Read Aramaic Peshita Job 31 Bible Online

Job 31 - Aramaic Peshita bible

Job 31

¹ܩܝܵܡܵܐ ܐܲܩܝܼܡܹ̇ܬ̣ ܠܥܲܝܢܲܝ̈: ܕܠܵܐ ܐܸܬ̣ܒܲܝܲܢ ܒܲܒ̣ܬ̣ܘܼܠܬܵܐ.

²ܘܡܵܢܲܐܗ̄ܝܼ ܦܵܠܓ̇ܘܼܬܹܗ ܕܐܲܠܵܗܵܐ ܕܡ̣ܢ ܠܥܸܠ: ܘܝܵܪܬ̇ܘܼܬܹܗ ܕܐܲܠܵܗܵܐ ܕܡ̣ܢ ܡܪܵܘܡܵܐ.

³ܐܸܠܵܐ ܬܒ̣ܵܪܵܐ ܠܥܵܘܿܠܹ̈ܐ: ܘܢܘܼܟ݂ܪܵܝܘܼܬ̣ܵܐ ܥܲܠ ܥܵܒ̣̇ܕܲܝ̈ ܥܵܘܼܠܵܐ.

⁴ܗ̤ܘܝܘܼ ܚ̣ܙܵܐ ܐܘܼܪ̈ܚܵܬ̣ܝ. ܘܟ݂ܠܗܹܝܢ ܗܲܠܟ݂ܵܬ̣̈ܝ ܡ̣ܢܵܐ.

⁵ܐܸܢ ܗܲܠܟܹ̇ܬ̣ ܥܲܡ ܫܲܩܵܪܹ̈ܐ: ܘܐܸܢ ܐܸܣܬܲܪܗܲܒ̣ ܪܸ̈ܓ̣ܠܲܝ ܠܡܸܪܗܲܛ ܒܢܸܟ݂ܠܵܐ.

⁶ܢܸܬ̣ܩܠܲܢܝ ܒܡܲܣܲܐܬ̣ܵܐ ܕܩܘܼܫܬܵܐ. ܘܢܸܕܲܥ ܐܲܠܵܗܵܐ ܫܲܠܡܘܼܬܝ.

⁷ܐܸܢ ܐܲܣܛܝܼ̇ܬ̣ ܗܲܠܟ݂ܵـ̈ـܬ̣ܝ ܡ̣ܢ ܐܘܼܪܚܵܐ. ܘܐܸܢ ܐܸܙܲܠ̣ ܠܹܒ̇ܝ ܒܵܬܪ ܥܲܝ̈ܢܲܝ. ܘܐܸܢ ܕܒܸܩ̣ ܒܝܼ ܡܸܕܹ̇ܡ.

⁸ܐܸܠܵܐ ܐܸܢ ܙܸܪܥܹ̇ܬ̣: ܗܵܝܕܹܝܢ ܐܸܟ݂ܠܹ̇ܬ̣. ܘܐܸܢ ܢܸܨܒܹ̇ܬ̣: ܗܵܝܕܹ̇ܝܢ ܪܲܒ̇ܝܼܬ̣ ܘܚܸܡ̇ܠܹܬ̣.

⁹ܘܐܸܢ ܐܸܫܬܲܕܲܠ ܠܹܒ̇ܝ ܥܲܠ ܐܲܢ̄ܬ̇ܬ̣ܵܐ ܢܘܼܟ݂ܪܵܝܬܵܐ. ܘܥܲܠ ܬܲܪܥܵܐ ܕܚܲܒ̣ܪܝ ܐܸܢ ܟܸܡܢܹ̇ܬ̣.

¹⁰ܐܸܠܵܐ ܛܸܚܢܲܬ̤ ܠܐܲܚܪ̈ܵܢܝܼܢ ܐܲܢ̄ܬܲܬ̣ܝ: ܘܐܲܦܵܬ̤ ܒܕ݂ܘܼܟܵܐ ܐ̄ܚܪܹܢܝܵܐ.

