Read Aramaic Peshita Job 27 Bible Online

Job 27 - Aramaic Peshita bible

Job 27

¹ܘܐܵܘܣܸܦ ܐܝܼܘܿܒ̣: ܠܡܸܡܬܲܠ ܡܲܬ̣ܠܹܗ: ܘܐܸܡܲܪ.

²ܚܲܝ ܗ̄ܘܼ ܐܲܠܵܗܵܐ ܕܥܲܪܩܸܠ ܕܝܼܢܝ. ܘܚܲܣܝܼܢܵܐ ܕܐܵܡܲܪ ܠܢܲܦ̮ܫܝ ܘܟ݂ܠܵܗ̇ ܒܝܼ.

³ܘܪܘܼܚܹܗ ܕܐܲܠܵܗܵܐ ܒܲܢܚܝܼܪ̈ܲܝ.

⁴ܐܸܢ ܢܡܲܠ̈ܠܵܢ ܣܸܦ̈ܘܵܬ̣ܝ ܥܵܘܼܠܵܐ: ܘܠܸܫܵܢܝ ܐܸܢ ܢܡܲܠܸܠ ܢܸܟ݂ܠܵܐ.

⁵ܚܵܣ ܠܝܼ: ܥܕܲܡܵܐ ܕܐܹܡܘܼܬ̣: ܠܵܐ ܬܸܥܒܲܪ ܬܲܡܝܼܡܘܼܬ̣ܝ ܡܹܢܝ.

⁶ܘܲܒ̣ܙܲܕ̇ܝܼܩܘܼܬ̣ܝ ܐܹܚܲܡܣܸܢ ܘܠܵܐ ܐܹܪܲܦܹܐ: ܘܠܵܐ ܨܪܲܦ̣ ܠܝܼ ܠܹܒ̇ܝ ܡ̣ܢ ܝܵܘ̈ܡܲܝ.

⁷ܘܢܸܗܘܹܐ ܐܲܝܟ݂ ܪܲܫܝܼܥܵܐ ܒܥܸܠܕ̇ܒ̣ܵܒ̣ܝ: ܘܣܵܢܐܝ ܐܲܝܟ݂ ܥܵܘܿܠܵܐ.

⁸ܡܵܢܵܘ ܣܲܒ̣ܪܹܗ ܕܚܲܢܦܵܐ ܕܲܩܢܹܐ ܢܸܟ݂ܣܹ̈ܐ: ܒܥܸܕܵܢܵܐ ܕܫܵܩܹ̇ܠ ܠܵܗ̇ ܐܲܠܵܗܵܐ ܠܢܲܦ̮ܫܹܗ.

⁹ܡܸܛܠ ܕܠܵܐ ܫܡܲܥ ܐܲܠܵܗܵܐ ܩܵܠ ܨܠܘܿܬܹܗ: ܟܲܕ݂ ܬܹܐܬܹܐ ܥܠܵܘܗܝ ܒܝܼܫܬܵܐ.

¹⁰ܐܸܢ ܕܹܝܢ ܥܲܠ ܚܲܣܝܼܢܵܐ ܢܸܬ̇ܬ̇ܟܸܠ: ܘܢܸܩܪܹܐ ܠܐܲܠܵܗܵܐ ܒܟ݂ܠ ܥܸܕܵܢ: ܢܸܥܢܹܝܘܗܝ ܐܲܠܵܗܵܐ ܘܢܸܫ̱ܡܥܝܼܘܗܝ.

¹¹ܠܟ݂ܘܿܢ ܕܹܝܢ ܡܲܫܠܸܡ ܐ̄ܢܵܐ ܠܟ݂ܘܿܢ ܒܝܲܕ݂ ܐܲܠܵܗܵܐ. ܕܲܥܒ̣ܵܕܲܝ̈ܟܘܿܢ ܡܸܢܹܗ ܠܵܐ ܡܸܬ̣ܟܲܣܹܝܢ.

¹²ܗܵܐ ܐܲܢ̄ܬ̇ܘܿܢ ܟܠܟ݂ܘܿܢ ܚ̣ܙܲܝܬ̇ܘܿܢ ܘܲܠܡܵܢܵܐ ܡܸܬ̣ܪܵܘ̱ܪܒ̣ܝܼܢ ܐܢ̄ܬ̇ܘܿܢ ܣܪܝܼܩܵܐܝܼܬ̣.

