Read Aramaic Peshita Job 2 Bible Online

Job 2 - Aramaic Peshita bible

Job 2

¹ܘܲܗܘ̤ܵܐ ܝܵܘܡܵܐ: ܘܐܸܬ̣ܵܘ ܒ̈ܢܲܝ ܐܲܠܘܗܝܼܡ ܠܲܡܩܵܡ ܩܕ݂ܵܡ ܡܵܪܝܵܐ. ܘܐܸܬ̣ܵܐ ܐܵܦ ܣܵܛܵܢܵܐ ܒܲܝܢܵܬ̣ܗܘܿܢ ܠܵܡܩܵܡ ܡܵܪܝܵܐ.

²ܘܐܸܡ̣ܲܪ ܡܵܪܝܵܐ ܠܣܵܛܵܢܵܐ: ܡ̣ܢ ܐܲܝܡܸܟܵܐ ܐܵܬܹ̇ܐ ܐܲܢ̄ܬ̇. ܥ̣ܢܵܐ ܣܵܛܵܢܵܐ ܘܐܸܡ̣ܲܪ ܠܡܵܪܝܵܐ: ܚܲܕ݂ܪܹܬ̣ ܒܐܲܪܥܵܐ: ܘܗܲܠܟܹ̇ܬ̣ ܒܵܗ̇.

³ܘܐܸܡ̣ܲܪ ܡܵܪܝܵܐ ܠܣܵܛܵܢܵܐ: ܗܵܐ ܣܵܡ̣ܬ̇ ܠܸܒܵܟ݂ ܥܲܠ ܥܲܒ̣ܪ̇ܝ ܐܝܼܘܿܒ̣. ܕܠܲܝܬ̇ ܐܵܟ݂ܘܵܬܹܗ ܒܐܲܪܥܵܐ. ܓܒܲܪ ܬܲܡܝܼܡ ܘܲܬ̣ܪܝܼܨ: ܘܕ݂ܵܚܹ̇ܠ ܠܐܲܠܵܗܵܐ: ܘܣܵܛܹ̇ܐ ܡ̣ܢ ܒܝܼܫܬܵܐ. ܘܲܥܕܲܡܵܐ ܠܗܵܫܵܐ ܡܚܲܡܣܸܢ ܒܬܲܡܝܼܡܘܼܬܹܗ: ܘܲܡܓܲܪܸܐ ܐܲܢ̄ܬ̇ ܠܝܼ ܒܹܗ: ܕܐܵܘܒ̇ܕ݂ܝܼܘܗܝ ܣܪܝܼܩܵܐܝܼܬ̣.

⁴ܘܲܥ̣ܢܵܐ ܣܵܛܢܵܐ ܘܐܸܡ̣ܲܪ ܠܡܵܪܝܵܐ: ܡܸܫܟܵܐ ܚܠܵܦ ܡܸܫܟܵܐ. ܘܟ݂ܠܡܸܕܹ̇ܡ ܕܐܝܼܬ̣ ܠܓܲܒ̣ܪܵܐ ܝܵܗܹܒ̣ ܚܠܵܦ ܢܲܦ̮ܫܹܗ: ܘܡܸܬ̣ܦܲܠܲܛ.

⁵ܘܐܸܢ ܠܵܐ: ܐܵܘܫܸܛ ܐܝܼܕ݂ܵܟ݂: ܘܲܩܪܘܿܒ̣ ܠܒܸܣܪܹܗ ܐܵܘ ܠܓܲܪܡܹܗ: ܐܸܢ ܠܵܐ ܒܐܲܦܲܝ̈ܟ ܢܨܲܚܹܝܟ݂.

⁶ܘܐܸܡܲܪ ܡܵܪܝܵܐ ܠܣܵܛܵܢܵܐ: ܗܵܐ ܡܲܫܠܲܡ ܒܐܝܼܕܲܝ̈ܟ: ܒܲܠܚܘܿܕ݂ ܢܲܦ̮ܫܹܗ ܛܲܪ.

⁷ܘܲܢܦܲܩ̣ ܣܵܛܵܢܵܐ ܡܼܢ ܩܕ݂ܵܡ ܐܲܦܵܘ̈ܗܝ ܕܡܵܪܝܵܐ. ܘܲܡ̣ܚܵܝܗܝ ܠܐܝܼܘܿܒ̣ ܒܫܘܼܚܢܵܐ ܒܝܼܫܵܐ: ܡ̣ܢ ܦܲܣܬ̣ܵܐ ܕܪܸܓ̣ܠܹܗ ܘܲܥܕܲܡܵܐ ܠܡܘܼܚܹܗ.

