Read Aramaic Peshita Job 13 Bible Online

Job 13 - Aramaic Peshita bible

Job 13

¹ܗܵܐ ܗܵܠܹܝܢ ܟܠܗܹܝܢ ܚܙܵܬ̤ ܥܲܝܢ̄ܝ: ܘܫܡܥܲܬ̤ ܐܸܕ݂ܢܝܼ ܘܐܲܬ̣ܒܲܝ̇ܢܹܬ̣.

²ܐܲܝܟ݂ ܝܼܕܲܥܬ̣ܟ݂ܘܿܢ ܝܵܕܲܥ ܐ̄ܢܵܐ ܐܵܦ ܐܸܢܵܐ. ܘܠܵܐ ܗ̄ܘܹ̇ܝܬ̣ ܒܨܝܼܪ ܡܸܢܟ݂ܘܿܢ.

³ܒܪܲܡ ܕܹܝܢ ܐܸܢܵܐ ܠܘܵܬ̣ ܚܲܣܝܼܢܵܐ ܡܡܲܠܸܠ ܐ̄ܢܵܐ. ܘܡܲܟ̇ܣܵܢܘܼܬ̣ܝ ܠܘܵܬ̣ ܐܲܠܵܗܵܐ ܐܹܚܵܘܹܐ.

⁴ܒܪܲܡ ܐܲܢ̄ܬ̇ܘܿܢ ܡܡܲܠܠܲܝ̈ ܫܘܼܩܪܵܐ ܐܲܢ̄ܬ̇ܘܿܢ. ܘܡܲܐܣܝܲܝ̈ ܒܠܵܐ ܡܸܕܹ̇ܡ ܐܲܢ̄ܬ̇ܘܿܢ. ܘܡܲܐܣܝܲܝ̈ ܒܠܵܐ ܡܸܕܹ̇ܡ ܐܲܢ̄ܬ̇ܘܿܢ.

⁵ܡ̇ܢ ܕܹܝܢ ܥ̣ܒܲܕ݂ ܕܡܸܫܬ̇ܝܼܩܝܼܢ ܗ̄ܘܲܝܬ̇ܘܿܢ. ܘܲܗܘ̤ܵܬ̣ ܠܟ݂ܘܿܢ ܕܹܝܢ ܗܵܕܹܐ ܠܚܸܟ݂ܡܵܐ.

⁶ܫܡܲܥܘ ܗܵܟܹܝܠ ܡܲܟ̇ܣܵܢܘܼܬ̣ܝ. ܘܨܘܼܬ̣ܘ ܕܝܼܢܵܐ ܕܣܸܦ̈ܘܵܬ̣ܝ.

⁷ܥܲܠ ܐܲܠܵܗܵܐ ܡܡܲܠܠܝܼܢ ܐܲܢ̄ܬ̇ܘܿܢ ܥܵܘܼܠܵܐ. ܘܲܥܠܵܘܗܝ ܡܡܲܠܠܝܼܢ ܐܲܢ̄ܬ̇ܘܿܢ ܢܸܟ݂ܠܵܐ.

⁸ܒܐܲܦܲܘ̈ܗܝ ܢܵܣ̇ܒ̇ܝܼܢ ܐܲܢ̄ܬ̇ܘܿܢ ܐܵܘ ܥܲܡ ܐܲܠܵܗܵܐ ܕܵܝ̇ܢܝܼܢ ܐܲܢ̄ܬ̇ܘܿܢ.

⁹ܛܵܒ̣ ܠܟ݂ܘܿܢ ܕܒ̣ܵܨܹ̇ܐ ܠܟ݂ܘܿܢ ܐܵܘ ܐܲܝܟ݂ ܕܡܸܬ̇ܬ̇ܕ̇ܝܼܢ ܐܢ̄ܬ̇ܘ̇ܢ ܒܹܗ.

¹⁰ܡܲܟ̇ܣܘܼ ܢܲܟܸ̇ܣܟ݂ܘܿܢ. ܐܵܘ ܒܐܲܦܵܘ̈ܗܝ ܢܵܣ̇ܒ̇ܝܼܢ ܐܢ̄ܬ̇ܘܿܢ.

¹¹ܕܸܚ̱ܠܬܹܗ ܬܲܒ̣ܥܸܬ̣ܟ݂ܘܿܢ ܘܙܵܘܼܥܬܹܗ ܬܸܦܸܠ ܥܠܲܝܟ̇ܘܿܢ.

¹²ܐܸܬ̇ܕܲܟ݂ܪܘ ܕܡ̣ܢ ܥܲܦܪܵܐ ܗ̄ܘܼ ܫܘܼܠܛܵܢܟ݂ܘܿܢ. ܘܥܲܠ ܓܸܢ̄ܒ̣ ܛܝܼܢܵܐ ܗ̄ܘܼ ܡܸܕ݂ܝܵܪܟ݂ܘܿܢ.

¹³ܫܬ̣ܘܿܩܘ ܡܹܢܝ: ܘܐܹܡܲܠܸܠ ܐܵܦ ܐܸܢܵܐ. ܘܐܹܡܲܪ ܟܠܡܸܕܹ̇ܡ ܕܲܥ̣ܒܲܪ ܥܠܲܝ.

