Read Aramaic Peshita Nehemiah 8 Bible Online

Nehemiah 8 - Aramaic Peshita bible

Nehemiah 8

¹ܘܐܸܬ̣ܟܲܢܲܫܘ ܥܲܡܵܐ ܟܠܹܗ: ܐܲܝܟ݂ ܚܲܕ݂ ܓܲܒ̣ܪܵܐ: ܠܫܘܼܩܵܐ ܕܐܝܼܬ̣ ܩܕ݂ܵܡ ܬܲܪܥܵܐ ܕܡܲـ̈ـܝܵܐ. ܘܐܵܡ̇ܪܝܼܢ ܠܥܲܙܪܵܐ ܣܵܦܪܵܐ: ܠܡܲܚܬܵܝܘܼ ܣܸܦܪܵܐ ܕܢܵܡܘܿܣܵܐ ܕܡܘܼܫܹܐ: ܕܲܦܩܲܕ݂ ܡܵܪܝܵܐ ܥܲܠ ܒܢܲܝ̈ ܝܼܣܪܵܝܹܠ.

²ܘܐܲܝܬ̇ܝܼ ܥܲܙܪܵܐ ܣܸܦܪܵܐ ܕܢܵܡܘܿܣܵܐ ܩܕ݂ܵܡ ܥܲܡܵܐ. ܘܐܸܬ̣ܟܲܢܲܫܘ ܥܲܡܵܐ ܡ̣ܢ ܓܲܒ̣ܪܹ̈ܐ ܘܲܥܕܲܡܵܐ ܠܢܸܫܹ̈ܐ: ܘܟ݂ܠܡܲܢ ܕܐܸܬ̇ܛܲܝܲܒ̣ ܠܡܸܫܡܲܥ: ܒܚܲܕ݂ ܒܝܲܪܚܵܐ ܫܒ̣ܝܼܥܵܝܵܐ.

³ܘܲܩ̣ܪܵܐ ܣܸܦܪܵܐ ܒܫܘܼܩܵܐ ܒܬܲܪܥܵܐ ܕܡܲـ̈ـܝܵܐ: ܡ̣ܢ ܨܲܦܪܵܐ ܠܦܸܠܓܹ̇ܗ ܕܝܵܘܡܵܐ: ܩܕ݂ܵܡ ܓܲܒ̣ܪܹ̈ܐ ܘܢܸܫܹ̈ܐ: ܘܲܩܕ݂ܵܡ ܐܲܝܠܹܝܢ ܕܫܵܡ̇ܥܝܼܢ ܘܐܸܕ݂ܢܲܝ̈ܗܘܿܢ ܕܥܲܡܵܐ ܨܲܠ̈ܝܵܢ ܗ̄ܘܲܝ̈: ܘܨܵܝ̈ܬܵܢ ܠܦܘܼܩܕܵܢܵܐ ܕܢܵܡܘܿܣܵܐ.

⁴ܘܩܵܡ̣ ܥܲܙܪܵܐ ܣܵܦܪܵܐ ܥܲܠ ܡܲܓܕ̇ܠܵܐ ܕܩܲܝܣܵܐ ܕܲܥܒܲܕ݂: ܕܢܸܗܘܹܐ ܡܡܲܠܸܠ ܥܠܵܘܗܝ. ܘܩܵܡ̣ ܠܘܵܬܹܗ ܡܲܬ̇ܝܼܬ̣ܵܐ: ܘܲܫܡܘܿܥ: ܘܚܲܢܲܢܝܵܐ: ܘܐܘܿܪܝܼܵܐ: ܘܚܸܠܲܩܝܵܐ: ܘܲܡܥܲܣܝܵܐ: ܩܵܡ̣ܘ ܡ̣ܢ ܝܲܡܝܼܢܹܗ ܘܡ̣ܢ ܣܸܡܵܠܹܗ: ܩܵܡ̣ ܦܵܪܝܵܐ: ܘܡܝܼܫܵܐܹܝܠ: ܘܲܡܠܲܟ݂ܝܵܐ: ܘܲܚܫܘܿܡ: ܘܲܚܫܲܒ̣ܝܵܐ: ܘܲܙܟܲܪܝܵܐ: ܘܡܲܫܠܲܡ.