¹¹ܡܸܛܠ ܕܗ̤ܝ ܚܛܝܼܬ̣ܵܐ ܗ̄ܝܼ. ܘܗ̤ܝ ܥܲܝܢܵܐ ܗ̄ܝܼ ܕܨܸܢܥ̱ܬ̣ܵܐ.

¹²ܘܢܘܼܪܵܐ ܗ̄ܝܼ ܕܲܥܕܲܡܵܐ ܠܐܲܒ̣ܕܵܢܵܐ ܐܲܟ݂ܠܵܐ. ܘܟ݂ܠܗܹܝܢ ܥܲܠ̈ܠܵܬ̣ܝ ܢܸܬ̣ܥܲܩܪ̈ܵܢ.

¹³ܐܸܢ ܐܲܣܠܝܼܬ̣ ܕܝܼܢܵܐ ܕܥܲܒ̣ܕ̇ܝ ܘܕܲܐܡܬ̣ܝ ܡܵܐ ܕܕ݂ܵܝܢ̇ܝܼܢ ܗ̄ܘܼܵܘ ܥܲܡܝ.

¹⁴ܐܸܠܵܐ ܐܹܡ̇ܪܹܬ̣ ܡܵܢܵܐ ܐܸܥܒܸ̇ܕ݂ ܡܵܐ ܕܩܵܐܹ̇ܡ ܐܲܠܵܗܵܐ. ܘܡܵܐ ܕܦܵܩܹ̇ܕ݂: ܡܵܢܵܐ ܐܲܬ̣ܝܼܒ̣ܝܼܘܗܝ.

¹⁵ܕܗܵܐ ܒܟܲܪܣܵܐ ܕܥܲܒ̣ܕܲܢܝ ܥܲܒ̣ܕܹ̇ܗ. ܘܲܒ̣ܚܲܕ݂ ܡܲܪܒ̇ܥܵܐ ܬܲܩܢܲܢܝ.

¹⁶ܐܸܢ ܟ̇ܠܹܝܬ̣ ܠܡܸܣܟܹ̇ܢܵܐ ܡܸܕܹ̇ܡ ܕܲܨܒ̣ܵܐ ܘܐܸܢ ܐܲܚܫܟܹ̇ܬ̣ ܠܥܲܝܢܹ̈ܐ ܕܐܲܪܡܲܠܬܵܐ.

¹⁷ܐܸܢ ܐܸܟ݂ܠܹ̇ܬ̣ ܠܲܚܡܝ ܒܲܠܚܘܿܕܲܝ. ܘܠܵܐ ܝܲܬ̣ܡܵܐ ܡܸܢܹܗ ܐܸܟܲܠ̣.

¹⁸ܡܸܛܠ ܕܡ̣ܢ ܛܲܠܝܘܼܬ̣ܝ ܪܲܒ̇ܝܘܼܢܝ ܟܹܐܒܹ̈ܐ. ܘܡ̣ܢ ܟܲܪܣܵܗ̇ ܕܐܹܡܝ ܬܸܢ̈ܚܵܬ̣ܵܐ.

¹⁹ܐܸܢ ܚܙܹ̇ܝܬ̣ ܕܐܲܒ̇ܝܼܕ݂ ܡ̣ܢ ܒܠܲܝ ܠܒ̣ܘܼܫܵܐ. ܘܠܲܝܬ̇ ܬܲܟ݂ܣܝܼܬ̣ܵܐ ܠܒ̣ܵܝ̇ܫܵܐ.

²⁰ܐܸܠܵܐ ܥܲܠ ܒܘܼܪ̈ܟܲܝ ܐܸܬ̣ܪܲܒ̣ܝܼܘ. ܘܡ̣ܢ ܓܸܙܹ̈ܐ ܕܥܵܢ̈ܝ ܐܸܫܬܲܚܲܢܘ.

²¹ܐܸܢ ܐܲܪܝܼܡܹ̇ܬ̣ ܥܲܠ ܝܲܬ̣ܡܵܐ ܐܝܼܕ݂ܝ. ܐܸܠܵܐ ܡܵܐ ܕܲܚܙܹ̇ܝܬܹܗ ܒܬܲܪܥܵܐ: ܥܲܕܲܪܬܹ̇ܗ.

