Read Aramaic Peshita Nehemiah 9 Bible Online

Nehemiah 9 - Aramaic Peshita bible

Nehemiah 9

¹ܘܲܒ̣ܝܵܘܡܵܐ ܕܐܲܪܒ̇ܥܵܐ ܘܥܸܣܪܝܼܢ ܒܹܗ ܒܝܲܪܚܵܐ ܗܵܢܵܐ: ܐܸܬ̣ܟܲܢܲܫܘ ܒܢܲܝ̈ ܝܼܣܪܵܝܹܠ ܒܨܵܘܡܵܐ ܘܲܒ̣ܣܲܩܹ̈ܐ. ܘܐܲܪܡܝܼܘ ܩܸܛܡܵܐ ܥܠܲܝܗܘܿܢ.

²ܘܐܸܬ̣ܦܪܸܫ ܙܲܪܥܵܐ ܕܝܼܣܪܵܝܹܠ ܡ̣ܢ ܟܠܗܘܿܢ ܥܲܡܡܹ̈ܐ ܘܩܵܡ̣ܘ ܘܐܵܘܕ̇ܝܼܘ ܥܲܠ ܚܛܵܗܲܝ̈ܗܘܿܢ: ܘܥܲܠ ܚܛܵܗܹ̈ܐ ܕܐܲܒ̣ܵܗܲܝ̈ܗܘܿܢ.

³ܘܩܵܡ̣ܘ ܥܲܠ ܕܘܼܟ̇ܬ̣ܗܘܿܢ ܘܩܵܪܹܝܢ ܗ̄ܘ̣ܵܘ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ ܕܡܵܪܝܵܐ ܐܲܠܵܗܗܘܿܢ ܪܘܼܒ̣ܥܹܗ ܕܝܵܘܡܵܐ ܩܵܪܹܝܢ: ܘܪܘܼܒ̣ܥܹܗ ܕܝܵܘܡܵܐ ܡܵܘܕܹ̇ܝܢ: ܘܣܵܓ̣ܕ̇ܝܼܢ ܩܕ݂ܵܡ ܡܵܪܝܵܐ ܐܲܠܵܗܗܘܿܢ.

⁴ܘܩܵܡ̣ܘ ܪܹ̈ܫܵܐ ܥܲܠ ܠܹܘܵܝܹ̈ܐ: ܝܼܫܘܿܥ ܘܩܲܕ݂ܡܵܐܹܝܠ: ܒܲܢܝܼ: ܚܫܲܒ̣ܝܵܐ: ܘܲܫܪܲܒ̣ܝܵܐ: ܘܟܲܒ̣ܢܝܼ: ܘܗܘܼܕ݂ܝܼܵܐ: ܘܲܫܒܲܢܝܵܐ: ܘܲܦܬܲܚܝܵܐ. ܘܨܲܠܝܼܘ ܩܕ݂ܵܡ ܡܵܪܝܵܐ ܐܲܠܗܗܘܿܢ ܒܩܵܠܵܐ ܪܵܡܵܐ.

⁵ܘܐܵܡ̇ܪܝܼܢ ܠܹܘܵܝܹ̈ܐ: ܝܼܫܘܿܥ: ܘܩܲܕ݂ܡܵܐܹܝܠ: ܒܲܢܝܼ: ܚܫܲܒ̣ܝܵܐ: ܘܲܫܪܲܒ̣ܝܵܐ: ܘܗܘܼܕ݂ܝܼܵܐ: ܘܲܫܟܲܢܝܵܐ: ܘܲܦܬܲܚܝܵܐ. ܘܩܵܡܘ ܘܒܲܪܸܟ݂ܘ ܠܡܵܪܝܵܐ ܐܲܠܵܗܗܘܿܢ: ܡ̣ܢ ܥܵܠܲܡ ܘܲܥܕܲܡܵܐ ܠܥܵܠܲܡ: ܘܲܒ̣ܪܝܼܟ݂ ܫܡܵܐ ܕܐܝܼܩܵܪܹܗ: ܘܲܡܪܲܡܪܲܡ ܥܲܠ ܟܠ ܒܸܪ̈ܝܵܬ̣ܵܐ ܒܬܸܫܒ̇ـ̈ـܚܵܬ̣ܵܐ.

