Read Aramaic Peshita Job 33 Bible Online

Job 33 - Aramaic Peshita bible

Job 33

¹ܒܪܲܡ ܕܹܝܢ ܫܡܲܥ ܐܝܼܘܿܒ̣ ܡܸܠܲܝ̈. ܘܟ݂ܠܗܘܿܢ ܦܸܬ̣ܓ̣ܵܡܲܝ̈ ܨܘܼܬ̣.

²ܗܵܐ ܦܸܬ̣ܚܹ̇ܬ̣ ܦܘܼܡܝ. ܘܲܒ̣ܦܘܼܡܝ ܡܡܲܠܸܠ ܠܸܫܵܢܝ.

³ܬܪܝܼܨ ܗ̄ܘܼ ܡܲܡܠܠܹܗ ܕܦܘܼܡܝ. ܘܲܓ̣ܒܸܐ ܗ̄ܘܼ ܡܹܐܡܪܵܐ ܕܣܸܦ̈ܘܵܬ̣ܝ.

⁴ܪܘܼܚܹܗ ܕܐܲܠܵܗܵܐ ܐܲܥܝܼܪܬܲܢܝ. ܘܲܢܫܲܡܬܹܗ ܕܐܲܠܵܗܵܐ ܐܲܚܝܵܬܲܢܝ.

⁵ܐܸܢ ܡܸܫܟܲܚ ܐܲܢ̄ܬ̇: ܐܲܬܝܲܒܲܝܢܝ ܦܸܬ̣ܓ̣ܵܡܵܐ. ܐܸܬ̇ܛܲܝܲܒ̣ ܘܩܘܼܡ ܩܕ݂ܵܡܲܝ.

⁶ܘܐܵܦ ܐܸܢܵܐ ܐܲܟ݂ܘܵܬ̣ܵܟ݂ ܐ̄ܢܵܐ ܠܘܵܬ̣ ܐܲܠܵܗܵܐ. ܘܐܵܦ ܐܸܢܵܐ ܡ̣ܢ ܛܝܼܢܵܐ ܐܸܬ̣ܓܲܒ̣ܠܹ̇ܬ̣.

⁷ܘܗܵܫܵܐ ܕܸܚܠܲܬ̣ܝ ܠܵܐ ܬܙܝܼܥܵܟ݂. ܘܐܘܼܟ݂ܦܵܢܝ ܥܠܲܝܟ ܠܵܐ ܢܹܐܩܲܪ.

⁸ܒܪܲܡ ܐܸܡ̣ܲܪܬ̇ ܒܐܸܕ݂ܢܲܝ̈. ܘܩܵܠ ܡܸܠܲܝ̈ܟ ܫܸܡܥܹ̇ܬ̣.

⁹ܕܐܸܡܲܪܬ̇: ܕܙܲܟܵܝ ܐ̄ܢܵܐ ܕܠܵܐ ܚܵܘ̈ܒ̇ܝܼܢ. ܘܙܲܕ̇ܝܼܩ ܐ̄ܢܵܐ: ܘܠܲܝܬ̇ ܒܝܼ ܚܛܵܗܹ̈ܐ. ܘܲܡܦܲܨܲܝ ܐ̄ܢܵܐ ܡ̣ܢ ܥܵܘܼܠܵܐ.

¹⁰ܕܗܵܐ ܥܸܠ̈ܠܵܬ̣ܵܐ ܥܠܲܝ ܡܸܫܟܲܚ. ܘܚܲܫܸܒܲܢܝ ܠܹܗ ܐܲܝܟ݂ ܒܥܸܠܕ̇ܒ̣ܵܒ̣ܵܐ.

¹¹ܘܣܵܡ̣ ܒܣܲܕܵܐ ܪܸ̈ܓ̣ܠܲܝ ܘܲܢܛܲܪ ܟܠܗܹܝܢ ܐܘܼܪ̈ܚܵܬ̣ܝ.

¹²ܒܗܵܕܹܐ ܠܵܐ ܡܸܫܟܲܚ ܐܲܢ̄ܬ̇ ܠܡܸܙܟܵܐ. ܐܸܬܸ̇ܠ ܠܵܟ݂ ܦܸܬ̣ܓ̣ܵܡܵܐ: ܕܪܲܒ̇ ܗ̄ܘܼ ܐܲܠܵܗܵܐ ܡ̣ܢ ܐ̄ܢܵܫܵܐ.

