Read Aramaic Peshita Job 39 Bible Online

Job 39 - Aramaic Peshita bible

Job 39

¹ܝܵܕܲܥ ܐܲܢ̄ܬ̇ ܙܲܒ̣ܢܵܐ ܕܝܵܠ̈ܕܵܢ ܕܲܝ̈ܨܵܬ̣ܵܐ ܒܲܫܩܝܼܦܹ̈ܐ: ܘܒܲܛ̈ܢܵܢ ܐܲܝ̈ܠܵܬ̣ܵܐ.

²ܢܵܛܲܪ ܐܲܢ̄ܬ̇ ܡܸܢܝܵܢܵܐ ܕܝܲܪܚܹ̈ܐ: ܘܝܵܕܲܥ ܐܲܢ̄ܬ̇ ܙܒܲܢ ܡܵܘܠܵܕܹܗܹ̇ܝܢ.

³ܘܐܸܡܲܬ̣ܝ ܒܵܪ̈ܟܵܢ ܘܝܵܠ̈ܕܵܢ.

⁴ܘܡܸܬ̣ܪܲܒ̇ܝܹܝܢ ܒܢܲܝ̈ܗܹܝܢ: ܘܡܸܬ̣ܚܲܣܠܝܼܢ.

⁵ܡܲܢ̣ܘܼ ܫ̣ܒܲܩ ܥܪܵܕ݂ܵܐ ܒܲܪ ܚܹܐܪ̈ܝܼܢ ܘܦܲܠܸܛ̣ ܡܸܢܹܗ ܢܝܼܪܵܐ.

⁶ܕܲܥ̣ܒܲܕ݂ ܦܩܲܥܬ̣ܵܐ ܒܲܝܬܹ̇ܗ. ܘܒܲܐܬ̣ܪܵܐ ܡܵܠܚܵܐ ܡܲܫ̱ܪܝܹܗ.

⁷ܓܵܝ̇ܝܟ ܥܲܠ ܣܘܿܓ̣ܵܐܐ ܕܩܘܼܪ̈ܝܵܐ. ܘܠܵܐ ܕܵܚܹ̇ܠ ܡ̣ܢ ܩܵܠܵܐ ܕܫܲܠܝܼܛܵܢܹ̈ܐ.

⁸ܒܣܘܿܓ̣ܵܐܐ ܕܛܘܼܪܹ̈ܐ ܕܛܘܼܪܹ̈ܐ ܡܲܪܥܝܼܬܹܗ. ܘܥܲܠ ܟܠ ܝܘܼܪܵܩ ܕܵܐܹܫ.

⁹ܕܲܠܡܵܐ ܡܸܬ̇ܛܦܝܼܣ ܪܲܝܡܵܐ ܕܢܸܦܠ̱ܚܵܟ݂. ܐܵܘ ܕܲܠܡܵܐ ܥܲܠ ܐܘܼܪܚܵܟ݂ ܒܵܐܹ̇ܬ̣.

¹⁰ܕܲܠܡܵܐ ܐܵܣܲܪ ܐܲܢ̄ܬ̇ ܢܝܼܪܵܐ ܥܲܠ ܩܕ݂ܵܠܹܗ ܕܪܲܝܡܵܐ. ܐܵܘ ܕܵܒܲܪ ܦܲܕܵܢܵܐ ܒܐܲܬ̣ܪܵܐ ܥܲܣܩܵܐ.

¹¹ܡܸܬ̇ܬ̇ܟ݂ܠ ܐܲܢ̄ܬ̇ ܥܠܵܘܗܝ ܕܣܲܓ̇ܝܼ ܚܲܝܠܹܗ. ܘܫܵܒܹ̇ܩ ܐܲܢ̄ܬ̇ ܥܠܵܘܗܝ ܠܐܹܘܬ̣ܵܟ݂.

¹²ܡܗܲܝܡܸܢ ܐܲܢ̄ܬ̇ ܠܹܗ ܕܲܡܕܲܟܹ̇ܐ ܐܸܕ̇ܪܵܟ݂. ܘܙܲܪܥܵܟ݂ ܚܵܡܹ̇ܠ.

