Read Aramaic Peshita Job 3 Bible Online

Job 3 - Aramaic Peshita bible

Job 3

¹ܘܡ̣ܢ ܒܵܬܲܪܟܸ̇ܢ ܦ̣ܬܲܚ ܐܝܼܘܿܒ̣ ܦܘܼܡܹܗ: ܘܠܵܛ ܝܵܘܡܵܐ ܕܐܸܬ̣ܝܼܠܸܕ݂ ܒܹܗ.

²ܥ̣ܢܵܐ ܐܝܼܘܿܒ̣ ܘܐܸܡ̣ܲܪ

³ܢܹܐܒܲܕ ܝܵܘܡܵܐ ܕܐܸܬ̣ܝܲܠܕܹܿܬ̣ ܒܹܗ: ܘܠܸܠܝܵܐ ܘܐܸܬ̣ܐ̱ܡܲܪ ܒܹܗ ܕܐܸܬ̣ܒܿܛܸܢ ܓܲܒ̣ܪܵܐ.

⁴ܝܵܘܡܵܐ ܗܵܘܿ ܢܸܗܘܹܐ ܚܸܫܘܿܟ݂. ܘܠܵܐ ܢܸܬ̣ܒ̇ܥܝܼܘܗܝ ܐܲܠܵܗܵܐ ܡ̣ܢ ܠܥܸܠ. ܘܠܵܐ ܢܸܕ݂ܢܲܚ ܥܠܵܘܗܝ ܢܘܼܗܪܵܐ.

⁵ܢܟܲܣܹܝܘܗܝ ܚܸܫܘܿܟ݂ܵܐ ܘܛܲـ̈ـܠܠܲܝ ܡܵܘܬܵܐ. ܬܸܪܟܲܢ ܥܠܵܘܗܝ ܥܢܵܢܵܐ. ܢܸܒ̣ܥܬ̣ܘܼܢܹܗ ܡܲܪܝܼܪ̈ܲܝ ܝܵܘܡܵܐ.

⁶ܠܸܠܝܵܐ ܗܵܘܿ ܢܟܲܣܹܝܘܗܝ ܥܲܡܛܵܢܵܐ. ܝܵܘܡܵܐ ܗܵܘ̇ ܠܵܐ ܢܸܬ̣ܚܫܸܒ̣ ܒܡܸܢܝܵܢܵܐ ܕܝܵܘ̈ܡܵܬ̣ܵܐ ܕܫܲܢ̄ܬܵܐ. ܘܲܒ̣ܡܸܢܝܵܢܵܐ ܕܝܲܪ̈ܚܹܐ ܠܵܐ ܢܸܥܘܿܠ.

⁷ܠܸܠܝܵܐ ܗܵܘܿ ܢܸܗܘܹܐ ܡܓܲܙܲܝ: ܘܠܵܐ ܬܸܥܘ̇ܠ ܒܹܗ ܬܸܫܒ̇ܘ̇ܚܬܵܐ.

⁸ܢܠܘܼܛܘܼܢܹܗ ܠܵܝ̇ܛܲܝ̈ ܝܵܘܡܵܐ: ܐܲܝܠܹܝܢ ܕܲܥܬ̣ܝܼܕ݂ܝܼܢ ܠܲܡܥܲܝܵܪܘܼܬܹܗ ܠܠܸܘܝܵܬ̣ܵܢ.

⁹ܢܸܚ̄ܫܕܘܼܢ ܟܵܘ̈ܟ̇ܒܲܝ ܫܲܦܪܹܗ. ܢܣܲܟܿܘܿܢ ܠܢܘܼܗܪܵܐ: ܘܠܵܐ ܢܸܗܘܹܐ ܠܹܗ. ܘܠܵܐ ܢܸܚܙܹܐ ܒܙܲܠܝܼܩܲܝ̈ ܫܲܦܪܵܐ.

¹⁰ܥܲܠ ܕܠܵܐ ܐܸܚܲܕ݂ ܬܲܪ̈ܥܲܝ ܡܲܪܒ̇ܥܵܗ̇ ܕܐܹܡܝ. ܘܣܲܬܲܪ ܥܲܡܠܵܐ ܡ̣ܢ ܥܲܝܢܲܝ̈.

¹¹ܠܡܵܢܵܐ ܠܵܐ ܡܝܼܬܹܿܬ̣ ܡ̣ܢ ܡܲܪܒ̇ܥܵܐ. ܘܡ̣ܢ ܒܲܛܢܵܐ ܠܡܵܢܵܐ ܢܸܦܩܹ̇ܬ̣: ܣܵܦܹ̇ܬ̣ ܕܹܝܢ.

¹²ܠܡܵܢܵܐ ܪ̈ܲܒܿܝܵܢܝ ܒܘܼܪ̈ܟܹܿܐ. ܘܡ̣ܢ ܬ̈ܕܲܝܵܐ ܠܡܵܢܵܐ ܝܼܢܩܹܿܬ̣.

