Read Aramaic Peshita Job 42 Bible Online

Job 42 - Aramaic Peshita bible

Job 42

¹ܘܲܥܢ̣ܵܐ ܐܝܼܘܿܒ̣ ܘܐܸܡ̣ܲܪ ܠܡܵܪܝܵܐ.

²ܝܵܕܲܥ ܐ̄ܢܵܐ ܕܗܵܠܹܝܢ ܟܠܗܹܝܢ ܡܨܹܐ ܐܲܢ̄ܬ̇ ܚܲܝܠܵܐ ܠܡܸܥܒܲܕ݂. ܘܠܵܐ ܡܸܬ̇ܛܲܫܝܵܐ ܡܸܢܵܟ݂ ܬܲܪܥܝܼܬ̣ܵܐ.

³ܡܲܢ̣ܘܼ ܗܵܢܵܐ ܕܡܸܬ̣ܪܲܥܹܐ ܬܲܪܥܝܼܬ̣ܵܐ ܒܡܸܠܹ̈ܐ ܕܠܵܐ ܝܼܕܲܥܬ̣ܵܐ. ܡܸܛܠ ܗܵܢܵܐ ܚܵܘܝܼܬܵܢܝ ܕܠܵܐ ܐܸܬ̣ܒܲܝܢܹ̇ܬ̣: ܘܠܵܐ ܝܼܕ݂ܥܹ̇ܬ̣ ܕܪܵܘ̱ܪ̈ܒ̣ܵܢ ܡܹܢܝ.

⁴ܫܡܲܥܲܝܢܝ ܘܐܸܢܵܐ ܐܹܡܲܠܸܠ. ܐܹܫܲܐܠܵܟ݂: ܐܵܘܕܲܥܲܝܢܝ.

⁵ܠܫܸܡܥܵܐ ܗ̄ܘܼ ܕܐܸܕ݂ܢܵܐ ܫܡܲܥ̇ܬܵܟ݂. ܗܵܫܵܐ ܥܲܝܢܝ ܗܵܐ ܚܙܵܬ̣ܵܟ݂.

⁶ܡܸܛܠ ܗܵܢܵܐ ܐܸܫܬ̇ܘܿܩ. ܘܐܹܬܢܲܚܲܡ ܥܲܠ ܥܲܦܪܵܐ: ܘܥܲܠ ܩܸܛܡܵܐ.

⁷ܘܲܗܘ̤ܵܐ ܡ̣ܢ ܒܵܬܲܪ ܕܡܲܠܸܠ ܡܵܪܝܵܐ ܦܸܬ̣ܓ̣ܵܡܹ̈ܐ ܗܵܠܹܝܢ ܥܲܡ ܐܝܼܘܿܒ̣: ܐܸܡܲܪ ܡܵܪܝܵܐ ܠܐܹܠܝܼܦܵܙ ܬܲܝܡܢܵܝܵܐ: ܐܸܬ̣ܚܲܡܲܬ̣ ܪܘܼܓ̣ܙܝ ܥܠܲܝܟ ܘܥܲܠ ܬܪܹܝܢ ܚܲܒ̣ܪ̈ܲܝܟ. ܡܸܛܠ ܕܠܵܐ ܐܸܡ̣ܲܪܬ̇ܘܿܢ ܩܕ݂ܵܡܲܝ ܟܹܐܢܘܼܬ̣ܵܐ ܐܲܝܟ݂ ܥܲܒ̣ܕ̇ܝ ܐܝܼܘܿܒ̣.

⁸ܗܵܫܵܐ ܣܲܒ̣ܘ ܠܟ݂ܘܿܢ ܫܲܒ̣ܥܵܐ ܬܵܘܪ̈ܝܼܢ: ܘܫܲܒ̣ܥܵܐ ܕܸܟ݂ܪ̈ܝܼܢ. ܘܙܸܠܘ ܠܘܵܬ̣ ܥܲܒ̣ܕ̇ܝ ܐܝܼܘܿܒ̣ ܘܢܲܣܸܩ ܩܘܼܪܒܵܢܵܐ ܚܠܵܦܲܝܟ̇ܘܿܢ. ܘܥܲܒ̣ܕ̇ܝ ܐܝܼܘܿܒ̣ ܢܨܲܠܹܐ ܥܠܲܝܟ̇ܘܿܢ. ܘܐܸܥܒܸ̇ܕ݂ ܒܐܲܦܵܘ̈ܗܝ ܕܠܵܐ ܐܸܥܒܸܕ݂ܟ݂ܘܿܢ ܒܲܩܠܵܠܵܐ. ܡܸܛܠ ܕܠܵܐ ܐܸܡܲܪܬ̇ܘܿܢ ܩܕ݂ܵܡܲܝ ܟܹܐܢܘܼܬ̣ܵܐ: ܐܲܝܟ݂ ܥܲܒ̣ܕ̇ܝ ܐܝܼܘܿܒ̣.

⁹ܘܐܸܙܲܠ̣ܘ ܐܹܠܝܼܦܵܙ ܬܲܝܡܢܵܝܵܐ: ܘܒܸܠܕ݂ܵܕ ܫܘܿܚܵܝܵܐ: ܘܨܘܿܦܵܪ ܢܲܥܡܬ̣ܵܝܵܐ. ܘܲܥ̣ܒܲܕ݂ܘ ܐܲܝܟ݂ ܕܐܸܡ̣ܲܪ ܠܗܘܿܢ ܡܵܪܝܵܐ. ܘܲܥ̣ܒܲܕ݂ ܡܵܪܝܵܐ ܒܐܲܦܵܘ̈ܗܝ ܕܐܝܼܘܿܒ̣.