⁶ܐܲܢ̄ܬ̇ ܗ̄ܘ̣ ܡܵܪܝܵܐ ܒܲܠܚܘܿܕܲܝܟ: ܐܲܢ̄ܬ̇ ܥܒܲܕ̇ܬ̇ ܫܡܲܝܵܐ ܘܲܫܡܲܝ̈ ܫܡܲܝܵܐ: ܘܟ݂ܠܗܘܿܢ ܚܲܝܠܵـ̈ـܘܵܬ̣ܗܘܿܢ: ܘܐܲܪܥܵܐ ܘܟ݂ܠ ܡܸܕܸ̇ܡ ܕܐܝܼܬ̣ ܥܠܹܝܗ̇: ܘܡܲـ̈ـܝܵܐ ܘܟ݂ܠܡܸܕܸ̇ܡ ܕܐܝܼܬ̣ ܒܗܘܿܢ. ܘܐܲܢ̄ܬ̇ܝ ܗ̄ܘ̣ ܕܡܲܚܹܐ ܠܟ݂ܠܗܘܿܢ ܘܚܲܝܠܵܘܵܬ̣ܵܐ ܕܲܫܡܲܝܵܐ ܠܵܟ݂ ܗ̄ܘ̣ ܣܵܓ̣ܕ̇ܝܼܢ.

⁷ܐܲܢ̄ܬ̇ ܗ̄ܘ̣ ܡܵܪܝܵܐ ܐܲܠܵܗܵܐ ܕܲܓ̣ܒܲܝܬ̇ ܠܐܲܒ̣ܪܵܡ. ܘܐܲܦܸܩܬܵܝܗܝ ܡ̣ܢ ܐܘܿܪ ܕܟܲܠܕ݂ܵܝܹ̈ܐ. ܘܫܲܚ̣ܠܦܲܬ̇ ܫܡܹܗ ܐܲܒ̣ܪܵܗܵܡ.

⁸ܘܐܸܫܟܲܚܬ̇ ܠܸܒܹ̇ܗ ܕܟܸܐ ܩܕ݂ܵܡܲܝܟ. ܘܝܼܡܲܝܬ̇ ܠܹܗ ܡܵܘ̈ܡܵܬ̣ܵܐ: ܠܡܸܬܲܠ ܠܹܗ ܐܲܪܥܵܐ ܕܲܟ݂ܢܲܥܢܵܝܹܐ: ܘܲܕ݂ܚܹ̈ܬ̣ܵܝܹܐ: ܘܕ݂ܵܐܡܘܿܪ̈ܵܝܹܐ: ܘܲܕ݂ܦܲܪ̈ܙܵܝܹܐ: ܘܲܕ݂ܚܵܘܵܝܹ̈ܐ: ܘܲܕ݂ܝܵܒ̣ܘܿܣܵܝܹ̈ܐ: ܘܲܕ݂ܓܲܪ̈ܓ̇ܘܿܣܵܝܹܐ: ܠܡܸܬ̇ܠܵܗ̇ ܠܹܗ ܘܲܠܙܲܪܥܹܗ. ܘܐܲܫܪܬ̣ ܡܸܠܲܝܟ ܥܲܡܹܗ: ܡܸܛܠ ܕܙܲܕ̇ܝܼܩ ܐܲܢ̄ܬ̇.

⁹ܘܲܚܙܲܝܬ̇ ܫܘܼܥܒܵܕ݂ܵܐ ܕܐܲܒ̣ܵܗܲܝ̈ܢ ܕܲܒ̣ܡܸܨܪܹܝܢ. ܘܲܫܡܲܥܬ̇ ܝܑܼܠܠܬ̇ܗܘܿܢ ܥܲܠ ܝܲܡܵܐ ܕܣܘܿܦ.

