Read Aramaic Peshita Job 19 Bible Online

Job 19 - Aramaic Peshita bible

Job 19

¹ܘܲܥܢ̣ܵܐ ܐܝܼܘܿܒ̣ ܘܐܸܡ̣ܲܪ.

²ܥܕܲܡܵܐ ܠܐܸܡܲܬ̣ܝ ܡܲܕ݂ܘܹܝܢ ܐܲܢ̄ܬ̇ܘܿܢ ܠܢܲܦ̮ܫܝ. ܘܡܲܟ݂ܐ̱ܒ̣ܝܼܢ ܐܲܢ̄ܬ̇ܘܿܢ ܠܝܼ ܒܡܸܠܹ̈ܐ.

³ܕܗܵܐ ܥܣܲܪ ܙܲܒ̣ܢ̈ܝܼܢ ܡܟ݂ܵܘܢܝܼܢ ܐܢ̄ܬ̇ܘܿܢ ܠܝܼ ܘܠܵܐ ܒܵܗ̇ܬ̇ܝܼܢ ܐܢ̄ܬ̇ܘܿܢ ܕܡܲܟ݂ܪܹܝܢ ܐܢ̄ܬ̇ܘܿܢ ܠܝܼ.

⁴ܘܐܸܢ ܫܲܪܝܼܪܵܐܝܼܬ̣ ܛܥܹ̇ܝܬ̣: ܠܘܵܬ̣ܝ ܬܸܗܘܹܐ ܛܵܥܝܘܼܬ̣ܝ.

⁵ܘܐܸܢ ܡ̣ܢ ܩܘܼܫܬܵܐ ܐܸܬ̣ܪܵܘܪܲܒ̣ܬܘܿܢ ܥܠܲܝ: ܘܐܲܟ݂ܣܬ̇ܘܿܢܵܢܝ ܘܚܲܣܸܕܲܬ̇ܘܿܢܵܢܝ.

⁶ܕܲܥܘ ܗܵܟܹܝܠ ܕܐܲܠܵܗܵܐ ܗ̄ܘܼ ܚܲܝܸܒܲܢܝ ܘܲܡܨܝܼܕ̇ܬܹ̇ܗ ܗ̄ܘܼ ܦܪܲܣ̣ ܥܠܲܝ.

⁷ܘܐܸܢ ܡܲܝܠܸܠ ܐ̄ܢܵܐ: ܐ̄ܢܵܫ ܠܵܐ ܥܵܢܹ̇ܐ ܠܝܼ. ܘܐܸܢ ܐܸܒܲܓܸ̇ܢ: ܠܲܝܬ̇ ܕܬ̣ܵܒܲܥ ܠܝܼ.

⁸ܐܘܼܪ̈ܚܵܬ̣ܝ ܣܵܓ̣ ܕܠܵܐ ܐܸܥܒܲܪ. ܘܣܵܡ ܚܸܫܘܿܟ݂ܵܐ ܫܒ̣̈ܝܼܠܲܝ.

⁹ܐܝܼܩܵܪܝ ܐܲܫܠܲܚ ܡܹܢܝ. ܘܐܲܥ̣ܒܲܪ ܟܠܝܼܠܵܐ ܕܪܹܫܝ.

¹⁰ܥܲܩ̣ܪܲܢܝ ܡ̣ܢ ܟܠ ܣܸܛܪ̈ܲܝ ܘܐܸܙܹ̇ܠ̄ܬ̣ ܘܲܫܩܲܠ ܐܲܝܟ݂ ܩܲܝܣܵܐ ܣܲܒ݂ܪܝ.

¹¹ܘܲܬ̣ܩܸܦ ܥܠܲܝ ܪܘܼܓ̣ܙܹܗ ܘܚܲܫܸܒܲܢܝ ܠܹܗ ܐܲܝܟ݂ ܒܥܸܠܕ̇ܒ̣ܵܒ̣ܵܐ.

¹²ܘܐܲܟ݂ܚܕ݂ܵܐ ܐܹܬ̣ܵܘ ܥܠܲܝ ܫܠܝܼܚܵܘ̈ܗܝ. ܘܲܕ݂ܪܲܫ̣ܘ ܥܠܲܝ ܐܘܼܪ̈ܚܵܬ̣ܗܘܿܢ ܘܲܫ̣ܪܵܘ ܚܟ݂ܵܪ̈ܲܝ ܡܲܫܟܲܢܝ.

¹³ܐܲܚܲܝ̈ ܐܲܪܚܸܩ̣ܘ ܡܹܢܝ: ܘܝܵܕ݂ܥܲܝ ܥܸܒܲܪܘ.

¹⁴ܦܣܲܩ݂ܘ ܩܲܪ̈ܝܼܒܲܝ ܡ̣ܢ ܠܘܵܬ̣ܝ ܘܝܵܕ݂ܥܲܝ̈ ܐܸܬ̣ܢܲܫܝܘܼܢܝ.

¹⁵ܬܵܘܬܵܒܲܝ̈ ܒܲܝܬ̇ܝ ܘܐܲܡ̈ܗܵܬ̣ܝ: ܐܲܝܟ݂ ܢܘܼܟ݂ܪܵܝܵܐ ܚܲܫܒ̇ܘܼܢܝ ܘܢܘܼܟ݂ܪܵܝ ܗ̄ܘܹܿܝܬ̣ ܒܥܲܝܢܲܝ̈ܗܘܿܢ.