¹⁰ܘܡܵܪܝܵܐ ܐܲܗܦܸܟ݂ ܫܒ̣ܝܼܬܹܗ ܕܐܝܼܘܿܒ̣ ܟܲܕ݂ ܡܨܲܠܸܐ ܗ̄ܘܼܵܐ ܥܲܠ ܪ̈ܵܚܡܵܘܗܝ. ܘܐܵܘܣܸܦ ܡܵܪܝܵܐ ܥܲܠ ܟܠܡܸܕܹ̇ܡ ܕܐܝܼܬ̣ ܗ̄ܘܼܵܐ ܠܹܗ ܠܐܝܼܘܿܒ̣ ܐܲܥܦܵܐ.

¹¹ܘܐܸܬ̣ܵܘ ܠܘܵܬܹܗ ܟܠܗܘܿܢ ܐܲܚܵܘ̈ܗܝ ܘܐܲܚ̈ܘܵܬܹܗ: ܘܟ݂ܠ ܕܝܵܕ݂ܥܝܼܢ ܗ̄ܘܼܵܘ ܠܹܗ ܡ̣ܢ ܩܕ݂ܝܼܡ. ܘܐܸܟܲܠ̣ܘ ܠܲܚܡܵܐ ܥܲܡܹܗ ܒܒܲܝܬܹ̇ܗ: ܕܐܲܟ݂ܪܝܼܘ ܗ̄ܘܼܵܘ ܥܠܵܘܗܝ. ܘܒܲܝܐܘܼܗܝ ܡ̣ܢ ܟܠܗܹܝܢ ܒܝܼ̈ܫܵܬ̣ܵܐ ܕܐܲܝܬ̇ܝܼ ܡܵܪܝܵܐ ܥܠܵܘܗܝ. ܘܝܲܗ̄ܒ݂ܘ ܠܹܗ ܓܒܲܪ ܚܕ݂ܵܐ ܚܕ݂ܵܐ ܢܸܩܝܵܐ: ܘܚܲܕ݂ ܚܲܕ݂ ܩܕ݂ܵܫܵܐ ܕܕܲܗܒ̣ܵܐ.

¹²ܘܡܵܪܝܵܐ ܒܲܪܸܟ݂ ܐ̄ܚܪܵܝܬܹ̇ܗ ܕܐܝܼܘܿܒ̣ ܛܵܒ̣ ܡ̣ܢ ܩܲܕ݂ܡܵܝܬܹ̇ܗ. ܘܲܗܘ̤ܵܘ ܠܹܗ ܐܲܪܒܲܬܲܥܣܲܪ ܐܲܠܦ̈ܝܼܢ ܥܵـ̈ـܢܵܐ: ܘܸܫܬܵܐ ܐܲܠܦ̈ܝܼܢ ܓܲܡܠܹ̈ܐ: ܘܐܵܠܸܦ ܦܲܕܵܢܝܼ̈ܢ ܕܬ̣ܵܘܪܹ̈ܐ: ܘܐܵܠܸܦ ܐܲܬܵܢܝܼ̈ܢ.

¹³ܘܲܗܘ̤ܵܘ ܠܹܗ ܫܲܒ̣ܥܵܐ ܒ̈ܢܝܼܢ ܘܲܬ̣ܠܵܬ̣ ܒ̈ܢܵܢ.

¹⁴ܘܲܩ̣ܪܵܐ ܫܡܵܗ̇ ܕܲܚܕ݂ܵܐ ܡܸܢܗܹܝܢ: ܐܝܼܡܵܡܵܐ. ܘܲܫܡܵܐ ܕܬܲܪܬܹ̇ܝܢ: ܩܲܨܘܿܥܵܐ ܘܲܫܡܵܐ ܕܲܬ̣ܠܵܬ̣: ܩܲܪܢܵܦܘܿܟ݂.

¹⁵ܘܠܵܐ ܐܸܫܬ̇ܟܲܚ ܢܸܫܹ̈ܐ ܕܫܲܦܝܼܪ̈ܵܢ ܐܲܝܟ݂ ܒ̈ܢܵܬܹܗ ܕܐܝܼܘܿܒ̣: ܒܟ݂ܠܵܗ̇ ܐܲܪܥܵܐ. ܘܝܲܗ̄ܒ̣ ܠܗܹܝܢ ܐܲܒ̣ܘܼܗܹܝܢ ܝܘܼܪܬܵܢܵܐ ܥܲܡ ܐܲܚܲܝ̈ܗܹܝܢ.

¹⁶ܘܲܚܝܵܐ ܐܝܼܘܿܒ̣ ܡ̣ܢ ܒܵܬܲܪ ܗܵܝܕܹ̇ܝܢ: ܡܵܐܐ ܘܐܲܪܒ̇ܥܝܼܢ ܫܢ̈ܝܼܢ. ܘܲܚ̣ܙܵܐ ܒܢܵܘ̈ܗܝ ܘܲܒ̈ܢܲܝ ܒܢܵܘ̈ܗܝ: ܥܲܠ ܐܲܪܒ̇ܥܵܐ ܕܵܪ̈ܝܼܢ.

¹⁷ܣ̣ܐܸܒ̣ ܐܝܼܘܿܒ̣: ܘܲܣ̣ܒܲܥ ܝܵܘ̈ܡܵܬܹܗ: ܘܡܝܼܬ̣.