Read Aramaic Peshita Job 1 Bible Online

Job 1 - Aramaic Peshita bible

Job 1

¹ܓܲܒ̣ܪܵܐ ܚܲܕ݂ ܐܝܼܬ̣ ܗ̄ܘ̣ܵܐ ܒܐܲܪܥܵܐ ܕܥܘܼܨ: ܝܼܘܿܒ̣ ܫܡܹܗ. ܓܒܲܪ ܗ̄ܘܼܵܐ ܬܲܡܝܼܡ ܘܙܲܕ̇ܝܼܩ. ܘܕ݂ܵܚܹ̇ܠ ܠܐܲܠܵܗܵܐ. ܘܣܵܛܹ̇ܐ ܡ̣ܢ ܒܝܼܫܬܵܐ.

²ܘܐܸܬ̣ܝܼܠܸܕ݂ܘ ܠܹܗ ܫܲܒ̣ܥܵܐ ܒܢ̈ܝܼܢ: ܘܲܬ̣ܠܵܬ̣ ܒ̈ܢܵܢ.

³ܘܲܗܘܸܵܐ ܩܸܢܝܵܢܹܗ ܫܲܒ̣ܥܵܐ ܐܲܠܦ̈ܝܼܢ ܥܵــ̈ـܢܵܐ: ܘܲܬ̣ܠܵܬ̣ܐ ܐܲܠܦ̈ܝܼܢ ܓܲܡ̈ܠܹܐ: ܘܚܲܡܸܫ ܡܵܐܐ ܦܲܕܵܢܝܼ̈ܢ ܕܬ̣ܵܘܪܹ̈ܐ: ܘܚܲܡܸܫܡܵܐܐ ܐܲܬܵܢܝܼ̈ܢ: ܘܲܥܒ̣ܵܕ̇ܬܵܐ ܣܘܿܓ̣ܵܐܐ ܕܛܵܒ̣. ܘܓܲܒ̣ܪܵܐ ܗܵܘܿ ܪܲܒܿ ܗ̄ܘܼܵܐ ܡ̣ܢ ܟܠܗܘܿܢ ܒ̈ܢܲܝ ܡܲܕ݂ܢ̱ܚܵܐ.

⁴ܘܐܵܙܠ̄ܝܼܢ ܗ̄ܘܼܵܘ ܒܢܵܘ̈ܗܝ: ܘܥܲܒ̣̇ܕܝܼܢ ܡܲܫܬܵܝܵܐ ܒܹܝܬ̣ ܓܲܒܲܪ ܕܝܵܘܡܹܗ. ܘܲܡܫܲܕ̇ܪܝܼܢ: ܘܩܵܪܹܿܝܢ ܠܲܬ̣ܠܵܬ̣ ܐܲܚ̈ܘܵܬ̣ܗܘܿܢ: ܠܡܹܐܟܲܠ ܘܲܠܡܸܫܬܵܐ ܥܲܡܗܘܿܢ.

⁵ܘ̇ܗܘܸܵܐ ܕܟܲܕ݂ ܐܲܩܸܦܘ ܝܵܘ̈ܡܲܝ ܡܲܫܬܿܝܵܐ: ܫܲܕܲܪ ܐܝܼܘܿܒ̣ ܘܩܲܕܸܿܫ ܐܸܢܘܿܢ. ܘܩܲܕܸܿܡ ܐܝܼܘܿܒ̣ ܒܨܲܦܪܵܐ. ܘܐܲܣ̣ܩ ܕܸܒ̣ܚܹ̈ܐ ܡ̣ܢܝܵܢ ܟܠܗܘܿܢ. ܡܸܛܠ ܕܐܸܡܲܪ ܐܝܼܘܿܒ̣: ܕܲܠܡܵܐ ܚܛ̣ܵܘ ܒ̈ܢܲܝ: ܘܨܲܚ̣ܝܼܘ ܠܐܲܠܵܗܵܐ ܒܠܸܒܿܗܘܿܢ. ܗܟܲܢܵܐ ܥܵܒܹܿܕ݂ ܗ̄ܘܼܵܐ ܐܝܼܘܿܒ̣ ܟܠܗܘܿܢ ܝܵܘܡܵܬ݂ܵܐ.

⁶ܘܲܗܘܸܵܐ ܝܵܘܡܵܐ: ܘܐܸܬ̣ܵܘ ܒ̈ܢܲܝ ܐܲܠܘܿܗܝܼܡ ܠܲܡܩܵܡ ܩܕ݂ܵܡ ܡܵܪܝܵܐ. ܘܐܸܬ̣ܵܐ ܐܵܦ ܣܵܛܵܢܵܐ ܒܲܝܢܵܬ݂ܗܘܿܢ ܠܲܡܩܵܡ ܩܕ݂ܵܡ ܡܵܪܝܵܐ.

