Read Aramaic Peshita Job 29 Bible Online

Job 29 - Aramaic Peshita bible

Job 29

¹ܘܐܵܘܣܸܦ ܐܝܼܘܿܒ̣ ܠܡܸܡܬܲܠ ܡܲܬ̣ܠܹܗ: ܘܐܸܡ̣ܲܪ.

²ܡ̇ܢ ܕܹܝܢ ܥܲܒ̣ܕܲܢܝ ܐܲܝܟ݂ ܝܲܪ̈ܚܹܐ ܩܲܕ݂ܡܵܝܹ̈ܐ. ܘܐܲܝܟ݂ ܝܵܘ̈ܡܵܬܹܗ ܕܐܲܠܵܗܵܐ ܢܲܛܪܲܢܝ.

³ܕܸܚ̱ܠܬܹܗ ܥ̣ܒܲܕ݂ ܠܥܸܠ ܡ̣ܢ ܪܹܫܝ ܒܡܲܦܪܲܣ ܫܪܵܓܹܗ ܥܸܠܵܘܲܝ ܘܲܒ̣ܢܘܼܗܪܹܗ ܗܲܠܟܹ̇ܬ̣ ܒܚܸܫܘܿܟ݂ܵܐ.

⁴ܐܲܝܟ݂ ܕܲܗܘܹ̇ܝܬ̣ ܒܝܵܘ̈ܡܲܝ ܚܸܣܕ݂ܝ: ܟܲܕ݂ ܡܲܓܸ̇ܢ ܗ̄ܘܼܵܐ ܐܲܠܵܗܵܐ ܥܸܠܵܘܲܝ ܡܲܫܟܲܢܝ.

⁷ܟܲܕ݂ ܢܸܦܩܹ̇ܬ̣ ܠܬܲܪܥܵܐ ܘܲܩܪܹܝ̇ܬ̣. ܘܲܒ̣ܫܘܼܩܵܐ ܐܲܝܟ݂ ܒܵܝ̇ܫܵܐ ܝܸܬ̣ܒܹ̇ܬ̣.

⁸ܚܙ̣ܵܐܘܼܢܝ ܥܠܲܝܡܹ̈ܐ ܘܐܸܬ̇ܛܲܫܝܼܘ ܘܩ̣ܵܡܘ ܣܵܒܹ̈ܐ ܘܐܸܬ̇ܕܲܡܲܪܘ ܒܝܼ.

⁹ܘܪܵܘ̱ܪ̈ܒ̣ܵܢܹܐ ܐܸܬ̣ܟ̇ܠܝܼܘ ܒܡܸܠܹ̈ܐ. ܘܐܝܼܕܲܝ̈ܗܘܿܢ ܣ̣ܵܡܘ ܥܲܠ ܦܘܼܡܗܘܿܢ.

¹⁰ܩܵܠܵܐ ܕܫܲܠܝܼܛܵܢܹ̈ܐ ܕܡܸܬ̇ܛܲܫܹܝܢ. ܘܠܸܫܵܢܗܘܿܢ ܕܒܹܩ̣ ܠܲܫܡܲܝ̈ ܚܸܟ̇ܗܘܿܢ.

¹¹ܡܸܛܠ ܕܐܸܕ݂ܢܵܐ ܕܫܸܡܥܲܬ̤: ܫܲܒܲܚܬ̣ܵܢܝ ܘܥܲܝܢܵܐ ܕܲܚܙܵܬ̤ ܣܲܗܸܕ̇ܬܲܢܝ.

¹²ܡܸܛܠ ܕܦܲܠܛܹ̇ܬ̣ ܠܡܸܣܟܹ̇ܢܵܐ ܡ̣ܢ ܐܘܼܠܨܵܢܵܐ: ܘܲܠܝܲܬ̣ܡܵܐ ܕܠܲܝܬ̇ ܠܹܗ ܡܥܲܕܪܵܢܵܐ.

¹³ܒܘܼܪܟ̇ܬܹܗ ܕܐܲܒ̇ܝܼܕ݂ܵܐ ܥܠܲܝ ܬܸܥܘܿܠ. ܘܠܸܒܵܐ ܕܐܲܪܡܲܠܬܵܐ ܚܲܕ̇ܝܼܬ̣.

