Read Aramaic Peshita Nehemiah 6 Bible Online

Nehemiah 6 - Aramaic Peshita bible

Nehemiah 6

¹ܗܵܝܕܹ̇ܝܢ ܐܸܫܬܲܡܥܲܬ̤ ܡܸܠܬ̣ܵܐ ܠܣܲܡܒ̇ܠܵܛ: ܘܲܠܛܘܿܒ̇ܝܼܵܐ: ܘܠܲܓ̣ܫܘܿܡ ܥܲܪܒ̣ܵܝܵܐ: ܘܲܠܫܲܪܟܵܐ ܕܲܒ̣ܥܸܠܕ̇ܒ̣ܵܒܲܝ̈ܢ: ܕܲܒ̣ܢܲܝܢܵܝܗܝ ܠܫܘܼܪܵܐ. ܘܲܥܕܲܡܵܐ ܠܹܗ ܠܙܲܒ̣ܢܵܐ ܗܵܘܿ ܦܪ̈ܘܼܣܬ̇ܕܹܐ ܕܬܲܪ̈ܥܹܐ ܥܕܲܟܹ̇ܝܠ ܠܵܐ ܐܲܩܝܼܡ̄ܢ.

²ܘܫܲܕܲܪܘ ܠܘܵܬ̣ܝ ܣܲܡܒ̇ܠܵܛ ܘܲܓ̣ܫܘܿܡ: ܘܐܵܡ̇ܪܝܼܢ ܠܝܼ: ܬܵܐ ܢܹܐܙܲܠ ܐܲܟ݂ܚ̄ܕ݂ܵܐ: ܘܢܸܫܪܹܐ ܐܲܝܟ݂ ܓܲܝܣܹ̈ܐ ܒܲܦܩܲܥܬ̣ܵܐ ܕܐܝܼܢܘܿ ܘܗܸܢܘܿܢ ܡܸܬ̣ܪܲܥܹܝܢ ܗ̄ܘ̣ܵܘ ܠܡܸܥܒܲܕ݂ ܠܲܢ ܒܝܼܫܬܵܐ.

³ܘܫܲܕ̇ܪܹܬ̣ ܠܘܵܬ̣ܗܘܿܢ ܡܲܠܲܐܟ݂ܵܐ: ܘܐܸܡ̇ܪܹܬ̣ ܠܗܘܿܢ: ܥܒ̣ܵܕ݂ܵܐ ܪܲܒܵܐ ܥܵܒܹ̇ܕ݂ ܐ̄ܢܵܐ. ܘܠܵܐ ܡܸܫܟܲܚ ܐ̄ܢܵܐ ܠܡܸܚܲܬ̣: ܕܲܠܡܵܐ ܢܸܒ̣ܛܲܠ ܟܲܕ݂ ܐܵܪܦܹܐ ܘܐܹܚܘܿܬ̣ ܠܘܵܬ̣ܟ݂ܘܿܢ.

⁴ܘܫܲܕܲܪܘ ܠܘܵܬ̣ܝ ܐܲܝܟ݂ ܦܸܬ̣ܓ̣ܵܡܵܐ ܗܵܢܵܐ: ܐܲܪܒܲܥ ܙܲܒ̣ܢ̈ܝܼܢ. ܘܐܲܬ̣ܝܼܒܹ̇ܬ̣ ܐܸܢܘܿܢ ܐܲܝܟ݂ ܦܸܬ̣ܓ̣ܵܡܵܐ ܗܵܢܵܐ.

⁵ܘܫܲܕܲܪ ܠܘܵܬ̣ܝ ܣܲܡܒ̇ܠܵܛ ܐܲܝܟ݂ ܦܸܬ̣ܓ̣ܵܡܵܐ ܗܵܢܵܐ: ܒܲܙܒܲܢ̄ܬܵܐ ܚܡܝܼܫܵܝܬܵܐ ܠܲܥܠܲܝܡܹܗ: ܘܐܸܓܲܪܬܵܐ ܒܐܝܼܕܹܗ.

⁶ܘܲܟ݂ܬ̣ܝܼܒ̣ ܒܵܗ̇: ܒܥܲܡܡܹ̈ܐ ܐܸܫܬ̇ܡܲܥ: ܘܲܓ̣ܫܘܿܡ ܐܸܡܲܪ: ܐܲܢ̄ܬ̇ ܘܲܝܗܘܼ̈ܕ݂ܵܝܹܐ ܡܸܬ̣ܪܲܥܹܝܢ ܠܡܸܡܪܲܕ݂. ܡܸܛܠ ܗܵܢܵܐ ܐܲܢ̄ܬ̇ ܒܵܢܹ̇ܐ ܫܘܼܪܵܐ. ܘܐܲܢ̄ܬ̇ ܗܵܘܹ̇ܐ ܠܗܘܿܢ ܡܲܠܟܵܐ ܐܲܝܟ݂ ܦܸܬ̣ܓ̣ܵܡܹ̈ܐ ܗܵܠܹܝܢ.

