Read Aramaic Peshita Job 11 Bible Online

Job 11 - Aramaic Peshita bible

Job 11

¹ܘܲܥ̣ܢܵܐ ܨܘܿܦܵܪ ܢܲܥܡܬ̣ܵܝܵܐ: ܘܐܸܡܲܪ.

²ܒܣܘܿܓ̣ܵܐܐ ܕܡܸܠܹ̈ܐ ܠܵܐ ܥܵܢܹܿܐ. ܐܵܦܠܵܐ ܓܲܒ̣ܪܵܐ ܡܲܠܵܠܵܐ ܒܦܸܬ̣ܓ̣ܵܡܵܘ̈ܗܝ ܡܸܙܕܲܕܲܩ.

³ܗܵܐ ܥܲܠ ܡܸܠܲܝ̈ܟ ܡܝܼ̈ܬܹܐ ܗ̄ܘܼ ܢܸܫܬ̇ܩܘܼܢ. ܐܲܢ̄ܬ̇ ܡܡܲܠܸܠ: ܘܠܲܝܬ̇ ܕܟ݂ܵܠܹ̈ܐ ܠܵܟ݂. ܘܐܸܢ ܡܡܲܝܸܩ ܐܲܢ̄ܬ̇: ܠܲܝܬ̇ ܕܡܲܟܸ̇ܣ ܠܵܟ݂.

⁴ܘܐܵܡܲܪ ܐܲܢ̄ܬ̇ ܕܟܹܐܢܵܐܝܼܬ̣ ܐܸܬ̇ܕܲܒ̇ܪܹܬ̣. ܘܲܕ݂ܟܸܐ ܗ̄ܘܲܝܬ̇ ܒܥܲܝ̈ܢܲܝ ܢܲܦ̮ܫܵܟ݂.

⁵ܒܪܲܡ ܡ̇ܢ ܕܹܝܢ ܥ̣ܒܲܕ݂ ܕܝܵܗܹ̇ܒ̣ ܗ̄ܘܼܵܐ ܐܲܠܵܗܵܐ ܦܸܬ̣ܓ̣ܵܡܵܐ. ܘܲܡܪܝܼܡ ܗ̄ܘ̣ܵܐ ܣܸܦ̈ܘܵܬܹܗ ܥܲܡܵܟ݂.

⁶ܘܲܡܚܵܘܹܐ ܗ̄ܘܼܵܐ ܠܵܟ݂ ܟܲܣ̈ܝܵܬ̣ܵܐ ܕܚܸܡ̱ܬ̣ܵܐ. ܡܸܛܠ ܕܐܝܼܬ̣ ܠܵܗ̇ ܩܸܦܠܹ̈ܐ ܠܚܸܟ݂ܡ̱ܬ̣ܵܐ. ܘܝܵܕܲܥ ܗ̄ܘܲܝܬ̇ ܕܫܵܒܹ̇ܩ ܗ̄ܘܼܵܐ ܠܵܟ݂ ܐܲܠܵܗܵܐ ܚܛܵܗܲܝ̈ܟ.

⁷ܒܘܼܕܵܩܹܗ ܕܐܲܠܵܗܵܐ ܡܸܫܟܲܚ ܐܲܢ̄ܬ̇ ܠܡܸܕܲܥ. ܐܵܘ ܥܲܠ ܣܵܘܦܹܗ ܕܚܲܣܝܼܢܵܐ ܡܸܫܟܲܚ ܐܲܢ̄ܬ̇ ܠܲܡܩܵܡ.

⁸ܪܵܘܡܵܐ ܕܲܫܡܲܝܵܐ ܝܵܕܲܥ ܐܲܢ̄ܬ̇. ܐܵܘ ܥܘܼܡܩܵܐ ܕܲܫܝܘܿܠ ܡ̣ܢ ܐܲܝܡܸܟܵܐ ܝܵܕܲܥ ܐܲܢ̄ܬ̇.

