Read Aramaic Peshita Job 28 Bible Online

Job 28 - Aramaic Peshita bible

Job 28

¹ܘܡܸܛܠ ܕܐܝܼܬ̣ ܠܟ݂ܣܦܵܐ ܢܸܦܩܵܐ: ܘܐܲܬ̣ܪܵܐ ܕܲܠܕܲܗܒ̣ܵܐ ܡܫܲܚܠܝܼܢ.

²ܘܦܲܪܙܠܵܐ ܡ̣ܢ ܥܲܦܪܵܐ ܡܸܬ̣̱ܢܣܸܟ݂ ܘܡ̣ܢ ܟܹܐܦܹ̈ܐ ܡܸܬ̣̱ܢܣܸܟ݂ ܢܚܵܫܵܐ.

³ܩܸܨܵܐ ܣܵܡ̣ ܠܚܸܫܘܿܟ݂ܵܐ ܘܲܠܟ݂ܠ ܣܵܘܦܵܐ ܗ̤ܘ ܝܵܕܲܥ: ܟܹܐܦܵܐ ܕܚܲܒ̣ܪܵܐ ܘܛܸܠܵܠܹܗ ܕܡܵܘܬܵܐ.

⁴ܬܘܼܪ̱ܥܬ̣ܵܐ ܝܼܪܸܬ̣ܘ ܡ̣ܢ ܥܲܡܵܐ ܓܝܼܘܿܪܵܐ. ܐܸܬ̇ܛܥܝܼܘ ܡ̣ܢ ܪܸ̈ܓ̣ܠܵܬ̣ܵܐ. ܘܐܸܬ̇ܕܲܠܲܠܘ ܡ̣ܢ ܐ̄ܢܵܫܵܐ.

⁵ܓ̣ܠܵܘ ܐܲܪܥܵܐ ܕܡܸܢܵܗ̇ ܢܵܦܹ̇ܩ ܡܵܙܘܿܢܵܐ. ܘܲܬ̣ܚܘܿܬܹܝܗ̇ ܡܸܬ̣ܗܲܦܲܟ݂ ܐܲܝܟ݂ ܢܘܼܪܵܐ.

⁶ܘܕ݂ܘܼܟ̇ܬܵܐ ܕܣܲܦܝܼܠܵܐ ܟܹܐܦܹܝ̈ܗ̇. ܘܫܵܚܠܵܐ ܕܕܲܗܒ̣ܵܐ ܒܲܫܒ̣ܝܼ̈ܠܹܝܗ̇.

⁷ܠܵܐ ܝܼܕܲܥܬ̣ܵܗ̇ ܛܲܝܪܵܐ: ܘܠܵܐ ܚܙܵܬ̣ܵܗ̇ ܥܹܝܢ ܕܲܝܬܵܐ.

⁸ܘܠܵܐ ܕܲܪ̈ܫܵܗ̇ ܚܲܝ̈ܘܵܬ̣ܵܐ. ܘܠܵܐ ܥܸܒܲܪ ܥܠܹܝܗ̇ ܐܲܪܝܵܐ.

⁹ܒܟܹܐܦ ܛܲܪܵܢܝܼܢ ܐܵܘܫܸܛ̣ ܐܝܼܕܹܗ. ܘܲܗ̣ܦܲܟ݂ ܡ̣ܢ ܥܸܩܵܪ̈ܲܝܗܘܿܢ ܛܘܼܪ̈ܝܼܢ.

¹⁰ܒܚܵܘܣܵܢܹܗ ܢܲܗܪ̈ܵܘܵܢ ܢܦܲܠܸܓ̣. ܘܟ݂ܠ ܐܝܼܩܵܪ ܚܙܵܬ̤ ܥܲܝܢܹܗ.

¹¹ܘܥܘܼܫܢܵܐ ܕܢܲܗܪ̈ܵܘܵܬ̣ܵܐ ܚ̣ܒܲܫ ܘܡ̣ܢ ܬܲܚܦܝܼܬ̣ܵܐ ܢܦܲܩ̣ ܢܘܼܗܪܵܐ.

¹²ܘܚܸܟ݂ܡ̱ܬ̣ܵܐ ܐܲܝܡܸܟܵܐ ܬܸܫܬ̇ܟܲܚ ܘܐܲܝܢܵܐ ܗ̄ܘܼ ܐܲܬ̣ܪܵܐ ܕܣܘܼܟܵܠܵܗ̇.

¹³ܠܵܐ ܝܑܼܕܲܥ̣ ܐ̄ܢܵܫ ܓܲܙܵܗ̇: ܘܠܵܐ ܡܸܫܬܲܟ݂ܚܵܐ ܐܸܠܵܐ ܐܸܢ ܒܐܲܬ̣ܪܵܐ ܕܚܲܝܹ̈ܐ.

¹⁴ܬܗܘܿܡܵܐ ܐܵܡܲܪ ܠܵܐ ܗܘ̤ܵܬ̣ ܒܝܼ. ܘܝܲܡܵܐ ܐܵܡ̇ܲܪ ܠܲܝܬ̇ ܠܘܵܬ̣ܝ.

¹⁵ܠܵܐ ܡܸܬ̣̱ܝܼܗܸܒ̣ ܕܲܗܒ̣ܵܐ ܚܠܵܦܹܝܗ̇. ܘܠܵܐ ܡܸܬ̣̱ܡܢܹܐ ܟܸܣܦܵܐ ܒܲܕ݂ܡܹ̈ܝܗ̇.

