Read Aramaic Peshita Job 6 Bible Online

Job 6 - Aramaic Peshita bible

Job 6

¹ܘܲܥ̣ܢܵܐ ܐܝܼܘܿܒ̣ ܘܐܸܡ̣ܲܪ.

²ܠܘܲܝ ܕܹܝܢ ܡܸܬ̇ܬ̇ܩܸܠ ܪܘܼܓ̣ܙܝ: ܘܡܸܕܹܿܡ ܕܲܗܘ̣ܵܢܝ ܒܡܲܣܲܐܬ̣ܵܐ ܐܲܟ݂ܚ̄ܕ݂ܵܐ.

³ܡܸܛܠ ܕܗܵܫܵܐ ܡ̣ܢ ܚܵܠܵܐ ܕܝܲܡܡܹ̈ܐ ܥ̣ܫܸܢ: ܡܸܛܠ ܗܵܢܵܐ ܦܸܬ̣ܓ̣ܵܡܲܝ̈ ܟܠܹܝܢ.

⁴ܡܸܛܠ ܕܓܹܐܪ̈ܵܘܗܝ ܕܚܲܣܝܼܢܵܐ ܒܒܸܣ̄ܪܝ. ܘܚܸܡܲܬ̣ܗܘܿܢ ܫܵܬ̣̇ܝܵܐ ܠܪܘܼܚܝ. ܘܲܒ̣ܥܸܬ̇ܬܹܗ ܕܐܲܠܵܗܵܐ ܣܲܕ̇ܕ݂ܬܲܢܝ.

⁵ܕܲܠܡܵܐ ܡܣܵܘܸܩ ܥܪܵܕ݂ܵܐ ܥܲܠ ܬܸܕ݂ܐܵܐ: ܐܵܘ ܓܵܥܹ̇ܐ ܬܵܘܪܵܐ ܚܲܡܝܼܡܵܐ.

⁶ܐܵܘ ܡܸܬ̣ܐ̱ܟ݂ܠ ܦܲܟ̇ܝܼܗܵܐ ܕܠܵܐ ܡܸܠܚܵܐ. ܐܵܘ ܐܝܼܬ̣ ܛܲܥܡܵܐ ܒܪܝܼܪܵܗ̇ ܕܲܚܠܲܡܬ̣ܵܐ.

⁷ܡܸܐܢܲܬ̤ ܢܲܦ̮ܫܝ ܒܡܲܟ݂ܬܵܫܵܗ̇: ܐܵܘ ܡܲܝܠܸܠ ܐܲܝܟ݂ ܪܵܘܝܵܐ ܩܪܵܒ̣ܝ.

⁸ܡܲܢ̣ܘܼ ܢܸܬܸ̇ܠ ܠܝܼ: ܕܬܹܐܬܹܐ ܫܸܐ̱ܠܲܬ̣ܝ. ܘܣܲܒ̣ܪܝ ܢܸܬܸ̇ܠ ܐܲܠܵܗܵܐ.

⁹ܘܢܸܬ̇ܛܦܝܼܣ ܐܲܠܵܗܵܐ ܘܲܢܕܲܟܹ̇ܝܢܝ. ܘܢܸܦܪܘܿܣ ܐܝܼܕܹܗ ܘܲܢܫܲܡܠܹܢܝ.

¹⁰ܘܢܸܗܘܹܐ ܬܘܼܒ̣ ܒܘܼܝܵܐܝ: ܘܐܸܫܬܲܡܠܹܐ ܬܘܼܒ̣ ܒܚܲܝܠܵܐ ܕܠܵܐ ܚܵܘܣܵܢ: ܡܸܛܠ ܕܠܵܐ ܕܲܓ̇ܠܹܿܬ̣ ܒܡܹܐܡܪܹܗ ܕܩܲܕ̇ܝܼܫܵܐ.

¹¹ܘܲܟ݂ܡܵܐ ܗ̄ܘܼ ܚܲܝܠ̄ܝ ܕܐܹܣܲܝܒܲܪ. ܘܡܵܢܲܐ ܗ̄ܝܼ ܚܲܪܬ̣ܝ ܕܐܲܓܲܪ ܪܘ̣ܚܝ.

