Read Aramaic Peshita Esther 4 Bible Online

Esther 4 - Aramaic Peshita bible

Esther 4

¹ܘܡܘܼܪܕ̇ܟܲܝ ܝܼܕܲܥ ܟܠ ܡܸܕܸ̇ܡ ܕܐܸܬ̣ܥ̱ܒܸܕ݂. ܘܨܲܪܝܼ ܡܘܼܪܕ̇ܟܲܝ ܠܒ̣ܘܼܫܵܘ̈ܗܝ: ܘܐܸܬ̣ܟ̇ܒܸܢ ܣܲܩܵܐ: ܘܐܸܬ̇ܬ̇ܦܝܼܠ ܒܩܸܛܡܵܐ. ܘܲܢܦܲܩ̣ ܡܲܝܠܸܠ ܒܓ̣ܵܘ ܡܕ݂ܝܼܢ̄ܬܵܐ ܝܑܼܠܲܠܬܵܐ ܪܲܒ̇ܬ̣ܵܐ ܘܡܲܪܝܼܪܬܵܐ.

²ܘܐܸܬ̣ܵܐ ܥܕܲܡܵܐ ܠܬܲܪܥܵܐ ܕܡܲܠܟܵܐ. ܘܠܲܝܬ̇ ܗ̄ܘܼܵܐ ܢܵܡܘܿܣܵܐ ܕܐ̄ܢܵܫ ܢܸܠܒܲܫ ܣܲܩܵܐ: ܘܢܹܐܬܹܐ ܠܬܲܪܥܵܐ ܕܡܲܠܟܵܐ.

³ܘܲܒ̣ܟ݂ܠ ܡܕ݂ܝܼܢܵܐ ܟܲܕ݂ ܡܲܛܝܼ ܦܸܬ̣ܓ̣ܵܡܵܐ ܕܡܲܠܟܵܐ: ܗܘ̤ܵܐ ܐܸܒ̣ܠܵܐ ܪܲܒܵܐ ܠܲܝܗܘܼ̈ܕ݂ܵܝܹܐ: ܘܨܴܵܘܡܵܐ: ܘܲܒ̣ܟ݂ܵܬ̣ܵܐ: ܘܡܲܪ̈ܩܕ݂ܵܬ̣ܵܐ. ܘܣܲܩܵܐ ܘܩܸܛܡܵܐ ܡܲܟܸ̇ܟ݂ ܠܣܲܓ̇ܝܼ̈ܐܹܐ.

⁴ܘܥܲܠܘ ܡܗܲܝܡܢܹ̈ܝܗ̇ ܕܝܼܠܵܗ̇ ܕܐܸܣܬܹ̇ܝܪ: ܘܚܵܘܝܘܼܗ̇ ܘܐܸܬ̇ܬ̇ܙܝܼܥܲܬ̤ ܡܲܠܟ̇ܬ̣ܵܐ ܛܵܒ̣. ܘܫܲܕ̇ܪܲܬ̤ ܡܵܐܢܹ̈ܐ ܠܡܲܠܒܵܫܘܼܬܹܗ ܠܡܘܼܪܕ̇ܟܲܝ: ܘܠܲܡܫܲܠܵܚܘܼ ܣܲܩܵܐ ܡܸܢܹܗ. ܘܠܵܐ ܩܲܒܸ̇ܠ.

⁵ܘܲܩܪܵܬ̤ ܐܸܣܬܹ̇ܝܪ ܠܗܵܬ̣ܵܢ ܡܗܲܝܡܢܵܐ ܡ̣ܢ ܡܗܲܝܡܢܹ̈ܐ ܕܡܲܠܟܵܐ: ܕܩܵܐܹ̇ܡ ܩܕ݂ܵܡܹܝܗ̇ ܘܦܲܩܸܕܬܹܗ ܠܘܵܬ̣ ܡܘܼܪܕ̇ܟܲܝ: ܕܬܸܕܲܥ ܕܡܵܢܲܐ ܗ̄ܝܼ ܗܵܕܹܐ: ܘܥܲܠ ܡܵܢܵܐ.

