Read Aramaic Peshita Esther 8 Bible Online

Esther 8 - Aramaic Peshita bible

Esther 8

¹ܒܝܵܘܡܵܐ ܗܵܘܿ ܝܲܗ̄ܒ̣ ܡܲܠܟܵܐ ܐܲܚܫܝܼܪܹܫ ܠܐܸܣܬܹ̇ܝܪ ܡܲܠܟ̇ܬ̣ܵܐ: ܒܲܝܬܹ̇ܗ ܕܗܵܡܵܢ ܒܥܸܠܕ̇ܒ̣ܵܒ̣ܵܐ ܕܲܝܗܘܼܕ݂ܵܝܹ̈ܐ. ܘܡܘܼܪܕ̇ܟܲܝ ܥܲܠ ܩܕ݂ܵܡ ܡܲܠܟܵܐ: ܡܸܛܠ ܕܲܓ̣ܠܵܬ̤ ܐܸܣܬܹ̇ܝܪ ܡܵܢܵܐ ܗܘ̤ܵܐ ܠܵܗ̇.

²ܘܲܫܩܲܠ ܡܲܠܟܵܐ ܥܸܙܲܩܬ̣ܵܐ ܕܲܫܩܲܠ ܡ̣ܢ ܗܵܡܵܢ: ܘܝܲܗ̄ܒ̣ܵܗ̇ ܠܡܘܼܪܕ̇ܟܲܝ ܘܐܲܩܝܼܡܬܹܗ ܐܸܣܬܹ̇ܝܪ ܠܡܘܼܪܕ̇ܟܲܝ ܥܲܠ ܒܲܝܬܹ̇ܗ ܕܗܵܡܵܢ.

³ܘܗܸܦܟܲܬ̤ ܐܸܣܬܹ̇ܝܪ ܘܡܲܠܠܲܬ̤ ܩܕ݂ܵܡ ܡܲܠܟܵܐ: ܘܢܸܦܠܲܬ̤ ܥܲܠ ܪܸ̈ܓ̣ܠܵܘܗܝ: ܘܒ̣ܵܥܝܵܐ ܘܡܸܬ̣ܟܲܫܦܵܐ ܠܹܗ: ܕܢܲܥܒܲܪ ܒܝܼܫܬܵܐ ܕܗܵܡܵܢ ܐܵܓ̣ܵܓ̣ܵܝܵܐ: ܘܡܲܚܫܲܒ̣ܬܵܐ ܕܐܸܬ̣ܚܲܫܲܒ̣ ܥܲܠ ܝܗ̄ܘܼܕ݂ܵܝܹ̈ܐ.

⁴ܘܐܵܘܫܸܛ ܡܲܠܟܵܐ ܠܐܸܣܬܹ̇ܝܪ ܫܲܒ̣ܛܵܐ ܕܕܲܗܒ̣ܵܐ. ܘܩܸܪܒܲܬ̤ ܠܹܗ ܐܸܣܬܹ̇ܝܪ.

⁵ܘܩܵܡܲܬ̤ ܩܕ݂ܵܡ ܡܲܠܟܵܐ. ܘܐܸܡܪܲܬ̤. ܐܸܢ ܥܲܠ ܡܲܠܟܵܐ ܫܲܦܝܼܪ. ܘܫܵܦܲܪ ܦܸܬ̣ܓ̣ܵܡܵܐ ܩܕ݂ܵܡ ܡܲܠܟܵܐ: ܘܐܸܢ ܐܸܫܟ̇ܚܹ̇ܬ̣ ܪ̈ܲܚܡܹܐ ܒܥܲܝܢܵܘ̈ܗܝ: ܢܸܟ݂ܬ̇ܘܿܒ̣ ܘܢܲܗܦܸܟ݂ ܐܸܓ̇ܪ̈ܵܬ̣ܵܐ ܘܡܲܚܫ̈ܒ̣ܵܬ̣ܵܐ ܕܗܵܡܵܢ ܐܵܓ̣ܓ̣ܵܝܵܐ ܕܲܟ݂ܬܲܒ̣ ܠܡܵܘܒܵܕ݂ܘܼ ܠܟ݂ܠܗܘܿܢ ܝܗ̄ܘܼܕ݂ܵܝܹ̈ܐ ܒܟ݂ܠܗܹܝܢ ܡܕ݂ܝܼ̈ܢܵܬܹܗ ܕܡܲܠܟܵܐ.

