Read Aramaic Peshita Job 22 Bible Online

Job 22 - Aramaic Peshita bible

Job 22

¹ܘܲܥܢܵܐ ܐܸܠܝܼܦܵܙ ܬܲܝܡ̄ܢܵܝܵܐ: ܘܐܸܡ̣ܲܪ.

²ܕܲܠܡܵܐ ܥܲܡ ܐܲܠܵܗܵܐ ܐܵܡܲܪ ܐܲܢ̄ܬ̇ ܓܲܒ̣ܪܵܐ: ܕܐܲܢ̄ܬ̇ ܐܸܫܬ̇ܘܝܼܬ̇ ܥܲܡܹܗ ܒܚܸܟ݂ܡ̱ܬ̣ܵܐ

³ܘܡܵܢܵܐ ܝܘܼܬ̣ܪܵܢ ܕܲܡܬܲܡܸܡ ܐܲܢ̄ܬ̇ ܐܘܼܪ̈ܚܵܬ̣ܵܟ݂ ܡ̣ܢ ܕܸܚ̱ܠܬ̣ܵܟ݂.

⁴ܢܲܟ̇ܣܵܟ݂ ܘܢܸܥܘܿܠ ܒܕ݂ܝܼܢܵܐ ܥܲܡܵܟ݂.

⁵ܗܵܐ ܒܝܼܫܬܵܐ ܪܲܒܵܐ ܗ̄ܝܼ: ܘܠܲܝܬ̇ ܣܘܿܦ ܠܲܚܛܵܗܲܝ̈ܟ.

⁶ܡܸܛܠ ܕܲܢܣܲܒ̣ܬ̇ ܡܸܫܪܵܢܵܐ ܕܐܲܚܲܝ̈ܟ ܣܪܝܼܩܵܐܝܼܬ̣. ܘܲܠܒ̣ܘܼܫܵܐ ܕܥܲܪܛܲܠܵܝܵܐ ܐܲܫܠܲܚ̣ܬ̇.

⁷ܠܵܐ ܡܲـ̈ـܝܵܐ ܐܲܫܩܝܼܬ̇ ܠܲܡܛܲܪܦܵܐ. ܘܡ̣ܢ ܟܲܦܢܵܐ ܟܠܲܝܬ̇ ܠܲܚܡܵܐ.

⁸ܐܝܼܬ̣ ܓܲܒ̣ܪܵܐ ܕܙܵܪܲܥ ܠܹܗ ܐܲܪܥܵܐ. ܘܡܵܪܹܐ ܩܛܝܼܪܵܐ ܢܵܣܹ̇ܒ̣ ܠܵܗ̇ ܡܸܢܹܗ.

⁹ܐܲܪܡܲܠܬܵܐ ܫܲܕܲܪܬ̇ ܣܪܝܼܩܵܐܝܼܬ̣. ܘܲܕ݂ܪܵܥܹܗ ܕܝܲܬ̣ܡܵܐ ܡܲܕܲܟ݂ܬ̇.

¹⁰ܡܸܛܠ ܗܵܢܵܐ ܚܲܕ݂ܪܘܼܟ݂ ܦܲܚܹ̈ܐ. ܘܐܲܙܝܼܥܬ̣ܵܟ݂ ܕܸܚ̱ܠܬ̣ܵܐ ܡ̣ܢ ܫܹܠܝ.

¹¹ܐܲܝܡܸܟܵܐ ܗ̄ܘܼ ܚܸܫܘܿܟ݂ܵܐ ܠܵܐ ܚ̣ܙܲܝܬ̇ ܘܫܸܦܥܵܐ ܕܡܲـ̈ـܝܵܐ ܢܟܲܣܹܝܟ݂.

¹²ܗܵܐ ܐܲܠܵܗܵܐ ܐܲܪܝܼܡ ܫܡܲܝܵܐ: ܘܲܚ̣ܙܵܐ ܪܹܫ ܟܵܘܟ̇ܒܹ̈ܐ ܕܐܸܬ̇ܬ̇ܪܝܼܡ.

¹³ܘܐܵܡ̇ܲܪ ܐܲܢ̄ܬ̇ ܡܵܢܵܐ ܝܵܕܲܥ ܐܲܠܵܗܵܐ. ܕܲܠܡܵܐ ܠܓ̣ܵܘ ܡ̣ܢ ܥܲܪܦܸܠܵܐ ܢܕ݂ܘܼܢ.

¹⁴ܥܢܵܢܵܐ ܓܹܝܪ ܣ̣ܬܵܪܹܗ: ܘܠܵܐ ܚܙ̣ܵܘ ܘܥܲܠ ܚܘܼܓ̣ܬ̣ܵܐ ܕܲܫܡܲܝܵܐ ܡܗܲܠܸܟ݂.

¹⁵ܐܘܼܪܚܵܐ ܕܥܵܠܡܵܐ ܢܛܲܪܬ̇: ܕܟܲܒ̣ܫܘܼܗ̇ ܥܲܡܵܐ ܕܫܘܼܩܪܵܐ ܕܠܵܐ ܒܥܸܕܵܢܗܘܿܢ.