⁶ܘܲܢܦܲܩ ܗܵܬ̣ܵܢ ܠܘܵܬ̣ ܡܘܼܪܕ̇ܟܲܝ ܠܫܘܼܩܹ̈ܐ ܕܲܡܕ݂ܝܼܢ̄ܬܵܐ: ܩܕ݂ܵܡ ܬܲܪܥܵܐ ܕܡܲܠܟܵܐ.

⁷ܘܚܵܘܝܹܗ ܡܘܼܪܕ̇ܟܲܝ ܟܠ ܡܸܕܸ̇ܡ ܕܲܓ̣ܕܲܫ̣ ܠܹܗ: ܘܚܘܼܫܒܵܢܵܐ ܕܟܸܣܦܵܐ ܕܐܸܡܲܪ ܗܵܡܵܢ ܠܡܸܬ̣ܩܲܠ: ܠܡܲܥܵܠܘܼ ܠܒܹܝܬ̣ ܓܲܙܵܐ ܥܲܠ ܝܗ̄ܘܼܕ݂ܵܝܹ̈ܐ ܕܢܹܐܒ̣ܕ̇ܘܼܢ.

⁸ܘܦܲܪܫܲܓ̣ܢܵܐ ܕܣܝܼܡ ܒܫܘܿܫܲܢ ܒܝܼܪܬܵܐ ܝܲܗ̄ܒܹ̇ܗ ܠܹܗ: ܕܲܢܚܵܘܹܐ ܠܐܸܣܬܹ̇ܝܪ: ܘܢܸܦܩܕ݂ܝܼܗ̇ ܕܬܸܥܘܿܠ ܠܘܵܬ̣ ܡܲܠܟܵܐ ܘܬܸܒ̣ܥܸܐ ܡܸܢܹܗ: ܘܬܸܬ̣ܟܲܫܲܦ ܥܲܠ ܥܲܡܵܐ.

⁹ܘܥܲܠ ܗܵܬ̣ܵܢ: ܘܐܸܡܲܪ ܠܐܸܣܬܹ̇ܝܪ ܡܸܠܵܘ̈ܗܝ ܕܡܘܼܪܕ̇ܟܲܝ.

¹⁰ܘܐܸܡܪܲܬ̤ ܐܸܣܬܹ̇ܝܪ ܠܗܵܬ̣ܵܢ: ܘܦܲܩܸܕܬܹܗ ܠܘܵܬ̣ ܡܘܼܪܕ̇ܟܲܝ ܠܡܹܐܡܲܪ.

¹¹ܟܠܗܘܿܢ ܥܲܒ̣̈ܕܹ̇ܐ ܕܡܲܠܟܵܐ ܝܵܕ݂ܥܝܼܢ: ܕܟ݂ܠ ܓܲܒ̣ܪܵܐ ܐܵܘ ܐܲܢ̄ܬ̇ܬ̣ܵܐ ܕܥܵܐܹ̇ܠ ܩܕ݂ܵܡ ܡܲܠܟܵܐ ܠܕ݂ܵܪܬܵܐ ܓܵܘܵܝܬܵܐ: ܐܲܝܢܵܐ ܕܠܵܐ ܡܸܬ̣ܦܩܸܕ݂: ܚܕ݂ܵܐ ܗ̤ܝ ܐܵܬ̤ܵܐ ܕܐܵܬܹ̇ܐ ܠܡܸܬ̣ܩܛܵܠܘܼ: ܠܒܲܪ ܡ̣ܢ ܡܲܢ ܕܡܵܘܫܸܛ ܠܹܗ ܡܲܠܟܵܐ ܫܵܒ̣ܛܵܐ ܕܕܲܗܒ̣ܵܐ ܘܚܵܝܹ̇ܐ. ܘܐܸܢܵܐ ܠܵܐ ܐܸܬ̣ܩܪܝܼܬ̣ ܠܡܸܥܲܠ ܩܕ݂ܵܡ ܡܲܠܟܵܐ ܗܵܐ ܬܠܬ̣ܝܼܢ ܝܵܘ̈ܡܝܼܢ.

