Read Aramaic Peshita Job 15 Bible Online

Job 15 - Aramaic Peshita bible

Job 15

¹ܘܲܥܢ̣ܵܐ ܐܹܠܝܼܦܵܙ ܬܲܝܡ̄ܢܵܝܵܐ ܘܐܹܡ̣ܲܪ.

²ܚܲܟ̇ܝܼܡ ܪܘܼܚܵܐ ܢܸܥܢܹܐ ܒܝܼܕܲܥܬ̣ܵܐ: ܘܢܸܡܠܹܐ ܚܸܡܬ̣ܵܐ ܟܲܪܣܹܗ.

³ܠܡܲܟܵܣܘܼ ܡܸܠ̈ܝܼܢ ܕܠܵܐ ܟܵܫܪܵܢ: ܘܲܒ̣ܡܸܠܹ̈ܐ ܕܠܲܝܬ̇ ܒܗܹܝܢ ܝܘܼܬ̣ܪܵܢ.

⁴ܐܵܦ ܐܲܢ̄ܬ̇ ܡܒܲܛܸܠ ܐܲܢ̄ܬ̇ ܕܸܚ̱ܠܬ̣ܵܐ. ܘܡܲܣܓܹ̇ܐ ܐܲܢ̄ܬ̇ ܡܡܲܠܸܠ ܩܕ݂ܵܡ ܐܲܠܵܗܵܐ.

⁵ܡܸܛܠ ܕܢܹܐܠܲܦ ܦܘܼܡܵܟ݂ ܚܛܵܗܹ̈ܐ. ܘܨܵܒܹ̇ܐ ܐܲܢ̄ܬ̇ ܕܢܸܟ݂ܠܵܐ.

⁶ܢܚܲܒ̣ܵܟ݂ ܦܘܼܡܵܟ݂ ܘܠܵܐ ܐܸܢܵܐ. ܘܣܸܦ̈ܘܵܬ̣ܵܟ݂ ܢܲܣ̱ܗ̈ܕ݂ܵܢ ܒܵܟ݂ ܩܕ݂ܵܡܲܝ.

⁷ܕܲܠܡܵܐ ܩܕ݂ܵܡ ܐ̄ܢܵܫܵܐ ܐܸܬ̣ܝܼܠܸܕ̇ܬ̇. ܐܵܘ ܡ̣ܢ ܩܕ݂ܵܡ ܪ̈ܵܡܵܬ̣ܵܐ ܐܸܬ̣ܒ̇ܛ̣ܢܬ̇.

⁸ܒܐ̄ܪܵܙܹܗ ܕܡܵܪܝܵܐ ܫܡܲܥ̣ܬ̇: ܘܐܸܬ̣ܓܲܠܝܲܬ̤ ܠܵܟ݂ ܚܸܟ݂ܡܬ̣ܵܐ.

⁹ܡܵܢܵܐ ܝܵܕܲܥ ܐܲܢ̄ܬ̇ ܕܲܚܢܲܢ ܠܵܐ ܝܵܕ݂ܥܝܼܢ ܚ̄ܢܵܢ. ܐܵܘ ܡܵܢܵܐ ܡܸܬ̣ܒܲܝܲܢ ܐܲܢ̄ܬ̇ ܕܠܵܐ ܗ̄ܘܼܵܐ ܠܘܵܬ̣ܵܢ.

¹⁰ܗܵܐ ܐܝܼܬ̣ ܒܲܢ ܕܣܵܒ̣: ܐܵܦ ܐܝܼܬ̣ ܒܲܢ ܕܩܲܫܝܼܫ: ܘܲܕ݂ܥܲܬ̇ܝܼܩ ܐܵܦ ܡ̣ܢ ܐܲܒ̣ܘܼܟ݂ ܒܝܵܘ̈ܡܵܬ̣ܵܐ.

¹¹ܐܲܙܥܲܪ ܡܸܢܵܟ݂ ܠܘܼܚܵܡܵܘ̈ܗܝ ܕܐܲܠܵܗܵܐ. ܘܡܲܠܸܠ ܒܲܢܝܵܚ ܠܘܵܬ̣ ܢܲܦ̮ܫܵܟ݂.

¹²ܠܡܵܢܵܐ ܐܸܬ̇ܬ̇ܪܝܼܡ ܠܸܒܵܟ݂. ܘܡܵܢܵܐ ܡܪ̈ܲܡܙܵܢ ܥܲܝܢܲܝ̈ܟ.

