Read Aramaic Peshita Job 21 Bible Online

Job 21 - Aramaic Peshita bible

Job 21

¹ܘܲܥ̣ܢܵܐ ܐܝܼܘܿܒ̣ ܘܐܸܡ̣ܲܪ.

²ܫܡܲܥܘ ܡܸܫܡܲܥ ܡܸܠܲـ̈ـܝ. ܘܢܸܗܘܹܐ ܒܟ݂ܘܿܢ ܒܘܼܝܵܢܵܐ.

³ܣܲܝܒ̇ܪܘܼܢܝ ܘܐܹܡܲܠܸܠ. ܘܒ̣ܵܬܲܪ ܦܸܬ̣ܓ̣ܵܡܲܝ̈ ܡܲܝܸܩܘ.

⁴ܐܹܡܲܪ ܠܒܲܪܢܵܫܵܐ ܡܸـ̈ـܠܲܝ: ܠܡܵܢܵܐ ܡܸܬ̇ܬ̇ܥܝܼܩܵܐ ܪܘܼܚܝ.

⁵ܐܸܬ̣ܦܢܵܘ ܠܘܵܬ̣ܝ ܘܲܬ̣ܡܲܗܘ. ܘܣܝܼܡܘ ܐܝܼܕܲܝ̈ܟ̇ܘܿܢ ܥܲܠ ܦܘܼܡܟ݂ܘܿܢ.

⁶ܕܐܸܢ ܐܸܬ̇ܕܲܟ݂ܪܹܬ̣: ܐܸܬ̇ܬ̇ܙܝܼܥܹ̇ܬ̣: ܘܐܸܚܸܕ݂ܘ ܠܒܸܣܪܝ ܨܵܘܪ̈ܵܢܹܐ.

⁷ܡܸܛܠ ܡܵܢܵܐ ܪ̈ܲܫܝܼܥܹܐ ܚܲܝܝܼܢ: ܘܡܲܥܬ̇ܩܝܼܢ ܓܲܢ̄ܒܵܪ̈ܲܝ ܚܲܝܠܵܐ.

⁸ܙܲܪܥ̱ܗܘܿܢ ܡܲܬ̣ܩܲܢ ܩܕ݂ܵܡܲܝܗܘܿܢ: ܘܲܒ̣ܢܲܝ̈ܗܘܿܢ ܠܥܹܝܢܲܝܗܘܿܢ.

⁹ܒܵܬܲܝ̈ܗܘܿܢ ܫܠܹܝܢ ܡ̣ܢ ܕܸܚ̱ܠܬ̣ܵܐ. ܘܠܲܝܬ̇ ܫܲܒ̣ܛܹܗ ܕܐܲܠܵܗܵܐ ܥܠܲܝܗܘܿܢ.

¹⁰ܬܵܘܪܹܗ ܥܵܒܲܪ ܘܠܵܐ ܓܵܥܹ̇ܐ. ܘܦܵܠܛܵܐ ܬܘܿܪܬܹ̇ܗ: ܘܠܵܐ ܡܚܲܒ̇ܠܵܐ.

¹¹ܐ: ܡܫܲܪܪܝܼܢ ܐܲܝܟ݂ ܥܵـ̈ـܢܵܐ ܒܢܲܝ̈ܗܘܿܢ: ܘܝܲܠܘܼܕܲܝ̈ܗܘܿܢ ܡܫܵܘܪܝܼܢ.

¹²ܫܩܲܠ̣ܘ ܦܠܲܓܹ̈ܐ ܘܟܸܢܵܪܹ̈ܐ. ܘܚܵܕܹܝܢ ܠܩܵܠܵܐ ܕܲܙܡܵܪܵܐ.

¹³ܡܓܲܡܪܝܼܢ ܒܛܵـ̈ـܒ̣ܵܬ̣ܵܐ ܝܵܘ̈ܡܲܝܗܘܿܢ ܘܒܲܥܓܲܠ ܠܲܫܝܘܿܠ ܢܵܚ̇ܬ̇ܝܼܢ.