¹⁰ܘܲܥܒܲܕ̇ܬ̇ ܐܵܬ̣̈ܘܵܬ̣ܵܐ ܘܬܸܕ݂ܡܪ̈ܵܬ̣ܵܐ ܒܦܸܪܥܘܿܢ ܘܲܒ̣ܟ݂ܠܹܗ ܚܲܝܠܹܗ: ܘܲܒ̣ܟ݂ܠܹܗ ܥܲܡܵܐ ܕܐܲܪܥܹܗ ܡܸܛܠ ܕܝܼܕܲܥܬ̇ ܕܐܲܥܠܝܼܘ ܒܗܘܿܢ ܒܥܲܡܵܟ݂: ܘܲܥܒܲܕ̇ܬ̇ ܠܵܟ݂ ܫܡܵܐ ܐܲܝܟ݂ ܕܝܵܘܡܵܢܵܐ.

¹¹ܘܝܲܡܵܐ ܬܪܲܥܬ̇ ܩܕ݂ܵܡܲܝܗܘܿܢ. ܘܲܥܒܲܪܘ ܒܓ̣ܵܘ ܝܲܡܵܐ ܒܝܲܒ̣ܫܵܐ. ܘܲܠܪ̈ܵܕ݂ܘܿܦܲܝܗܘܿܢ ܛܲܒܲܥ̣ܬ̇ ܒܥܘܼܡܩܵܘ̈ܗܝ ܕܝܲܡܵܐ: ܐܲܝܟ݂ ܕܛܵܒ̣ܥܵܐ ܟܹܐܦܵܐ ܒܡܲـ̈ـܝܵܐ ܥܲܫܝܼܢܹ̈ܐ.

¹²ܘܲܒ̣ܥܲܡܘܼܕ݂ܵܐ ܕܲܥܢܵܢܵܐ ܕܲܒ̇ܪܬ̇ ܐܸܢܘܿܢ ܒܐܝܼܡܵܡܵܐ: ܘܒܸܐܣܛܘܿܢܵܐ ܕܢܘܼܪܵܐ ܒܠܸܠܝܵܐ: ܠܡܲܢܗܵܪܘܼ ܠܗܘܿܢ ܐܘܼܪܚܵܐ: ܠܲܡܗܲܠܵܟ݂ܘܼ ܒܵܗ̇.

¹³ܘܥܲܠ ܛܘܼܪܵܐ ܕܣܝܼܢܲܝ ܢܚܸܬ̇ܬ̇ ܘܡܲܠܠܬ̇ ܥܲܡܗܘܿܢ ܡ̣ܢ ܫܡܲܝܵܐ. ܘܝܲܗ̄ܒ̣ܬ̇ ܠܗܘܿܢ ܕܝܼܢܹ̈ܐ ܬܪ̈ܝܼܨܹܐ: ܘܢܵܡܘܿܣܹ̈ܐ ܕܲܫܪܵܪܵܐ: ܘܲܩܝܵܡܹ̈ܐ ܘܦܘܼܩ̈ܕܵܢܹܐ ܕܛܵܒ̣ܝܼܢ.

¹⁴ܘܫܲܒ̇ܬ̣ܵܐ ܕܩܘܼܕ݂ܫܵܟ݂ ܐܘܿܕܲܥ̣ܬ̇ ܐܸܢܘܿܢ ܘܦܘܼܩ̈ܕܵܢܹܐ ܘܲܩܝܵܡܹ̈ܐ ܘܢܵܡܘܿܣܹ̈ܐ ܕܦܲܩܸܕ̇ܬ̇ ܐܸܢܘܿܢ ܒܐܝܼܕ݂ܵܐ ܕܡܘܼܫܹܐ ܥܲܒ̣ܕܵܟ݂.

¹⁵ܘܠܲܚܡܵܐ ܡ̣ܢ ܫܡܲܝܵܐ. ܝܲܗ̄ܒ̣ܬ̇ ܠܗܘܿܢ ܠܟܲܦܢ̱ܗܘܿܢ ܘܡܲـ̈ـܝܵܐ ܡ̣ܢ ܟܹܐܦܵܐ ܝܲܗ̄ܒ̣ܬ̇ ܠܗܘܿܢ. ܠܨܲܗܝܼܗܘܿܢ ܘܐܸܡܲܪܬ̇ ܠܗܘܿܢ ܠܡܸܥܲܠ ܘܲܠܡܹܐܪܲܬ̣ ܐܲܪܥܵܐ: ܕܐܲܬ̣ܩܢܲܬ̤ ܐܝܼܕ݂ܵܟ݂ ܠܡܸܬܲܠ ܠܗܘܿܢ.