⁷ܐܵܦ ܢܒ̣ܝܹ̈ܐ ܐܲܩܝܼܡ̣ܬ̇ ܠܡܲܬ̣ܢܲܒܵܝܘܼ ܥܠܲܝܟ ܒܐܘܿܪܸܫܠܸܡ. ܘܐܵܡ̇ܪܝܼܢ ܕܗܵܐ ܐܲܡ̣ܠܸܟ݂ ܒܲܝܗܘܼܕ݂. ܘܡܸܟܹ̇ܝܠ ܐܸܫܬܲܡܲܥ ܠܡܲܠܟܵܐ ܐܲܝܟ݂ ܡܸܠܹ̈ܐ ܗܵܠܹܝܢ. ܡܸܟܹ̇ܝܠ ܬܵܘ ܢܸܬ̣ܡܲܠܲܟ݂ ܐܲܟ݂ܚ̄ܕ݂ܵܐ.

⁸ܘܫܲܕ̇ܪܹܬ̣ ܠܘܵܬܹܗ ܘܐܸܡ̇ܪܹܬ̣ ܠܹܗ: ܠܵܐ ܫܲܦܝܼܪ ܕܢܸܗ̱ܘ̈ܝܵܢ ܐܲܝܟ݂ ܡܸܠܹ̈ܐ ܕܐܲܢ̄ܬ̇ ܐܵܡܲܪ ܐܲܢ̄ܬ̇. ܡܸܛܠ ܕܡ̣ܢ ܠܸܒܵܟ݂ ܐܵܡܲܪ ܐܲܢ̄ܬ̇ ܠܗܹܝܢ.

⁹ܡܸܛܠ ܕܟ݂ܠܗܘܿܢ ܡܕܲܚܠܝܼܢ ܠܲܢ: ܘܐܵܡ̇ܪܝܼܢ: ܡܸܬ̣ܪ̈ܲܦܝܵܢ ܐܝܼܕܲܝ̈ܗܘܿܢ ܡ̣ܢ ܥܒ̣ܝܼܕ̇ܬܵܐ. ܘܐܵܡ̇ܪܝܼܢ ܠܲܢ ܠܵܐ ܬܸܥܒ̇ܕ݂ܘܼܢ. ܡܸܟܹ̇ܝܠ ܐܲܥܫܸܢ ܐܝܼ̈ܕܲܝ.

¹⁰ܘܐܸܢܵܐ ܥܸܠܹ̇ܬ̣ ܠܘܵܬ̣ ܫܡܲܥܝܵܐ ܒܲܪ ܕܲܠܝܵܐ ܒܲܪ ܡܲܗܛܒ̣ܵܐܹܝܠ: ܘܗ̤ܘ ܟܵܠܹ̇ܐ ܗ̄ܘ̣ܵܐ ܠܝܼ: ܘܐܸܡܲܪ ܠܝܼ: ܬܵܐ ܢܸܬ̣ܘܲܥܲܕ݂ ܠܒܲܝܬܹ̇ܗ ܕܡܵܪܝܵܐ ܠܓ̣ܵܘ ܗܲܝܟ̇ܠܵܐ: ܘܢܹܐܚܘܿܕ݂ ܬܲܪ̈ܥܹܐ ܕܗܲܝܟ̇ܠܵܐ. ܡܸܛܠ ܕܐܵܬܹܝܢ ܠܡܸܩܛܠܵܟ݂: ܘܲܒ̣ܠܸܠܝܵܐ ܐܵܬܹ̇ܝܢ ܠܡܸܩܛܠܵܟ݂.

¹¹ܘܐܸܡ̇ܪܹܬ̣: ܠܓܲܒ̣ܪܵܐ ܕܐܲܟ݂ܘܵܬ̣ܵܟ݂: ܢܸܥܪܘܿܩ. ܚܵܣ ܠܝܼ ܕܐܸܥܪܘܿܩ: ܘܐܸܥܘܿܠ ܠܗܲܝܟ̇ܠܵܐ.

¹²ܚܵܟܹ̇ܡ ܐ̄ܢܵܐ ܕܠܵܐ ܗ̄ܘ̣ܵܐ ܐܲܠܵܗܵܐ ܫܲܕܪܹܗ ܥܠܲܝ: ܘܐܵܦܠܵܐ ܒܝܲܕ݂ ܢܒ̣ܝܼܵܐ ܐܸܬ̣ܐ̱ܡܲܪ ܠܝܼ ܕܩܵܛܹ̇ܠ ܠܝܼ ܛܘܿܒ̇ܝܼܵܐ ܘܣܲܡܒ̇ܠܵܛ ܘܚܲܒ̣ܪ̈ܵܘܗܝ: ܐܲܓ̣ܪܘܼܗܝ ܘܫܲܕ̇ܪܘܼܗܝ ܥܠܲܝ ܠܡܸܩܛܠܲܢܝ.