¹⁴ܥܲܠ ܡܵܢܵܐ ܫܩܝܼܠ ܐ̄ܢܵܐ ܒܸܣܪܝ ܒܫܸܢܲܝ̈. ܘܢܲܦ̮ܫܝ ܣܝܼܡܵܐ ܒܐܝܼ̈ܕܲܝ.

¹⁵ܐܸܢ ܢܸܩܛܠܲܝ: ܠܹܗ ܗ̄ܘܼ ܡܣܲܟܹ̇ܐ ܐ̄ܢܵܐ ܒܲܠܚܘܿܕ݂. ܡܸܛܠ ܕܐܘܼܪ̈ܚܵܬ̣ܝ ܩܕ݂ܵܡܵܘܗܝ ܐܸܢܹܝܢ.

¹⁶ܘܐܵܦ ܗ̤ܘ ܢܸܗܘܹܐ ܠܝܼ ܦܵܪܘܿܩܵܐ ܡܸܛܠ ܕܠܵܐ ܥܵܐܹ̇ܠ ܩܕ݂ܵܡܵܘܗܝ ܚܲܠܦܵܐ.

¹⁷ܫܡܲܥܘ ܡܸܫܡܲܥ ܡܸـ̈ـܠܲܝ. ܘܬܲܚܘܝܼܬ̣ܝ ܐܹܡܲܪ ܩܕ݂ܵܡܲܝܟ̇ܘܿܢ.

¹⁸ܗܵܐ ܐܵܦ ܐܸܢܵܐ ܡܲܝܬܹ̇ܐ ܐܢܵܐ ܕܝܼܢܝ. ܘܝܵܕܲܥ ܐ̄ܢܵܐ ܕܐܸܢܵܐ ܗ̄ܘܼ ܙܲܟܵܝ.

¹⁹ܡܲܢ̣ܘܼ ܟ݂ܵܐܹ̇ܢ ܥܲܡܝ: ܕܗܵܫܵܐ ܐܸܫܬ̇ܘ̇ܩ ܘܐܸܬ̇ܬ̇ܢܝܼܚ.

²⁰ܒܪܲܡ ܬܲܪܬܹܿܝܢ ܠܵܐ ܬܲܥܒܲܪ ܡܹܢܝ. ܘܗܵܝܕܹܿܝܢ ܡ̣ܢ ܩܕ݂ܵܡܲܝܟ ܠܵܐ ܐܸܬ̇ܛܥܸܐ.

²¹ܐܝܼܕ݂ܵܟ݂ ܠܵܐ ܬܲܦܪܸܩ ܡܹܢܝ. ܘܕܸܚ̱ܠܬ̣ܵܟ݂ ܠܵܐ ܬܙܝܼܥܲܢܝ.

²²ܘܲܩܪܝܼܢܝ ܘܐܸܢܵܐ ܐܹܥܢܹܐ: ܐܘ ܐܹܡܲܠܸܠ ܘܐܲܬ̣ܝܼܒܲܢܝ ܦܸܬ̣ܓ̣ܵܡܵܐ.

²³ܟܡܵܐ ܠܝܼ ܚܵܘ̈ܒܹ̇ܐ ܘܲܚܛܵܗܹ̈ܐ. ܚܵܘ̈ܒܲܝ ܘܲܚܛܵܗܲܝ̈ ܐܵܘܕܲܥܲܝܢܝ.

²⁴ܠܡܵܢܵܐ ܡܲܗܦܸܟ݂ ܐܲܢ̄ܬ̇ ܐܲܦܲܝ̈ܟ ܡܹܢܝ. ܘܲܚ̣ܫܲܒ̣ܬܵܢܝ ܠܵܟ݂ ܐܲܝܟ݂ ܒܥܸܠܕܵܒ̣ܵܒ̣ܵܐ.

²⁵ܠܛܲܪܦܵܐ ܝܲܒ̇ܝܼܫܵܐ ܕܢܵܬܲܪ: ܕܵܐܹ̇ܫ ܐܲܢ̄ܬ̇ ܘܲܠܓܸܠܵܐ ܝܲܒ̇ܝܼܫܵܐ ܪܵܕܹܦ ܐܲܢ̄ܬ̇.

²⁶ܕܲܟ݂ܬܲܒ̣ܬ̇ ܥܠܲܝ ܡܲܪܕ̇ܘܼܬ̣ܵܐ ܘܡܲܕ݂ܟܲܪ ܐܲܢ̄ܬ̇ ܥܠܲܝ ܚܵܘ̈ܒܹ̇ܐ ܕܛܵܠܝܘܼܬ̣ܝ.

²⁷ܘܣ̣ܵܡܬ̇ ܪܸ̈ܓ̣ܠܲܝ ܒܣܲܕܵܐ ܘܲܢ̣ܛܵܪܬ̇ ܟܠܗܹܝܢ ܐܘܼܪ̈ܚܵܬ̣ܝ. ܘܥܲܠ ܬܘܼܩܦܵܐ ܕܪܸ̈ܓ̣ܠܲܝ ܬܸܚܙܹܐ.

²⁸ܘܗ̤ܘ ܐܲܝܟ݂ ܪܲܩܒ̣ܵܐ ܕܒ̣ܵܠܹ̇ܐ: ܘܐܲܝܟ݂ ܠܒ̣ܘܼܫܵܐ ܕܐܵܟܹܿܠ ܠܹܗ ܣܵܣܵܐ.