²²ܟܲܬ̣ܦܝ ܡ̣ܢ ܟܸܪܵܗ̇ ܬܸܦܸܠ. ܘܲܕ݂ܪܵܥܝ ܡ̣ܢ ܩܲܢܝܹܗ ܢܸܬ̇ܬ̇ܒܲܪ.

²³ܡܸܛܠ ܕܕܸܚ̱ܠܬܹܗ ܕܐܲܠܵܗܵܐ ܐܲܙܝܼܥܬܲܢܝ: ܘܲܬ̣ܒ̣ܵܪܹܗ ܐܸܬ̣ܵܐ ܥܠܲܝ. ܘܡ̣ܢ ܙܵܘܼܥܬ̣ܵܐ ܠܵܐ ܐܸܫܟ̇ܚܹ̇ܬ̣ ܠܲܡܩܵܡ.

²⁴ܐܸܢ ܥܸܒ̣ܪܹ̇ܬ̣ ܕܲܗܒ̣ܵܐ ܬܘܼܟ݂ܠܵܢܝ. ܘܐܸܢ ܐܸܡ̇ܪܹܬ̣ ܥܲܠ ܟܹܐܦܵܐ ܛܵܒ̣ܬ̣ܵܐ ܕܐܲܢ̄ܬ̇ܝ ܗ̄ܝܼ ܬܘܼܟ݂ܠܵܢܝ ܘܐܸܢ ܐܸܡ̇ܪܹܬ̣ ܥܲܠ ܣܢܝܼܢܵܐ ܕܐܲܢ̄ܬ̇ ܗ̄ܘܼ ܣܲܒ̣ܪܝ.

²⁵ܘܐܸܢ ܚܕ݂ܝܼ̇ܬ̣ ܟܲܕ݂ ܣܓ̣ܝܼ ܩܸܢܝܵܢܝ. ܘܟܲܕ݂ ܣܓ̣ܝܼ: ܐܸܫܟ̇ܚܲܬ̤ ܐܝܼܕ݂ܝ.

²⁶ܐܸܢ ܚܙܹ̇ܝܬ̣ ܢܘܼܗܪܵܐ ܟܲܕ݂ ܕܲܢܝܼܚ: ܘܣܲܗܪܵܐ ܟܲܕ݂ ܚܒ̣ܝܼܒ̣

²⁷ܐܸܢ ܐܸܙܲܠ̣ ܘܐܸܫܬܲܕܲܠ ܒܣܸܬ̣ܪܵܐ ܠܹܒ̇ܝ. ܘܢܸܫܩܲܬ̤ ܐܝܼܕ݂ܝ ܠܦܘܼܡܝ.

²⁸ܐܵܦ ܗ̤ܘ ܚ̣ܙܵܐ ܟܠܗܹܝܢ ܨܸܢ̈ܥܵܬ̣ܝ. ܐܸܢ ܟܲܕ̇ܒܹ̇ܬ̣ ܩܕ݂ܵܡ ܐܲܠܵܗܵܐ.

²⁹ܘܐܸܢ ܚܕ݂ܝܼ̇ܬ̣ ܒܲܬ̣ܒ̣ܵܪܵܐ ܕܣܵܢܐܝ: ܘܐܸܢ ܕܵܨܹ̇ܬ̣ ܡܵܐ ܕܲܗܘ̤ܵܬ̣ ܠܹܗ ܒܝܼܫܬܵܐ.

³⁰ܘܐܸܢ ܐܲܫ̱ܠܡܹ̇ܬ̣ ܦܘܼܡܝ ܠܲܚܛܵܗܹ̈ܐ. ܘܢܲܦ̮ܫܝ ܠܲܚܕ݂ܵܐ ܡ̣ܢ ܗܵܠܹܝܢ ܠܵܐ ܫܸܐܠܲܬ̤.

³¹ܐܸܠܵܐ ܐܸܡܲܪܘ ܪ̈ܵܚܡܲܝ: ܡ̇ܢ ܕܹܝܢ ܝܲܗ̄ܒ̣ ܠܲܢ ܡ̣ܢ ܒܸܣܪܹܗ: ܘܠܵܐ ܣ̣ܒܲܥ̄ܢ.