¹⁶ܠܵܐ ܡܸܬ̣ܚܲܠܦܵܐ ܒܕܲܗܒ̣ܵܐ ܕܐܵܘܦܹܝܪ: ܘܲܒ̣ܒܹܪ̈ܘܿܠܹܐ ܘܲܒ̣ܣܲܦܝܼܠܵܐ.

¹⁷ܠܵܐ ܦܵܚܹ̇ܡ ܠܵܗ̇ ܕܲܗܒ̣ܵܐ ܘܲܙܓ̣ܘܿܓ̣̈ܝܵܬ̣ܵܐ: ܘܡܲܪ̈ܓܵܢܝܵܬ̣ܵܐ ܛܵܒ̣ܵـ̈ـܬ̣ܵܐ. ܘܛܲܒ̣ܥܹ̈ܐ ܘܚܘܼܡܪܹ̈ܐ ܠܵܐ ܦܵܚ̇ܡܝܼܢ ܠܵܗ̇.

¹⁸ܛܵܒܲܐܗ̄ܝܼ ܚܸܟ݂ܡ̱ܬ̣ܵܐ ܡ̣ܢ ܟܹܐܦܹ̈ܐ ܛܵܒ̣ܵـ̈ـܬ̣ܵܐ. ܠܵܐ ܦܵܚܹ̇ܡ ܠܵܗ̇ ܦܬ̣ܵܘܬ̇ܟ݂ܵܐ ܕܲܗܝܵܐ. ܘܒܲܙܡܲܪ̈ܓ̇ܕܹܐ: ܘܲܒ̣ܩܲܪ̈ܟܸ̇ܕ݂ܢܹܐ ܠܵܐ ܡܸܬ̣ܚܲܠܦܵܐ.

¹⁹ܛܵܒ̣ܵܐ ܗ̄ܝܼ ܓܹܝܪ ܚܸܟ݂ܡ̱ܬ̣ܵܐ ܡ̣ܢ ܟܠ ܡܸܕܹ̇ܡ ܠܵܐ ܦܵܚܹ̇ܡ ܠܵܗ̇. ܡܲܪ̈ܓܵܢܝܵܬ̣ܵܐ ܕܟ݂ܘܼܫ ܘܟܹܐܦܹ̈ܐ ܕܦܸܕ̇ܬ̣ܵܐ ܠܵܐ ܦܵܚ̈ܡܵܢ ܠܵܗ̇.

²⁰ܚܸܟ݂ܡ̱ܬ̣ܵܐ ܐܲܝܡܸܟܵܐ ܐܵܬܲܝܵܐ. ܘܐܲܝܢܵܘ ܐܲܬ̣ܪܵܐ ܕܣܘܼܟܵܠܵܗ̇.

²¹ܟܲܣܝܵܐ ܗ̄ܝܼ ܡ̣ܢ ܥܲܝܢܲܝ̈ ܟܠ ܕܚܲܝ. ܘܡ̣ܢ ܦܵܪܲܚܬ̣ܵܐ ܕܲܫܡܲܝܵܐ ܡܣܲܬ̇ܪܵܐ ܗ̄ܝܼ.

²²ܐܲܒ̣ܕܵܢܵܐ ܘܡܵܘܬܵܐ ܐܸܡܲܪܘ: ܕܒܸܐܕ݂ܢܲܝ̈ܢ ܫ̣ܡܲܥ̄ܢ ܫ̣ܡܥܵܗ̇.

²³ܡܸܛܠ ܕܐܲܠܵܗܵܐ ܗ̄ܘܼ ܒܲܝܢܲܢ ܐܘܼܪ̈ܚܵܬ̣ܵܗ̇. ܘܗ̤ܘܝܘܼ ܝܵܕܲܥ ܕܘܼܟ̇ܬ̣ܵܗ̇.

²⁴ܡܸܛܠ ܕܗ̤ܘ ܚܵܙܹ̇ܐ ܠܣܘܿܦ ܟܠ ܕܒܲܐܪܥܵܐ. ܘܲܬ̣ܚܹܝܠ ܟܠ ܫܡܲܝܵܐ ܚܵܙܹ̇ܐ.

²⁵ܕܲܥܒܲܕ݂ ܡܲܬ̣ܩܵܠܵܐ ܠܪܘܼܚܵܐ. ܘܡܲـ̈ـܝܵܐ ܐܲܬ̣ܩܸܢ ܒܲܟ݂ܝܵܠܬܵܐ.

²⁶ܥ̣ܒܲܕ݂ ܢܵܡ̇ܘܿܣܵܐ ܠܡܸܛܪܵܐ: ܘܐܘܼܪܚܵܐ ܠܚܸܙܘܵܢܹ̈ܐ ܕܩܵܠܵܐ.

²⁷ܗܵܝܕܹ̇ܝܢ ܚ̣ܙܵܗ̇ ܘܐܸܫܬܲܥܝܵܗ̇ ܬܲܩ̣ܠܵܗ̇: ܐܵܦ ܒܲܕܩ̣ܵܗ̇.

²⁸ܘܐܸܡ̣ܲܪ ܠܒܲܪܢܵܫܵܐ: ܕܸܚܠ̱ܬܹܗ ܕܐܲܠܵܗܵܐ ܗ̤ܝ ܗ̄ܝܼ ܚܸܟ݂ܡ̱ܬ̣ܐ ܘܲܠܡܸܣܛܵܐ ܡ̣ܢ ܒܝܼܫܬܵܐ ܒܘܼܝܵܢܵܐ.