⁶ܐܲܝܟܲܢܵܐ ܓܹܝܪ ܡܲܨܝܵܐ ܐ̄ܢܵܐ ܕܐܸܚܙܹܐ ܒܒ̣ܝܼܫܬܵܐ ܕܬܸܓ̣ܕܲܫ ܠܥܲܡܝ ܘܐܲܝܟܲܢܵܐ ܡܸܫܟ̇ܚܵܐ ܐ̄ܢܵܐ ܕܐܸܚܙܹܐ ܒܐܲܒ̣ܕܵܢܵܐ ܕܫܲܪܒܲܬ̣ܝ.

⁷ܘܐܸܡܲܪ ܡܲܠܟܵܐ ܐܲܚܫܝܼܪܹܫ ܠܐܸܣܬܹ̇ܝܪ ܡܲܠܟ̇ܬ̣ܵܐ: ܗܵܐ ܒܲܝܬܹ̇ܗ ܕܗܵܡܵܢ ܝܸܗ̄ܒܹ̇ܬ̣ ܠܹܟ݂ܝ: ܘܠܹܗ ܬܠܵܘ ܥܲܠ ܩܲܝܣܵܐ: ܥܲܠ ܕܐܵܘܫܸܛ ܐܝܼܕ݂ܵܐ ܒܲܝܗܘܼ̈ܕ݂ܵܝܹܐ.

⁸ܘܐܲܢ̄ܬ̇ܘܿܢ ܥܲܠ ܝܗ̄ܘܼܕ݂ܵܝܹ̈ܐ ܐܲܝܟ݂ ܕܫܲܦܝܼܪ ܒܥܲܝܢܲܝ̈ܟ̇ܘܿܢ ܒܲܫܡܵܐ ܕܡܲܠܟܵܐ ܚܬ̣ܘܿܡܘ ܒܥܸܙܲܩܬ̣ܵܐ ܕܡܲܠܟܵܐ: ܒܲܟ݂ܬ̣ܵܒ̣ܵܐ ܕܡܸܬ̣ܟ̇ܬܸܒ̣ ܒܫܸܡ ܡܲܠܟܵܐ: ܘܡܸܬ̣ܚܬܸܡ ܒܥܸܙܲܩܬܹܗ ܕܡܲܠܟܵܐ ܘܠܵܐ ܗܵܦܹ̇ܟ݂.

⁹ܘܐܸܬ̣ܩܪܝܼܘ ܣܸܦܪܹ̈ܐ ܕܡܲܠܟܵܐ ܒܙܲܒ̣ܢܵܐ ܗܵܘܿ: ܒܝܲܪܚܵܐ ܬܠܝܼܬ̣ܵܝܵܐ ܕܗ̤ܘ ܚܙܝܼܪܵܢ: ܒܲܬ̣ܠܵܬ̣ܵܐ ܘܥܸܣܪܝܼܢ ܒܹܗ ܒܝܲܪܚܵܐ: ܘܲܟ݂ܬܲܒ̣ܘ ܟܠ ܡܸܕܸ̇ܡ ܕܲܟ݂ܬܲܒ̣ ܡܘܪܕ̇ܟܲܝ ܥܲܠ ܝܗ̄ܘܼܕ݂ܵܝܹ̈ܐ: ܠܪ̈ܲܒܲܝ ܚܲܝܠܹ̈ܐ ܘܲܠܡܵܪ̈ܵܘܵܬ̣ܵܐ ܘܲܠܪ̈ܵܘ̱ܪ̈ܒ̣ܵܢܹܐ ܕܲܡܕ݂ܝܼ̈ܢܵܬ̣ܵܐ: ܡ̣ܢ ܗܘܿܕ݂ ܘܲܥܕܲܡܵܐ ܠܟ݂ܘܼܫ: ܡܵܐܐ ܘܥܸܣܪܝܼܢ ܘܲܫܒܲܥ ܡܕ݂ܝܼ̈ܢܵܢ: ܡܕ݂ܝܼܢ̄ܬܵܐ ܐܲܝܟ݂ ܟܬ̣ܵܒ̣ܵܗ̇: ܘܲܠܥܲܡܵܐ ܐܲܝܟ݂ ܠܸܫܵܢܹܗ: ܘܠܲܝܗܘܼܕ݂ܵܝܹ̈ܐ ܐܲܝܟ݂ ܟܬ̣ܵܒ̣ܗܘܿܢ: ܘܐܲܝܟ݂ ܠܸܫܵܢܗܘܿܢ.