¹³ܟܒܲܪ ܕܹܝܢ ܗܵܫܵܐ ܫܟ݂ܝܼܒ̣ ܗ̄ܘܹܿܝܬ̣. ܘܲܫܠܹܐ ܘܕܲܡܝܼܟ݂ ܗ̄ܘܹܿܝܬ̣ ܘܢܝܼܚ.

¹⁴ܥܲܡ ܡܲܠ̈ܟܹܐ ܘܫܲܠܝܼܛܵܢܹ̈ܐ ܕܐܲܪܥܵܐ: ܕܒܲܢ̈ܝܵܢ ܠܗܘܿܢ ܚܪ̈ܒ̣ܵܬ݂ܵܐ.

¹⁵ܐܵܘ ܥܲܡ ܫܲܠܝܼܛܵܢܹ̈ܐ: ܕܕܲܗܒ̣ܵܐ ܐܝܼܬ̣ ܠܗܘܿܢ: ܘܲܡܠܹܝܢ ܒܵܬܲܝ̈ܗܘܿܢ ܟ݂ܣܦܵܐ.

¹⁶ܐܵܘ ܐܲܝܟ݂ ܚܲܝ̈ܛܹܐ ܛܡܝܼܪܹ̈ܐ ܐܲܝܟܵܘ ܠܵܐ ܗܘܹܿܝܬ̣: ܘܐܲܝܟ݂ ܥܘܸܠܹ̈ܐ ܕܠܵܐ ܚܙ̣ܵܘ ܢܘܼܗܪܵܐ.

¹⁷ܕܬܲܡܵܢ ܥܵܘ̈ܠܹܐ ܫܠܝܼܘ ܡ̣ܢ ܕܲܠܡܲܪܓܵܙܘ ܘܬܲܡܵܢ ܡܸܬ̇ܬ̇ܢܝܼܚܝܼܢ ܐܲܝܠܹܝܢ ܕܲܠܐܹܝܢ ܒܚܲܝܲܝ̈ܗܘܿܢ.

¹⁸ܘܐܲܟ݂ܚ̄ܕ݂ܵܐ ܐܲܣܝܼܪܹ̈ܐ ܫܠܹܝܢ: ܘܠܵܐ ܫܵܡ̇ܥܝܼܢ ܩܵܠܵܐ ܕܲܡܫܲܥܒ̇ܕ݂ܵܢܵܐ.

¹⁹ܙܥܘܿܪܵܐ ܘܪܲܒܵܐ ܬܲܡܵܢ ܗ̄ܘܼ: ܘܥܲܒ̣ܕܵܐ ܕܡܸܬ̣ܚܲܪܲܪ ܡ̣ܢ ܡܵܪܹܗ.

²⁰ܠܡܵܢܵܐ ܡܸܬ̣ܝܼܗܸܒ̣ ܢܘܼܗܪܵܐ ܠܥܵܡ̈ܠܹܐ: ܘܚܲܝܹ̈ܐ ܠܡܲܪܝܼܪ̈ܲܝ ܢܲܦ̮ܫܵܐ.

²¹ܕܲܡܣܲܟܹܿܝܢ ܠܡܵܘܬܵܐ ܘܠܲܝܬ̣̇: ܘܒ݂ܵܥܹܿܝܢ ܠܹܗ ܐܲܝܟ݂ ܕܲܠܣܝܼܡܬܵܐ.

²²ܕܚܵܕܹܿܝܢ ܘܡܸܬ̣ܟܲܢܫܝܼܢ ܘܕ݂ܵܝ̇ܨܝܼܢ: ܟܲܕ ܡܸܫܟ̇ܚܝܼܢ ܩܲܒ̣ܪܵܐ.

²³ܠܓܲܒ̣ܪܵܐ ܕܐܘܼܪܚܹܗ ܡܣܲܬ̇ܪܵܐ: ܘܡܲܓܸ̇ܢ ܐܲܠܵܗܵܐ ܥܠܵܘܗܝ.

²⁴ܡܸܛܠ ܕܡ̣ܢ ܩܕ݂ܵܡ ܠܲܚܡ̄ܝ ܬܸܢܚܲܬ̣ܝ ܥ̣ܠܲܬ̤. ܘܐܸܫܬܲܦܲܥ ܐܲܝܟ݂ ܡܲـ̈ـܝܵܐ ܢܸܗ̈ܡܵܬ̣ܝ.

²⁵ܡܸܛܠ ܕܕܸܚ̱ܠܬ̣ܵܐ ܕܕܸܚܠܹ̇ܬ̣: ܐܸܬ̣ܵܬ̤ ܥܠܲܝ. ܘܡ̣ܢ ܡܸܕܹܿܡ ܕܙܵܐܲܥ ܗ̄ܘܹܿܝܬ̣: ܡܲܛܝܲܢܝ.

²⁶ܘܠܵܐ ܫܠܹܝܬ̣ ܘܠܵܐ ܫ̣ܟ݂ܵܬܹ̇ܬ̣: ܘܠܵܐ ܢܵܚܹ̇ܬ̣: ܘܐܸܬ̣ܵܐ ܪܘ̣ܓ̣ܙܵܐ.