⁷ܘܐܸܡ̣ܲܪ ܡܵܪܝܵܐ ܠܣܵܛܵܢܵܐ: ܡ̣ܢ ܐܲܝܡܸܟܵܐ ܐܵܬܹܿܐ ܐܲܢ̄ܬ̇. ܥܢ̣ܵܐ ܣܵܛܵܢܵܐ ܘܐܸܡ̣ܲܪ ܠܡܵܪܝܵܐ: ܚܲܕܪܹܬ̣ ܒܐܲܪܥܵܐ ܘܗܲܠܟܹܿܬ̣ ܒܵܗܿ.

⁸ܘܐܸܡ̣ܲܪ ܡܵܪܝܵܐ ܠܣܵܛܵܢܵܐ: ܗܵܐ ܣܵܡ̣ܬܿ ܠܸܒܵܟ݂ ܥܲܠ ܥܲܒ݂ܕ̇ܝ ܐܝܼܘܿܒ̣: ܕܠܲܝܬ̇ ܐܲܟ݂ܘܵܬܹܗ ܒܐܲܪܥܵܐ. ܬܲܡܝܼܡ ܘܲܬ݂ܪܝܼܨ: ܘܕ݂ܵܚܹ̇ܠ ܠܐܲܠܵܗܵܐ: ܘܣܵܛܹ̇ܐ ܡ̣ܢ ܒܝܼܫܬܵܐ.

⁹ܘܲܥ̣ܢܵܐ ܣܵܛܵܢܵܐ ܘܐܸܡ̣ܲܪ ܠܡܵܪܝܵܐ: ܣܪܝܼܩܵܐܝܼܬ̣ ܓܹܝܪ ܕܵܚܹ̇ܠ ܐܝܼܘܿܒ̣ ܠܐܲܠܵܗܵܐ.

¹⁰ܐܲܢ̄ܬ̇ ܐܲܓܸ̇ܢܬ̇ ܐܝܼܕ݂ܵܟ݂ ܥܠܵܘܗܝ: ܘܥܲܠ ܒܲܝܬܹ̇ܗ ܘܥܲܠ ܒܢܵܘ̈ܗܝ: ܘܥܲܠ ܟܠܡܸܕܹ̇ܡ ܕܐܝܼܬ̣ ܠܹܗ ܒܟ݂ܠ ܕܘܼܟܵܐ. ܘܲܥܒ̣ܵܕ݂ ܐܝܼܕ݂ܵܘ̈ܗܝ ܒܲܪ̣ܟ݂ܬ̇. ܘܩܸܢܝܵܢܹܗ ܣܓ̣ܝܼ ܒܐܲܪܥܵܐ.

¹¹ܒܪܲܡ ܕܹܝܢ ܐܵܘܫܹܛ ܐܝܼܕ݂ܵܟ݂. ܘܲܩܪܘ̇ܒ̣ ܠܟ݂ܠ ܡܸܕܹܿܡ ܕܐܝܼܬ̣ ܠܹܗ. ܐܸܢ ܠܵܐ ܒܐܲܦܲܝ̈ܟ ܢܨܲܚܝܼܟ݂.

¹²ܘܐܸܡܲܪ ܡܵܪܝܵܐ ܠܣܵܛܵܢܵܐ: ܗܵܐ ܟܠܡܸܕܹܿܡ ܕܐܝܼܬ̣ ܠܹܗ ܡܲܫܠܲܡ ܒܐܝܼܕܲܝ̈ܟ. ܒܲܠܚܘ̇ܕ݂ ܥܠܵܘܗܝ ܠܵܐ ܬܵܘܫܸܛ ܐܝܼܕ݂ܵܟ݂. ܘܲܢ̣ܦܲܩ ܣܵܛܵܢܵܐ ܡ̣ܢ ܩܕ݂ܵܡ ܐܲܦܵܘ̈ܗܝ ܕܡܵܪܝܵܐ.

¹³ܘܲܗܘܸܵܐ ܝܵܘܡܵܐ: ܘܲܒ̣ܢܵܘ̈ܗܝ ܘܲܒ̣̈ܢܵܬܹܗ ܕܐܝܼܘ̇ܒ̣: ܐܵܟ݂ܠܝܼܢ ܗ̄ܘܼܵܘ ܘܫܵܬܹܿܝܢ ܒܹܝܬ̣ ܐܲܚܘܼܗܘܿܢ ܩܲܫܝܼܫܵܐ.

¹⁴ܘܡܲܠܲܐܟ݂ܵܐ ܐܸܬ̣ܵܐ ܠܘܵܬ̣ ܐܝܼܘ̇ܒ̣ ܘܐܸܡܲܪ ܠܹܗ: ܬܵܘܪܹ̈ܐ ܕܵܒ̣̇ܪܝܼܢ ܗ̄ܘܼܵܘ ܦܲܕܵܢܹ̈ܐ. ܘܐܲܬܵܢܹ̈ܐ ܪ̈ܵܥܝܵܢ ܗ̄ܘܲܝ̈ ܥܲܠ ܓܲܒ̇ܗܘܿܢ.

¹⁵ܘܲܢ̣ܦܲܠ ܓܲܝܵܣܵܐ ܘܕܲܒܲܪ ܐܸܢܘܿܢ. ܘܲܥܠܲܝܡܹ̈ܐ ܐܸܬ̣ܩܲܛܲܠܘ ܒܚܲܪܒܵܐ: ܘܐܸܬ̣ܦܲܠܛܹ̇ܬ̣ ܐܸܢܵܐ ܒܲܠܚܘܿܕܲܝ ܕܐܹܚܵܘܹܝܟ݂.

