Read Aramaic Peshita Job 10 Bible Online

Job 10 - Aramaic Peshita bible

Job 10

¹ܥܵܩܲܬ̤ ܢܲܦ̮ܫܝ ܒܚܲܝܲܝ̈. ܪܢܹ̇ܝܬ̣ ܒܪܹܢܚ̄. ܘܐܹܡܲܠܸܠ ܒܲܡܪܵܪܵܐ ܕܢܲܦ̮ܫܝ.

²ܘܐܹܡܲܪ ܠܐܲܠܵܗܵܐ: ܠܵܐ ܬܚܲܒܲܢܝ: ܘܐܵܘܕܲܥܲܝܢܝ ܥܲܠ ܡܵܢܵܐ ܕܵܐܹ̇ܝܢ ܐܲܢ̄ܬ̇ ܠܝܼ.

³ܠܵܐ ܟܲܕ̇ܘܼ ܠܵܟ݂ ܕܛܵܠܹ̇ܡ ܐܲܢ̄ܬ̇ ܘܡܲܣܠܹܐ ܐܲܢ̄ܬ̇ ܠܹܐܘܬ̣ܵܐ ܕܐܝܼ̈ܕܲܝܟ. ܘܥܲܠ ܬܲܪܥܝܼܬ̣ܵܐ ܕܪܲܫܝܼܥܹܐ ܐܲܕ݂ܝܼܩ̣ܬ̇.

⁴ܕܲܠܡܵܐ ܥܲܝܢܲܝ̈ܟ ܐܲܝܟ݂ ܥܲܝ̈ܢܲܝ ܒܸܣܪܵܐ ܐܸܢܹܝܢ. ܐܵܘ ܐܲܝܟ݂ ܡܲܚܙܝܵܐ ܗ̄ܘܼ ܕܐ̄ܢܵܫܵܐ ܚܵܙܹ̇ܐ ܐܲܢ̄ܬ̇.

⁵ܐܵܘ ܝܵܘ̈ܡܵܬ̣ܵܟ݂ ܐܲܝܟ݂ ܝܵܘ̈ܡܲܝ ܐ̄ܢܵܫܵܐ ܐܸܢܘܿܢ. ܐܵܘ ܫܢܲܝ̈ܟ ܐܲܝܟ݂ ܝܵܘ̈ܡܵܬ̣ܵܐ ܐܸܢܹܝܢ ܕܓܲܒ̣ܪܵܐ.

⁶ܕܲܡܥܲܩܸܒ̣ ܐܲܢ̄ܬ̇ ܥܲܠ ܚܵܘ̈ܒܲܝ ܘܥܲܠ ܚܛܵܗܲܝ̈.

⁷ܘܝܵܕܲܥ ܐܲܢ̄ܬ̇ ܕܐܸܢܵܐ ܙܲܟܵܝ ܐ̄ܢܵܐ. ܘܠܲܝܬ̇ ܕܡ̣ܢ ܐܝܼܕܲܝ̈ܟ ܡܸܫܬܵܘܙܲܒ̣.

⁸ܐܝܼ̈ܕܲܝܟ ܠܐܝܼ ܒܝܼ ܘܥܲܒ̣ܕܵܢ̈ܝ. ܘܡ̣ܢ ܒܵܬܲܪܟܸ̇ܢ ܨܵܒܹ̇ܐ ܐܲܢ̄ܬ̇ ܠܲܡܚܲܝܵܒ̣ܘܼܬܲܢܝ ܘܠܲܡܛܲܒܵܥܘܼܬܲܢܝ.

⁹ܐܸܬ̇ܕܲܟ݂ܪ ܕܐܲܝܟ݂ ܛܝܼܢܵܐ ܗ̄ܘܼ ܥ̣ܒܲܕ̇ܬܵܢܝ. ܘܲܠܥܲܦܪܵܐ ܡܲܗܦܸܟ݂ ܐܲܢ̄ܬ̇ ܠܝܼ.

¹⁰ܘܐܲܝܟ݂ ܚܲܠܒ̣ܵܐ ܗ̄ܘܼ ܪܲܒ̇ܝܼܬܵܢܝ. ܘܐܲܝܟ݂ ܓܒܸܬܵܐ ܗ̄ܘܼ ܡ̣ܣܲܝܬܵܢܝ.

¹¹ܡܸܫܟܵܐ ܘܒܸܣܪܵܐ ܐܲܠܒܸ̇ܫܬܵܢܝ. ܘܒ̇ܓ̣ܝܵـ̈ـܕܹܐ ܘܓܲܪ̈ܡܹܐ ܫܲܪܲܪܬ̇ܢܝ.