⁵ܘܲܦܬܲܚ ܥܲܙܪܵܐ ܣܵܦܪܵܐ: ܟܬ̣ܵܒ̣ܵܐ ܕܢܵܡܘܿܣܵܐ ܠܥܹܝܢ ܟܠܹܗ ܥܲܡܵܐ. ܘܟܲܕ݂ ܦ̣ܬܲܚ: ܩܵܡ̣ ܟܠܹܗ ܥܲܡܵܐ.

⁶ܘܒܲܪܸܟ݂ ܥܲܙܪܵܐ ܠܡܵܪܝܵܐ ܐܲܠܵܗܵܐ ܪܲܒܵܐ. ܘܲܥܢ̣ܵܘ ܟܠܹܗ ܥܲܡܵܐ ܘܐܵܡ̇ܪܝܼܢ: ܐܵܡܹܝܢ ܘܐܵܡܹܝܢ. ܘܟܲܕ݂ ܐܲܪܝܼܡܘ ܐܝܼܕܲܝ̈ܗܘܿܢ: ܩܥܲܕ݂ܘ ܘܲܣܓܸܕ݂ܘ ܩܕ݂ܵܡ ܡܵܪܝܵܐ ܥܲܠ ܐܲܦܲܝ̈ܗܘܿܢ ܥܕܲܡܵܐ ܠܐܲܪܥܵܐ.

⁷ܘܝܼܫܘܿܥ ܘܲܒ̣ܢܵܘ̈ܗܝ: ܘܲܣܪܲܒ̣ܝܵܐ: ܘܝܲܡܝܼܢ: ܘܲܥܩܘܿܦ: ܘܫܲܒ̇ܬܲܝ: ܘܗܘܼܕ݂ܝܼܵܐ: ܘܲܡܥܲܣܝܵܐ: ܘܲܩܠܲܛܝܵܐ: ܘܥܲܙܲܪܝܵܐ: ܘܝܘܿܙܵܒ̣ܵܪ: ܘܚܲܢܵܢܝܼ. ܘܲܦܢܵܝܵܐ: ܘܠܹܘܵܝܹ̈ܐ: ܡܫܲܡܫܝܼܢ ܠܥܲܡܵܐ ܒܢܵܡܘܿܣܵܐ. ܘܥܲܡܵܐ ܩܵܝ̇ܡܝܼܢ ܥܲܠ ܕܘܼܟ̇ܬ̣ܗܘܿܢ.

⁸ܘܲܩ̣ܪܵܘ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ ܕܡܵܪܝܵܐ ܟܲܕ݂ ܦܪܝܼܣ. ܘܐܸܬ̇ܛܦܝܼܣܘ ܒܹܗ: ܘܐܸܣܬܲܟܲܠܘ ܒܩܸܪܝܵܢܹܗ.

⁹ܘܐܸܡܲܪ ܢܚܲܡܝܵܐ ܪܹܫܵܐ ܕܟ݂ܘܼܡܪܹ̈ܐ: ܘܥܲܙܪܵܐ ܟܘܼܡܪܹ̈ܐ ܘܣܵܦܪܵܐ: ܘܠܹܘܵܝܹ̈ܐ ܐܲܝܠܹܝܢ ܕܲܡܫܲܡܫܝܼܢ ܗ̄ܘ̣ܵܘ ܠܥܲܡܵܐ: ܐܵܡ̇ܪܝܼܢ ܠܟ݂ܠܹܗ ܥܲܡܵܐ: ܝܵܘܡܵܢܵܐ ܩܲܕ̇ܝܼܫ ܗ̄ܘ̣ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ. ܠܵܐ ܬܸܟ݂ܪܸܐ ܠܟ݂ܘܿܢ: ܘܠܵܐ ܬܸܒ̣ܟ̇ܘܿܢ. ܡܸܛܠ ܕܒ̣ܵܟܹ̇ܝܢ ܗ̄ܘ̣ܵܘ ܓܹܝܪ ܟܠܹܗ ܥܲܡܵܐ: ܟܲܕ݂ ܫܵܡ̇ܥܝܼܢ ܗ̄ܘ̣ܵܘ ܟܬ̣ܵܒ̣ܵܐ ܕܢܵܡܘܿܣܵܐ.