¹⁶ܘܒܲܥܒ̣ܵܪ ܢܲܗܪܵܐ ܐܸܬ̣ܟ̇ܠܝܼܘ. ܘܠܵܐ ܥܗܲܕܘ ܠܡܲܢ ܕܐܲܟ̇ܝܼܢ ܫܲܬ̣ܐ̱ܣܲܝ̈ܗܘܿܢ.

¹⁷ܘܐܵܡ̇ܪܝܼܢ ܠܐܲܠܵܗܵܐ ܦܪܘܿܩ ܡܸܢܲܢ. ܘܡܵܢܵܐ ܥܵܒܹ̇ܕ݂ ܠܲܢ ܐܲܠܵܗܵܐ.

¹⁸ܘܗ̤ܘ ܡܠ̣ܵܐ ܒܵܬܲܝ̈ܗܘܿܢ ܛܘܼܒ̣ܵܐ. ܘܬܲܪܥܝܼܬ̣ܵܐ ܕܥܵܘܿܠܹ̈ܐ ܐܸܬ̣ܪܲܚܩܲܬ̤ ܡܸܢܗܘܿܢ.

¹⁹ܢܸܚܙܘܿܢ ܙܲܕ̇ܝܼܩܹ̈ܐ ܘܢܸܚܕ̇ܘܿܢ. ܘܙܲܟܵܝܵܐ ܢܡܲܝܸܩ ܒܗܘܿܢ.

²⁰ܐܸܢ ܠܵܐ ܢܸܬ̣ܡܲܟ̇ܟ݂ܘܿܢ ܡ̣ܢ ܩܲܫܝܼܫܘܼܬ݂ܗܘܿܢ: ܘܫܲܪܟ̇ܗܘܿܢ ܬܹܐܟ݂ܘܿܠ ܢܘܼܪܵܐ.

²¹ܐܸܫܬܵܘܝܲܝ ܕܹܝܢ ܥܲܡܹܗ: ܘܫܲܠܸܡ ܐܸܢܘܿܢ ܡ̣ܢ ܥܲܠ̈ܠܵܬ̣ܵܟ݂ ܛܵـ̈ـܒ̣ܵܬܵܐ.

²²ܩܲܒܸ̇ܠ ܡ̣ܢ ܦܘܼܡܹܗ ܢܵܡ̇ܘܿܣܵܐ. ܘܲܢܣܝܼܡ ܡܸܠܵܘ̈ܗܝ ܒܠܸܒܵܟ݂.

²³ܐܸܢ ܬܬ̣ܘܼܒ̣ ܠܘܵܬ̣ ܐܲܠܵܗܵܐ: ܬܸܬ̣ܒܲܢܹܐ: ܘܐܸܢ ܬܲܪܚܸܩ ܥܵܘܼܠܵܐ ܡ̣ܢ ܡܲܫܟ̇ܢܵܟ݂.

²⁴ܘܲܬ̣ܟܲܢܸܫ ܟܸܣܦܵܐ ܐܲܝܟ݂ ܥܲܦܪܵܐ: ܘܐܲܝܟ݂ ܚܵܠܵܐ ܕܢܲܚܠܵܐ ܕܲܗܒ̣ܵܐ ܕܐܵܘܦܹܝܪ.

²⁵ܢܸܗܘܹܐ ܐܲܠܵܗܵܐ ܒܥܸܕ݂ܪܵܟ݂ ܘܲܟ݂ܣܸܦ ܚܘܼܫ̈ܒܵܢܝܼܢ ܢܸܗܘܹܐ ܠܵܟ݂.

²⁶ܘܲܬ̣ܪܝܼܡ ܠܘܵܬ̣ ܐܲܠܵܗܵܐ ܐܲܦܲܝ̈ܟ.

²⁷ܘܲܬ̣ܨܲܠܹܐ ܩܕ݂ܵܡܵܘܗܝ ܘܢܸܫ̱̤ܡܥܵܟ݂. ܘܢܸܕ݂ܪ̈ܲܝܟ ܬܫܲܠܸܡ.

²⁸ܘܬܹܐܡܲܪ ܡܸܠܬ̣ܵܐ ܘܲܢܩܝܼܡ ܠܵܟ݂. ܘܥܲܠ ܐܘܼܪ̈ܚܵܬ̣ܵܟ݂ ܢܲܓܲܗ ܢܘܼܗܪܵܐ.

²⁹ܡܸܛܠ ܕܡܲܢ ܕܡܸܬ̣ܡܲܟܲܟ݂: ܐܸܡܲܪ ܕܢܸܬ̇ܬ̇ܪܝܼܡ. ܘܲܕ݂ܡܲܟ̇ܝܼ̈ܟ݂ܵܢ ܥܲܝܢܵܘ̈ܗܝ ܢܸܬ̣ܦܪܸܩ.

³⁰ܢܸܬ̣ܦܲܠܲܛ ܙܲܟܵܝܵܐ ܐܲܝܟܵܐ ܕܐܝܼܬ̣ܵܘܗܝ ܘܢܸܬ̣ܦܲܠܲܛ ܒܕܲܟ݂ܝܘܼܬ̣ܵܐ ܕܐܝܼܕ݂ܵܘ̈ܗܝ.