¹³ܕܲܡܪܝܼܡ ܐܲܢ̄ܬ̇ ܠܘܵܬ̣ ܐܲܠܵܗܵܐ ܪܘܼܚܵܟ݂: ܘܡܲܦܸܩ ܐܲܢ̄ܬ̇ ܡ̣ܢ ܦܘܼܡܵܟ݂ ܡܸܠܹ̈ܐ.

¹⁴ܡܲܢ̣ܘܼ ܐ̄ܢܵܫܵܐ ܕܢܸܙܟܸ̇ܐ: ܐܵܘ ܡܲܢܘܼ ܢܸܙܕܲܕܲܩ ܝܼܠܝܼܕ݂ ܐܲܢ̄ܬܬ̣ܵܐ.

¹⁵ܗܵܐ ܒܩܲܕ̇ܝܼܫܵܘ̈ܗܝ ܠܵܐ ܡܗܲܝܡܸܢ ܘܲܫܡܲܝܵܐ ܠܵܐ ܕܟܹܝܢ ܩܕ݂ܵܡܵܘܗܝ.

¹⁶ܐܵܦ ܐܸܢ ܡܸܣܬ̇ܠܹܐ ܘܡܸܬ̇ܛܲܪܹܦ ܓܲܒ̣ܪܵܐ: ܢܸܫܬܹ̇ܐ ܥܵܘܼܠܵܐ ܐܲܝܟ݂ ܡܲـ̈ـܝܵܐ.

¹⁷ܐܹܚܵܘܹܝܟ݂: ܫܡܲܥܲܝܢܝ ܘܡܸܕܹ̇ܡ ܕܲܚܙܹ̇ܝܬ̣ ܐܹܬܲܢܹܐ.

¹⁸ܕܚܲܟ̇ܝܼܡܹ̈ܐ ܚܵܘܝܼܘ: ܘܠܵܐ ܟܲܣ̣ܝܼܘ ܡ̣ܢ ܐܲܒ̣ܵܗܲܝ̈ܗܘܿܢ.

¹⁹ܠܗܘܿܢ ܒܲܠܚܘܿܕܲܝܗܘܿܢ ܐܸܬ̣ܝܲܗ̄ܒܲܬ̤ ܐܲܪܥܵܐ. ܘܠܵܐ ܥ̣ܒܲܪ ܢܘܼܟ݂ܪܵܝܵܐ ܒܲܝܢܵܬ̣ܗܘܿܢ.

²⁰ܟܠ ܝܵܘܡܵܘ̈ܗܝ ܕܪܲܫܝܼܥܵܐ ܡܸܬ̣ܪܵܘܪܲܒ̣. ܘܡܸܢܝܵܢ ܫ̣ܢܵܘ̈ܗܝ ܢܸܬ̣ܢ̱ܛܲܪ ܠܚܲܣܝܼܢܵܐ.

²¹ܩܵܠ ܙܵܘܼܥܬ̣ܵܐ ܒܐܸܕ݂ܢܵܘ̈ܗܝ. ܘܒܲܫܠܵܡܵܐ ܒܵܙ̇ܘܿܙܵܐ ܢܹܐܬܹܐ ܥܠܵܘܗܝ.

²²ܠܵܐ ܡܗܲܝܡܸܢ ܕܗܵܦܹ̇ܟ݂ ܡ̣ܢ ܚܸܫܘܿܟ݂ܵܐ. ܚܵܙܹ̇ܐ ܚܲܪܒܵܐ.

²³ܥܵܪܹܩ ܗ̄ܘܼܵܐ ܠܠܘܼܚܵܡܵܐ ܕܕ݂ܝܼܢܵܐ. ܘܐܲܝܟܵܐ ܕܗ̤ܘ ܝܵܕܲܥ ܕܲܡܛܲܝܲܒ̣ ܗ̄ܘܼ ܒܐܝܼܕܹܗ ܝܵܘܡܵܐ ܕܚܸܫܘܿܟ݂ܵܐ.

²⁴ܢܸܒ̣ܥ̱ܬ̣ܝܼܘܗܝ ܐܘܼܠܨܵܢܵܐ. ܘܥܵܩ̇ܬ̣ܵܐ ܬܲܕ݂ܪ̱ܟ݂ܝܼܘܗܝ: ܐܲܝܟ݂ ܡܲܠܟܵܐ ܕܲܡܛܲܝܲܒ̣ ܠܲܩܪܵܒ̣ܵܐ.

