Read Aramaic Peshita Job 17 Bible Online

Job 17 - Aramaic Peshita bible

Job 17

¹ܪܘܼܚܝ ܐܸܬ̇ܛܲܪܦܲܬ̤: ܘܝܵܘ̈ܡܲܝ ܐܸܬ̇ܕܲܥܲܟ݂ܘ ܛܲܝܸܒ̣ܘ ܠܝܼ ܩܲܒ̣ܪܵܐ.

²ܡܸܛܠ ܕܠܲܝܬ̇ ܫܘܼܩܪܵܐ ܠܘܵܬ̣ܝ. ܘܒܲܡܪܵܪܗܘܿܢ ܒܵܬܲܬ̤ ܪܘܼܚܝ.

³ܣܝܼܡ ܢܹܐ ܡܸܫܟܵܢܝ ܠܘܵܬ̣ܵܟ݂: ܡܲܢ̣ܘܼ ܗܵܢܵܐ ܡܲܫܠܸܡ ܐܝܼܕ݂ܝ.

⁴ܡܸܛܠ ܕܠܸܒ̇ܗܘܿܢ ܟܲܣܝܼܬ̇ ܡ̣ܢ ܣܘܼܟܵܠܵܐ. ܡܸܛܠ ܗܵܢܵܐ ܢܸܬ̇ܬ̇ܪܝܼܡܘܼܢ ܒܦܵܠܓ̇ܘܼܬ̣ܵܐ.

⁵ܘܢܸܬ̣ܪܵܘܪܲܒ̣ ܪܵܚܡܵܐ ܥܲܠ ܪܵܚܡܹܗ ܘܥܲܝܢܹ̈ܐ ܕܲܒ̣ܢܲܝ̈ܗܘܿܢ ܢܸܚܫ̈ܟ݂ܵܢ.

⁶ܘܐܲܩܝܼܡ ܫܘܼܠܛܵܢܵܐ ܕܥܲܡܡܹ̈ܐ. ܘܬܲܚܦܝܼܬ̣ܵܐ ܥܲܠ ܐܲܦܲܝ̈ܗܘܿܢ ܐܸܗܘܹܐ.

⁷ܟܹܐܒܲܬ̤ ܡ̣ܢ ܪܘܼܓ̣ܙܵܐ ܥܲܝ̈ܢܲܝ. ܘܬܲܪ̈ܥܝܵܬ̣ܝ ܟܠܗܹܝܢ ܐܲܝܟ݂ ܛܸܠܵܢ̈ܝܵܬ̣ܵܐ.

⁸ܢܸܬ̣ܡ̱ܗܘܼܢ ܬܪ̈ܝܼܨܵܐ ܥܲܠ ܗܵܕܹܐ. ܘܙܲܟܵܝܵܐ ܥܲܠ ܚܲܝܵܒ̣ܵܐ ܢܸܬ̣ܢܲܦܲܨ.

⁹ܢܹܐܚܘܿܕ݂ ܙܲܕܿܝܼܩܵܐ ܐܘܼܪܚܹܗ: ܘܲܢܚܲܡܣܝܼܢ: ܘܲܕܿܕܲܟ݂̈ܝܵܢ ܐܝܼܕ݂ܵܘ̈ܗܝ: ܢܵܘܣܸܦ ܥܲܠ ܚܲܝܠܵܐ.

¹⁰ܒܪܲܡ ܗܵܐ ܟܠܟ݂ܘܿܢ ܬܵܒ̣ܬ̇ܘܿܢ. ܘܲܗܦܲܟ݂ܬ̇ܘܿܢ ܘܐܸܬܲܝܼܬ̇ܘܿܢ ܠܘܵܬ̣ܝ. ܘܠܵܐ ܐܸܫܟ̇ܚܹ̇ܬ̣ ܒܟ݂ܘܿܢ ܕܚܲܟ̇ܝܼܡ.

¹¹ܡܲܥܒ̇ܪ̈ܲܝ ܝܵܘ̈ܡܵܬ̣ܵܐ: ܡܒܲܛ̈ܠܲܝ ܡܲܚܫ̈ܒ̣ܵܬ̣ܵܐ ܡܵܘ̈ܒ̇ܕܲܝ ܠܠܸܒܵܘ̈ܬ̣ܵܐ ܕܥܲܡܡܹ̈ܐ.

¹²ܠܸܠܝܵܐ ܠܐܝܼܡܵܡܵܐ ܣܵܝ̇ܡܝܼܢ ܐܢ̄ܬ̇ܘܿܢ. ܘܢܲܗܝܼܪܵܐ ܡܩܲܪܒ̣ܝܼܢ ܐܢ̄ܬ̇ܘܿܢ ܡ̣ܢ ܩܕ݂ܵܡ ܚܸܫܘܿܟ݂ܵܐ.

¹³ܐܸܢ ܐܹܣܲܟܹܿܐ ܠܲܫܝܘܿܠ: ܒܲܝܬ̇ܝ ܗ̄ܘܼ. ܘܲܒ̣ܚܸܫܘܿܟ݂ܵܐ ܬܸܫܘܝܼܬ̣ܝ ܫܵܘܝܼܬ̣.

¹⁴ܠܲܚܒ̣ܵܠܵܐ ܩܪܹܝܿܬ̣ ܐܵܒ̣ܝ ܐܲܢ̄ܬ̇ ܘܐܹܡܝ ܘܚܵܬ̣ܝ ܠܪܸܡܬ̣ܵܐ.

¹⁵ܐܲܝܟܵܘ ܡܸܟܹ̇ܝܠ ܣܲܒ̣ܪܝ ܘܬ̣ܘܼܟ݂ܠܵܢܝ. ܘܲܠܣܲܒ݂ܪܝ ܡܵܢ̣ܘܼ ܢܸܫܟ̇ܚܝܼܘܗܝ.

¹⁶ܒܬ̣ܘܼܩܦܵܐ ܠܲܫܝܘܿܠ ܬܸܚܬ̣ܘܼܢ ܘܐܲܟ݂ܚ̄ܕ݂ܵܐ ܠܥܲܦܪܵܐ ܢܸܚܬ݂ܘܼܢ.