³²ܒܫܘܼܩܵܐ ܠܵܐ ܐܲܒ̣ܝܼܬܹ̇ܬ̣ ܐܲܟ݂ܣܵܢܵܝܵܐ. ܘܬܲܪܥܝ ܠܐܵܪܚܵܐ ܦܸܬ̣ܚܹ̇ܬ̣.

³³ܐܸܢ ܟܲܣܝܼ̇ܬ̣ ܐܲܝܟ݂ ܐ̄ܢܵܫܵܐ ܚܛܵܗܲܝ̈. ܘܐܸܢ ܛܸܡ̇ܪܹܬ̣ ܒܛܘܼܫܝܵܐ ܚܵܘ̈ܒܲܝ.

³⁴ܐܸܢ ܕܵܫܹ̇ܬ̣ ܚܲܝܠܵܐ ܕܣܲܓ̇ܝܼ̈ܐܹܐ. ܐܸܠܵܐ ܣܘܿܓ̣ܵܐܐ ܗ̄ܘܼ ܕܫܲܪ̈ܒ̣ܵܬ̣ܵܐ ܬܲܒ̣ܪܲܢܝ. ܘܒܲܪܢܵܫܵܐ ܠܵܐ ܐܲܗܦܟܹ̇ܬ̣ ܒܬܲܪܥܵܐ. ܘܲܒ̣ܡܲܡܠܠܵܐ ܕܣܸܦ̈ܘܵܬ̣ܵܐ ܠܵܐ ܪܢܹ̇ܝܬ̣ ܓܘܼܪ̈ܵܓ̣ܵܘܗܝ ܕܐܲܠܵܗܵܐ ܡܲܟ̇ܟ݂ܘܼܢܝ.

³⁵ܡ̇ܢ ܕܹܝܢ ܝܲܗ̄ܒ݂ ܡ̇ܢ ܕܫܵܡܲܥ ܠܝܼ. ܐܸܢ ܐܝܼܬ̣ܵܘܗܝ ܐܲܠܵܗܵܐ: ܢܸܥܢܹܝܢܝ. ܘܢܸܟ݂ܬ̇ܘܿܒ̣ ܒܣܸܦܪܵܐ ܕܝܼܢܵܘ̈ܗܝ ܕܓܲܒ̣ܪܵܐ.

³⁶ܐܸܠܵܐ ܥܲܠ ܟܲܬ̣ܦܝ ܐܸܫܩܠܝܼܘܗܝ. ܘܲܥܒܲܕܲܬܹ̇ܗ ܠܝܼ ܟܠܝܼܠܵܐ.

³⁷ܘܡܸܢܝܵܢܵܐ ܕܗܲܠܟ݂ܵܬ̣̈ܝ ܐܹܚܵܘܹܝܘܗܝ. ܘܐܲܝܟ݂ ܫܲܠܝܼܛܵܐ ܐܹܒܲܕܲܩܝܼܘܗܝ.

³⁸ܘܲܥܠܲܝ ܐܲܪܥܵܐ ܬܲܝܠܸܠ. ܘܲܟ݂ܪ̈ܵܒܹܝܗ̇ ܐܲܟ݂ܚ̄ܕ݂ܵܐ ܢܸܒ̣ܟ̇ܘܿܢ.

³⁹ܐܸܢ ܐܸܟ݂ܠܹ̇ܬ̣ ܚܲܝܠܵܗ̇ ܕܠܵܐ ܟܣܸܦ: ܘܢܲܦ̮ܫܵܐ ܕܡܲܪܝܼܪܵܐ ܐܸܢ ܐܲܕ݂ܘܝܼܬ݂.

⁴⁰ܚܠܵܦ ܚܸܛܬ̣ܵܐ: ܢܸܦܘܿܩ ܙܸܒ̣ܠܵܐ. ܘܲܚܠܵܦ ܣܥܵܪܬܵܐ ܢܸܦܘܿܩ ܟܘܼܒܵܐ. ܘܲܫܸܠܡ̣ܘ ܦܸܬ̣ܓ̣ܵܡܵܘ̈ܗܝ ܕܐܝܼܘܿܒ̣.