¹⁴ܘܐܵܡ̇ܪܝܼܢ ܠܐܲܠܵܗܵܐ ܥܒܲܪ ܡܸܢܲܢ: ܘܲܠܡܸܕܲܥ ܐܘܼܪ̈ܚܵܬ̣ܵܟ݂ ܠܵܐ ܨܵܒܹܿܝܢ ܚ̄ܢܲܢ.

¹⁵ܘܐܵܡ̇ܪܝܼܢ: ܡܲܢ݂ܘܼ ܐܲܠܵܗܵܐ ܕܢܸܦ̱ܠܚܝܼܘܗܝ: ܐܵܘ ܡܵܢܐ ܝܵܬ̣ܪܝܼܢ ܚ̄ܢܲܢ ܕܢܸܒ̣ܥܹܐ ܡܸܢܹܗ.

¹⁶ܗܵܐ ܠܵܐ ܗ̄ܘܼܵܐ ܒܐܝܼܕܲܝ̈ܗܘܿܢ ܛܘܼܒ̣ܗܘܿܢ ܘܡܲܚܫܲܒ̣ܬ̣ܗܘܿܢ ܕܪ̈ܲܫܝܼܥܹܐ ܐܸܬ̣ܪܲܚܩܲܬ̤ ܡܹܢܝ.

¹⁷ܟܡܵܐ ܢܸܕ݂ܥܲܟ݂ ܫܪܵܓ̣ܗܘܿܢ ܕܪ̈ܲܫܝܼܥܹܐ: ܘܢܹܐܬܹܗ ܥܠܲܝܗܘܿܢ ܬܒ̣ܵܪܵܐ. ܘܲܚܒ̣ܵܠܵܐ ܢܦܲܠܸܓ̣ ܪܘܼܓ̣ܙܹܗ.

¹⁸ܘܢܸܗܘܘܿܢ ܐܲܝܟ݂ ܬܸܒ̣ܢܵܐ ܩܕ݂ܵܡ ܪܘܼܚܵܐ: ܘܐܲܝܟ݂ ܥܘܼܪܵܐ ܕܫܵܩ̇ܠܵܐ ܠܹܗ ܟ̇ܘܿܟ݂ܝܼܬ̣ܵܐ.

¹⁹ܐܲܠܵܗܵܐ ܢܸܛܲܪ ܥܵܘܼܠܹܗ ܠܲܒ̣ܢܵܘ̈ܗܝ. ܘܢܸܦ̱ܪܥܝܼܘܗܝ ܘܢܸܕܲܥ.

²⁰ܘܢܸܚ̈ܙܝܵܢ ܥܲܝܢܵܘ̈ܗܝ ܐܲܒ̣ܕܵܢܹܗ ܘܡ̣ܢ ܚܸܡܬܹܗ ܕܐܲܠܵܗܵܐ ܢܸܫܬܹ̇ܐ.

²¹ܡܵܢ̈ܘ ܨܸܒ̣ܝܵܢܹܗ ܒܒܲܝܬܹ̇ܗ: ܡ̣ܢ ܒܵܬ̣ܪܹܗ ܘܡܸܢܝܵܢܵܐ ܕܝܲܪ̈ܚܵܘܗܝ ܢܸܬ̣ܢܲܛܪܘܼܢ ܠܲܒ̣ܢܵܘ̈ܗܝ.

²²ܠܐܲܠܵܗܵܐ ܡܲܠܦܝܼܢ ܐܢ̄ܬܿܘܿܢ ܝܼܕܲܥܬ݂ܵܐ: ܘܗ̤ܘ ܠܪ̈ܵܡܹܐ ܢܕ݂ܘܼܢ.

²³ܕܐܸܢ ܗܵܢܵܐ ܢܡܘܼܬ̣ ܒܥܘܼܫܢܵܐ ܕܫܲܠܡܘܼܬܹܗ: ܕܲܬ̣ܟ݂ܝܼܠ ܗ̄ܘܼܵܐ ܘܲܫܠܹܐ.