¹³ܡܸܛܠ ܡܵܢܵܐ ܕܵܢ̣ܬ̇ ܥܲܡܹܗ: ܘܲܒ̣ܟ݂ܠܗܘܿܢ ܦܸܬ̣ܓ̣ܵܡܵܘ̈ܗܝ ܠܵܐ ܥ̣ܢܵܐ.

¹⁴ܡܸܛܠ ܕܒܲܚܕ݂ܵܐ ܗ̄ܘܼ ܡܡܲܠܸܠ ܐܲܠܵܗܵܐ: ܘܲܒ̣ܬܲܪܬܹ̇ܝܢ ܠܵܐ ܡܵܘܣܸܦ.

¹⁵ܘܲܒ̣ܣܸܦ̈ܘܵܬ̣ܵܐ ܠܵܐ ܡܸܣܬܲܟܲܠ: ܒܚܸܠܡܵܐ ܘܲܒ̣ܚܸܙܘܵܐ ܕܠܸܠܝܵܐ: ܟܲܕ݂ ܢܵܦ̇ܠܵܐ ܫܸܢܬ̣ܵܐ ܥܲܠ ܐ̄ܢܵܫܵܐ ܒܢܵܘܡܬ̣ܵܐ ܥܲܠ ܡܲܫܟ̇ܒ̣ܵܐ.

¹⁶ܗܵܝܕܹ̇ܝܢ ܓܵܠܹ̇ܐ ܐܸܕ݂ܢܹܗ ܕܐ̄ܢܵܫܵܐ: ܘܲܒ̣ܡܵܪܘܿܕ݂ܘܼܬ̣ܗܘܿܢ ܢܡܲܟܸ̇ܟ݂ ܐܸܢܘܿܢ.

¹⁷ܠܡܲܥܒܵܪܘܼ ܐ̄ܢܵܫܵܐ ܡ̣ܢ ܥܒ̣ܵܕ݂ܵܘ̈ܗܝ. ܘܓ̣ܘܼܫܡܹܗ ܕܓܲܒ̣ܪܵܐ ܡܟܲܣܹܐ.

¹⁸ܢܸܚܣܘܿܟ݂ ܢܲܦ̮ܫܹܗ ܡ̣ܢ ܚܒ̣ܵܠܵܐ: ܘܚܲܝܵܘ̈ܗܝ ܡ̣ܢ ܐܲܒ̣ܕܵܢܵܐ.

¹⁹ܘܲܢܟܲܣܸܐ ܒܟܹܐܒ̣ܵܐ ܥܲܠ ܡܲܫܟ̇ܒܹܗ. ܘܣܘܿܓ̣ܐܐ ܕܓܲܪ̈ܡܵܘܗܝ ܢܲܥܫܸܢ.

²⁰ܢܸܓ̣ܡܲܪ ܒܸܣܪܹܗ ܡ̣ܢ ܕܸܚ̱ܠܬܹܗ. ܘܢܲܦ̮ܫܹܗ ܠܵܐ ܢܣܲܒܲܥ ܠܲܚܡܵܐ: ܘܢܲܦ̮ܫܹܗ ܡܹܐܟ݂ܘܼܠܬܵܐ ܬ̣ܪܲܓ̣.

²¹ܢܹܐܟ݂ܘܿܠ ܒܸܣܪܹܗ ܡ̣ܢ ܕܸܚ̱ܠܬܹܗ. ܘܣܘܿܓ̣ܵܐܐ ܕܓܲܪ̈ܡܵܘܗܝ ܠܵܐ ܢܸܚܙܹܐ.

²²ܘܬܸܩܪܘܿܒ̣ ܠܲܚܒ̣ܵܠܵܐ ܢܲܦ̮ܫܹܗ: ܘܚܲܝܵܘ̈ܗܝ ܠܡܵܘܬܵܐ.