¹³ܟܸܢ̈ܦܲܝ ܫܲܒܵܚܝܼܢ ܡܸܬ̣ܪܵܘ̱ܒ̣ܵܐ: ܘܛܵܝ̇ܣܵܐ ܘܐܵܬ̣̇ܝܵܐ: ܘܡܲܩܢܵܐ.

¹⁴ܘܫܵܒ̣̇ܩܵܐ ܥܲܠ ܐܲܪܥܵܐ ܒ̈ܢܵܬ̣ܵܗ̇. ܘܥܲܠ ܥܲܦܪܵܐ ܡܚܲܡܡܵܐ ܠܗܹܝܢ.

¹⁵ܘܐܸܬ̣ܢܲܫܝܲܬ̤ ܡܸܛܠ ܕܪܸ̈ܓ̣ܠܹܐ ܕܛܲܝܪܵܐ ܐܝܼܬ̣ ܠܵܗ̇. ܘܚܲܝ̄ܘܼܬ̣ܵܐ ܕܐܲܪܥܵܐ ܕܵܝ̇ܫܵܐ ܠܵܗ̇.

¹⁶ܐܲܣܓ̇ܝܲܬ̤ ܒ̈ܢܲܝܵܐ ܕܠܵܐ ܠܵܗ̇. ܘܲܣܪܝܼܩܵܐܝܼܬ̣ ܠܐܸܝܲܬ̤ ܕܠܵܐ ܕܸܚ̱ܠܬ̣ܵܐ.

¹⁷ܡܸܛܠ ܕܐܲܣܓ̇ܝܼ ܐܲܠܵܗܵܐ ܚܸܟ݂ܡ̱ܬ̣ܵܐ. ܘܠܵܐ ܦܠܲܓ̣ ܠܵܗ̇ ܒܘܼܝܵܢܵܐ.

¹⁸ܒܲܡܪܵܘܡܵܐ ܬܸܬ̇ܪܝܼܡ ܐܲܝܟ݂ ܕܸܩܠܵܐ. ܬܸܓ̣ܚܲܟ݂ ܥܲܠ ܣܘܼܣܝܵܐ: ܘܥܲܠ ܪܵܟ݂ܒܹ̇ܗ.

¹⁹ܝܵܗܹ̇ܒ̣ ܐܲܢ̄ܬ̇ ܠܣܘܼܣܝܵܐ ܓܲܢ̄ܒܵܪܘܼܬ̣ܵܐ. ܘܡܲܠܒܸ̇ܫ ܐܲܢ̄ܬ̇ ܨܵܘܪܹܗ ܙܲܝܢܵܐ.

²⁰ܡܙܝܼܥ ܐܲܢ̄ܬ̇ ܠܹܗ ܐܲܝܟ݂ ܩܲܡܨܵܐ. ܐܵܘ ܡܕܲܚܸܠ ܐܲܢ̄ܬ̇ ܠܹܗ ܒܕܸܚ̱ܠܬ̣ܵܐ.

²¹ܚܵܦܲܪ ܒܥܘܼܡܩܵܐ: ܘܕ݂ܵܐܲܨ ܒܢܲܚܠܵܐ. ܘܢܵܦܹ̇ܩ ܠܐܘܼܪܥܵܐ ܒܙܲܝܢܵܐ.

²²ܓܵܝ̇ܝܹܟ ܥܲܠ ܓܘܼܡܵܨܵܐ: ܘܠܵܐ ܕܵܚܹ̇ܠ ܘܠܵܐ ܗܵܦܹܟ݂ ܡ̣ܢ ܐܲܦܲܝ̈ ܚܲܪܒܵܐ.

²³ܥܠܵܘܗܝ ܡܸܫܬܲܒ̇ܚܵܐ ܩܛܸܪܩܵܐ: ܘܫܲܠܗܹܒ̣ܝܼܬ̣ܵܐ ܕܪܘܼܡܚܵܐ ܘܲܕ݂ܢܲܝܙܟ݂ܵܐ.

