Read Aramaic Peshita Job 34 Bible Online

Job 34 - Aramaic Peshita bible

Job 34

¹ܘܲܥ̣ܢܵܐ ܐܹܠܝܼܗܘܿ ܘܐܸܡ̣ܲܪ.

²ܫܡܲܥܘ ܚܲܟ̇ܝܼ̈ܡܹܐ ܡܸـ̈ـܠܲܝ. ܘܐܲܝܠܹܝܢ ܕܝܵܕ݂ܥܝܼܢ: ܨܘܼܬ̣ܘܼܢܵܢܝ.

³ܡܸܛܠ ܕܐܸܕ݂ܢܵܐ ܒܵܚ̇ܪܵܐ ܡܸܠܹ̈ܐ. ܘܚܸܟܵܐ ܛܵܥܹ̇ܡ ܡܹܐܟ݂ܘܼܠܬܵܐ.

⁴ܢܸܓ̣ܒܹ̇ܐ ܠܲܢ ܕܲܝܵܢܵܐ: ܘܢܸܕܲܥ ܒܲܝܢܵܬܲܢ: ܡܵܢܵܐ ܫܲܦܝܼܪ.

⁵ܐܸܡ̣ܲܪܬ̇ ܐܝܼܘܿܒ̣ ܘܲܙܟܲܝܸܬ̇. ܕܐܸܡܲܪܬ̇ ܐܸܙܕܲܕ̇ܩܹ̇ܬ̣: ܘܐܲܠܵܗܵܐ ܗ̄ܘܼ ܨܠܵܝܗܝ ܠܕ݂ܝܼܢܝ ܥܠܲܝ.

⁶ܡܲܢ̣ܘܼ ܐ̄ܢܵܫܵܐ ܕܐܸܒܲܕ݂ ܕܠܵܐ ܣܲܟ݂ܠܘܼ.

⁷ܡܲܢ̣ܘܼ ܓܲܒ̣ܪܵܐ ܐܲܝܟ݂ ܐܝܼܘܿܒ̣: ܕܢܸܫܬܸ̇ܐ ܡܘܼܝܵܩܵܐ ܐܲܝܟ݂ ܡܲـ̈ـܝܵܐ.

⁸ܘܲܗܘ̤ܵܐ ܫܵܘܬܵܦܵܐ ܘܚܲܒ̣ܪܵܐ ܠܥܵܒ̣̇ܕܲܝ̈ ܥܵܘܼܠܵܐ: ܥܲܡ ܐ̄ܢܵܫܵܐ ܚܲܛܵܝܹ̈ܐ ܠܲܡܗܲܠܵܟ݂ܘܼ.

⁹ܕܐܸܡ̣ܲܪܬ̇: ܕܠܵܐ ܙܵܟܹ̇ܐ ܓܲܒ̣ܪܵܐ ܡܵܐ ܕܕ݂ܵܚܹ̇ܠ ܡ̣ܢ ܐܲܠܵܗܵܐ.

¹⁰ܡܸܛܠ ܗܵܢܵܐ ܐ̄ܢܵܫܲܝ̈ ܠܸܒܵܐ ܫܘܼܡܥܘܼܢܝ. ܚܵܣ ܠܐܲܠܵܗܵܐ ܕܢܸܥܒܸ̇ܕ݂ ܥܵܘܼܠܵܐ. ܘܚܵܣ ܠܹܗ ܕܢܸܥܒܸ̇ܕ݂ ܚܛܝܼܬ̣ܵܐ.

¹¹ܡܸܛܠ ܕܐܲܝܟ݂ ܥܒ̣ܵܕ݂ܵܘ̈ܗܝ ܕܒܲܪܢܵܫܵܐ ܦܵܪܲܥ ܠܹܗ. ܘܓܲܒ̣ܪܵܐ ܐܲܝܟ݂ ܐܘܼܪ̈ܚܵܬܹܗ ܡܸܫܟܲܚ.

¹²ܫܲܪܝܼܪܵܐܝܼܬ̣ ܐܲܠܵܗܵܐ ܠܵܐ ܥܵܒܹ̇ܕ݂ ܥܵܘܼܠܵܐ. ܘܐܵܦܠܵܐ ܐܲܠܵܗܵܐ ܡܥܲܪܩܸܠ ܐܘܼܪܚܵܐ.

¹³ܡܲܢ̣ܘܼ ܦ̣ܩܲܕ݂ ܠܐܲܪܥܵܐ. ܘܡܲܢ̣ܘܼ ܥ̣ܒܲܕ݂ ܠܟ݂ܠܵܗ̇ ܬܹܒܹܝܠ.