¹⁶ܗܸܢܘܿܢ ܕܹܝܢ ܘܐܲܒ̣ܵܗܲܝ̈ܗܘܿܢ ܐܲܥܠܝܼܘ: ܘܩܲܫܝܼܘ ܩܕ݂ܵܠܗܘܿܢ: ܘܠܵܐ ܨܵܬ̣ܘ ܠܦܘܼܩ̈ܕ݂ܵܢܲܝܟ.

¹⁷ܘܠܵܐ ܨܒ̣ܵܘ ܠܡܸܫܡܲܥ: ܘܠܵܐ ܐܸܬ̇ܕ̇ܟܲܪܘ ܬܸܕ݂ܡܪ̈ܵܬ̣ܵܟ݂ ܕܲܥܒܲܕ̇ܬ̇ ܠܗܘܿܢ. ܘܲܗܦܲܟ݂ ܠܒܸ̇ܗܘܿܢ ܠܲܥܒ̣ܵܕܲܝ̈ܗܘܿܢ ܒܝܼܫܹ̈ܐ ܘܐܲܢ̄ܬ̇ ܐܲܠܵܗܵܐ ܫܵܒ̣ܘܿܩܵܐ ܘܪܸܚ̱ܡܬ̣ܵܢܵܐ ܘܚܲܢܵܢܵܐ: ܪܲܚܝܼܩ ܪܘܼܓ̣ܙܵܐ ܘܩܲܪܝܼܒ̣ ܒܵܥܘܼܬ̣ܵܐ: ܠܵܐ ܫܒܲܩܬ̇ ܐܸܢܘܿܢ.

¹⁸ܡܸܛܠ ܕܗܸܢܘܿܢ ܥܒܲܕ݂ܘ ܥܸܓ̣ܠܵܐ ܕܢܸܣܟ̇ܬ̣ܵܐ: ܘܐܵܡܪܝܼܢ: ܗܵܢܵܘ ܐܲܠܵܗܵܟ݂ ܝܼܣܪܵܝܹܠ: ܕܐܲܣܩܵܟ݂ ܡ̣ܢ ܐܲܪܥܵܐ ܕܡܸܨܪܹܝܢ. ܘܲܥܒܲܕ݂ܘ ܒܝܼ̈ܫܵܬ̣ܵܐ ܪܵܘ̱ܪ̈ܒ̣ܵܬ̣ܵܐ.

¹⁹ܘܐܲܢ̄ܬ̇ ܒܪ̈ܲܚܡܲܝܟ ܣܲܓ̇ܝܼ̈ܐܹܐ ܠܵܐ ܫܒܲܩܬ̇ ܐܸܢܘܿܢ ܒܡܲܕ݂ܒ̇ܪܵܐ. ܘܥܲܡܘܼܕ݂ܵܐ ܕܲܥܢܵܢܵܐ ܠܵܐ ܥܒܲܪ ܡܸܢܗܘܿܢ ܒܐܝܼܡܵܡܵܐ: ܠܲܡܕܲܒܵܘܿܘܼ ܐܸܢܘܿܢ ܒܐܘܼܪܚܵܐ. ܘܐܸܣܛܘܿܢܵܐ ܕܢܘܼܪܵܐ ܒܠܸܠܝܵܐ: ܠܡܲܢܗܵܪܘܼ ܠܗܘܿܢ ܐܘܼܪܚܵܐ: ܕܢܹܐܙܠ̄ܘܼܢ ܒܵܗ̇.

²⁰ܘܪܘܼܚܵܟ݂ ܛܵܒ̣ܬ̣ܵܐ ܝܲܗ̄ܒ̣ܬ̇ ܐܸܢܘܿܢ ܠܡܲܠܵܦܘܼ ܐܸܢܘܿܢ. ܘܡܲܢ̄ܢܵܐ ܠܵܐ ܟܠܲܝܬ̇ ܡ̣ܢ ܦܘܼܡܗܘܿܢ. ܘܡܲـ̈ـܝܵܐ ܝܲܗ̄ܒ̣ܬ̇ ܠܗܘܿܢ ܠܨܲܗܝܼܗܘܿܢ.