²⁴ܒܙܵܘܼܥܬ̣ܵܐ ܘܲܒ̣ܪܘܼܓ̣ܙܵܐ ܪܵܗܹ̇ܛ ܥܲܠ ܐܲܪܥܵܐ. ܘܠܵܐ ܕܵܚܹ̇ܠ ܡ̣ܢ ܩܵܠܵܐ ܕܩܲܪܢܵܐ.

²⁵ܒܩܵܠܵܐ ܐܵܡܲܪ ܐܲܚܵܢܝ. ܘܡ̣ܢ ܪܘܼܚܩܵܐ ܡܪܝܼܚ ܩܪܵܒ̣ܵܐ. ܘܲܡܙܝܼܥ ܠܪܵܘ̱ܪ̈ܒ̣ܵܢܹܐ ܒܨܸܗܠܹܗ.

²⁶ܡ̣ܢ ܚܸܟ݂ܡ̱ܬ̣ܵܟ݂ ܗܘ̤ܵܐ ܢܸܨܵܐ. ܘܲܦ̣ܪܸܣ ܓܸܦܵـ̈ـܘܗܝ ܠܬܲܝܡܢܵܐ.

²⁷ܥܲܠ ܡܸܠܲܬ̣ ܦܘܼܡܵܟ݂ ܢܸܬ̇ܬ̇ܪܝܼܡ ܢܸܫܪܹܐ. ܘܲܡܪܝܼܡ ܩܸܢܹܗ ܠܲܫܩܝܼܦܵܐ.

²⁸ܘܫܵܟܹ̇ܝܢ ܘܒ̣ܵܐܹ̇ܬ̣ ܥܲܠ ܫܸܢܵܐ ܕܲܫܩܝܼܦܵܐ.

²⁹ܘܡ̣ܢ ܨܲܝܕܹ̇ܗ ܡܸܣܬܲܝܒܲܪ. ܘܲܠܪܘܼܚܩܵܐ ܚܵܝ̇ܪ̈ܵܢ ܥܲܝ̈ܢܵܘܗܝ.

³⁰ܘܦܲܪ̈ܘܼܓ̣ܵܘܗܝ ܕܡܵܐ ܠܵܥ̇ܝܼܢ. ܘܐܲܝܟܵܐ ܕܡܸܬ̣ܩܛܸܠ ܩܛܝܼܠܵܐ: ܬܲܡܵܢ ܗ̄ܘܼ.

³¹ܘܲܥܢ̣ܵܐ ܡܵܪܝܵܐ ܘܐܸܡ̣ܲܪ ܠܐܝܼܘܿܒ̣.

³²ܣܲܓ̇ܝܼܐܝܼܢ ܐܸܢܘܿܢ ܡܸܠܟܵܘ̈ܗܝ ܕܐܲܠܵܗܵܐ. ܘܡ̇ܢ ܕܡܲܟܸ̇ܣ ܠܐܲܠܵܗܵܐ: ܝܵܗܹ̇ܒ̣ ܦܸܬ̣ܓ̣ܵܡܵܐ.

³³ܘܲܥܢ̣ܵܐ ܐܝܼܘܿܒ̣ ܘܐܸܡ̣ܲܪ ܠܡܵܪܝܵܐ.

³⁴ܒܸܨ̇ܪܹܬ̣ ܠܝܼ: ܡܵܢܵܐ ܐܲܬ̣ܝܼܒ̣ܵܟ݂. ܣܵܡܹ̇ܬ̣ ܐܝܼ̈ܕ݂ܝ ܥܲܠ ܦܘܼܡܝ.

³⁵ܚܕ݂ܵܐ ܡܲܠܠܹ̇ܬ̣: ܘܠܵܐ ܐܸܬܸ̇ܠ ܦܸܬ̣ܓ̣ܵܡܵܐ. ܘܲܕ̇ܬܲܪܬܹ̇ܝܢ ܠܵܐ ܡܵܘܣܸܦ ܐ̄ܢܵܐ ܠܲܡܡܲܠܵܠܘܼ.