Read Aramaic Peshita Job 37 Bible Online

Job 37 - Aramaic Peshita bible

Job 37

¹ܘܐܵܦ ܥܲܠ ܗܵܕܹܐ ܢܸܬ̇ܬ̇ܙܝܼܥ ܠܸܒܹ̇ܗ: ܘܲܢܙܘܼܥ ܡ̣ܢ ܕܘܼܟ̇ܬܹܗ.

²ܫܡܲܥܘ ܡܸܫܡܲܥ ܩܵܠܹܗ ܒܪܘܼܓ̣ܙܵܐ: ܕܝܼܢܵܐ ܕܢܵܦܹ̇ܩ ܡ̣ܢ ܦܘܼܡܹܗ.

³ܬܚܹܝܬ̣ ܟܠܗܘܿܢ ܫܡܲܝܵܐ ܢܫܲܒ̇ܚܘܼܢܹܗ. ܘܢܘܼܗܪܹܗ ܥܲܠ ܟܸܢ̈ܦܹܝܗ̇ ܕܐܲܪܥܵܐ.

⁴ܒܵܬ̣ܪܹܗ ܢܸܪܥܲܡ ܒܩܵܠܵܐ ܕܓܲܐܝܘܼܬܹܗ. ܘܠܵܐ ܢܥܲܩܸܒ̣ ܐܸܢܘܿܢ.

⁵ܡܸܛܠ ܕܢܸܫ̱ܡܥܘܼܢ ܩܵܠܹܗ. ܘܢܸܪܥܲܡ ܐܲܠܵܗܵܐ ܒܩܵܠܹܗ. ܬܸܕ݂ܡܪ̈ܵܬ̣ܵܐ ܥܵܒܹ̇ܕ݂ ܘܪܵܘ̱ܪ̈ܒ̣ܵܬ̣ܵܐ: ܘܠܵܐ ܡܸܬ̣̱ܝܼܕܲܥ.

⁶ܡܸܛܠ ܕܲܠܬܲܠܓܵܐ ܐܸܡܲܪ ܗܸܘܲܝ̈ ܐܲܪܥܵܐ. ܘܡܸܛܪܵܐ ܘܲܪܒ̣ܝܼܥܵܐ ܪܲܒܵܐ ܒܝܲܕ݂ ܟܠ ܐ̄ܢܵܫ ܚ̣ܬܲܡ.

⁷ܕܢܵܘܕܲܥ ܠܟ݂ܠ ܐ̄ܢܵܫ ܥܒ̣ܵܕ݂ܵܘ̈ܗܝ.

⁸ܘܬܸܥܘܿܠ ܚܲܝ̄ܘܬ̣ܵܐ ܒܲܟ݂ܡܹܐܢܵܐ. ܘܬܸܫܪܸܐ ܒܡܲܪܒ̇ܘܼܥܝܼܬ̣ܵܗ̇.

⁹ܡ̣ܢ ܬܵܘܵܢܹ̈ܐ ܬܹܐܬܹܐ ܟܘܿܟ݂ܝܼܬ̣ܵܐ. ܘܡ̣ܢ ܙܵܪܝܼܦ̮ܬܵܐ ܩܘܼܪܫܵܐ.

¹⁰ܘܡ̣ܢ ܢܫܲܡܬܹܗ ܕܐܲܠܵܗܵܐ ܢܸܬ̣̱ܝܼܗܸܒ̣ ܓܠܝܼܕ݂ܵܐ. ܘܣܘܿܓ̣ܵܐܐ ܕܡܲـ̈ـܝܵܐ ܡܲܚܸܬ̣.

¹¹ܘܪܲܟ̇ܝܼܟ݂ܵܐܝܼܬ̣ ܡܸܬ̣ܡܲܬ̣̈ܚܵܢ ܥܢܵܢܹ̈ܐ: ܘܦܵܪܹܣ ܥܢܵܢܹ̈ܐ ܕܢܘܼܗܪܹܗ.

¹²ܘܗ̤ܘ ܡܸܬ̣ܟ̇ܪܸܟ݂: ܘܡܸܬ̣ܗܲܦܲܟ݂ ܠܡܸܥܒܲܕ݂ ܡܲܚ̈ܫܒ̣ܵܢ. ܟܠ ܕܦܵܩܹ̇ܕ݂ ܠܗܘܿܢ ܥܲܠ ܐܲܦܲܝ̈ ܬܸܒܹܝܠ ܐܲܪܥܹܗ.