¹⁰ܘܐܸܡܲܪܘ ܠܗܘܿܢ: ܙܸܠܘ ܐܲܟ݂ܘܿܠܘ ܘܐܸܫܬܵܘ. ܘܫܲܕܲܪܘ ܡܹܐܟ݂ܘܼܠܬܵܐ ܠܡܲܢ ܕܠܵܐ ܡܛܲܝܒ̣ܵܐ ܠܹܗ. ܡܸܛܠ ܕܩܲܕ̇ܝܼܫ ܗ̄ܘ̣ ܝܵܘܡܵܢܵܐ ܩܕ݂ܵܡ ܡܵܪܝܵܐ. ܝܵܘܡܵܢܵܐ ܠܵܐ ܬܸܟ݂ܪܹܐ ܠܟ݂ܘܿܢ: ܡܸܛܠ ܕܝܵܘܡܵܐ ܗ̄ܘ̣ ܕܚܲܕ݂ܘܼܬ̣ܵܐ ܕܡܵܪܝܵܐ. ܘܗ̤ܘ ܢܸܗܘܹܐ ܥܲܕ݂ܘܿܪܟ݂ܘܿܢ.

¹¹ܘܠܹܘܵܝܹ̈ܐ ܡܫܲܬ̇ܩܝܼܢ ܠܟ݂ܠܹܗ ܥܲܡܵܐ: ܘܐܵܡ̇ܪܝܼܢ: ܫܬ̣ܘܿܩܘ: ܡܸܛܠ ܕܝܵܘܡܵܢܵܐ ܡܩܲܕܲܫ ܗ̄ܘ̣: ܘܠܵܐ ܬܸܒ̣ܟ̇ܘܿܢ.

¹²ܘܐܸܙܲܠ̣ܘ ܟܠܹܗ ܥܲܡܵܐ ܠܡܹܐܟܲܠ ܘܲܠܡܸܫܬܵܐ: ܘܠܲܡܫܲܕܵܪܘܼ ܡܹܐܟ݂̈ܠܵܬ̣ܵܐ ܠܐܲܝܠܹܝܢ ܕܠܲܝܬ̇ ܠܗܘܿܢ: ܘܲܠܡܸܥܒܲܕ݂ ܚܲܕ݂ܘܼܬ̣ܵܐ ܪܲܒ̇ܬ̣ܵܐ. ܘܐܸܬ̇ܛܦܝܼܣܘ ܒܡܸܠܹ̈ܐ ܐܲܝܠܹܝܢ ܕܐܵܘܕܲܥܘ ܐܸܢܘܿܢ.

¹³ܘܲܒ̣ܝܵܘܡܵܐ ܕܲܬ̣ܪܹܝܢ: ܐܸܬ̣ܟܲܢܲܫܘ ܪܹ̈ܫܲܝ ܐܲܒ̣ܵܗܹ̈ܐ ܕܟ݂ܠܹܗ ܥܲܡܵܐ: ܘܟ݂ܘܼܡܪܹ̈ܐ ܘܠܹܘܵܝܹ̈ܐ ܠܘܵܬ̣ ܥܲܙܪܵܐ ܣܵܦܪܵܐ: ܠܡܸܬ̇ܛܦܵܣܘܼ ܡܸܢܹܗ ܥܲܠ ܟܬ̣ܵܒ̣ܵܐ ܕܢܵܡܘܿܣܵܐ.

¹⁴ܘܐܸܫܟܲܚܘ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ: ܕܦܲܩܸܕ݂ ܡܵܪܝܵܐ ܠܡܘܼܫܹܐ: ܕܢܸܬ̇ܒ̣ܘܼܢ ܒܢܲܝ̈ ܝܼܣܪܵܝܹܠ ܒܲܡ̈ܛܲܠܠܹܐ: ܒܥܹܐܕ݂ܵܐ ܒܝܲܪܚܵܐ ܕܬܸܫܪܝܼܢ.

