Read Aramaic Peshita Job 32 Bible Online

Job 32 - Aramaic Peshita bible

Job 32

¹ܘܲܫ̣ܠܝܼܘ ܗܵܠܹܝܢ ܬܠܵܬ̣ܵܐ ܓܲܒ̣ܪ̈ܝܼܢ ܕܒ̣ܵܥܹ̇ܝܢ ܗ̄ܘܼܵܘ ܠܲܡܚܲܝܒ̣ܘܼܬܹܗ ܠܐܝܼܘܿܒ̣. ܡܸܛܠ ܕܗ̤ܘ ܗܘ̤ܵܐ ܙܲܕ̇ܝܼܩ ܒܥܲܝܢܲܝ̈ܗܘܿܢ.

²ܘܐܸܬ̣ܚܲܡܲܬ̣ ܐܹܠܝܼܗܘܿ ܒܲܪ ܒܲܪܟ̇ܝܼܐܹܝܠ ܒܘܼܙܵܝܵܐ ܡ̣ܢ ܫܲܪܒ̇ܬ̣ܵܐ ܕܪܲܡܘܼ. ܐܸܬ̣ܚܲܡܲܬ̣ ܪܘܼܓ̣ܙܹܗ ܥܲܠ ܐܝܼܘܿܒ̣: ܥܲܠ ܕܙܲܕܸ̇ܩ ܢܲܦ̮ܫܹܗ ܛܵܒ̣ ܡ̣ܢ ܐܲܠܵܗܵܐ.

³ܘܐܸܬ̣ܚܲܡܲܬ̣ ܥܲܠ ܬܠܵܬ̣ܵܐ ܚܲܒ݂ܪ̈ܵܘܗܝ: ܥܲܠ ܕܠܵܐ ܐܸܫ̣ܟܲܚܘ ܕܢܸܬ̇ܠܘܼܢ ܠܹܗ ܦܸܬ̣ܓ̣ܵܡܵܐ ܠܐܝܼܘܿܒ̣ ܘܲܢܚܲܝܒ̣ܘܼܢܹܗ.

⁴ܘܐܹܠܝܼܗܘܼ ܡܟ݂ܵܘܸܢ ܗ̄ܘܼܵܐ ܠܹܗ ܠܐܝܼܘܿܒ̣ ܒܡܸܠܹ̈ܐ. ܡܸܛܠ ܕܣܵܒ̣ܝܼܢ ܗ̄ܘܼܵܘ ܡܸܢܹܗ ܒܝܵܘ̈ܡܵܬ̣ܵܐ.

⁵ܘܲܚܙ̣ܵܐ ܐܹܠܝܼܗܘܿ ܕܠܵܐ ܡܸܫܟ̇ܚܝܼܢ ܕܢܸܬ̇ܠܘܼܢ ܠܹܗ ܦܸܬ̣ܓ̣ܵܡܵܐ ܗܵܠܹܝܢ ܬܠܵܬ̣ܵܐ ܓܲܒ݂ܪ̈ܝܼܢ: ܘܐܸܬ̣ܚܲܡܲܬ̣ ܪܘܼܓ̣ܙܹܗ.

⁶ܘܲܥܢ̣ܵܐ ܐܹܠܝܼܗܘܿ ܒܲܪ ܒܲܪܟ̇ܝܼܐܹܝܠ ܒܘܼܙܵܝܵܐ: ܘܐܸܡ̣ܲܪ: ܡܸܛܠ ܕܲܒ̣ܨܝܼܪ ܐ̄ܢܵܐ ܡܸܢܟ݂ܘܿܢ ܒܝܵܘ̈ܡܵܬ̣ܵܐ: ܘܐܲܢ̄ܬ̇ܘܿܢ ܩܲܫܝܼܫܝܼܢ. ܡܸܛܠ ܗܵܢܵܐ ܕܸܚܠܲܬ̣ ܘܙܵܥܹ̇ܬ̣ ܠܲܡܚܵܘܵܝܘܼܬ̣ܟ݂ܘܿܢ ܝܼܕܲܥܬ̣ܝ.

⁷ܐܸܢܵܐ ܓܹܝܪ ܐܸܡ̇ܪܹܬ̣ ܕܝܵܘ̈ܡܵܬ̣ܵܐ ܗ̄ܘܼ ܡܡܲܠܠܝܼܢ: ܘܣܘܿܓ̣ܵܐܐ ܗ̄ܘܼ ܕܲܫܢܲـ̈ـܝܵܐ ܡܲܠ̈ܦܝܼܢ ܚܸܟ݂ܡ̱ܬ̣ܵܐ.

⁸ܫܲܪܝܼܪܵܐܝܼܬ̣ ܪܘܼܚܵܐ ܐܝܼܬ̣ ܒܒܲܪܢܵܫܵܐ ܘܲܢܫܲܡܬܹܗ ܗ̄ܘܼ ܕܐܲܠܵܗܵܐ: ܡܒܲܝܢܵܐ ܠܗܘܿܢ.

⁹ܠܵܐ ܗ̄ܘܼܵܐ ܗܵܟܹܝܠ ܣܘܿܓ̣ܵܐܐ ܕܝܵܘ̈ܡܵܬ̣ܵܐ ܡܚܲܟ̇ܡܝܼܢ ܐܵܦܠܵܐ ܗ̄ܘܼܵܐ ܣܵܒܹ̈ܐ ܡܸܬ̣ܒܲܝܢܝܼܢ ܕܝܼܢܵܐ.