¹³ܡܸܛܠ ܕܐܲܓ̣ܪܵܐ ܗ̄ܘ̣: ܡܸܛܠ ܕܐܸܕ݂ܚܲܠ ܘܐܸܥܒܸ̇ܕ݂ ܗܵܟܲܢܵܐ: ܘܐܸܚܛܹܐ: ܘܲܗܘܸܐ ܠܗܘܿܢ ܠܲܫܡܵܐ ܒܝܼܫܵܐ: ܡܸܛܠ ܕܲܢܚܲܣܕ݂ܘܼܢܵܢܝ.

¹⁴ܐܸܬ̇ܕܲܟ݂ܪ ܐܲܠܵܗܝ ܠܛܘܿܒ̇ܝܼܵܐ ܘܲܠܣܲܡܒ̇ܠܵܛ ܘܲܠܚܲܒ̣ܪ̈ܵܘܗܝ: ܐܲܝܟ݂ ܥܒ̣ܵܕܲܝ̈ܗܘܿܢ ܗܵܠܹܝܢ ܣܢܲـ̈ـܝܵܐ: ܐܵܦ ܠܝܘܿܕܲܥܝܵܐ ܢܒ̣ܝܼܵܐ: ܐܵܦ ܠܫܲܪܟܵܐ ܕܲܢܒ̣ܝܹ̈ܐ: ܕܲܗܘ̤ܵܘ ܡܕܲܚܠܝܼܢ ܠܝܼ ܡܸܢܗܘܿܢ.

¹⁵ܘܲܫܠܸܡ ܫܘܼܪܵܐ ܒܚܲܡܫܵܐ ܘܥܸܣܪ̈ܝܼܢ ܒܐܝܼܠܘܿܠ: ܠܚܲܡܫܝܼܢ ܘܲܬ̣ܪܹܝܢ ܝܵܘ̈ܡܝܼܢ.

¹⁶ܗܵܝܕܹ̇ܝܢ ܟܲܕ݂ ܫܡܲܥ̣ܘ ܟܠܗܘܿܢ ܒܥܸܠܕ̇ܒ̣ܵܒܲܝ̈ܢ: ܕܚܸܠ̣ܘ. ܘܟ݂ܠܗܘܿܢ ܥܲܡܡܹ̈ܐ ܕܲܚܕ݂ܵܪ̈ܲܝܢ: ܘܙܵܥ̣ܘ ܛܵܒ̣ ܡ̣ܢ ܩܕ݂ܵܡܲܝܢ ܘܝܼܕܲܥ̣ܘ ܕܡ̣ܢ ܐܲܠܵܗܵܐ ܐܸܬ̣ܥܲܒ̣ܕ̇ܬܵܐ ܗܵܕܹܐ.

¹⁷ܐܵܦ ܒܝܵܘ̈ܡܵܬ̣ܵܐ ܗܵܢܘܿܢ: ܡܲܣܓܹ̇ܝܢ ܗ̄ܘ̣ܵܘ ܪܵܘ̱ܪ̈ܒ̣ܵܢܹܐ ܕܲܝܗܘܼܕ݂ܵܐ ܐܸܓ̇ܪ̈ܵܬ̣ܗܘܿܢ. ܘܐܵܙܵܠ̄ܢ ܗ̄ܘܲܝ̈ ܠܘܵܬ̣ ܛܘܼܒ̇ܝܼܵܐ. ܘܐܸܓ̇ܪ̈ܵܬܹܗ ܕܛܘܿܒ̇ܝܼܵܐ ܐܵܬ̣̈ܝܵܢ ܗ̄ܘܲܝ̈ ܠܘܵܬ̣ܗܘܿܢ.

¹⁸ܡܸܛܠ ܕܣܲܓ̇ܝܼ̈ܐܐ ܗ̄ܘ̣ܵܘ ܒܲܝܗܘܼܕ݂: ܕܝܼܡܝܼܘ ܠܹܗ ܕܠܵܐ ܢܲܗܪܘܼܢܹܗ. ܡܸܛܠ ܕܚܲܬ̣ܢܵܐ ܗ̄ܘ̣ܵܐ ܕܲܫܒܲܢܝܵܐ ܒܲܪ ܐܵܪܵܚ. ܘܝܘܿܚܲܢܵܢ ܒܪܹܗ: ܢܣܲܒ̣ ܠܒܲܪܬ̣ ܡܲܫܠܘܿܡ ܒܲܪ ܒܪܲܟ݂ܝܵܐ.

¹⁹ܐܵܦ ܡܸܠܵܘ̈ܗܝ ܛܵܒ̣ܵـ̈ـܬ̣ܵܐ ܐܵܡ̇ܪܝܼܢ ܗ̄ܘ̣ܵܘ ܩܕ݂ܵܡܲܝ. ܘܡܸܠܬ̣ܵܐ ܕܐܵܡܲܪ ܗ̄ܘܹ̇ܝܬ̣: ܐܵܡ̇ܪܝܼܢ ܗ̄ܘ̣ܵܘ ܠܹܗ. ܘܐܸܓ̇ܪ̈ܵܬ̣ܵܐ ܡܫܲܕܲܪ ܗ̄ܘ̣ܵܐ ܗ̤ܘ ܛܘܿܒ̇ܝܼܵܐ ܠܲܡܕܲܚܵܠܘܼܬܲܢܝ.