Read Aramaic Peshita Job 18 Bible Online

Job 18 - Aramaic Peshita bible

Job 18

¹ܘܲܥܢ̣ܵܐ ܒܸܠܕܵܕ݂ ܫܘܿܚܵܝܵܐ ܘܐܸܡܲܪ.

²ܥܕܲܡܵܐ ܠܐܲܡܲܬ̣ܝ ܣܵܝܿܡܝܼܢ ܐܢ̄ܬ̇ܘܿܢ ܣܵܩܘܼܒ̣ܠܵܐ ܠܡܸܠܹ̈ܐ. ܘܐܸܬ̣ܒܲܝܲܢܘ: ܘܐܲܚܪܵܝܑܬ̣ ܢܡܲܠܸܠ.

³ܠܡܵܢܵܐ ܐܸܬ̣ܚܫܸܒ̣̄ܢ ܐܲܝܟ݂ ܒܥܝܼܪܵܐ. ܘܐܸܬ̇ܛܲܡܲܐ̄ܢ ܒܥܲܝܢܲܝ̈ܟ: ܩܵܛܹܿܠ ܢܲܦ̮ܫܹܗ ܒܪܘܼܓ̣ܙܹܗ.

⁴ܗܵܐ ܡܸܛܠܵܬ̣ܵܟ݂ ܬܸܫܬ̇ܒܸܩ ܐܲܪܥܵܐ. ܘܲܢܫܲܢܹܐ ܛܘܼܪܵܐ ܡ̣ܢ ܕܘܼܟ̇ܬܹܗ.

⁵ܘܐܵܦ ܫܪܵܓ̣ܵܐ ܕܪ̈ܲܫܝܼܥܹܐ ܢܸܕܥܲܟ݂. ܘܐܵܦ ܬܵܓܹܗ ܫܲܠܗܹܒ̣ܝܼܬ݂ܵܐ ܕܢܘܼܪܹܗ.

⁶ܢܘܼܗܪܵܐ ܢܸܚܫܲܟ݂ ܒܡܲܫܟ̇ܢܹܗ ܘܲܫܪܵܓܹܗ ܢܸܕܥܲܟ݂ ܥܠܵܘܗܝ.

⁷ܢܸܨ̈ܕܲܝܵܢ ܗܲܠܟ݂ܵܬܹ̈ܗ ܒܟܹܐܒ̣ܵܘ̈ܗܝ ܘܲܬ̇ܛܲܒ̇ܥܝܼܘܗܝ ܬܲܪܥܝܼܬܹܗ.

⁸ܡܸܛܠ ܕܐܵܘܫܸܛ ܪܸܓ̣ܠܹܗ ܒܲܡܨܝܼܕ̇ܬܵܐ. ܘܥܲܠ ܣܪܝܼܓ̣ܬܵܐ ܗܲܠܸܟ݂.

⁹ܘܐܸܚܲܕ݂ ܦܲܚܵܐ ܒܥܸܩܒܹܗ ܢܸܬ̣ܥܲܫܢܘܼܢ ܥܠܵܘܗܝ ܨܲܗ̈ܘܵܢܹܐ.

¹⁰ܛܡܝܼܪ ܗ̄ܘܼ ܒܐܲܪܥܵܐ ܚܲܒ̣ܠܹܗ. ܘܲܡܨܝܼܕ̇ܬܹ̇ܗ ܥܲܠ ܫܒ̣ܝܼ̈ܠܹܐ ܬܸܬ̣ܟ̇ܪܸܟ݂.

¹¹ܚܲܕ݂ܪܘܼܗܝ ܣܸܕ݂ܪ̈ܲܝ ܒܘܼܠܗܵܝܵܐ. ܘܒܲܕܲܪܘ ܐܸܢܹܝܢ ܠܪܸ̈ܓ̣ܠܵܘܗܝ.

¹²ܘܢܸܗܘܹܐ ܟܲܦܢܵܐ ܟܹܐܒܹܗ: ܘܲܬ̣ܵܒ̣ܵܪܵܐ ܡܲܬ̣ܩܲܢ ܠܬ̣ܵܘ̈ܠܕ݂ܵܬܹܗ.

¹³ܢܸܬ̣ܐܲܟ݂̈ܠܵܢ ܒܬ̣ܘܼܩܦܵܐ ܩܘܼܪ̈ܝܹܗ: ܘܒܲܬ̣ܩܘܿܦ ܡܝܼܬܹ̈ܐ ܒܘܼܟ݂ܪܹܗ.

¹⁴ܢܸܬ̣ܦܣܸܩ ܡ̣ܢ ܡܲܫܟ̇ܢܹܗ ܬܘܟ݂ܠܵܢܹܗ. ܘܲܢܣܲܪܗܒ̣ܘܼܢܹܗ ܒܘܼ̈ܠܗܵܝܲܝ ܡܲܠܟܵܐ.

¹⁵ܘܢܸܫܪܘܿܢ ܒܡܲܫܟ̇ܢܹܗ ܡܸܛܠ ܕܠܲܝܬ̇ ܐ̄ܢܵܫ. ܬܸܬ̣ܒܲܕܲܪ ܥܲܠ ܐܲܬ̣ܪܹܗ ܟܹܒ̣ܪܝܼܬ̣ܵܐ.

¹⁶ܡ̣ܢ ܠܬܲܚܬ̇ ܥܸܩܵܪ̈ܵܘܗܝ ܢܹܐܒ݂ܫܘܼܢ. ܘܡ̣ܢ ܠܥܸܠ ܢܵـ̈ـܬܹܪ ܩܛܵܦܹܗ.

¹⁷ܢܹܐܒܲܕ݂ ܕܘܼܟ݂ܪܵܢܹܗ ܡ̣ܢ ܐܲܪܥܵܐ. ܘܠܲܝܬ̇ ܠܹܗ ܫܸܡ ܥܲܠ ܐܲܦܲܝ̈ ܒܪܝܼܬ̣ܵܐ.

¹⁸ܢܸܣܚܦܘܼܢܹܗ ܡ̣ܢ ܢܘܼܗܪܵܐ ܠܚܸܫܘܿܟ݂ܵܐ. ܘܡ̣ܢ ܬܹܒܹܝܠ ܢܸܕ݂ܚܩܘܼܢܹܗ.

¹⁹ܠܵܐ ܫܸܡ ܠܹܗ ܘܠܵܐ ܕܘܼܟ݂ܪܵܢ ܒܥܲܡܵܐ. ܘܠܵܐ ܢܸܗܘܹܐ ܠܹܗ ܣܪܝܼܕ݂ܵܐ ܒܡܲܥܡܪܹܗ.

²⁰ܥܲܠ ܝܵܘܡܵܘ̈ܗܝ ܢܸܬ̣ܡ̱ܗܘܼܢ ܐ̄ܚܪ̈ܵܝܹܐ. ܘܩܲܕ݂ܡܵܝܹ̈ܐ ܙܸܩܦܲܬ̤ ܣܥܲܪܬ̇ܗܘܿܢ.

²¹ܒܪܲܡ ܗܵܠܹܝܢ ܐܸܢܘܿܢ ܡܲܫܟ̇ܢܵܘ̈ܗܝ ܕܥܵܘܿܠܵܐ. ܘܗܵܢܵܘ ܐܲܬ̣ܪܵܐ ܕܡܿܢ ܕܠܵܐ ܝܵܕܲܥ ܠܐܲܠܵܗܵܐ.