²¹ܘܐܲܪܒ̇ܥܝܼܢ ܫܢ̈ܝܼܢ ܡܸܕܸ̇ܡ ܠܵܐ ܚܣܲܪ ܠܗܘܿܢ ܒܡܲܕ݂ܒ̇ܪܵܐ. ܢܲܚܬܲܝ̈ܗܘܿܢ ܠܵܐ ܒܠܝܼܘ: ܘܲܡܣܵܢܲܝ̈ܗܘܿܢ ܠܵܐ ܐܸܬ̣ܒܲܙܲܥܘ.

²²ܘܝܲܗ̄ܒ̣ܬ̇ ܠܗܘܿܢ ܡܲܠ̈ܟ̇ܘܵܬ̣ܵܐ ܕܥܲܡܡܹ̈ܐ. ܘܦܲܠܸܓ̣ܬ̇ ܐܸܢܹܝܢ ܠܗܘܿܢ ܠܪܹܫ ܐ̄ܢܵܫ. ܘܝܼܪܸܬ̣ܘ ܐܲܪܥܵܐ ܕܣܝܼܚܘܿܢ: ܘܐܲܪܥܵܐ ܕܡܲܠܟܵܐ ܕܚܸܫܒ̇ܘܿܢ: ܘܐܲܪܥܵܐ ܕܥܘܿܓ ܡܲܠܟܵܐ ܕܒܲܝܫܵܢ.

²³ܘܲܒ̣ܢܲܝ̈ܗܘܿܢ ܐܲܣܓ̇ܝܼܬ̇ ܐܲܝܟ݂ ܟܵܘ̈ܟ̇ܒܹܐ ܕܒܲܫܡܲܝܵܐ. ܘܐܲܥܸܠ̣ܬ̇ ܐܸܢܘܿܢ ܠܐܲܪܥܵܐ ܕܐܸܡܲܪܬ̇ ܠܐܲܒ̣ܵܗܲܝ̈ܗܘܿܢ ܠܡܸܥܲܠ ܠܵܗ̇ ܘܲܠܡܹܐܪܬܵܗ̇.

²⁴ܘܥܲܠܘ ܒ̈ܢܲܝܵܐ: ܘܝܼܪܸܬ̣ܘ ܐܲܪܥܵܐ. ܘܬܲܒܲܪܬ̇ ܩܕ݂ܵܡܲܝܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ ܕܲܟ݂ܢܲܥ̈ܢܵܝܹܐ. ܘܐܲܫܠܸܡ̣ܬ̇ ܐܸܢܘܿܢ ܒܐܝܼܕܲܝ̈ܗܘܿܢ: ܠܗܘܿܢ ܘܲܠܡܲܠܟܲܝ̈ܗܘܿܢ: ܘܲܠܥܲܡܡܹ̈ܐ ܕܐܲܪܥܵܐ: ܠܡܸܥܒܲܕ݂ ܒܗܘܿܢ ܐܲܝܟ݂ ܨܸܒ̣ܝܵܢܗܘܿܢ.

²⁵ܘܐܸܚܲܕ݂ܘ ܩܘܼܪ̈ܝܵܐ ܬܲܩܝܼ̈ܦܵܬ̣ܵܐ: ܘܐܲܪܥܵܐ ܫܲܡܝܼܢܬܵܐ: ܘܒ̣ܵـ̈ـܬܹ̇ܐ ܕܲܡܠܹܝܢ ܟܠܗܹܝܢ ܛܵܒ̣ܵـ̈ـܬ̣ܵܐ: ܘܓ̣ܘܼ̈ܒܹ̇ܐ ܚܦܝܼܪܹ̈ܐ: ܘܟܲܪ̈ܡܹܐ: ܘܙܲܝ̈ܬܹ̇ܐ: ܘܐܝܼܠܵܢܹ̈ܐ: ܘܡܹܐܟ݂̈ܠܵܬ̣ܵܐ ܣܲܓ̇ܝܼܵܐ̈ܬ̣ܵܐ. ܘܐܸܟܲܠܘ: ܘܲܣܒܲܥܘ: ܘܲܫܡܸܢܘ: ܘܐܸܬ̣ܦܲܢܲܩܘ ܒܛܘܼܒ̣ܵܟ݂ ܪܲܒܵܐ.