¹⁴ܩܘܼܫܬܵܐ ܠܸܒ̣ܫܹ̇ܬ̣: ܘܠܲܒ̣ܫܲܢܝ ܐܲܝܟ݂ ܦܪܝܼܣܵܐ ܘܲܟ݂ܠܝܼܠܵܐ ܕܕ݂ܝܼܢܵܐ.

¹⁵ܥܲܝܢܹ̈ܐ ܗܘܹ̇ܝܬ̣ ܠܲܥܘܝܼܪܹ̈ܐ: ܘܪܸ̈ܓ̣ܠܹܐ ܠܲܡܚܲܓ̇ܪܹ̈ܐ.

¹⁶ܐܲܒ̣ܵܐ ܗܘܹ̇ܝܬ̣ ܠܒ̣ܵܝܫܹ̈ܐ. ܘܕ݂ܝܼܢܵܐ ܕܠܵܐ ܝܵܕܲܥ ܗ̄ܘܹ̇ܝܬ̣ ܒܲܕ̇ܩܹ̇ܬ̣.

¹⁷ܬܸܒ̣ܪܹܬ̣ ܢܝܼܒ̣ܵܘ̈ܗܝ ܕܥܵܘܿܠܵܐ: ܘܲܚܛܘܼܦܝܵܐ ܐܲܦܩܹ̇ܬ̣ ܡ̣ܢ ܒܹܝܬ̣ ܫܸܢܵܘ̈ܗܝ.

¹⁸ܘܐܸܡ̇ܪܹܬ̣ ܥܲܡܵܐ ܡܸܣܟܹ̇ܢܵܐ ܐܸܦܪܘܿܩ ܘܐܲܝܟ݂ ܩܲܢܝܵܐ ܐܸܫܠܲܡ ܘܐܲܝܟ݂ ܚܵܠܵܐ ܕܝܲܡܡܹ̈ܐ ܐܲܣܓܹ̇ܐ ܝܵܘ̈ܡܲܝ.

¹⁹ܫܸܪ̈ܫܲܝ ܢܨܝܼܒ̣ܝܼܢ ܥܲܠ ܡܲـ̈ـܝܵܐ. ܘܛܸܠܵܠܵܐ ܢܒ̣ܘܼܬ̣ ܘܒܲܚܨܵܕ݂ܵܐ ܐܸܬ̣ܩܪܹܐ.

²⁰ܐܸܬ̇ܬ̇ܚܸܕ݂ ܥܲܡܝ ܘܩܸܫܬܵܐ ܒܐܝܼܕ݂ܝ ܐܸܬ̣ܚܲܠܦܲܬ̤.

²¹ܘܐܸܠܘܼ ܫܲܡ̣ܥܘܼܢܝ ܘܣܲܒܲܪܘ: ܘܲܫ̣ܡܲܥܘ ܠܡܘܼܠܟܵܢܝ.

²²ܘܡ̣ܢ ܦܸܬ̣ܓ̣ܵܡܲܝ̈ ܠܵܐ ܛܥ̣ܵܘ. ܘܲܠܗܘܿܢ ܒܸܣܡܲܬ̤ ܡܸܠܬ̣ܝ.

²³ܣܲܟ̇ܝܼܘ ܠܝܼ ܐܲܝܟ݂ ܕܲܠܡܸܛܪܵܐ. ܘܦܘܼܡܗܘܿܢ ܦ̣ܥܲܪܘ ܐܲܝܟ݂ ܕܠܲܪܒ̣ܝܼܥܵܐ.

²⁴ܐܸܓ̣ܚܲܟ݂ ܥܠܲܝܗܘܿܢ ܘܠܵܐ ܢܗܲܝܡܢܘܼܢ ܘܲܒ̣ܢܘܼܗܪܵܐ ܕܐܲܦܲܝ̈ ܠܵܐ ܢܗܲܠܟ݂ܘܼܢ.

²⁵ܐܸܒ̣ܨܹܐ ܐܘܼܪ̈ܚܵܬ̣ܗܘܿܢ. ܘܐܸܗܦܘܿܟ݂ ܘܐܸܫܪܹܐ ܐܲܝܟ݂ ܡܲܠܟܵܐ ܒܚܲܝܠܹܗ: ܘܐܲܝܟ݂ ܓܲܒ̣ܪܵܐ ܕܠܲܐܒ̣ܝܼ̈ܠܹܐ ܡܒܲܝܲܐ.