Read Aramaic Peshita Job 4 Bible Online

Job 4 - Aramaic Peshita bible

Job 4

¹ܘܲܥ̣ܢܵܐ ܐܹܠܝܼܦܵܙ ܬܲܝܡ̄ܢܵܝܵܐ. ܘܐܸܡ̣ܲܪ.

²ܐܸܢ ܐܲܩܸܦ ܠܲܡܡܲܠܵܠܘܼ ܥܲܡܵܟ݂: ܬܸܠܐܹܐ ܘܲܠܡܸܟ݂ܠܵܐ ܡ̣ܠ̈ܝܼܢ ܡܸܢܵܟ݂ ܡܲܢ̣ܘܼ ܡܸܫܟܲܚ.

³ܗܵܐ ܪܕܲܝܼܬ̇ ܣܲܓܝܼ̈ܐܹܐ: ܘܐܝܼ̈ܕܲܝܵܐ ܕܲܡܪ̈ܲܦܝܵܢ ܬܚܲܝܸܠ.

⁴ܟܪ̈ܝܼܗܹܐ ܠܵܐ ܢܩܝܼܡܘܼܢ ܡ̣ܠܲܝ̈ܟ ܘܒܘܼܪ̈ܟܹ̇ܐ ܪ̈ܵܥܠܵܬ̣ܵܐ ܬܚܲܝܸܠ.

⁵ܡܸܛܠ ܕܗܵܫܵܐ ܐܸܬ̣ܵܬ̤ ܥܠܲܝܟ ܘܲܠܐܲܝܼܬ̇. ܘܲܡܛܵܬ̤ ܠܘܿܬ̣ܵܟ݂: ܘܐܸܬ̣ܒܲܠܗ̣ܝܲܬ̇.

⁶ܗܵܐ ܕܸܚ̱ܠܬ̣ܵܟ݂ ܗ̤ܝ ܗ̄ܝܼ ܥ̣ܕܲܠܝܵܟ݂: ܘܣܲܒ̣ܪܵܟ݂: ܘܬܲܡܝܼܡܘܼܬ̣ ܐܘܼܪܚܵܟ݂.

⁷ܐܸܬ̇ܕܲܟ̄ܪ ܢܹܐ: ܡܲܢ̣ܘ ܙܲܟܵܝܵܐ ܕܐܸܒܲܕ݂: ܘܐܲܝܟܵܘ ܬܪܝܼܨܵܐ ܕܲܒ̣ܗܸܬ̣.

⁸ܐܲܝܟ݂ ܡܵܐ ܕܲܚܙܲܝܬ̇ ܕܪܵܕܹܝܢ ܒܲܚܛܵܐ: ܘܙܵܪܥܝܼܢ ܥܲܡܠܵܐ ܢܸܚܨܕܘܼܢܹܗ.

⁹ܘܡ̣ܢ ܢܫܲܡܬܹܗ ܕܐܲܠܵܗܵܐ ܢܹܐܒ̣ܕ̇ܘܼܢ ܘܡ̣ܢ ܪܘܼܚܵܐ ܕܪܘܼܓ̣ܙܹܗ ܢܣܘܼܦܘܼܢ.

¹⁰ܢܸܗܡ̱ܬ̣ܵܐ ܕܐܲܪܝܵܐ: ܘܩܵܠܵܐ ܕܓ̣ܘܼܪܝܵܐ ܕܐܲܪܝܵܐ: ܘܫ̣ܢܹ̈ܐ ܕܐܲܪܝ̇ܘܿܬ̣ܵܐ ܐܸܬ̇ܬ̇ܒܲܪ.

¹¹ܐܲܪܝܵܐ ܐܸܒܲܕ݂ ܡ̣ܢ ܒܠܲܝ ܕܠܲܝܬ̇ ܠܹܗ ܬܒ̣ܵܪܵܐ. ܘܲܒ̣̈ܢܲܝ ܐܲܪܝܘܿܬ̣ܵܐ ܐܸܬ̣ܒܲܕܲܪܘ.