²⁶ܘܲܗܦܲܟ݂ܘ ܘܕܲܓܸ̇ܠ̣ܘ ܒܵܟ݂. ܘܲܫܕ݂ܵܐܘܼܗܝ ܠܢܵܡܘܿܣܵܟ݂ ܠܒܲܪ ܡ̣ܢ ܬܲܪܥܝܼܬ̣ܗܘܿܢ ܘܠܲܒ̣ܢܲܝ̈ܟ ܩܲܛܸܠܘ: ܥܲܠ ܕܐܸܡܲܪܘ ܠܗܘܿܢ ܠܡܸܗܦܲܟ݂ ܠܘܵܬ̣ܵܟ݂. ܘܲܥܒܲܕ݂ܘ ܒܝܼ̈ܫܵܬ̣ܵܐ ܪܵܘ̱ܪ̈ܒ̣ܵܬ̣ܵܐ.

²⁷ܘܐܲܫܠܸܡܬ̇ ܐܸܢܘܿܢ ܒܝܲܕ݂ ܒܥܸܠܕ̇ܒ̣ܵܒܲܝ̈ܗܘܿܢ: ܘܐܲܥܝܼܩܘ ܠܗܘܿܢ. ܘܲܒ̣ܥܸܕܵܢܵܐ ܕܐܘܼܠܨܵܢܵܐ ܒܥ̣ܵܘ ܡܸܢܵܟ݂: ܘܲܫܡܲܥܬ̇ ܐܸܢܘܿܢ ܡ̣ܢ ܫܡܲܝܵܐ: ܐܲܝܟ݂ ܪ̈ܲܚܡܲܝܟ ܣܲܓ̇ܝܼ̈ܐܹܐ. ܘܐܲܩܝܼܡ̣ܬ̇ ܠܗܘܿܢ ܦܵܪܘܿܩܵܐ. ܘܲܦܪܲܩ ܐܸܢܘܿܢ ܡ̣ܢ ܐܝܼܕ݂ܵܐ ܕܐܵܠܘܿܨܲܝ̈ܗܘܿܢ.

²⁸ܘܟܲܕ݂ ܐܲܪܘܲܚܬ̇ ܠܗܘܿܢ: ܗ̣ܦܲܟ݂ܘ ܠܡܸܥܒܲܕ݂ ܕܲܣܢܹܐ ܩܕ݂ܵܡܲܝܟ. ܘܲܫܒܲܩܬ̇ ܐܸܢܘܿܢ ܒܝܲܕ݂ ܒܥܸܠܕ̇ܒ̣ܵܒܲܝ̈ܗܘܿܢ. ܘܫܲܥܒܸ̇ܕ݂ܘ ܐܸܢܘܿܢ. ܘܲܗܦܲܟ݂ܘ ܘܨܲܠܝܼܘ ܩܕ݂ܵܡܲܝܟ. ܘܐܲܢ̄ܬ̇ ܡ̣ܢ ܫܡܲܝܵܐ ܫ̣ܡܲܥܬ̇: ܘܲܦܪܲܩܬ̇ ܐܸܢܘܿܢ ܒܟ݂ܠܙܒܲܢ: ܐܲܝܟ݂ ܣܲܓ̇ܝܼܐܘܼܬ̣ ܪ̈ܲܚܡܲܝܟ.