¹⁶ܘܥܲܕ݂ ܗ̤ܘ ܡܡܲܠܸܠ: ܐܸܬ̣ܵܐ ܐ̄ܚܪܹܢܵܐ: ܘܐܸܡܲܪ ܠܹܗ: ܢܘܼܪܹܗ ܕܐܲܠܵܗܵܐ ܢܸܦܠܲܬ̤ ܡ̣ܢ ܫܡܲܝܵܐ ܘܣܸܦܲܬ̤ ܒܥܵـ̈ـܢܵܐ ܘܲܒ݂ܪܵܥܵܘܵܬ݂ܵܐ. ܘܐܵܘܩܕܲܬ̣ ܐܸܢܘܿܢ ܘܐܸܬ̣ܦܲܠܛܹ̇ܬ̣ ܐܸܢܵܐ ܒܲܠܚܘܿܕܲܝ ܕܐܹܚܵܘܹܝܟ݂.

¹⁷ܘܥܲܕ݂ ܗ̤ܘ ܡܡܲܠܸܠ: ܐܸܬ̣ܵܐ ܐ̄ܚܪܹܢܵܐ ܘܐܸܡܲܪ ܠܹܗ: ܟܲܠܕܵܝܹ̈ܐ ܐܸܬ̣ܦܲܠܲܓ̣ܘ ܠܲܬ̣ܠܵܬ̣ ܡ̈ܢܵܘܵܢ. ܘܲܢܦܲܠ̣ܘ ܥܲܠ ܓܲܡ̈ܠܹܐ: ܘܕ݂ܒܲܪܘ ܐܸܢܘܿܢ. ܘܠܲܥܠܲܝܡܹ̈ܐ ܩܲܛܸܠ̣ܘ ܒܚܲܪܒܵܐ. ܘܐܸܬ̣ܦܲܠܛܹ̇ܬ̣ ܐܸܢܵܐ ܒܲܠܚܘܿܕܲܝ ܕܐܹܚܵܘܼܝܟ݂.

¹⁸ܘܥܲܕ݂ ܗܸܘ ܡܡܲܠܸܠ: ܐܸܬ̣ܵܐ ܐ̄ܚܪܹܢܵܐ: ܘܐܸܡܲܪ ܠܹܗ: ܒܢܲܝ̈ܟ ܘܲܒ̣̈ܢܵܬ݂ܵܟ݂ ܐܵܟ݂ܠܝܼܢ ܗ̄ܘܼܵܘ ܘܫܵܬܹܿܝܢ ܒܹܝܬ݂ ܐܲܚܘܼܗܘܿܢ ܩܲܫܝܼܫܵܐ.

¹⁹ܘܗܵܐ ܪܘܼܚܵܐ ܬܲܩܝܼܦܬܵܐ ܐܸܬ̣ܵܬܸ ܡ̣ܢ ܥܸܒ̣ܪܹ̈ܐ ܕܡܲܕ݂ܒܿܪܵܐ: ܘܐܸܬܿܛܲܪܝܲܬ̤ ܒܐܲܪܒܲܥ ܙܵܘܝܵܬܹ̈ܗ ܕܒܲܝܬܵܐ. ܘܲܢܦܲܠ̣ ܥܲܠ ܛܵܠܝܹ̈ܐ: ܘܡܝܬ̣ܘ ܘܐܸܬ̣ܦܲܠܛܹܬ̣ ܐܸܢܵܐ ܒܲܠܚܘܿܕܲܝ ܕܐܹܚܵܘܹܝܟ݂.

²⁰ܘܩܵܡ ܐܝܼܘܿܒ̣ ܘܲܨܪܵܐ ܦܪܝܼܣܹܗ. ܘܓܲܙ ܪܹܫܹܗ. ܘܲܢܦܲܠ ܥܲܠ ܐܲܪܥܵܐ ܘܲܣܥܸܪ.

²¹ܘܐܸܡܲܪ ܥܲܪܛܹܠ ܢܸܦܩܹ̇ܬ̣ ܡ̣ܢ ܟܲܪܣܵܗ̇ ܕܐܹܡܝ: ܘܥܲܪܛܹܠ ܐܸܗܦܘ̇ܟ݂. ܡܵܪܝܵܐ ܝܲܗ̄ܒ̣: ܘܡܵܪܝܵܐ ܢܣܲܒ̣. ܢܸܗܘܹܐ ܫܡܹܗ ܕܡܵܪܝܵܐ ܡܒܲܪܲܟ݂.

²²ܘܲܒ̣ܗܵܠܹܝܢ ܟܠܗܹܝܢ ܠܵܐ ܚܛ̣ܵܐ ܐܝܼܘ̇ܒ̣: ܐܵܦܠܵܐ ܓܲܕܸ̇ܦ ܥܲܠ ܐܲܠܵܗܵܐ.