¹⁰ܡܸܛܠ ܗܵܢܵܐ ܐܵܡܲܪ ܐ̄ܢܵܐ: ܫܘܼܡܥܘܼܢܝ. ܘܐܵܦ ܐܸܢܵܐ ܐܹܚܵܘܹܝܟ݂ܘܿܢ ܝܼܕܲܥܬ̣ܝ.

¹¹ܘܗܵܐ ܫܸܬ̣ܩܹ̇ܬ̣ ܠܟ݂ܘܿܢ ܘܲܠܡܸܠܲܝ̈ܟ̇ܘܿܢ: ܘܨܵܬܹ̇ܬ̣ ܥܕܵܡܵܐ ܕܛܲܠܩܸܬ̇ܘܿܢ: ܘܲܒ̣ܨܹܝ̇ܬ̣ܟ݂ܘܿܢ ܒܡܸܠܹ̈ܐ.

¹²ܘܲܒ̣ܣܵܗ̈ܕ̇ܘܵܬ̣ܟ݂ܘܿܢ ܐܸܬ̣ܒܲܝܢܹ̇ܬ̣ ܘܗܵܐ ܠܷܲܬ̇ ܠܐܝܼܘܿܒ̣ ܡܲܟ̇ܣܵܢܵܐ: ܘܲܕ݂ܝܵܗܹ̇ܒ̣ ܠܹܗ ܡܸܢܟ݂ܘܿܢ ܦܸܬ̣ܓ̣ܵܡܵܐ.

¹³ܕܐܵܡ̇ܪܝܼܢ ܐ̄ܢܬ̇ܘܿܢ ܐܸܫ̣ܟ̇ܚܢ ܚܸܟ݂ܡ̱ܬ̣ܵܐ. ܐܲܠܵܗܵܐ ܗ̄ܘܼ ܡܚ̣ܵܝܗܝ: ܘܠܵܐ ܒܲܪܢܵܫܵܐ.

¹⁴ܠܵܐ ܐܹܡܲܪ ܠܘܼܩܒܲܠ ܡܸܠܹ̈ܐ. ܘܲܒ̣ܡܸܠܲܝ̈ܟ̇ܘܿܢ ܠܵܐ ܡܸܬ̣̱ܪܡܹܐ ܐ̄ܢܵܐ ܠܹܗ.

¹⁵ܫܬ̣ܩ̣ܘ ܘܬ̣ܘܼܒ̣ ܠܵܐ ܥܢ̣ܵܐܘܼܗܝ. ܐܲܦܪܸܩ̣ܘ ܡܸܢܗܘܿܢ ܡܸܠܹ̈ܐ ܘܲܫܬܸܩ̣ܘ.

¹⁶ܡܸܛܠ ܕܠܵܐ ܡܡܲܠܠܝܼܢ ܡܸܛܠ ܕܩܵܡ̣ܘ: ܘܬ̣ܘܼܒ̣ ܠܵܐ ܥ̣ܢܵܐܘܼܗܝ.

¹⁷ܐܸܥܢܹܐ ܐܵܦ ܐܸܢܵܐ ܡܸܠܲܬ̣ܝ. ܘܐܹܚܵܘܸܐ ܐܵܦ ܐܸܢܵܐ ܝܼܕܲܥܬ̣ܝ.

¹⁸ܡܸܛܠ ܕܐܸܬ̣ܡ̱ܠܝܼܬ̣ ܡܸܠܹ̈ܐ. ܘܐܸܬ̣ܢܲܣܟܲܬ̤ ܪܘܼܚܵܐ ܒܟܲܪܣܝ.

¹⁹ܗܵܐ ܟܲܪܣܝ ܟܵܝ̇ܒܵܐ: ܘܠܵܐ ܡܸܬ̣ܦܲܬ̣ܚܵܐ. ܘܐܲܝܟ݂ ܐܸܒܵܐ ܒܝܲܪܚܵܐ ܡܸܬ̣ܦܲܪܬܵܐ.

²⁰ܐܹܡܲܠܸܠ: ܘܢܸܪܘܲܚ ܠܝܼ ܐܸܦ̮ܬܲܚ ܣܸܦ̈ܘܵܬ̣ܝ ܘܐܸܬܸ̇ܠ ܦܸܬ̣ܓ̣ܵܡܵܐ.

²¹ܠܵܐ ܐܸܣܲܒ̣ ܒܐܲܦܲܝ̈ ܐ̄ܢܵܫ. ܘܡ̣ܢ ܐܲܦܲܝ̈ ܐ̄ܢܵܫ ܠܵܐ ܐܸܒ̣ܗܲܬ̣.

²²ܡܸܛܠ ܕܠܵܐ ܝܵܕܲܥ ܐ̄ܢܵܐ ܒܸܗܬ̇ܬ̣ܵܐ. ܘܥܲܕ݂ ܩܲܠܝܼܠ ܫܵܩܹ̇ܠ ܗ̄ܘܼܵܐ ܠܝܼ ܥܘܼܫܢܝ.