Read Aramaic Peshita Job 12 Bible Online

Job 12 - Aramaic Peshita bible

Job 12

¹ܘܲܥ̣ܢܵܐ ܐܝܼܘܿܒ̣ ܘܐܸܡܲܪ.

²ܒܩܘܼܫܬܵܐ ܐܲܢ̄ܬ̇ܘܿܢ ܐܸܢܘܿܢ ܥܲܡܵܐ. ܘܥܲܡܟ݂ܘܿܢ ܬܡܘܬ̣ ܚܸܟ݂ܡ̱ܬ̣ܵܐ.

³ܐܵܦ ܠܝܼ ܠܸܒܵܐ ܐܝܼܬ̣ ܠܝܼ ܐܲܟ݂ܘܵܬ̣ܟ݂ܘܿܢ. ܘܠܵܐ ܗ̄ܘܹܿܝܬ̇ ܒܨܝܼܪ ܡܸܢܟ݂ܘܿܢ.

⁴ܠܡ̇ܢ ܗ̤ܘܝ̈ ܐܲܝܟ݂ ܗܵܠܹܝܢ. ܘܲܗܘ̤ܵܐ ܓܘܼܚܟܵܐ ܠܚܲܒ̣ܪ̈ܵܘܗܝ: ܘܲܩ̣ܪܵܐ ܠܐܲܠܵܗܵܐ ܘܲܥ̣ܢܵܝܗܝ: ܕܨܵܒܹ̇ܐ ܒܙܲܕ̇ܝܼܩܹ̈ܐ ܕܠܵܐ ܡܘܼܡ.

⁵ܠܡܲܦܪܵܩܘܼ ܫܵܛ̇ܝܘܼܬ̣ܵܐ ܘܥܵܘܼܠܵܐ: ܘܲܠܡܲܬ̣ܩܵܢܘܼ ܪܸܓ̣ܠܵܐ ܡܙܵܥܬܵܐ.

⁶ܢܫܲܢܘܿܢ ܡܲܫܟ̇ܢܲܝ̈ܗܘܿܢ ܕܒ̣ܵܙ̇ܘܿܙܹ̈ܐ. ܘܬ̣ܘܼܟ݂ܠܵܢܗܘܿܢ ܕܐܲܝܠܹܝܢ ܕܡܲܪܓ̇ܙܝܼܢ ܠܐܲܠܵܗܵܐ. ܡܸܛܠ ܕܠܲܝܬ̇ ܐܲܠܵܗܵܐ ܒܠܸܒ̇ܗܘܿܢ.

⁷ܘܐܸܢ ܠܵܐ: ܫܲܐܸܠ ܠܚܲܝ̄ܘܬ݂ܵܐ: ܘܬܲܠܦܲܟ݂. ܘܲܠܦܵܪܲܚܬ̣ܵܐ ܕܲܫܡܲܝܵܐ: ܘܲܬ̣ܚܵܘܹܝܟ݂.

⁸ܘܐܸܫܬܲܥܵܐ ܠܐܲܪܥܵܐ: ܘܬܲܠܦܵܟ݂. ܘܢܸܫܬܲܥܘܿܢ ܠܵܟ݂ ܢܘܼܢܹ̈ܐ ܕܲܒ̣ܝܲܡܵܐ.

⁹ܡܲܢ̣ܘܼ ܕܠܵܐ ܝܵܕܲܥ ܒܗܵܠܹܝܢ ܟܠܗܹܝܢ: ܕܐܝܼܕܹܗ ܕܡܵܪܝܵܐ ܥܸܒ̣ܕܲܬ̤ ܗܵܠܹܝܢ.

¹⁰ܡܸܛܠ ܕܒ̣ܐܝܼܕܹܗ ܐܸܢܹܝܢ ܢܲܦ̮̈ܫܵܬ̣ܵܐ ܕܟ݂ܠ ܕܚܲܝ: ܘܪܘܼܚܵܐ ܕܟ݂ܠ ܒܣܲܪ ܘܐ̄ܢܵܫ.

¹¹ܐܸܕ݂ܢܵܐ ܫܵܡ̇ܥܵܐ ܡܸܠܹ̈ܐ. ܘܚܸܟܵܐ ܛܵܥܹ̇ܡ ܡܹܐܟ݂ܘܼܠܬܵܐ.

¹²ܘܲܒ̣ܩܲܫܝܼ̈ܫܹܐ ܚܸܟ݂ܡ̱ܬ̣ܵܐ: ܘܲܒ̣ܢܘܼܓ̣ܪܵܐ ܕܝܵܘ̈ܡܵܬ̣ܵܐ ܒܘܼܝܵܢܵܐ.

