Read Aramaic Peshita Job 24 Bible Online

Job 24 - Aramaic Peshita bible

Job 24

¹ܡܸܛܠ ܡܵܢܵܐ ܡ̣ܢ ܐܲܠܵܗܵܐ ܠܵܐ ܐܸܬ̇ܛܲܫܝܼܘ ܥܵܘܵܠ̈ܝܼܢ. ܘܝܼܕܲܥ̣ܘ: ܘܠܵܐ ܚܙ̣ܵܘ ܝܵܘ̈ܡܲܝܗܘܿܢ.

²ܘܲܬ̣ܚܘܼܡܵܐ ܫܲܢܝܼܘ. ܘܲܓ̣ܙܪܵܐ ܕܒܲܪܘ

³ܘܲܚܡܵܪܵܐ ܕܝܲܬ̣ܡܵܐ ܕܒܲܪܘ: ܘܡܲܫܟܸ̇ܢܘ ܬܵܘܪܵܗ̇ ܕܐܲܪܡܲܠܬܵܐ.

⁴ܐܸܬ̇ܛܲܫܝܼܘ ܒܵܝ̈ܫܹܐ ܡ̣ܢ ܐܘܼܪܚܵܐ ܘܐܲܟ݂ܚ̄ܕ݂ܵܐ ܐܸܬ̇ܛܲܫܝܼܘ ܡܲܟ̇ܝܼ̈ܟܹܝܗ̇ ܕܐܲܪܥܵܐ.

⁵ܐܲܝܟ݂ ܥܪ̈ܵܕܹܐ ܒܡܲܕ݂ܒ̇ܪܵܐ: ܕܲܡܩܲܕ̇ܡܝܼܢ ܠܡܹܐܟ݂ܘܼܠܬܵܐ ܠܲܚܡܵܐ ܠܲܥܠܲܝܡܘܼܬ̣ܗܘܿܢ.

⁶ܘܲܒ̣ܚܲܩܠܵܐ ܚܲܡܝܼܡܵܐ ܕܠܵܐ ܕܝܼܠܗܘܿܢ ܢܸܚܨܕ݂ܘܼܢ ܘܟܲܪ̈ܡܹܐ ܕܪ̈ܲܫܝܼܥܹܐ ܢܠܲܩܫܘܼܢ.

⁷ܒܵܐܹ̇ܬ̣ ܥܲܪܛܸܠܵܝܵܐ ܡ̣ܢ ܒܠܲܝ ܠܒ̣ܘܼܫܵܐ. ܘܠܲܝܬ̇ ܬܲܟ݂ܣܝܼܬ̣ܵܐ ܒܥܲܪܝܵܐ.

⁸ܡ̣ܢ ܙܵܪܝܼܦ̮ܬܵܐ ܕܛܘܼܪܹ̈ܐ ܢܸܬ̣ܪܲܛܒ̣ܘܼܢ. ܘܡ̣ܢ ܒܠܲܝ ܣܸܬܪܵܐ ܠܟܹܐܦܵܐ ܢܥܲܦܩܘܼܢ.

⁹ܢܸܚ̄ܛܦܘܼܢ ܡ̣ܢ ܒܸܙܬ̣ܵܐ ܕܝܲܬ̣ܡܹ̈ܐ. ܘܥܲܠ ܡܸܣܟܹ̇ܢܹ̈ܐ ܚܘܼܒ̣̈ܠܹܐ ܐܲܪܡ̣ܝܼܘ.

¹⁰ܥܲܪܛܸܠ ܗܲܠܸܟ݂ܘ ܡ̣ܢ ܒܠܲܝ ܠܒ̣ܘܼܫܵܐ. ܘܟܲܦܢܹ̈ܐ ܫܩܲܠ̣ܘ ܠܲܚܡܵܐ: ܘܒܹܝܬ̣ ܫܵܪ̈ܘܵܬ̣ܵܐ ܡܓܲܗܢܝܼܢ ܘܟܲܦܢܝܼܢ ܟܲܕ݂ ܫܩܝܼܠܝܼܢ ܣܲܐܬ̣ܵܐ ܘܟܲܠܝܵܐ.

¹¹ܘܒܲܙܒܲܢ ܢܸܟ݂ܦܢܘܼܢ ܒܫܵܪ̈ܘܵܬ̣ܗܘܿܢ. ܘܡܲܥܨܪ̈ܵܢ ܢܸܥܨܪܘܼܢ ܘܢܸܨܗܘܿܢ.

¹²ܘܡ̣ܢ ܓܵܘ ܩܪܝܼܬ̣ܵܐ ܡܝܼ̈ܬܹܐ ܢܸܬ̣ܐܲܢܩܘܼܢ ܘܢܲܦ̮ܫܵܐ ܕܲܩܛܝܼ̈ܠܹܐ ܬܸܓ̣ܥܹܐ ܘܐܲܠܵܗܵܐ ܠܵܐ ܢܩܲܒܸ̇ܠ ܨܠܘܿܬ̣ܗܘܿܢ.

¹³ܗܸܢܘܿܢ ܗܘ̤ܵܘ ܒܡܸܕ݂ܝܵܪ̈ܲܝ ܢܘܼܗܪܵܐ ܘܠܵܐ ܚܟܲܡ̣ܘ ܐܘܼܪ̈ܚܵܬܹܗ. ܘܠܵܐ ܗܲܠܸܟ݂ܘ ܒܲܫܒ̣ܝܼܠܵܘ̈ܗܝ.