²⁵ܡܸܛܠ ܕܐܲܪܝܼܡ ܥܲܠ ܐܲܠܵܗܵܐ ܐܝܼܕܹܗ ܘܥܲܠ ܚܲܣܝܼܢܵܐ ܐܸܬ̣ܓܲܢ̄ܒܲܪ.

²⁶ܘܲܪܗܸܛ̣ ܥܠܵܘܗܝ ܒܨܵܘܪܵܐ ܪܵܡܵܐ ܘܲܒ̣ܩܵܦܝܵܐ ܕܲܩܕ݂ܵܠܹܗ: ܒܣܘܿܓܲܐܬ̣ ܣܸܕ݂ܪܹ̈ܐ ܕܣܲܟ̇ܪܹ̈ܐ.

²⁷ܘܟܲܣܝܼ ܐܲܦܵܘ̈ܗܝ ܒܬܲܪܒܹ̇ܗ ܘܲܥ̣ܒܲܕ݂ ܟܝܼܡܵܐ ܠܥܸܠ ܡ̣ܢ ܥܝܼܘܿܬ̣ܵܐ.

²⁸ܘܐܵܘܬܸ̇ܒ̣ ܩܘܼܪ̈ܝܵܐ ܚܲܪ̈ܒ̣ܵܬ̣ܵܐ ܕܠܵܐ ܝܵܬ̣̈ܒܵܢ. ܘܐܸܬ̇ܛܲܝܲܒ̣ ܠܲܩܪܵܒ̣ܵܐ.

²⁹ܠܵܐ ܢܟܲܬܲܪ ܘܠܵܐ ܢܩܘܼܡ ܚܲܝܠܹܗ. ܘܠܵܐ ܢܲܪܡܹܐ ܡܸܠܹ̈ܐ ܥܲܠ ܐܲܪܥܵܐ.

³⁰ܘܠܵܐ ܢܸܥ̱ܢܕ݂ܘܼܢ ܡ̣ܢ ܚܸܫܘܿܟ݂ܵܐ ܘܲܥܢܵܩܵܘ̈ܗܝ ܬܝܲܒܸ̇ܫ ܫܲܠܗܹܒ̣ܝܼܬ̣ܵܐ. ܢܸܫܛܹܐ ܒܪܘܼܚܵܐ ܕܦܘܼܡܹܗ.

³¹ܘܠܵܐ ܢܗܲܝܡܸܢ ܠܕܲܓܵܠܘܼܬ̣ܵܐ ܡܲܛܥ̱ܝܵܢܝܼܬ̣ܵܐ: ܡܸܛܠ ܕܐܝܼܩܹܐ ܗܘ̤ܵܬ̣ ܡܵܘܥܝܼܬܹܗ.

³²ܘܲܕ݂ܠܵܐ ܒܝܵܘ̈ܡܵܘܗܝ ܝܑܼܒ̣ܫ. ܘܐܝܼܕ݂ܵܘ̈ܗܝ ܠܵܐ ܢܸܫ̈ܟ̇ܚܵܢ.

³³ܢܸܥܩܘܿܪ ܐܲܝܟ݂ ܓܦܸܬܵܐ ܒܸܣܪ̈ܵܘܗܝ. ܘܢܸܫܕܹ̇ܐ ܐܲܝܟ݂ ܙܲܝܬܵܐ ܡܵܘܥܝܼܬܹܗ.

³⁴ܡܸܛܠ ܕܲܟ݂ܢܘܼܫܬܵܐ ܕܚܲܢܦܹ̈ܐ ܬܸܗܘܹܐ ܠܚܘܼܪܒܵܐ ܘܲܠܨܹܕ݂ܝܵܐ ܘܢܘܼܪܵܐ ܬܹܐܟ݂ܘܿܠ ܠܡܲܫ̈ܟ̇ܢܹܐ ܕܥܵܘܿܠܹ̈ܐ.

³⁵ܒܸܛ̣ܢܘ ܥܵܘܼܠܵܐ: ܘܝܑܼܠܸܕ݂ܘܥ̣ܬܵܐ. ܘܟܲܪ̈ܣܵܬ̣ܗܘܿܢ ܡܲܠ̈ܝܵܢ ܢܸܟ݂ܠܵܐ.