⁸ܘܲܢ̣ܣܲܒ̣ ܠܹܗ ܚܸܨܦܵܐ ܠܡܸܬ̣ܓܲܪܵܕ݂ܘܼ ܒܹܗ. ܘܝܵܬܹܒ̣ ܗ̄ܘܼܵܐ ܥܲܠ ܩܸܛܡܵܐ.

⁹ܘܐܵܡ̇ܪܵܐ ܠܹܗ ܐܲܢ̄ܬ̇ܬܹܗ: ܐܵܦ ܥܕܲܡܵܐ ܠܗܵܫܵܐ ܡܚܲܡܣܝܼܢ ܐܲܢ̄ܬ̇ ܒܬܲܡܝܼܡܘܼܬ̣ܵܟ݂. ܨܲܚܵܐ ܠܐܲܠܵܗܵܟ݂: ܘܡܘܼܬ̣.

¹⁰ܐܵܡܲܪ ܠܵܗܿ: ܐܲܝܟ݂ ܕܲܡܡܲܠܠܵܐ ܚܕ݂ܵܐ ܡ̣ܢ ܫܵܛ̈ܝܵܬ̣ܵܐ ܡܲܠܸܠܬ̇ܝ. ܛܵܒ݂ܵܬܹ̈ܗ ܕܐܲܠܵܗܵܐ ܩܲܒܸ̇ܠܢܲܢ: ܘܒ̣ܝܼ̈ܫܵܬܹܗ ܠܵܐ ܢܩܲܒܸ̇ܠ. ܘܲܒ̣ܗܵܠܹܝܢ ܟܠܗܹܝܢ ܠܵܐ ܚܛ̣ܵܐ ܐܝܼܘ̇ܒ̣: ܐܵܦܠܵܐ ܓܲܕܸ̇ܦ ܥܲܠ ܐܲܠܵܗܵܐ ܒܣܸܦ̈ܘܵܬܹܗ.

¹¹ܘܲܫܡܲܥܘ ܬܠܵܬ݂ܵܐ ܪܵܚܡܵܘܗܝ ܕܐܝܼܘܿܒ̣ ܒܟ݂ܠܵܗ̇ ܒܝܼܫܬܵܐ ܗܵܕܹܐ ܕܐܹܬ݂ܵܬ̤ ܥܠܵܘܗܝ. ܘܐܸܬ̣ܘܲܥܲܕ݂ܘ ܘܐܸܬ̣ܵܘ ܠܘܵܬܹܗ ܓܒܲܪ ܡ̣ܢ ܐܲܬ̣ܪܹܗ: ܐܹܠܝܼܦܵܙ ܬܲܝܡ̄ܢܵܝܵܐ: ܘܒܸܠܕܵܕ݂ ܫܘܼܚܵܝܵܐ: ܘܨܘܼܦܵܪ ܢܲܥ̄ܡܬ̣ܵܝܵܐ. ܘܐܸܬ̣ܘܲܥܲܕ݂ܘ ܐܲܟ݂ܚ̄ܕ݂ܵܐ ܠܡܹܐܬ̣ܵܐ: ܘܲܠܡܸܡܠܵܐ ܒܠܸܒܹܿܗ ܘܠܲܡܒܲܝܵܐܘܼܬܹܗ.

¹²ܘܐܲܪܝܼܡ̣ܘ ܥܲܝܢܲܝ̈ܗܘܿܢ ܡ̣ܢ ܪܘܼܚܩܵܐ: ܘܠܵܐ ܐܸܫܬܵܘܕ̇ܥܘܼܗܝ. ܘܐܲܪܝܼܡ̣ܘ ܩܵܠܗܘܿܢ ܘܲܒ̣ܟ݂ܵܘ. ܘܲܨ̣ܪܵܘ ܓܒܲܪ ܦܪܝܼܣܹܗ: ܘܲܕ݂ܪܵܘ ܥܲܦܪܵܐ ܥܲܠ ܪܹ̈ܫܲܝܗܘܿܢ ܠܘܵܬ̣ ܫܡܲܝܵܐ.

¹³ܘܝܼܬܸܒ̣ܘ ܥܲܡܹܗ ܥܲܠ ܐܲܪܥܵܐ: ܫܲܒ̣ܥܵܐ ܐܝܼܡܵܡ̈ܝܼܢ ܘܫܲܒ̣ܥܵܐ ܠܲܝ̈ܠܵܘܵܢ. ܘܠܲܝܬ̇ ܕܐܵܡ̇ܲܪ ܡ̣ܠܵܐ: ܡܸܛܠ ܕܲܚܙ̣ܵܘ ܕܥܸܫܢܲܬ̤ ܠܵܗ̇ ܡܚܘܿܬܹܗ ܛܵܒ̣.