¹³ܥܲܡܹܗ ܗ̄ܝܼ ܚܸܟ݂ܡ̱ܬ̣ܵܐ ܘܓܲܢ̄ܒܵܪܘܼܬ̣ܵܐ. ܕܝܼܠܹܗ ܗ̄ܝܼ ܬܲܪܥܝܼܬ̣ܵܐ ܘܒ̣ܘܼܝܵܢܵܐ.

¹⁴ܗܵܐ ܐܸܢ ܣܵܚܹ̇ܦ: ܡܲܢ̣ܘܼ ܒܵܢܹ̇ܐ. ܘܐܸܢ ܐܵܚܹ̇ܕ݂ ܒܐܲܦܲܝ̈ ܐ̄ܢܵܫ: ܡܲܢܘܼ ܦܵܬܲܚ.

¹⁵ܐܸܢ ܓܵܥ̇ܲܪ ܒܡܲـ̈ـܝܵܐ: ܝܵܒ̣̇ܫܝܼܢ. ܘܐܸܢ ܡܫܲܕܲܪ ܠܗܘܿܢ: ܗܵܦ̇ܟ̇ܝܼܢ ܐܲܪܥܵܐ.

¹⁶ܕܝܼܠܹܗ ܗ̄ܘܼ ܬܘܼܩܦܵܐ ܘܚܸܟ݂ܡ̱ܬ̣ܵܐ. ܕܝܼܠܹܗ ܗ̄ܘܼ ܥܘܼܫܢܵܐ ܘܦܘܼܪܩܵܢܵܐ.

¹⁷ܡܕܲܒܲܪ ܠܡܲܠ̈ܟܹܐ ܒܬܸܡܗܵܐ: ܘܲܠܕܲܝܵܢܹ̈ܐ ܗ̤ܘ ܡܲܫܛܹܐ.

¹⁸ܡܲܚܸܬ̣ ܠܡܲܠܟ̇ܝܼ̈ܢ ܠܬܲܪܥܵܐ: ܘܐܵܣܲܪ ܚܙܵܩܹ̈ܐ ܒܚܲܨܲܝ̈ܗܘܿܢ.

¹⁹ܡܕܲܒܲܪ ܠܟ݂ܵܗܢܹ̈ܐ ܒܬ̤ܡܗܵܐ: ܘܲܠܥܲܫܝܼ̈ܢܹܐ ܡܫܲܦܸܠ.

²⁰ܡܲܥܒܲܪ ܡܲܡܠܠܵܐ ܡ̣ܢ ܡܗܲܝܡܢܹ̈ܐ. ܘܛܲܥܡܵܐ ܕܣܵܒܹ̈ܐ ܫܵܩܹ̇ܠ.

²¹ܐܵܫܹ̇ܕ݂ ܫܵܛ̇ܝܘܼܬ̣ܵܐ ܥܲܠ ܫܲܠܝܼܛܵܢܹ̈ܐ. ܘܲܚܠܝܼܨܘܼܬ̣ܗܘܿܢ ܕܬܲܩܝܼ̈ܦܹܐ ܗ̤ܘ ܡܪܲܦܹܐ.

²²ܡܓܲܠܸܐ ܥܲܡܝܼ̈ܩܵܬ̣ܵܐ ܡ̣ܢ ܚܸܫܘܿܟ݂ܵܐ. ܘܡܲܦܸܩ ܠܢܘܼܗܪܵܐ ܡ̣ܢ ܛܸܠܵܠܲܝ̈ ܡܵܘܬܵܐ.

²³ܡܲܛܥܹܐ ܠܥܲܡܡܹ̈ܐ: ܘܡܵܘܒܸ̇ܕ݂ ܠܗܘܿܢ. ܫܵܛ̇ܲܚ ܠܐܸܡ̈ܘܵܬ̣ܵܐ: ܘܫܵܒܹ̇ܩ ܠܗܹܝܢ.

²⁴ܡܲܫܛܹܐ ܠܸܒܵܐ ܕܪܹ̈ܫܵܘܗܝ ܕܥܲܡܵܐ ܕܐܲܪܥܵܐ. ܘܡܲܛܥܹܐ ܠܗܘܿܢ ܒܬ̣ܵܘܫܵܐ ܕܠܵܐ ܐܘܼܪܚܵܐ.

²⁵ܢܡܘܼܫܘܼܢ ܒܚܸܫܘܿܟ݂ܵܐ ܘܠܵܐ ܒܢܘܼܗܪܵܐ. ܢܓܲܫܓ̇ܫܘܼܢ ܚܸܫܘܿܟ݂ܵܐ ܘܠܵܐ ܢܲܗܝܼܪܵܐ. ܘܡܲܛܥܹܐ ܠܗܘܿܢ ܐܲܝܟ݂ ܪܵܘܲܝܵܐ.