¹⁵ܘܲܕ݂ܢܸܫ̱ܡܥܘܿܢ ܟܠܡܸܕܸ̇ܡ ܕܲܟ݂ܬܲܒ̣ ܡܘܼܫܹܐ ܒܢܵܡܘܿܣܵܐ. ܘܲܩܪܵܘ ܟܵܪ̈ܘܿܙܹܐ ܒܟ݂ܠܗܹܝܢ ܩܘܼܪ̈ܝܼܗܘܿܢ ܘܒ̣ܐܘܿܪܸܫܠܸܡ ܘܐܵܡ̇ܪܝܼܢ: ܣܲܩܘ ܠܛܘܼܪܵܐ ܐܲܝܬܵܘ ܩܲܝ̈ܣܹܐ ܕܙܲܝ̈ܬܹ̇ܐ: ܘܩܲܝ̈ܣܹܐ ܕܓ̣ܵܘ̈ܙܹܐ: ܘܛܲܪ̈ܦܹܐ ܕܐܸܛܪܘܼܓܹ̇ܐ: ܘܣܵܘ̈ܟܹ̇ܐ ܕܥܲܪ̈ܒܹܐ. ܘܲܥܒܸܕ݂ܘ ܡܛܲܠܠܹ̈ܐ: ܐܲܝܟܲܢܵܐ ܕܲܟ݂ܬ̣ܝܼܒ̣ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ ܕܡܘܼܫܹܐ.

¹⁶ܘܲܢܦܲܩ̣ܘ ܥܲܡܵܐ: ܘܐܲܝܬ̇ܝܼܘ: ܘܲܥܒܲܕ݂ܘ ܠܗܘܿܢ ܓܒܲܪ ܓܒܲܪ ܥܲܠ ܐܸܓܵܪ̈ܲܝܗܘܿܢ ܘܲܒ̣ܕ݂ܵܪ̈ܲܝܗܘܿܢ: ܘܲܒ̣ܕ݂ܵܪܬܵܐ ܕܒܲܝܬܹ̇ܗ ܕܡܵܪܝܵܐ: ܘܲܒ̣ܫܘܼܩܵܐ ܕܬܲܪܥܵܐ ܕܡܲـ̈ـܝܵܐ: ܘܲܒ̣ܫܘܼܩܵܐ ܕܬܲܪܥܵܐ ܕܐܲܦܪܹܝܡ.

¹⁷ܘܲܥܒܲܕ݂ܘ ܟܠܹܗ ܥܲܡܵܐ ܕܲܗܦܲܟ݂ܘ ܡ̣ܢ ܫܸܒ̣ܝܵܐ ܡܛܲܠ̈ܠܹܐ: ܘܝܼܬܸܒ̣ܘ ܒܲܡܛܲܠ̈ܠܹܐ ܡܸܛܠ ܕܠܵܐ ܥܒܲܕ݂ܘ ܒܢܲܝ̈ ܝܼܣܪܵܝܹܠ ܗܵܟܲܢܵܐ: ܡ̣ܢ ܝܵܘ̈ܡܵܬܹܗ ܕܝܼܫܘܿܥ ܒܲܪܢܘܿܢ: ܥܕܲܡܵܐ ܠܹܗ ܠܝܵܘܡܵܐ ܗܵܢܵܐ. ܘܲܗܘ̤ܵܬ̣ ܚܲܕ݂ܘܼܬ̣ܵܐ ܪܲܒ̇ܬ̣ܵܐ ܕܛܵܒ̣.

¹⁸ܘܩܵܪܹܝܢ ܗ̄ܘ̣ܵܘ ܒܲܟ݂ܬ̣ܵܒ̣ܵܐ ܕܢܵܡܘܿܣܹܗ ܕܡܘܼܫܹܐ: ܟܠ ܝܘܿܡ ܒܝܘܿܡ: ܡ̣ܢ ܝܵܘܡܵܐ ܩܲܕ݂ܡܵܝܵܐ: ܥܕܲܡܵܐ ܠܝܵܘܡܵܐ ܐ̄ܚܪܵܝܵܐ. ܘܲܥ̣ܒܲܕ݂ܘ ܥܹܐܕ݂ܵܐ ܫܲܒ̣ܥܵܐ ܝܵܘ̈ܡܝܼܢ ܘܲܒ̣ܝܵܘܡܵܐ ܕܲܬ̣ܡܵܢܝܵܐ: ܐܸܬ̣ܟܲܢܲܫܘ ܐܲܝܟܲܢܵܐ ܕܲܟ݂ܬ̣ܝܼܒ̣ ܠܗܘܿܢ.