¹³ܐܸܢ ܠܫܲܠܝܼܛܵܢܹ̈ܐ ܘܐܸܢ ܠܐܲܪܥܵܐ: ܘܐܸܢ ܠܲܚܣܝܼܕ݂ܵܐ ܕܡܸܫܬ̇ܟܲܚ ܒܵܗ̇.

¹⁴ܨܘܼܬ̣ ܗܵܕܹܐ ܐܝܼܘܿܒ̣ ܘܲܫܡܲܥ. ܘܐܸܬ̣ܒܲܝܲܢ ܬܸܕ݂ܡܪ̈ܵܬܹܗ ܕܐܲܠܵܗܵܐ.

¹⁵ܗܵܐ ܝܵܕܲܥ ܐܲܢ̄ܬ̇ ܡܸܕܹ̇ܡ ܕܣܵܡ̣ ܐܲܠܵܗܵܐ ܥܠܲܝܗܘܿܢ: ܘܲܓ̣ܠܵܐ ܢܘܼܗܪܵܐ ܕܲܥܢܵܢܵܘ̈ܗܝ.

¹⁶ܝܵܕܲܥ ܐܲܢ̄ܬ̇ ܡܲܦܩܵܐ ܕܲܥܢܵܢܹ̈ܐ: ܘܬܸܕ݂ܡܪ̈ܵܬ̣ܵܐ ܕܲܕ݂ܠܵܐ ܡܘܼܡ ܒܝܼܕܲܥܬ̣ܵܐ.

¹⁷ܠܒ̣ܘܼܫܲܝ̈ܟ ܢܸܚܡܘܿܢ. ܘܲܬ̣ܫܸ̇ܢܹܐ ܐܲܪܥܵܐ ܡ̣ܢ ܬܲܝܡܢܵܐ.

¹⁸ܘܬܸܪܩܘܿܠ ܥܲܡܹܗ ܠܲܪܩܝܼܥܵܐ ܬܲܩܝܼܦܵܐ: ܠܲܡܣܲܡܵܟ݂ܘܼ ܐܲܟ݂ܚ̄ܕ݂ܵܐ.

¹⁹ܐܵܘܕܲܥܲܝܢܝ ܡܵܢܵܐ ܐܹܡܲܪ ܠܹܗ: ܘܠܵܐ ܢܸܣܬܲܬܲܪ ܡ̣ܢ ܩܕ݂ܵܡ ܚܸܫܘܿܟ݂ܵܐ.

²⁰ܘܐܸܫܬܲܥܵܐ ܠܹܗ ܡܸܕܹ̇ܡ ܕܐܸܡܲܪ. ܘܐܸܢ ܢܹܐܡܲܪ ܓܲܒ̣ܪܵܐ: ܢܸܬ̣ܒ̇ܠܲܥ.

²¹ܘܗܵܫܵܐ ܠܵܐ ܚܙ̣ܵܘ ܢܘܼܗܪܵܐ. ܢܲܗܝܼܪ ܗ̄ܘܼ ܒܲܪܩܝܼܥܵܐ ܕܲܫܡܲܝܵܐ. ܘܪܘܼܚܵܐ ܬܸܥܒܲܪ ܘܲܬ̇ܕܲܟܹ̇ܐ ܐܸܢܘܿܢ.

²²ܡ̣ܢ ܓܲܪܒ̇ܝܵܐ ܕܲܗܒ̣ܵܐ ܢܹܐܬܹܐ: ܘܡ̣ܢ ܐܲܠܵܗܵܐ ܢܘܼܗܪܵܐ.

²³ܚܲܣܝܼܢܵܐ: ܣܲܓ̇ܝܼ ܚܲܝܠܵܐ ܘܕ݂ܝܼܢܵܐ. ܘܪܲܒ̇ ܙܲܟܵܝ̈ܝܼܢ ܠܵܐ ܢܸܥܢܹܐ.

²⁴ܡܸܛܠ ܗܵܢܵܐ ܢܸܕ݂ܚ̄ܠܘܼܢ ܐ̄ܢܵܫ̈ܝܼܢ. ܘܲܢܙܘܼܥܘܼܢ ܡܸܢܹܗ ܟܠ ܚܲܟ̇ܝܼ̈ܡܲܝ ܠܸܒܵܐ.