Read Aramaic Peshita Job 5 Bible Online

Job 5 - Aramaic Peshita bible

Job 5

¹ܩܪܝܼ ܢܹܐ ܐܸܢ ܐܝܼܬ̣ ܕܥܵܢܹ̇ܐ ܠܵܟ݂. ܘܲܠܘܵܬ̣ ܡ̇ܢ ܡ̣ܢ ܩܲܕ̇ܝܼܫܹ̈ܐ ܬܸܬ̣ܦܢܹܐ.

²ܡܸܛܠ ܕܲܠܣܲܟ݂ܠܵܐ ܩܵܛܹܿܠ ܪܘܼܓ̣ܙܵܐ: ܘܲܠܣܲܟ݂ܠܵܐ ܩܵܛ̇ܠܵܐ ܩܸܢ̱ܐܬ̣ܵܐ.

³ܐܸܢܵܐ ܚܙܹ̇ܝܬ̣ ܪܲܫܝܼܥܵܐ ܕܡܲܨܠܲܚ: ܘܐܵܒ̣ܕܵܐ ܕܲܝܪܹܗ ܡ̣ܢ ܫܹܠܝ.

⁴ܢܸܬ̣ܪܲܚܩܘܼܢ ܒܢܵܘ̈ܗܝ ܡ̣ܢ ܦܘܼܪܩܵܢܵܐ. ܢܸܬ̣ܡܲܟ̇ܟ݂ܘܼܢ ܒܬܲܪܥܵܐ: ܘܠܲܝܬ̇ ܕܦܵܪܹܩ ܠܗܘܿܢ.

⁵ܕܚܵܨܹ̇ܕ݂ ܟܲܦܢܵܐ ܢܹܐܟ݂ܘܿܠ. ܘܲܠܨܲܗܝܵܐ ܢܸܬ̣ܢܲܣܟ̇ܘܼܢ. ܘܲܢܓܲܪܸܣ ܨܲܗܝܵܐ ܩܸܢܝܵܢܗܘܿܢ.

⁶ܡܸܛܠ ܕܠܵܐ ܢܵܦܹ̇ܩ ܡ̣ܢ ܥܲܦܪܵܐ ܫܘܼܩܪܵܐ: ܐܵܦܠܵܐ ܡ̣ܢ ܐܲܕ݂ܡ̱ܬ̣ܵܐ ܨܵܡ̇ܲܚ ܥܵܘܼܠܵܐ.

⁷ܡܸܛܠ ܕܒܲܪܢܵܫܵܐ ܠܥܲܡܠܵܐ ܗ̄ܘܼ ܐܸܬ̣̱ܝܼܠܸܕ݂. ܘܲܒ̣̈ܢܲܝ ܥܵܘܦܵܐ ܢܪܝܼܡܘܼܢ ܓ̣ܦܵܐ.

⁸ܒܪܲܡ ܐܸܢܵܐ ܐܹܥܲܩܸܒ̣ ܥܲܠ ܐܲܠܵܗܵܐ. ܘܲܠܘܵܬ̣ ܐܲܠܵܗܵܐ ܐܹܣܝܼܡ ܡܸܠܲܬ̣ܝ.

⁹ܕܲܥ̣ܒܲܕ݂ ܪܵܘ̱ܪ̈ܒ̣ܵܬ̣ܵܐ ܕܠܵܐ ܣܵܟ݂: ܘܬܸܕ݂ܡܪ̈ܵܬ̣ܵܐ ܕܠܵܐ ܡܸܢܝܵܢ.

¹⁰ܕܝܵܗܹܒ̣ ܡ̣ܛܪܵܐ ܥܲܠ ܐܲܦܲܝ̈ ܐܲܪܥܵܐ. ܘܲܡܫܲܕܲܪ ܡܲـ̈ـܝܵܐ ܥܲܠ ܐܲܦܲܝ̈ ܫܘܼ̈ܩܹܐ.

¹¹ܠܲܡܣܵܡ ܫܲܦ̈ܠܹܐ ܒܪܵܘܡܵܐ: ܘܡܲܟ̇ܝܼ̈ܟܹܐ ܢܸܬ̣ܥܲܫܢܘܼܢ ܒܦܘܼܪܩܵܢܵܐ.

¹²ܡܒܲܛܸܠ ܡܲܚܫ̈ܒ̣ܵܬ̣ܵܐ ܕܚܲܟܿܝܼ̈ܡܹܐ: ܕܠܵܐ ܢܸܥ̈ܒ̇ܕ݂ܵܢ ܐܝܼܕܲܝ̈ܗܘܿܢ ܠܚܸܟ݂ܡܵܐ.

¹³ܐܵܚܹܿܕ݂ ܚܲܟ̇ܝܼܡܹ̈ܐ ܒܚܸܟ݂ܡܲܬ̣ܗܘܿܢ. ܘܬܲܪܥܝܼܬ̣ܵܐ ܕܨܲܢܘܼܥ̈ܬ̣ܵܢܹܐ ܡܒܲܛܸܠ.

