Read Aramaic Peshita Job 41 Bible Online

Job 41 - Aramaic Peshita bible

Job 41

¹ܠܵܐ ܢܲܪܚܸܩ ܟܲܕ݂ ܢܸܬ̇ܬ̇ܥܝܼܪ. ܘܡܲܢ̣ܘܼ ܕܲܩܕ݂ܵܡܲܝ ܢܩܘܼܡ.

²ܡܲܢ̣ܘܼ ܩܲܕ̇ܡܲܢܝ ܕܐܸܫܠܲܡ. ܬܚܹܝܬ̣ ܟܠ ܫܡܲܝܵܐ: ܕܝܼܠܝ ܗ̄ܘܼ.

³ܘܠܵܐ ܐܸܫܬ̇ܘܿܩ: ܒܚܵܘܣܵܢܹܗ ܘܒܲܓ̣ܝܵܕܹ̈ܐ ܕܓܲܢ̄ܒܵܪܘܼܬܹܗ.

⁴ܡ̇ܢ ܓܲܠܝܼ ܐܲܦܲܝ̈ ܠܒ̣ܘܼܫܹܗ: ܘܡܵܐ ܕܢܵܦ̇ܠܵܐ ܡܨܝܼܕ̇ܬܵܐ.

⁵ܡܲܢ̣ܘܼ ܐܵܬܹ̇ܐ. ܬܲܪܥܵܐ ܕܦܘܼܡܹܗ ܡܲܢ̣ܘܼ ܦܵܬܲܚ. ܕܘܼܪܵܐ ܕܫܸܢܵܘ̈ܗܝ ܕܸܚ̱ܠܬ̣ܵܐ ܕܲܒ̣ܢܲܚܠܵܐ.

⁶ܦܘܼܡܹܗ ܨܪܝܼܪ: ܘܐܲܣܝܼܪ: ܘܲܚܬ̣ܝܼܡ.

⁷ܚܲܕ݂ ܠܚܲܕ݂ ܩܲܪܝܼܒ̣ܝܼܢ. ܘܪܘܼܚܵܐ ܠܵܐ ܥܵܐܠܵܐ ܒܲܝܢܵܬ̣ܗܘܿܢ.

⁸ܚܲܕ݂ ܠܚܲܕ݂ ܢܲܩܝܼܦܝܼܢ: ܘܐܲܚܝܼܕ݂ܝܼܢ: ܘܠܵܐ ܡܸܬ̣ܦܲܪܩܝܼܢ.

⁹ܘܚܵܙ̈ܝܵܬܹܗ ܡܲܠ̈ܝܵܢ ܢܘܼܗܪܵܐ. ܘܥܲܝܢܵܘ̈ܗܝ ܐܲܝܟ݂ ܙܲܠܝܼܩܲܝ̈ ܫܲܦܪܵܐ.

¹⁰ܘܢܵܦܩܝܼܢ ܡ̣ܢ ܦܘܼܡܹܗ ܠܲܡܦܹܝ̈ܕܹܐ ܐܲܝܟ݂ ܓܘܼܡܪܹ̈ܐ ܕܢܘܼܪܵܐ: ܘܐܲܝܟ݂ ܫܒ̣ܝܼ̈ܒܲܝ ܢܘܼܪܵܐ ܡܸܬ̣ܠܲܗܛܝܼܢ.

¹¹ܡ̣ܢ ܢܚܝܼܪ̈ܵܘܗܝ ܢܵܦܹ̇ܩ ܬܸܢܵܢܵܐ: ܐܲܝܟ݂ ܕܘܼܪܬܵܐ ܕܩܲܕ݂ܣܵܐ ܕܡܸܫܬ̇ܓܲܪ.

¹²ܢܲܦ̮ܫܹܗ ܓܘܼܡܪ̈ܝܼܢ ܬܲܠܗܸܛ. ܘܫܲܠ̈ܗܸܒ̣ܝܵܢ ܢܵܦ̈ܩܵܢ ܡ̣ܢ ܦܘܼܡܹܗ.

¹³ܒܨܵܘܪܹܗ ܒܵܐܹ̇ܬ̣ ܥܘܼܫܢܵܐ. ܘܲܩܕ݂ܵܡܵܘܗܝ ܬܕ݂ܘܼܨ ܕܸܚ̱ܠܬ̣ܵܐ.

¹⁴ܫܒ̣ܝܼܚ ܒܸܣܪܹܗ: ܘܫܲܡܝܼܢ: ܘܡܸܣܬܲܡܲܟ݂.

¹⁵ܘܠܵܐ ܙܵܐܲܥ ܠܸܒܹ̇ܗ. ܢܣܝܼܟ݂ ܐܲܝܟ݂ ܟܹܐܦܵܐ. ܘܲܡܫܲܕܲܪ ܐܲܝܟ݂ ܨܘܼܢܵܡܵܐ.

¹⁶ܡ̣ܢ ܕܸܚ̱ܠܬܹܗ ܢܙܘܥܘܼܢ ܬܲܩܝܼ̈ܦܝܼܢ ܘܕܲܡܫܲܪܪܝܼܢ ܢܸܬ̣ܡܲܟ̇ܟ݂ܘܢ.

¹⁷ܬܲܪܥܵܐ ܕܚܲܪܒܵܐ ܠܵܐ ܡܸܫܟܲܚ ܠܲܡܩܵܡ. ܡܲܪ̈ܢܝܵܬ̣ܵܐ ܕܪܵܘ̱ܪ̈ܒ̣ܵܢܹܐ ܫܵܩܹ̇ܠ.

¹⁸ܦܲܪܙܠܵܐ ܐܲܝܟ݂ ܬܸܒ̣ܢܵܐ ܚܫܝܼܒ̣ ܠܹܗ. ܘܲܢܚܵܫܵܐ ܐܲܝܟ݂ ܩܲܝܣܵܐ ܕܢܵܦ̇ܠܵܐ ܒܹܗ ܒܸܠܛܝܼܬ̣ܵܐ.

¹⁹ܠܵܐ ܥܵܪܹܩ ܡ̣ܢ ܩܸܫܬܵܐ. ܘܐܲܝܟ݂ ܓ̣ܠܹ̈ܐ ܚܫܝܼ̈ܒ̣ܵܢ ܠܹܗ ܟܹܐܦܹ̈ܐ ܕܩܸܠܥܵܐ.

²⁰ܓܵܚܹ̇ܟ ܥܲܠ ܢܲܝܙܟ݂ܵܐ. ܘܐܲܝܟ݂ ܝܲܒ̣ܫܵܐ ܚܫܝܼܒ̣ ܠܹܗ ܬܗܘܿܡܵܐ.

²⁵ܕܲܥ̣ܒܲܕ݂ ܠܐܲܒ̣ܕܵܢܵܐ ܟܠ ܕܪܵܡ ܘܚܵܙܹܐ. ܘܲܗܘ̤ܵܐ ܡܲܠܟܵܐ ܥܲܠ ܟܠܹܗ ܪ̈ܲܚܫܵܐ.