¹⁶ܠܥܲܒ̣ܕ̇ܝ ܩܪܹܝܬ̣: ܘܠܵܐ ܥܢܵܢܝ. ܘܐܸܬ̣ܟܲܫܦܹ̇ܬ̣ ܠܹܗ ܒܡܸـ̈ـܠܲܝ ܦܘܼܡܝ: ܘܐܸܬ̣ܚܲܢܢܹ̇ܬ̣ ܠܹܗ.

¹⁷ܢܘܼܟ݂ܪܵܝܵܐ ܗ̄ܘܹܿܝܬ̣ ܠܐܲܢ̄ܬܹܿܬ̣ܝ. ܘܐܸܬ̣ܚܲܢܢܹܬ̣ ܠܒܲܪ ܡܥܲܝ̈.

¹⁸ܘܐܵܦ ܥܵܘܿܠܹ̈ܐ ܐܲܣܠ̱ܝܘܼܢܝ ܩܵܡܹܿܬ̣ ܘܡܲܠܸܠ̣ܘ ܒܝܼ.

¹⁹ܐܲܣܠ̱ܝܘܼܢܝ ܟܠ ܡܵܠܟܲܝ̈ ܡܸܠܟܲܝ̈. ܘܐܵܦ ܪ̈ܵܚܡܲܝ ܐܸܬ̣ܗ̱ܦܸܟ݂ܘ ܥܠܲܝ.

²⁰ܡܸܫܟܚ ܘܒܸܣܪܝ ܕܒܸܩܘ ܒܓܲܪ̈ܡܲܝ ܘܐܹܬ̣ܦܲܠܛܹ̇ܬ̣ ܒܡܸܫܟܵܐ ܕܫܹܢܲܝ̈.

²¹ܚܘܼܢܘܼܢܝ ܚܘܼܢܘܼܢܝ: ܐܲܢ̄ܬ̇ܘܿܢ ܪ̈ܵܚܡܲܝ ܡܸܛܠ ܕܐܝܼܕܹܗ ܗ̄ܘܼ ܕܐܲܠܵܗܵܐ ܩܸܪܒܲܬ̤ ܠܝܼ.

²²ܠܡܵܢܵܐ ܬܸܪܕ̇ܦܘܼܢܵܢܝ ܐܵܦ ܐܲܢ̄ܬ̇ܘܿܢ ܐܲܝܟ݂ ܐܲܠܵܗܵܐ. ܘܡܼܢ ܒܸܣܪܝ ܠܵܐ ܬܸܣܒ̇ܥܘܼܢ.

²³ܡ̇ܢ ܕܹܝܢ ܥ̣ܒܲܕ݂ ܕܡܸܬ̣ܟܲܬ݂̈ܒܵܢ ܗ̄ܘܲܝ̈ ܡܸـ̈ـܠܲܝ: ܘܡܸܬ̣ܪ̈ܲܫܡܵܢ ܗ̄ܘܲܝ̈ ܒܣܸܦܪܵܐ.

²⁴ܘܲܒ̣ܩܲܢܝܵܐ ܕܦܲܪܙܠܵܐ: ܘܲܒ̣ܨܵܝܪܵܐ ܕܐܲܒ̣ܵܪܵܐ ܠܥܵܠܲܡ: ܘܥܲܠ ܟܹܐܦܵܐ ܢܸܬ̣ܪܲܫܡܵܢ.

²⁵ܘܐܸܢܵܐ ܝܵܕܲܥ ܐ̄ܢܵܐ ܕܦܵܪܘܿܩܝ ܚܲܝ ܗ̄ܘܼ ܘܲܒ̣ܣܵܘܦܵܐ ܥܲܠ ܐܲܪܥܵܐ ܢܸܬ̣ܓ̇ܠܹܐ.

²⁶ܘܥܲܠ ܡܸܫܟ̇ܝ ܗ̄ܘܼ ܐܸܬ̣ܟ̇ܪܸܟ݂ ܗܵܠܹܝܢ ܘܥܲܠ ܒܸܣܪܝ.

²⁷ܐܸܢ ܬܸܚܙܹܐ ܠܐܲܠܵܗܵܐ ܥܲܝܢܝ: ܚܙܲܝ̈ ܢܘܼܗܪܵܐ ܟܘܿܠ̈ܝܵܬ̣ܝ: ܡܣܵܦ ܗ̄ܘܼ ܓܹܝܪ ܣܵܦܹ̇ܬ̣ ܡ̣ܢ ܩܝܵܡܝ.

²⁸ܕܐܵܡ̇ܪܝܼܢ ܐܲܢ̄ܬ̇ܘܿܢ ܡܵܢܵܐ ܪܵܕ݂ܦܝܼܢ ܚ̄ܢܲܢ ܠܹܗ. ܛܵܒ̣ܵܐ ܓܹܝܪ ܡܸܠܬ̣ܵܐ ܐܸܫܟܲܚ ܒܵܬܲܪܝ.

²⁹ܦܪܘܿܩܘ ܠܟ݂ܘܿܢ ܡ̣ܢ ܩܕ̣ܵܡ ܚܲܪܒܵܐ. ܡܸܛܠ ܕܚܸܡܬ̣ܵܐ ܕܲܚܛܵܗܹ̈ܐ ܚܲܪܒܵܐ ܗ̄ܝܼ ܡܸܛܠ ܕܬܸܕ̇ܥܘܼܢ ܕܐܝܼܬ̣ ܕܝܼܢܵܐ.