²⁴ܘܓܲܒܵܘ̈ܗܝ ܡܠܹܝܢ ܬܲܪܒܵܐ: ܘܓܲܪ̈ܡܵܘܗܝ ܡܠܹܝܢ ܡܘܼܚܵܐ.

²⁵ܗܵܢܵܐ ܢܡܘܼܬ̣ ܒܲܢܦܸܫ ܡܲܪܝܼܪܵܐ. ܘܠܵܐ ܐܸܟܲܠ̣ ܒܛܵܒ̣ܬ̣ܵܐ.

²⁶ܐܲܟ݂ܚ̄ܕ݂ܵܐ ܥܲܠ ܐܲܪܥܵܐ ܫܵܟ݂ܒܵܝܼܢ ܘܪܸܡܬ̣ܵܐ ܬܟܲܣܹܐ ܐܸܢܘܿܢ.

²⁷ܗܵܐ ܝܵܕܲܥ ܐ̄ܢܵܐ ܡܲܚܫ̈ܒ̣ܵܬ̣ܟ݂ܘܿܢ: ܘܡܸܠܟܵܐ ܕܲܥܠܲܝ ܡܸܬ̣ܚܲܫܒ̣ܝܼܢ ܐܢ̄ܬ̇ܘܿܢ.

²⁸ܡܸܛܠ ܕܐܸܡܲܪܬ̇ܘܿܢ ܕܐܲܝܟܵܘ ܒܲܝܬܹ̇ܗ ܕܙܲܕܝܼܩܵܐ: ܘܐܲܢܵܘ ܡܲܫ̱ܪܝܵܐ ܕܡܲܫܟ̇ܢܵܐ ܕܪ̈ܲܫܝܼܥܹܐ.

²⁹ܠܵܐ ܓܹܝܪ ܫܲܐܸܠܬ̇ܘܿܢ ܠܥܵܒ̣ܪ̈ܲܝ ܐܘܼܪܚܵܐ. ܘܐܵܬ̣ܘܵܬ̣̈ܗܘܿܢ ܠܵܐ ܐܸܫܬܵܘܕܲܥܬ̇ܘܿܢ.

³⁰ܡܸܛܠ ܕܲܠܝܵܘܡܵܐ ܕܲܬ̣ܒ̣ܵܪܵܐ ܡܸܬ̣ܢܛܲܪ ܒܝܼܫܵܐ. ܘܲܠܝܵܘܡܵܐ ܕܪܘܼܓ̣ܙܵܐ ܡܸܬ̇ܕܲܟܲܪ.

³¹ܡܲܢ̣ܘ ܡܚܵܘܹܐ ܠܹܗ ܐܘܼܪܚܵܐ ܘܗܵܘܿ ܡܸܕܸ̇ܡ ܕܲܥܒܲܕ݂: ܡܲܢ̣ܘܼ ܦܵܪܲܥ ܠܹܗ.

³²ܗ̤ܘ ܕܹܝܢ ܐܵܙܹ̇ܠ ܠܩܲܒ̣ܪܵܐ: ܘܲܠܓ̣ܕ݂ܫܵܐ ܡܸܬ̣̱ܢܛܲܪ.

³³ܒܵܠ̇ܥܝܼܢ ܠܹܗ ܓܦܝܼ̈ܦܲܝ ܢܲܚܠܵܐ ܘܒ̣ܵܬ̣ܪܹܗ ܟܠܢܵܫ ܡܸܬ̣ܢ̱ܓ̣ܕ݂ ܘܲܩܕ݂ܵܡܵܘܗܝ ܠܲܝܬ̇ ܡܸܢܝܵܢ.

³⁴ܘܐܲܝܟܵܐ ܬܠܲܒ̇ܒ̣ܘܼܢܵܢܝ. ܗܸܒ̣ܠܵܐ ܘܲܬ̣ܝܵܒ̣ܬ̣ܵܐ ܕܦܸܬ̣ܓ̣ܵܡܵܘ̈ܗܝ ܝܲܬܲܪܘ ܩܕ݂ܵܡܲܝ.