²⁹ܘܐܲܣܗܸܕ̇ܬ̇ ܒܗܘܿܢ: ܠܡܲܗܦܵܟ݂ܘܼ ܐܸܢܘܿܢ ܠܢܵܡܘܿܣܵܟ݂. ܘܗܸܢܘܿܢ ܐܲܥܠܝܼܘ: ܘܠܵܐ ܫܡܲܥ̣ܘ ܠܦܘܼܩ̈ܕ݂ܵܢܲܝܟ ܘܲܒ̣ܕܝܼܢܲܝ̈ܟ ܚܛܵܘ ܒܗܘܿܢ. ܕܐܸܢ ܥܵܒܹ̇ܕ݂ ܠܗܘܿܢ ܒܲܪܢܵܫܵܐ: ܚܵܝܹ̇ܐ ܒܗܘܿܢ. ܘܲܥܒܲܕ݂ܘ ܠܗܘܿܢ ܟܲܬ̣ܦܵܐ ܡܵܪܘܿܕ̇ܬܵܐ. ܘܲܩܕ݂ܵܠܗܘܿܢ ܩܲܫܝܼܘ: ܘܠܵܐ ܫܡܲܥܘ.

³⁰ܘܐܲܟ݂ܪܸܙܬ̇ ܥܠܲܝܗܘܿܢ ܫܢܲـ̈ـܝܵܐ ܣܲܓ̇ܝܼܵܐ̈ܬ̣ܵܐ. ܘܐܸܣܗܸܕ̇ܬ̇ ܒܗܘܿܢ ܒܪܘܼܚܵܟ݂: ܒܐܝܼܕ݂ܵܐ ܕܲܢܒ̣ܝܲܝ̈ܟ. ܘܠܵܐ ܫ̣ܡܲܥܘ ܘܐܲܫܠܸܡܬ̇ ܐܸܢܘܿܢ ܒܐܝܼܕ݂ܵܐ ܕܥܲܡܡܹ̈ܐ ܕܲܡܕ݂ܝܼ̈ܢܵܬ̣ܵܐ.

³¹ܘܡܸܛܠ ܪ̈ܲܚܡܲܝܟ ܣܲܓ̇ܝܼ̈ܐܹܐ: ܠܵܐ ܐܵܘܒܸ̇ܕ̇ܬ̇ ܐܸܢܘܿܢ. ܘܠܵܐ ܫܒܲܩܬ̇ ܐܸܢܘܿܢ ܡܸܛܠ ܕܐܲܠܵܗܵܐ ܐܲܢ̄ܬ̇ ܚܲܢܵܢܵܐ ܘܪܸܚ̱ܡܬ̣ܵܢܵܐ.

³²ܡܸܟܹ̇ܝܠ: ܐܲܠܵܗܲܢ ܐܲܠܵܗܵܐ ܪܲܒܵܐ ܘܓܲܢ̄ܒܵܪܵܐ ܘܲܕ݂ܚܝܼܠܵܐ: ܢܵܛܲܪ ܡܵܘ̈ܡܵܬ̣ܵܐ ܘܲܫܪܵܪܵܐ. ܠܵܐ ܢܸܬ̣ܟܲܣܸܐ ܡ̣ܢ ܩܕ݂ܵܡܲܝܟ ܟܠܹܗ ܐܘܼܠܨܵܢܵܐ ܕܐܸܬ̣ܵܐ ܥܠܲܝܢ: ܘܥܲܠ ܡܲܠܟ̇ܝܼ̈ܢ: ܘܥܲܠ ܪܵܘ̱ܪ̈ܒ̣ܵܢܲܝܢ: ܘܥܲܠ ܟܘܼܡܪ̈ܲܝܢ: ܘܥܲܠ ܢܒ̣ܝܲܝ̈ܢ: ܘܥܲܠ ܐܲܒ̣ܵܗܲܝ̈ܢ: ܘܥܲܠ ܟܠܹܗ ܥܲܡܵܐ: ܡ̣ܢ ܝܵܘܡܵܘ̈ܗܝ ܕܡܲܠܟܵܐ ܕܐܵܬ̣ܘܿܪ ܘܲܥܕܲܡܵܐ ܠܝܵܘܡܵܢܵܐ.