¹⁰ܘܐܸܬ̣ܟ̇ܬܸܒ̣ܘ ܒܫܸܡ ܡܲܠܟܵܐ ܐܲܚܫܝܼܪܹܫ: ܘܐܸܬ̣ܚܬܸܡܘ ܒܥܸܙܲܩܬ̣ܵܐ ܕܡܲܠܟܵܐ. ܘܫܲܕܲܪ ܐܸܓ̇ܪ̈ܵܬ̣ܵܐ ܒܝܲܕ݂ ܪ̈ܲܗܛܹܐ: ܘܲܒ̣ܝܲܕ݂ ܐܸܣܦ̈ܘܿܟܹ̇ܐ: ܪ̈ܵܟ݂ܒܲܝ ܪ̈ܲܟ݂ܫܵܐ ܒܢܲܝ̈ ܪ̈ܲܡܟܵܐ.

¹¹ܐܸܓ̇ܪ̈ܵܬ̣ܵܐ ܕܲܟ݂ܬܲܒ̣ ܡܲܠܟܵܐ ܥܲܠ ܝܗ̄ܘܼܕ݂ܵܝܹ̈ܐ: ܕܲܒ̣ܟ݂ܠ ܡܕ݂ܝܼ̈ܢܵܬ̣ܵܐ ܠܡܸܬ̣ܟܲܢܵܫܘܼ: ܘܠܲܡܩܵܡ ܠܢܲܦ̮ܫܗܘܿܢ: ܘܲܠܡܸܚܪܲܒ̣ ܘܲܠܡܸܩܛܲܠ ܘܲܠܡܵܘܒܵܕ݂ܘܼ ܠܟ݂ܠ ܐ̄ܢܵܫ ܕܲܡܥܝܼܩ ܠܗܘܿܢ: ܘܲܛܠܵܝܹ̈ܐ ܘܢܸܫܹ̈ܐ: ܘܩܸܢܝܵܢܗܘܿܢ ܠܒܸܙܬ̣ܵܐ.

¹²ܒܚܲܕ݂ ܝܘܿܡ ܕܲܒ̣ܟ݂ܠܗܹܝܢ ܡܕ݂ܝܼ̈ܢܵܬܹܗ ܕܡܲܠܟܵܐ ܐܲܚܫܝܼܪܹܫ: ܒܲܬ̣ܠܵܬ̣ܥܸܣܪܹ̈ܐ ܒܝܲܪܚܵܐ ܕܲܬ̣ܪܸܥܣܲܪ: ܕܗ̤ܘ ܐܵܕ݂ܵܪ.