⁹ܐܲܪܝܼܟ݂ܵܐ ܗ̄ܝܼ ܡ̣ܢ ܐܲܪܥܵܐ ܡܫܘܼܚܬ̣ܵܗ̇. ܘܦܲܬ̣ܝܵܐ ܗ̄ܝ ܡ̣ܢ ܝܲܡܵܐ.

¹⁰ܐܸܢ ܢܸܥܒܲܪ ܢܹܐܚܘܿܕ݂ ܘܲܢܟܲܢܸܫ: ܡܲܢ̣ܘܼ ܡܲܗܦܸܟ݂ ܠܹܗ.

¹¹ܡܸܛܠ ܕܗ̤ܘܝܘܼ ܓܹܝܪ ܝܵܕܲܥ: ܐܸܡܲܬ̣ܝ ܗܵܘܹܿܐ ܙܲܒ̣ܢܵܐ. ܘܚܵܙܹ̇ܐ ܥܵܘܼܠܵܐ: ܘܗ̤ܘ ܡܸܬ̣ܒܲܝܲܢ.

¹²ܘܓܲܒ̣ܪܵܐ ܕܲܕ݂ܟ݂ܐ ܡܸܬ̣ܠܲܒܲܒ̣. ܘܲܕ݂ܓܲܢ̄ܒܵܪ: ܥܵܕܲܪ ܠܐ̄ܢܵܫ.

¹³ܐܸܠܘܼ ܐܲܢ̄ܬ̇ ܐܲܬ̣ܩܸܢ̣ܬ̇ ܠܸܒܵܟ݂: ܘܲܦܫܲܛ̣ܬ̇ ܐܝܼܕܲܝ̈ܟ ܠܘܵܬܹܗ.

¹⁴ܐܸܢ ܐܝܼܬ̣ ܗ̄ܘܼܵܐ ܥܵܘܼܠܵܐ ܒܐܝܼܕܲܝ̈ܟ: ܡܲܪܚܸܩ ܗ̄ܘܼܵܐ ܠܹܗ. ܘܠܵܐ ܐܲܫ̣ܪܝܼܬ̇ ܒܡܲܫܟ̇ܢܵܟ݂ ܥܵܘܼܠܵܐ.

¹⁵ܘܗܵܝܕܹܿܝܢ ܬܪܝܼܡ ܐܝܼܕܲܝ̈ܟ: ܘܡ̣ܢ ܥܵܩܵܐ ܠܵܐ ܬܸܕ݂ܚܲܠ.

¹⁶ܘܗܵܝܕܹܿܝܢ ܥܲܡܠܵܟ݂ ܬܸܬ̣̱ܢܫܸܐ. ܘܐܲܝܟ݂ ܡܲـ̈ـܝܵܐ ܥܵܒ̣̇ܘܿܪܹ̈ܐ ܬܸܬ̇ܕ̇ܒܲܪ.

¹⁷ܘܡ̣ܢ ܛܲܗܪܵܐ ܢܩܘܼܡ ܚܸܦܪܵܐ. ܘܥܲܪܦܸܠܵܐ ܐܲܝܟ݂ ܨܲܦܪܵܐ ܬܸ̇ܗܘܹܐ.

¹⁸ܘܬܸܬ̇ܟܸܠ ܕܐܝܼܬ̣ ܣܲܒ̣ܪܵܐ: ܘܬܸܕ݂ܡܲܟ݂ ܘܲܬܸܬ̇ܢܝܼܚ.

¹⁹ܘܠܲܝܬ̇ ܕܲܡܥܝܼܪ ܠܵܟ݂. ܢܸܒ̣ܥܘܿܢ ܐܲܦܲܝ̈ܟ ܣܲܓܝܼ̈ܐܹܐ.

²⁰ܘܥܲܝܢܲܝ̈ܗܘܿܢ ܕܪܲܫܝܼܥܹܐ ܢܸܚܫ̈ܟ݂ܵܢ. ܘܬ̣ܘܼܩܦܗܘܿܢ ܢܹܐܒܲܕ݂ ܡܸܢܗܘܿܢ: ܘܣܲܒ̣ܪܵܐ ܕܢܲܦ̮̈ܫܵܬ̣ܗܘܿܢ.