³³ܘܐܲܢ̄ܬ̇ ܙܲܕ̇ܝܼܩ ܥܲܠ ܟܠ ܡܸܕܸ̇ܡ ܕܐܸܬ̣ܵܐ ܥܠܲܝܢ. ܡܸܛܠ ܕܲܒ̣ܩܘܼܫܬܵܐ ܐܲܢ̄ܬ̇ ܓܹܝܪ ܥܒܲܕ̇ܬ̇. ܘܲܚܢܲܢ ܐܲܥܠܝܼܢܲܢ.

³⁴ܘܡܲܠܟܲܝ̈ܢ: ܘܪܵܘ̱ܪ̈ܒ̣ܵܢܲܝܢ: ܘܟ݂ܘܼܡܪ̈ܲܝܢ: ܘܐܲܒ̣ܵܗܲܝ̈ܢ: ܠܵܐ ܥ̣ܒܲܕ݂ ܢܵܡܘܿܣܵܟ݂ ܘܠܵܐ ܨܵܬ̣ܘ ܠܦܘܼܩ̈ܕ݂ܵܢܲܝܟ ܘܲܠܣܵܗ̈ܕ̇ܘܵܬ̣ܵܟ݂: ܕܐܲܣܗܸܕ̇ܬ̇ ܒܗܘܿܢ.

³⁵ܘܲܟ݂ܦܲܪܘ ܒܡܲܠܟ̇ܘܼܬ̣ܵܟ݂ ܘܲܒ̣ܛܘܼܒ̣ܵܟ݂ ܪܲܒܵܐ ܕܝܲܗ̄ܒ݂ܬ̇ ܠܗܘܿܢ: ܒܐܲܪܥܵܐ ܛܵܒ̣ܬ̣ܵܐ ܘܫܲܡܝܼܢܬܵܐ ܕܝܲܗ̄ܒ̣ܬ̇ ܠܗܘܿܢ. ܘܠܵܐ ܦܲܠܚܘܿܟ݂: ܘܠܵܐ ܗܦܲܟ݂ܘ ܡ̣ܢ ܥܒ̣ܵܕܲܝ̈ܗܘܿܢ ܒܝܼ̈ܫܹܐ.

³⁶ܡܸܛܠ ܗܵܢܵܐ ܝܵܘܡܵܢܵܐ ܥܲܒ̣̈ܕܹ̇ܐ. ܘܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵܗܲܝ̈ܢ ܠܡܹܐܟܲܠ ܐܸܒܵܗ̇ ܘܛܘܼܒ̣ܵܗ̇: ܗܵܐ ܚܢܲܢ ܐܲܝܟ݂ ܥܲܒ̣̈ܕܹ̇ܐ ܦܵܠܚܝܼܢ ܒܓ̣ܵܘܵܗ̇.

³⁷ܘܥܲܠ̈ܠܵܬ̣ܵܗ̇ ܢܵܣܒ̇ܝܼܢ ܡܲܠ̈ܟܹ̇ܐ ܕܐܲܩܝܼܡܬ̇ ܥܠܲܝܢ: ܡܸܛܠ ܚܛܵܗܲܝ̈ܢ ܘܥܲܠ ܦܲܓ̣ܪ̈ܲܝܢ ܗܸܢܘܿܢ ܫܲܠܝܼܛܝܼܢ: ܘܥܲܠ ܒܥܝܼܪܲܢ: ܐܲܝܟ݂ ܨܸܒ̣ܝܵܢܗܘܿܢ ܘܒ̣ܐܘܼܠܨܵܢܵܐ ܪܲܒܵܐ ܫܪܹܝܢܲܢ.

³⁸ܘܲܒ̣ܟ݂ܠܗܹܝܢ ܗܵܠܹܝܢ ܝܵܡܹ̇ܝܢ ܚ̄ܢܲܢ ܒܲܫܪܵܪܵܐ ܘܡܲܣ̱ܗܕ݂ܝܼܢ ܥܲܠ ܚܵܬ̣ܡܵܐ: ܩܲܫܝܼ̈ܫܲܝܢ: ܘܠܹܘܵܝܹ̈ܐ: ܘܟ݂ܘܼܡܪ̈ܲܝܢ: ܘܟ݂ܠ ܐܲܝܠܹܝܢ ܕܲܚܝܵܘ ܡܸܢܲܢ.