¹²ܘܚܵܘܝܼ ܠܡܘܼܪܕ̇ܟܲܝ ܡܸܠܹ̈ܝܗ̇ ܕܐܸܣܬܹ̇ܝܪ.

¹³ܘܐܸܡܲܪ ܡܘܼܪܕ̇ܟܲܝ: ܐܸܡܲܪ ܠܵܗ̇ ܠܐܸܣܬܹ̇ܝܪ. ܠܵܐ ܬܸܣܒ̇ܪܝܼܢ ܒܢܲܦ̮ܫܹܟ݂ܝ: ܕܟܲܕ݂ ܒܹܝܬ̣ ܡܲܠܟܵܐ ܐܲܢ̄ܬ̇ܝ: ܡܸܬ̣ܦܲܠܛܵܐ ܐܲܢ̄ܬ̇ܝ ܡ̣ܢ ܟܠܗܘܿܢ ܝܗ̄ܘܼ̈ܕ݂ܵܝܹܐ.

¹⁴ܐܸܢ ܬܸܫܬ̇ܩܝܼܢ ܒܙܲܒ̣ܢܵܐ ܗܵܢܵܐ: ܪܘܲܚܬ̣ܵܐ ܘܦܘܼܪܩܵܢܵܐ ܗܵܘܹ̇ܐ ܠܲܝܗܘܼ̈ܕ݂ܵܝܹܐ ܡ̣ܢ ܕܘܼܟܵܐ ܐ̄ܚܪܹܢܵܐ. ܘܐܲܢ̄ܬ̇ܝ ܘܒܹܝܬ̣ ܐܲܒ̣ܘܼܟ݂ܝ ܐܵܒ̣ܕܵܐ ܐܲܢ̄ܬ̇ܝ. ܘܡܲܢܘܼ ܝܵܕܲܥ: ܐܸܢ ܡܸܛܠ ܗܵܢܵܐ ܙܲܒ̣ܢܵܐ ܐܸܬ̣ܩܪܝܼܬ̇ܝ ܘܐܸܬ̣ܩܲܪܲܒ̣ܬ̇ܝ ܠܡܲܠܟ̇ܘܼܬ̣ܵܐ.

¹⁵ܘܐܸܡܪܲܬ̤ ܐܸܣܬܹ̇ܝܪ: ܐܸܡܲܪ ܠܡܘܼܪܕ̇ܟܲܝ.

¹⁶ܙܸܠ ܟܲܢܸܫ ܠܟ݂ܠܗܘܿܢ ܝܗ̄ܘܼ̈ܕ݂ܵܝܹܐ ܕܐܝܼܬ̣ ܒܫܘܼܫܲܢ ܒܝܼܪܬܵܐ: ܘܨܘܼܡܘ ܥܠܲܝ: ܘܠܵܐ ܬܹܐܟ݂ܠܘܼܢ: ܘܠܵܐ ܬܸܫܬ̇ܘܿܢ ܬܠܵܬ̣ܵܐ ܝܵܘܡ̈ܝܼܢ ܠܸܠܝܵܐ ܘܐܝܼܡܵܡܵܐ. ܘܐܵܦ ܐܸܢܵܐ ܘܲܥܠܲܝ̈ܡܵܬ̣ܝ ܐܹܨܘܼܡ ܗܵܟܲܢܵܐ. ܗܵܝܕܹ̇ܝܢ ܐܸܥܘܿܠ ܩܕ݂ܵܡ ܡܲܠܟܵܐ ܕܠܵܐ ܒܢܵܡܘܿܣ ܘܐܸܢ ܥܸܒ̣ܕܹܬ̣: ܥܸܒ̣ܕܹ̇ܬ̣.

¹⁷ܘܐܸܙܲܠ ܡܘܼܪܕ̇ܟܲܝ ܘܲܥܒܲܕ݂ ܟܠ ܡܸܕܸ̇ܡ ܕܫܸܠܚܲܬ̤ ܠܹܗ ܐܸܣܬܹ̇ܝܪ.