¹³ܗܵܐ ܗܵܕܹ̇ܐ ܗ̄ܝܼ ܡܢܵܬܹܗ ܕܒܲܪܢܵܫܵܐ ܪܲܫܝܼܥܵܐ ܡ̣ܢ ܠܘܵܬ̣ ܐܲܠܵܗܵܐ. ܘܝܵܪܬ̇ܘܼܬ̣ܵܐ ܕܡܲܒ̣ܐ̱ܫܵܢܹ̈ܐ ܕܡ̣ܢ ܚܲܣܝܼܢܵܐ ܢܩܲܒܿܠܘܼܢ.

¹⁴ܐܸܢ ܢܸܣܓ̇ܘܿܢ ܒܢܲܝ̈ܗܘܿܢ ܠܚܲܪܒܵܐ: ܘܝܲܠܘܼܕܲܝ̈ܗܘܿܢ ܠܵܐ ܢܸܣܒ̇ܥܘܼܢ ܠܲܚܡܵܐ.

¹⁵ܫܲܪܟ̇ܗܘܿܢ ܒܡܵܘܬܵܐ ܢܸܬ̣ܩܲܒ̣ܪܘܼܢ. ܘܐܲܪ̈ܡܠܵܬ̣ܗܘܿܢ ܠܵܐ ܢܸܬ̣ܒܲܟ̇ـ̈ـܝܵܢ.

¹⁶ܐܸܢ ܢܟܲܢܫܘܼܢ ܟܸܣܦܵܐ ܐܲܝܟ݂ ܥܲܦܪܵܐ. ܘܐܲܝܟ݂ ܛܝܼܢܵܐ ܢܸܬ̣ܩܢܘܼܢ ܠܒ̣ܘܼܫܹ̈ܐ.

¹⁷ܗܸܢܘܿܢ ܢܲܬ̣ܩܢܘܼܢ: ܘܙܲܕ̇ܝܼܩܵܐ ܢܸܠܒܲܫ ܘܟܸܣܦܗܘܿܢ ܢܦܲܠܸܓ̣.

¹⁸ܒܢ̣ܵܐ ܓܹܝܪ ܐܲܝܟ݂ ܓܘܵܓܲܝ ܒܲܝܬܹ̇ܗ. ܘܐܲܝܟ݂ ܡܛܲܠܬ̣ܵܐ ܥ̣ܒܲܕ݂ ܡܲܛܠܠܹܗ.

¹⁹ܡܸܛܠ ܕܥܲܬ̇ܝܼܪܵܐ ܢܸܫܟܲܒ̣: ܘܠܵܐ ܡܵܘܣܸܦ ܠܲܡܩܵܡ. ܥܲܝܢܵܘ̈ܗܝ ܦܵܬܲܚ: ܘܠܲܝܬܵܘܗܝ.

²⁰ܢܲܕ݂ܪ̱ܟ݂ܝܼܘܗܝ ܕܠܘܼܚܝܵܐ ܐܲܝܟ݂ ܡܲـ̈ـܝܵܐ: ܘܐܲܝܟ݂ ܟܘܿܟ݂ܝܼܬ̣ܵܐ ܕܦܵܪܚܵܐ.

²¹ܬܸܫܩܠܝܼܘܗܝ ܪܘܼܚܵܐ ܒܠܸܠܝܵܐ. ܘܢܹܐܙܲܠ: ܘܢܸܕܚܩܘܼܢܹܗ ܡ̣ܢ ܐܲܬ̣ܪܹܗ.

²²ܘܬܸܫܕܹ̇ܝܘܗܝ ܕܠܵܐ ܚܵܘܣܵܢ. ܘܡ̣ܢ ܐܝܼܕܹܗ ܡܸܥܪܲܩ ܢܸܥܪܘܿܩ.

²³ܢܛܲܪܸܦ ܥܠܲܝܗܘܿܢ ܐܝܼܕܹܗ. ܘܢܲܫܪܸܩ ܥܠܲܝܗܘܿܢ ܡ̣ܢ ܐܲܬ̣ܪܹܗ.