²³ܐܸܢ ܐܝܼܬ̣ ܠܹܗ ܡܲܠܲܐܟ݂ܵܐ ܕܫܵܡ̇ܲܥ ܠܹܗ ܚܕ݂ܵܐ ܡ̣ܢ ܐܵܠܹܦ: ܢܚܵܘܹܐ ܠܐ̄ܢܵܫܵܐ ܬܪܝܼܨܘܼܬܹܗ.

²⁴ܘܲܢܪܲܚܸܡ ܥܠܵܘܗܝ: ܘܢܹܐܡܲܪ ܦܪܘܿܩܲܝܗܝ ܕܠܵܐ ܢܸܚܘܿܬ̣ ܠܲܚܒ̣ܵܠܵܐ. ܘܠܹܗ ܢܸܫܟܲܚ ܦܘܼܪܩܵܢܵܐ.

²⁵ܢܸܬ̣ܚܲܠܲܦ ܒܸܣܪܹܗ ܐܲܝܟ݂ ܕܲܒ̣ܛܲܠܝܘܼܬܹܗ. ܘܢܸܗܦܘܿܟ݂ ܠܝܵܘ̈ܡܲܝ ܥܠܲܝܡܘܼܬܹܗ.

²⁶ܘܲܢܨܲܠܹܐ ܩܕ݂ܵܡ ܐܲܠܵܗܵܐ: ܘܢܸܫ̱ܡܥܝܼܘܗܝ: ܘܢܸܨܛܒܸܐ ܒܹܗ: ܘܢܸܬ̣ܚܙܹܐ ܩܕ݂ܵܡܵܘܗܝ ܒܫܘܼܒ̣ܚܵܐ: ܘܢܸܦܪܘܿܥ ܠܒܲܪܢܵܫܵܐ ܙܲܕ̇ܝܼܩܘܼܬܹܗ.

²⁷ܘܲܬ̣ܪܝܼܨܘܼܬ̣ܵܐ ܥܲܠ ܐ̄ܢܵܫܵܐ ܢܹܐܡܲܪ. ܘܢܹܐܡܲܪ ܚܛܹ̇ܝܬ̣: ܘܫܲܪܝܼܪܵܐܝܼܬ̣ ܐܲܣܟ̇ܠܹ̇ܬ̣: ܘܠܵܐ ܐܲܗܢ̇ܝܼܬ̣ ܢܲܦ̮ܫܝ.

²⁸ܦܪܘܿܩ ܢܲܦ̮ܫܝ ܡ̣ܢ ܐܲܒ̣ܕܵܢܵܐ ܕܲܚܒ̣ܵܠܵܐ. ܘܢܲܦ̮ܫܝ ܬܸܚܙܹܐ ܢܘܼܗܪܵܐ.

²⁹ܗܵܠܹܝܢ ܟܠܗܹܝܢ ܥܵܒܹ̇ܕ݂ ܐܲܠܵܗܵܐ ܬܠܵܬ̣ ܙܲܒ̣ܢ̈ܝܼܢ ܥܲܡ ܓܲܒ̣ܪܵܐ.

³⁰ܡܲܗܦܸܟ݂ ܢܲܦ̮ܫܹܗ ܡ̣ܢ ܚܒ̣ܵܠܵܐ ܠܡܸܚܙܵܐ ܢܘܼܗܪܵܐ ܕܚܲܝܹ̈ܐ.

³¹ܨܘܼܬ̣ ܐܝܼܘܿܒ̣ ܘܲܫܡܲܥ. ܘܲܫܬ̣ܘܿܩ: ܘܐܸܢܵܐ ܐܹܡܲܠܸܠ.

³²ܐܸܢ ܐܝܼܬ̣ ܠܵܟ݂ ܡܸܠܹ̈ܐ: ܐܲܬ̣ܝܼܒܲܝܢܝ. ܡܸܛܠ ܕܨܵܒܹ̇ܐ ܐ̄ܢܵܐ ܗ̄ܘܼ ܕܬܸܙܟܹ̇ܐ.

³³ܘܐܸܢ ܠܵܐ ܫܵܡܲܥ ܐܲܢ̄ܬ̇ ܠܝܼ: ܫܬ̣ܘܿܩ: ܘܐܲܠܦܵܟ݂ ܚܸܟ݂ܡ̱ܬ̣ܵܐ.