¹⁴ܐܸܢ ܡܲܦܢܹܐ ܥ̇ܠܵܘܗܝ ܠܸܒܹ̇ܗ: ܪܘܼܚܹܗ ܘܲܢܫܲܡܬܹܗ ܠܘܵܬܹܗ ܡܸܬ̣ܟܲܢ̈ܫܵܢ.

¹⁵ܣܵܐܹ̇ܦ ܟܠ ܒܣܲܪ ܐܲܟ݂ܚ̄ܕ݂ܵܐ. ܘܒܲܪܢܵܫܵܐ ܠܥܲܦܪܵܐ ܗܵܦܹ̇ܟ݂.

¹⁶ܘܐܸܢ ܡܸܬ̣ܒܲܝܲܢ ܐܲܢ̄ܬ̇: ܫܡܲܥ ܗܵܠܹܝܢ. ܘܨܘܼܬ̣ ܠܩܵܠܵܐ ܕܡܸـ̈ـܠܲܝ.

¹⁷ܡ̇ܢ ܕܣܵܢܹ̇ܐ ܕܝܼܢܵܐ: ܙܵܟܹ̇ܐ. ܘܐܸܢ ܙܲܟܵܝ ܗ̄ܘܼ: ܠܵܐ ܟܹܐܢܵܐܝܼܬ̣ ܡܸܬ̣ܚܲܝܲܒ̣.

¹⁸ܕܐܸܡ̣ܲܪ ܥܲܠ ܡܲܠܟܵܐ ܥܵܘܼܠܵܐ: ܡܠܸܟ݂ ܪܹ̈ܫܵܢܹܐ ܡܠܸܟ݂ ܫܲܠܝܼܛܵܢܹ̈ܐ.

¹⁹ܕܠܵܐ ܢܵܣܹ̇ܒ̣ ܒܐܲܦܲܝ̈ ܪܵܘ̱ܪ̈ܒ̣ܵܢܹܐ. ܘܠܵܐ ܢܵܣܹ̇ܒ̣ ܒܐܲܦܲܝ̈ ܡܸܣܟܹ̇ܢܹ̈ܐ: ܡܸܛܠ ܕܟ݂ܠܗܘܿܢ ܥ̇ܒ̣ܵܕ݂ ܐܝܼܕ݂ܵܘ̈ܗܝ ܐܸܢܘܿܢ.

²⁰ܡ̣ܢ ܬܚܹܝܬ̣ ܫܸܠܝܵܐ ܡܵܝ̇ܬ̇ܝܼܢ. ܘܲܒ̣ܦܸܠܓܹ̇ܗ ܕܠܸܠܝܵܐ ܣܵܝ̇ܦܝܼܢ ܘܐܵܒ̣̇ܕ̇ܝܼܢ. ܘܡܸܫܬܵܘܕ̇ܥܝܼܢ ܠܚܲܣܝܼܢܵܐ: ܠܵܐ ܒܚܲܝܠܵܐ.

²¹ܡܸܛܠ ܕܥܲܝܢܵܘ̈ܗܝ ܥܲܠ ܟܠܗܹܝܢ ܐܘܼܪ̈ܚܵܬܹܗ ܕܓܲܒ̣ܪܵܐ. ܘܟ݂ܠܗܹܝܢ ܗܲܠܟ݂ܵܬܹ̈ܗ ܚܵܙܹ̇ܐ.

²²ܕܠܵܐ ܚܸܫܘܿܟ݂ܵܐ ܘܲܕ݂ܠܵܐ ܛܲܠܵܠܲܝ̈ ܡܵܘܬܵܐ: ܠܡܸܬ̇ܛܲܫܵܝܘܼ ܬܲܡܵܢ ܥܵܒ̣ܕܲܝ̈ ܥܵܘܼܠܵܐ.

²³ܡܸܛܠ ܕܬ̣ܘܼܒ̣ ܠܵܐ ܗ̄ܘܼܵܐ ܥܲܠ ܓܲܒ̣ܪܵܐ ܣܵܐܹ̇ܡ ܠܲܡܗܲܠܵܟ݂ܘܼ ܥܲܡ ܐܲܠܵܗܵܐ ܒܕ݂ܝܼܢܵܐ.

²⁴ܕܐܲܒ̣ܐܸܫ ܠܣܲܓ̇ܝܼ̈ܐܹܐ ܕܠܵܐ ܣܵܟ݂: ܘܲܢܩܝܼܡ ܐܲܟ݂ܚ̄ܕ݂ܵܐ ܚܠܵܦܲܝܗܘܿܢ.

²⁵ܡܸܛܠ ܗܵܢܵܐ ܐܸܫܬܵܘܕܲܥ ܐܸܢܘܿܢ ܡ̣ܢ ܥܒ̣ܵܕܲܝ̈ܗܘܿܢ. ܘܢܲܗܦܸܟ݂ ܐܸܢܘܿܢ ܠܠܸܝܵܐ.