¹⁴ܒܢܘܼܗܪܵܐ ܩܵܐܹ̇ܡ ܩܵܛܘܿܠܵܐ: ܘܩܵܛܹ̇ܠ ܠܡܸܣܟܹ̇ܢܹ̈ܐ ܘܲܠܒ̣ܵܝܫܹ̈ܐ. ܘܲܒ̣ܠܠܝܵܐ ܗܵܘܹܿܐ ܐܲܝܟ݂ ܓܵܢܵܒ̣ܵܐ.

¹⁵ܘܥܲܝܢܹ̈ܐ ܕܓܲܝܵܪܹ̈ܐ ܢܸܛܪܵܢ ܠܚܸܫܘܿܟ݂ܵܐ. ܘܐܵܡ̇ܪܝܼܢ ܠܵܐ ܬܸܚܙܹܝܢ ܥܲܝܢܵܐ. ܘܲܡܣܲܬܲܪ ܐܲܦܵܘ̈ܗܝ ܒܚܸܫܘܿܟ݂ܵܐ.

¹⁶ܦܵܠܹ̇ܫ ܒܚܸܫܘܿܟ݂ܵܐ ܒܵܬ̇ܝܼ̈ܢ ܘܒ̣ܐܝܼܡܵܡܵܐ ܡܚܲܬܸ̇ܡ ܠܗܘܿܢ. ܕܠܵܐ ܢܸܚܙܘܿܢ ܢܘܼܗܪܵܐ.

¹⁷ܡܸܛܠ ܗܵܢܵܐ ܒܥ̣ܵܘ ܠܗܘܿܢ ܛܸܠܵܠܹܗ ܕܡܵܘܬܵܐ: ܘܐܸܫ̣ܟܲܚܘ. ܘܒܲܠܗܝܼܘ ܐܸܢܘܿܢ ܛܸܠܵܠܵܘ̈ܗܝ ܕܡܵܘܬܵܐ.

¹⁸ܩܲܠܝܼܠ ܘܥܲܠ ܐܲܦܲܝ̈ ܡܲـ̈ـܝܵܐ. ܬܸܬ̣ܠܝܼܛ ܡܢܵܬ̣ܗܘܿܢ ܒܐܲܪܥܵܐ: ܒܐܘܼܪܲܚ ܟܲܪ̈ܡܝܼܢ.

¹⁹ܨܲܗ̈ܘܵܢܹܐ ܘܚܘܼܡܵܐ: ܢܸܚ̄ܛܦܘܼܢ ܐܸܢܘܿܢ ܡܲـ̈ـܝܵܐ ܕܬܲܠܓܵܐ ܒܲܫܝܘܿܠ ܚ̣ܛܵܘ.

²⁰ܘܐܸܬ̇ܛܥܝܼܘ ܡ̣ܢ ܡܲܪܒ̇ܥܵܐ. ܡܸܬ̣ܩܲܬ̤ ܐܸܢܘܿܢ ܪܸܡܬ̣ܵܐ. ܘܡܝܼ̈ܬܹܐ ܬܘܼܒ̣ ܠܵܐ ܢܸܬ̇ܕܲܟ݂ܪܘܼܢ. ܘܢܸܬ̇ܬ̇ܒܲܪ ܐܲܝܟ݂ ܩܲܝܣܵܐ ܥܵܘܵܠܵܐ.

²¹ܘܲܥܩܲܪܬ̣ܵܐ ܒܝܼܫܬܵܐ ܠܵܐ ܬܹܐܠܲܕ݂: ܘܠܲܐܪܡܲܠܬܵܐ ܠܵܐ ܐܲܛܐܸܒ̣ܘ.

²²ܘܩܸܢܝܵܢܵܐ ܕܥܲܫܝܼܢܵܐ ܒܚܲܝܠܹܗ ܢܩܘܼܡ. ܘܠܵܐ ܢܗܲܝܡܸܢ ܒܚܸܙܘܵܐ.

²³ܘܢܸܫܪܹܐ ܒܫܸܠܝܵܐ ܘܢܸܬ̇ܬ̇ܟ݂ܠ ܘܥܲܝܢܵܘ̈ܗܝ ܥܲܠ ܐܘܼܪ̈ܚܵܬ̣ܗܘܿܢ ܢܸܬ̇ܬ̇ܪ̈ܝܼܡܵܢ.

²⁴ܩܲܠܝܼܠ ܘܠܲܝܬ̇ ܐܸܢܘܿܢ: ܘܢܸܬ̣ܡܟ̇ܟ݂ܘܿܢ ܘܢܹܐܒ̣ܕ̇ܘܼܢ ܟܠܗܘܿܢ ܡܲܪ̈ܓ̇ܙܵܢܹܐ. ܘܐܲܝܟ݂ ܪܹܫܵܐ ܕܫܸܒ̇ܠܹ̈ܐ ܢܹܐܒ݂ܫܘܼܢ ܘܢܸܬ̣ܦܲܪܟ̇ܘܼܢ.

²⁵ܘܐܸܢ ܠܵܐ ܗ̄ܘܼܵܐ ܪܘܼܓ̣ܙܹܗ: ܢܟܲܕ̇ܒܲܢܝ ܘܬܸܬ̣ܚܫܸܒ̣ ܩܕ݂ܵܡ ܐܲܠܵܗܵܐ ܡܸܠܲܬ̣ܝ.