Read Aramaic Peshita Job 35 Bible Online

Job 35 - Aramaic Peshita bible

Job 35

¹ܘܲܥ̣ܢܵܐ ܐܹܠܝܼܗܘܿ ܘܐܸܡܲܪ.

²ܒܗܵܕܹܐ ܐܸܬ̣ܚܲܫܲܒ̣ܬ̇ ܒܕ݂ܝܼܢܵܐ: ܕܐܸܡܲܪܬ̇ ܐܸܙܕܲܕ̇ܩܹ̇ܬ̣ ܡ̣ܢ ܐܲܠܵܗܵܐ.

³ܐܸܢ ܐܸܡ̣ܪܬ̇ ܡܵܢܵܐ ܡܵܘܬܲܪ ܐܲܢ̄ܬ̇ ܥܲܠ ܢܲܦ̮ܫܵܟ݂: ܘܡܵܢܵܐ ܝܘܼܬ̣ܪܵܢܵܐ ܕܐܹܚܲܒ̣ܵܟ݂.

⁴ܐܸܢܵܐ ܐܲܬ̣ܝܼܒ̣ܵܟ݂ ܡܸܠܹ̈ܐ: ܘܐܵܦ ܠܪܵܚܡܲܝܟ ܥܲܡܵܟ݂.

⁵ܚܘܼܪ ܒܲܫܡܲܝܵܐ: ܘܐܸܬ̣ܒܲܩܵܐ ܒܲܥܢܵܢܹ̈ܐ ܕܪ̈ܵܡܵܢ ܡܸܢܵܟ݂.

⁶ܐܸܢ ܚܵܛܹ̇ܐ ܐܲܢ̄ܬ̇: ܡܵܢܵܐ ܥܵܒܹ̇ܕ݂ ܐܲܢ̄ܬ̇ ܠܹܗ. ܘܐܸܢ ܣܵܓܹ̇ܐ ܥܵܘܼܠܵܟ݂: ܡܵܢܵܐ ܬܸܥܒܸ̇ܕ݂ ܠܹܗ.

⁷ܘܐܸܢ ܗܵܘܹ̇ܐ ܐܲܢ̄ܬ̇ ܙܲܕ̇ܝܼܩ: ܡܵܢܵܐ ܡܵܘܬܲܪ ܐܲܢ̄ܬ̇ ܠܹܗ: ܐܵܘ ܡܵܢܵܐ ܢܵܣܹ̇ܒ̣ ܡܸܢܵܟ݂.

⁸ܠܢܲܦ̮ܫܵܟ݂ ܗ̄ܘܼ ܪܘܼܫܥܵܟ݂: ܘܲܠܢܲܦ̮ܫܵܟ݂ ܗ̄ܝܼ ܙܲܕ̇ܝܼܩܘܼܬ̣ܵܟ݂.

⁹ܡ̣ܢ ܣܘܿܓ̣ܵܐܐ ܕܲܛܠܘܼܡܝܵܐ ܡܲܝܠܠܝܼܢ: ܘܓܵܥܹ̇ܝܢ ܡ̣ܢ ܥܵܘܼܠܵܐ ܣܲܓܝܼ̈ܐܹܐ.

¹⁰ܘܠܵܐ ܐܸܡܲܪܘ ܐܲܝܟܵܘ ܐܲܠܵܗܵܐ ܕܥܲܒ̣ܕܲܝܢ: ܕܝܲܗ̄ܒ̣ ܡܲܚܫܲܒ̣ܬ̣ܵܐ ܒܠܸܠܝܵܐ.

¹¹ܡ̣ܢ ܩܕ݂ܵܡ ܚܲܝ̄ܘܬ̣ܵܐ ܕܐܲܪܥܵܐ: ܘܡ̣ܢ ܦܵܪܲܚܬ̣ܵܐ ܕܲܫܡܲܝܵܐ ܚܲܟ̇ܡܲܢ.

¹²ܬܲܡܵܢ ܓܵܥܹ̇ܝܢ: ܘܠܵܐ ܥܵܢܹ̈ܐ ܠܗܘܿܢ.

¹³ܡܸܛܠ ܓܲܐܝܘܼܬ̣ܵܐ ܕܒ̣ܝܼܫܹ̈ܐ ܣܪܝܼܩܵܐܝܼܬ̣ ܠܵܐ ܫܵܡܲܥ ܐܲܠܵܗܵܐ. ܐܵܦܠܵܐ ܐܲܠܵܗܵܐ ܡܫܲܒܲܚ ܠܵܗ̇.

¹⁴ܘܐܵܦܸܢ ܐܸܡ̣ܲܪܬ̇ ܠܵܐ ܬܫܲܒ̇ܚܝܼܘܗܝ: ܕܘܼܢ ܩܕ݂ܵܡܵܘܗܝ ܘܐܸܬ̣ܟܲܫܲܦ ܠܹܗ.

¹⁵ܕܗܵܫܵܐ ܠܵܐ ܦܵܩܹ̇ܕ݂ ܪܘܼܓ̣ܙܹܗ: ܘܠܵܐ ܡܲܒ̣ܐܸܫ ܠܢܲܦ̮ܫܵܐ.

¹⁶ܘܐܝܼܘܿܒ̣ ܣܪܝܼܩܵܐܝܼܬ̣ ܦ̣ܬܲܚ ܦܘܼܡܹܗ: ܘܲܕ݂ܠܵܐ ܒܝܼܕܲܥܬ̣ܵܐ ܡܲܣܓܹ̇ܐ ܡܸܠܹ̈ܐ.