²⁶ܘܢܸܬ̣ܡܲܟ̇ܟ݂ܘܿܢ ܬܚܹܝܬ̣ ܥܵܘܼܠܵܐ ܥܒ̣ܵܕܲܝ̈ܗܘܿܢ ܒܐܲܬ̣ܪܵܐ ܕܚܝܼܠܵܐ.

²⁷ܥܲܠ ܕܲܣ̣ܛܵܘ ܡ̣ܢ ܒܵܬܪܹܗ. ܘܟ݂ܠܗܹܝܢ ܐܘܼܪ̈ܚܵܬܹܗ ܠܵܐ ܐܸܣܬܲܟܲܠܘ.

²⁸ܥܵܐ̇ܠܵܐ ܩܕ݂ܵܡܵܘܗܝ ܨܠܘܿܬܹܗ ܕܡܸܣܟܹ̇ܢܵܐ. ܘܲܓ̣ܥܵܬܹܗ ܕܥܲܢܘܵܝܵܐ ܫܵܡܲܥ.

²⁹ܘܐܸܢ ܗ̤ܘ ܫܵܒܹ̇ܩ: ܡܲܢ̣ܘܼ ܡܚܲܝܸܒ݂. ܘܐܸܢ ܗ̤ܘ ܡܲܗܦܸܟ݂ ܐܲܦܵܘ̈ܗܝ: ܡܲܢ̣ܘܼ ܫܵܒܹ̇ܩ ܠܥܲܡܵܐ: ܐܵܘ ܠܒܲܪܢܵܫܵܐ ܐܲܟ݂ܚ̄ܕ݂ܵܐ.

³⁰ܕܠܵܐ ܐܲܡܠܸܟ݂ ܐ̄ܢܵܫܵܐ ܚܲܠܦܵܐ ܘܚܲܛܵܝܵܐ ܠܥܲܡܵܐ.

³¹ܡܸܛܠ ܕܐܲܠܵܗܵܐ ܐܸܡ̣ܲܪ: ܕܫܸܒ̣ܩܹ̇ܬ̣: ܠܵܐ ܡܚܲܒܸ̇ܠ ܐ̄ܢܵܐ ܕܠܵܐ ܚܛܵܗ̈ܝܼܢ.

³²ܐܲܠܸܦܲܝܢܝ ܐܲܢ̄ܬ̇ ܐܸܢ ܥܸܒܲܕ̇ܬ̇ ܥܵܘܼܠܵܐ.

³³ܬܘܼܒ̣ ܠܵܐ ܐܵܘܣܸܦ ܠܡܸܬܲܠ ܠܵܟ݂ ܦܸܬ̣ܓ̣ܵܡܵܐ ܥܲܠ ܕܲܚ̣ܛܲܝܬ̇. ܐܲܢ̄ܬ̇ ܓܹܝܪ ܐܸܬ̣ܒܲܩ̣ܝܼܬ̇ ܘܠܵܐ ܐܸܢܵܐ. ܘܡܸܕܹ̇ܡ ܕܝܵܕܲܥ ܐܲܢ̄ܬ̇: ܡܲܠܸܠ.

³⁴ܐ̄ܢܵܫܵܐ ܕܠܸܒܵܐ ܢܸܐܡܪܘܿܢ ܠܝܼ ܘܓܲܒ̣ܪܵܐ ܚܲܟ̇ܝܼܡܵܐ ܢܸܫ̱ܡܥܲܢܝ.

³⁵ܐܝܼܘܿܒ̣ ܠܵܐ ܗ̄ܘܼܵܐ ܒܝܲܕ݂ܥܬ̣ܵܐ ܡܡܲܠܸܠ ܘܡܸܠܵܘ̈ܗܝ ܠܵܐ ܗ̤ܘܲܝ̈ ܒܣܘܼܟܵܠܵܐ.

³⁶ܫܲܪܝܼܪܵܐܝܼܬ̣ ܐܸܬ̣ܒܲܚܲܪ ܐܝܼܘܿܒ݂ ܥܲܕ݂ ܣܵܘܦܵܐ. ܘܠܵܐ ܡܸܬ̣ܚܲܫܲܒ̣ ܒܐ̄ܢܵܫܵܐ ܥܵܘܵܠܹ̈ܐ.

³⁷ܘܐܸܢ ܡܵܘܣܸܦ ܥܲܠ ܚܛܵܗܵܘ̈ܗܝ: ܣܲܟ݂ܠܘܼܬ̣ܵܐ ܒܲܝܢܵܬܲܢ ܡܸܬ̣ܦܲܩܕܵܐ. ܘܲܢܩܲܪܸܒ̣ ܩܕܵܡ ܐܲܠܵܗܵܐ ܡܸܠܵܘ̈ܗܝ.