¹⁴ܒܐܝܼܡܵܡܵܐ ܢܓܲܫܓ̇ܫܘܼܢ ܐܲܝܟ݂ ܕܲܒ̣ܚܸܫܘ̇ܟ݂ܵܐ. ܘܐܲܝܟ݂ ܕܲܒ̣ܠܠܝܵܐ ܢܡܘܼܫܘܼܢ ܒܛܲܗܪܵܐ.

¹⁵ܦܵܪܹܩ ܡ̣ܢ ܚܲܪܒܵܐ ܦܘܼܡܗܘܿܢ: ܘܡ̣ܢ ܐܝܼܕ݂ܵܐ ܕܥܲܫܝܼܢܵܐ ܠܡܸܣܟܹ̇ܢܵܐ.

¹⁶ܘܢܸܗܘܹܐ ܠܡܸܣܟܹ̇ܢܵܐ ܣܲܒ̣ܪܵܐ. ܘܥܵܘܿܠܵܐ ܢܸܣܟ̇ܘܿܪ ܦܘܼܡܹܗ.

¹⁷ܛܘܼܒ̣ܵܘܗܝ ܠܓܲܒ̣ܪܵܐ ܕܢܲܟ̇ܣܝܼܘܗܝ ܐܲܠܵܗܵܐ. ܘܡܲܪܕ̇ܘܼܬܹܗ ܕܚܲܣܝܼܢܵܐ ܠܵܐ ܢܲܣܠܹܐ.

¹⁸ܡܸܛܠ ܕܗ̤ܘ ܬܵܒܲܪ ܘܥܵܨܹܿܒ̣: ܘܡܵܚܹ̇ܐ ܘܐܝܼܕ݂ܵܘ̈ܗܝ ܡܲܐܣ̈ܝܵܢ.

¹⁹ܒܫܹܬ̣ ܥܵـ̈ـܩܵܢ ܢܸܦ̱ܪܩܵܟ݂. ܘܲܒ̣ܕܲܫܒܲܥ ܠܵܐ ܢܸܩܪܘܿܒ̣ ܠܵܟ݂ ܒܝܼܫܵܐ.

²⁰ܒܟܲܦܢܵܐ ܢܸܦ̱ܪܩܵܟ݂ ܡ̣ܢ ܡܵܘܬܵܐ: ܘܒܲܩܪܵܒ̣ܵܐ ܡ̣ܢ ܐܝܼ̈ܕܲܝ ܚܲܪܒܵܐ.

²¹ܘܡ̣ܢ ܫܲܒ̣ܛܵܐ ܕܠܸܫܵܢܵܐ ܬܸܣܬܲܬܲܪ: ܘܠܵܐ ܬܸܕ݂ܚܲܠ ܡ̣ܢ ܬܒ̣ܵܪܵܐ ܟܲܕ݂ ܢܹܐܬܹܐ.

²²ܥܲܠ ܒܸܙܬ̣ܵܐ ܘܥܲܠ ܟܲܦܢܵܐ ܬܸܓ̣ܚܲܟ. ܘܡ̣ܢ ܚܲܝ̄ܘܬ̣ܵܐ ܕܒܲܪܵܐ ܠܵܐ ܬܸܕ݂ܚܲܠ.

²³ܡܸܛܠ ܕܥܵܡ ܟܹܐܦܹ̈ܐ ܕܕܲܒ݂ܪܵܐ ܩܝܵܡܵܟ݂. ܘܚܲܝ̄ܘܬ̣ܵܐ ܕܒܲܪܵܐ ܐܸܫܬܲܠܡܲܬ̤ ܠܵܟ݂.

²⁴ܘܬܸܕܲܥ ܕܲܫܠܵܡ ܗ̄ܘܼ ܡܲܫܟ̇ܢܵܟ݂. ܘܬܸܗܦܘܿܟ݂ ܠܕܲܝܪܵܟ݂: ܘܠܵܐ ܬܸܚܛܹܐ.

²⁵ܘܬܸܕܲܥ ܕܲܣܓ̣ܝܼ ܙܲܪܥܵܟ݂: ܘܝܲܠܕܵܟ݂ ܐܲܝܟ݂ ܥܸܣܒܵܐ ܕܐܲܪܥܵܐ.

²⁶ܘܬܸܥܘܿܠ ܢܝܼܚܵܐܝܼܬ̣ ܠܩܲܒ̣ܪܵܐ: ܐܲܝܟ݂ ܡܲܣܲܩ ܓܕ݂ܝܼܫܵܐ ܒܙܲܒ̣ܢܹܗ.

²⁷ܗܵܕܹܐ ܒܨܲܝܢ: ܘܗܵܟܲܢܵܐ ܗ̄ܘܼ ܫ̣ܡܲܥܢܵܗ̇. ܘܐܲܢ̄ܬ̇ ܕܲܥ ܠܵܟ݂.