¹²ܘܚܝܹ̈ܐ ܘܲܫܠܵܡܵܐ ܥ̣ܒܲܕ̇ܬ̇ ܥܲܡܝ ܘܦܘܼܩ̈ܕܵܢܲܝܟ ܢܸܛܪܲܬ̤ ܪܘܼܚܝ.

¹³ܘܗܵܠܹܝܢ ܟܲܣܝܼܬ̇ ܒܠܸܒܵܟ݂: ܝܵܕܲܥ ܗ̄ܘܹܿܝܬ̣ ܕܗܵܕܹܐ ܗܘ̤ܵܬ̣ ܒܪܥܝܵܢܵܟ݂.

¹⁴ܕܐܸܢ ܚܛܹ̇ܝܬ̣: ܢܵܛܲܪ ܐܲܢ̄ܬ̇ ܠܝܼ ܘܡ̣ܢ ܚܛܵܗܲܝ̈ ܠܵܐ ܡܙܲܟܹ̇ܐ ܐܲܢ̄ܬ̇ ܠܝܼ.

¹⁵ܐܸܢ ܚܛܹ̇ܝܬ̣: ܘܵܝ ܠܝܼ. ܘܐܸܢ ܐܸܙܕܲܕ̇ܩܹ̇ܬ̣: ܠܵܐ ܐܲܪܝܼܡ ܪܹܫܝ. ܡܣܲܒܲܥ ܐ̄ܢܵܐ ܨܲܥܪܵܐ: ܘܲܚܙܹ̇ܝܬ̣ ܡܘܼܟܵܟ݂ܝ.

¹⁶ܘܐܸܢ ܐܸܬ̇ܬ̇ܪܝܼܡ: ܐܲܝܟ݂ ܐܲܪܝܵܐ ܬܨܘܼܕܲܢܝ. ܘܗܵܦܲܟ݂ ܐܲܢ̄ܬ̇ ܡܸܬ̣ܓܲܢ̄ܒܲܪ ܥܠܲܝ.

¹⁷ܘܡܲܚܪܸܐ ܐܲܢ̄ܬ̇ ܙܲܝܢܵܟ݂ ܠܘܼܩܒܲܠܝ. ܘܡܲܣܓܹ̇ܐ ܐܲܢ̄ܬ̇ ܪܘܼܓ̣ܙܵܟ݂ ܠܘܵܬ̣ܝ. ܘܚܲܝ̈ܠܵܘܵܢ ܡܚܲܠܸܦ ܐܲܢ̄ܬ̇ ܥܠܲܝ.

¹⁸ܘܲܠܡܵܢܵܐ ܡ̣ܢ ܡܲܪܒ̇ܥܵܐ ܐܲܦܸܩ̣ܬܵܢܝ. ܣܵܦܹ̇ܬ̣ ܕܹܝܢ: ܘܥܹܝܢ ܠܵܐ ܚܙܵܬܲܢܝ.

¹⁹ܘܲܗܘܹܿܝܬ̣ ܕܹܝܢ ܐܲܝܟ݂ ܕܠܵܐ ܗ̄ܘܹܿܝܬ̣. ܘܡ̣ܢ ܟܲܪܣܵܐ ܠܩܲܒ̣ܪܵܐ ܕܹܝܢ ܐܵܘܒ̇ܠܘܼܢܝ.

²⁰ܙܥܘܿܪܝܼܢ ܐܸܢܘܿܢ ܝܵܘ̈ܡܵܬ̣ܵܐ ܕܚܲܝܲܝ̈. ܦܪܘܿܩ ܡܹܢܝ: ܘܐܸܫܠܹܐ ܘܐܸܬ̇ܬ̇ܢܝܼܚ ܩܲܠܝܼܠ.

²¹ܥܲܕܠܵܐ ܐܵܙܹ̇ܠ ܐ̄ܢܵܐ: ܘܬ̣ܘܼܒ̣ ܠܵܐ ܐܸܗܦܘܿܟ݂: ܠܐܲܪܥܵܐ ܚܸܫܘܿܟ݂ܬܵܐ ܕܛܸܠܵܠܲܝ̈ ܡܵܘܬܵܐ.

²²ܐܲܪܥܵܐ ܕܫܲܗܝܵܐ ܐܲܝܟ݂ ܚܲܒܵܪܵܐ ܘܛܸܠܵܠܲܝ̈ ܡܵܘܬܵܐ: ܘܠܲܝܬ̇ ܒܵܗ̇ ܣܸܕ݂ܪ̈ܝܼܢ ܘܕ݂ܵܪ̈ܝܼܢ: ܘܲܡܫܲܗܝܵܐ ܐܲܝܟ݂ ܚܲܒܵܪܵܐ.