¹³ܘܦܲܪܫܲܓ̣ܢܹܗ ܕܲܟ݂ܬ̣ܵܒ̣ܵܐ ܐܸܬ̣̱ܝܼܗܸܒ̣ ܒܟ݂ܠ ܡܕ݂ܝܼܢܵܐ. ܘܲܦܩܲܕ݂ ܠܟ݂ܠܗܘܿܢ ܥܲܡܡܹ̈ܐ: ܕܢܸܗܘܘܿܢ ܝܗ̄ܘܼܕ݂ܵܝܹ̈ܐ ܡܛܲܝܒ̣ܝܼܢ ܠܝܵܘܡܵܐ ܗܵܢܵܐ: ܕܢܸܬ̣ܦܲܪܥܘܼܢ ܡ̣ܢ ܒܥܸܠܕ̇ܒ̣ܵܒܲܝ̈ܗܘܿܢ.

¹⁴ܘܐܸܬ̣ܵܘ ܪ̈ܲܗܵܛܹܐ: ܘܐܸܣܦ̈ܘܿܟܹ̇ܐ ܪ̈ܵܟ݂ܒܲܝ ܪ̈ܲܟ݂ܫܵܐ: ܘܲܢܦܲܩ̣ܘ ܡܣܲܪܗܒ̣ܵܐܝܼܬ̣ ܒܦܸܬ̣ܓ̣ܵܡܵܐ ܘܲܒ̣ܦܘܼܩܕܵܢܵܐ ܕܐܸܬ̣ܦܩܸܕ݂ ܒܫܘܿܫܲܢ ܒܝܼܪܬܵܐ.

¹⁵ܘܡܘܼܪܕ̇ܟܲܝ ܢܦܲܩ ܡ̣ܢ ܩܕ݂ܵܡ ܡܲܠܟܵܐ: ܒܲܠܒ̣ܘܼܫܵܐ ܕܡܲܠܟ̇ܬ̣ܵܐ: ܕܬܸܟ݂ܠ̱ܬ̣ܵܐ: ܘܲܕ݂ܒ̣ܘܼܨܵܐ: ܘܒܲܟ݂ܠܝܼܠܵܐ ܕܕܲܗܒ̣ܵܐ. ܘܲܟ݂ܪܝܼܟ݂ ܒܒ̣ܘܼܨܵܐ ܘܒܲܐܪܓ̇ܘܵܢܵܐ. ܘܲܡܕ݂ܝܼܢ̄ܬܵܐ ܫܘܿܫܲܢ ܕܵܨܲܬ̤ ܘܲܚܕ݂ܵܬ̤.

¹⁶ܘܥܲܠ ܝܗ̄ܘܼ̈ܕ݂ܵܝܹܐ ܗܘ̤ܵܐ ܢܘܼܗܪܵܐ ܘܚܲܕ݂ܘܼܬ̣ܵܐ ܘܐܝܼܩܵܪܵܐ ܘܲܕ݂ܝܵܨܵܐ.

¹⁷ܒܟ݂ܠ ܡܕ݂ܝܼ̈ܢܵܬ̣ܵܐ ܘܲܒ̣ܟ݂ܠ ܩܘܼܪ̈ܝܵܐ: ܐܲܬܲܪ ܕܡܲܛܝܼ ܦܸܬ̣ܓ̣ܵܡܵܐ ܕܡܲܠܟܵܐ ܘܦܘܼܩܕܵܢܹܗ: ܚܲܕ݂ܘܼܬ̣ܵܐ ܪܲܒ̇ܬ̣ܵܐ ܗܘ̤ܵܬ̣ ܠܲܝܗܘܼ̈ܕ݂ܵܝܹܐ: ܘܡܲܫܬ̇ܝܵܐ ܘܝܵܘܡܵܐ ܛܵܒ̣ܵܐ: ܘܣܘܿܓ̣ܵܐܐ ܡ̣ܢ ܥܲܡܡܹ̈ܐ ܕܐܲܪܥܵܐ ܡܸܬ̇ܬܵܘܗܝܼܢ: ܡܸܛܠ ܕܢܸܦܠܲܬ̤ ܕܸܚ̱ܠܬ̣ܵܐ ܕܲܝܗܘܼ̈ܕ݂ܵܝܹܐ ܥܠܲܝܗܘܿܢ.