¹²ܘܲܥܠܲܝ ܦܸܬ̣ܓ̣ܵܡܵܐ ܐܸܬ̇ܬ̇ܓ̣ܝܼܒ̣. ܘܩܲܒܿܠܲܬ̤ ܐܸܕܢ̄ܝ ܐܲܝܟ݂ ܙܥܘܿܪ ܡܸܢܹܗ.

¹³ܒܫܸܠܝܵܐ ܒܚ̣ܙܘܵܐ ܕܠܸܠܝܵܐ: ܒܡܲܦܲܥ ܫ̣ܢܵܐ ܥܲܡܝܼܩܵܐ ܥܲܠ ܐ̄ܢܵܫܵܐ.

¹⁴ܕܸܚ̱ܠܬ̣ܵܐ ܩܪܵܬܲܢܝ ܘܙܵܘܼܥܬ̣ܵܐ. ܘܣܘܿܓ̣ܵܐܐ ܕܓܲܪ̈ܡܲܝ ܐܸܬ̇ܬ̇ܙܝܼܥܘ.

¹⁵ܘܪܘܼܚܵܐ ܥܲܠ ܐܲܦܲܝ̈ ܐܲܥ̣ܒܲܪ. ܘܐܸܙܕܲܩܦܲܬ̤ ܣܥܲܪܬ̣ܵܐ ܕܒܸܣܪܝ.

¹⁶ܘܩܵܡܹ̇ܬ̣ ܘܠܵܐ ܐܹܫܬܵܘܕ̇ܥܹ̇ܬ̣: ܘܠܲܝܬ̇ ܚܙܵܬ̣ܵܐ ܠܘܼܩܒܲܠ ܥܲܝܢܲܝ̈. ܘܢܸܥ̱ܡܬ̣ܵܐ ܘܩܵܠܵܐ ܫ̣ܡܥܹ̇ܬ̣ ܕܐܵܡܲܪ.

¹⁷ܐ̄ܢܵܫܵܐ ܡ̣ܢ ܐܲܠܵܗܵܐ ܢܸܙܕܲܕܲܩ. ܐܵܘ ܡ̣ܢ ܥܵܒ̣ܘܿܕܹܗ ܡܸܬ̇ܕܲܟܹܿܐ ܓܲܒ̣ܪܵܐ.

¹⁸ܗܵܐ ܒܥܲܒ̣ܕܵܘ̈ܗܝ ܠܵܐ ܡܗܲܝܡܸܢ: ܘܲܒ̣ܡܲܠܲܐܟ݂ܵܘ̈ܗܝ ܢܣܝܼܡ ܬܸܡܗܵܐ.

¹⁹ܐܵܦ ܐܲܝܠܹܝܢ ܕܲܫܪܹܝܢ ܒܒ̣ܵـ̈ـܬܹܐ ܕܛܝܼܢܵܐ ܕܲܒ̣ܥܲܦܪܵܐ ܡܫܲܟ݂ܠܠܝܼܢ: ܢܸܬ̣ܡܲܟ̇ܟ݂ܘܼܢ ܩܕ݂ܵܡ ܥܲܪܦ̣ܠܵܐ.

²⁰ܡ̣ܢ ܨܲܦܪܵܐ ܠܪܲܡܫܵܐ ܢܸܬ̣ܡܲܟ̇ܟ݂ܘܿܢ: ܕܠܵܐ ܢܸܬ̇ܬ̇ܣܝܼܡܘܼܢ ܥܵܡ̇ܘܿܪ̈ܝܼܢ ܠܥܵܠܲܡ: ܘܢܹܐܒ̣ܕ̇ܘܼܢ.

²¹ܗܵܐ ܫ̣ܩܲܠ ܝܘܼܬ̣ܪܵܢܗܘܿܢ ܡܸܢܗܘܿܢ. ܘܫܲܪܟ̇ܗܘܿܢ ܒܗܘܿܢ ܢܡܘܼܬ̣ܘܼܢ ܘܠܵܐ ܒܚܸܟ݂ܡ̱ܬ̣ܵܐ.