¹²ܐܸܠܘ̣ ܐܲܝܟ݂ ܚܲܝܠܵܐ ܗ̄ܘܼ ܕܟܹܐܦܹ̈ܐ ܚܲܝܠܝ: ܐܵܘ ܒܲܣܪܝ ܕܲܢܚܵܫܵܐ ܗ̄ܘ̣.

¹³ܗܵܐ ܠܲܝܬ̇ ܥܘܼܕ݂ܪܵܢܹܗ ܒܝܼ ܘܦܘܼܪܩܵܢܹܗ ܐܸܬ̣ܪܲܚܲܩ ܡܹܢܝ.

¹⁴ܕܟ݂ܵܠܹ̇ܐ ܫܠܵܡܵܐ ܚܲܒ̣ܪܹܗ: ܕܸܚ̱ܠܬܹܗ ܕܥܸܠܵܝܵܐ ܫܵܒܹܿܩ.

¹⁵ܐܲܚܲܝ̈ ܕܲܓ̣ܲܠܘ ܐܲܝܟ݂ ܦܨܝܼ̈ܕܹܐ: ܘܐܲܝܟ݂ ܪܸ̈ܓ̣ܠܵܬ̣ܵܐ ܕܥܵܝ̇ܒ̣ܪ̈ܵܢ.

¹⁶ܕܕ݂ܵܚ̇ܠܝܼܢ ܗ̄ܘܼܵܘ ܡ̣ܢ ܓܠܝܼܕ݂ܵܐ: ܥܠܲܝܗܘܿܢ ܣܓ̣ܝܼ ܬܲܠܓܵܐ.

¹⁷ܘܲܒ̣ܫܵܥܬ̣ܵܐ ܕܕ݂ܵܢܲܚ ܒܗܘܿܢ: ܦܵܫ̇ܪܝܼܢ. ܘܲܒ̣ܚܘܼܡܗܘܿܢ ܦܵܫ̇ܪܝܼܢ ܡ̣ܢ ܐܲܬ̣ܪ̱ܗܘܿܢ.

¹⁸ܢܸܬ̣ܥܲܪܩܠܘܼܢ ܫܒ̣ܝܼ̈ܠܹܐ ܕܐܘܼܪ̈ܚܵܬ̣ܗܘܿܢ: ܘܢܸܣܩܘܼܢ ܒܬ̣ܵܘܫܵܐ ܘܢܹܐܒ̣ܕ̇ܘܼܢ.

¹⁹ܕܚܵܪ̣ܘ ܠܐܘܼܪ̈ܚܵܬ̣ܵܐ ܕܬܲܝܡ̄ܢܵܐ: ܘܠܲܫܒ̣ܝܼ̈ܠܹܐ ܕܲܫܒ̣ܵܐ ܣܲܟ̇ܝܼܘ ܠܗܘܿܢ.

²⁰ܒ̣ܗܸܬ̣ܘ ܒܡܸܕܹܿܡ ܕܐܲܬ̇ܬ̇ܟ݂ܠܘ ܡܛ̣ܵܘ ܠܘܵܬܹܗ ܘܐܲܚܦܲܪܘ.

²¹ܘܐܵܦ ܐܲܢ̄ܬܘܿܢ ܗ̤ܘܲܝܬ̇ܘܿܢ ܥܠܲܝ ܡܸܛܠ ܕܥܲܕ݂ܠܵܐ ܚ̣ܙܲܝܬ̇ܘܿܢ ܙܵܘܥܵܐ: ܕܚܸܠܬ̇ܘܿܢ.

²²ܐܸܠܘܼ ܓܹܝܪ ܐܸܡ̇ܪܹܬ̣ ܠܟ݂ܘܿܢ ܗܲܒ̣ܘ ܠܝܼ: ܐܵܘ ܡ̣ܢ ܢܸܟ݂ܣܲܝ̈ܟ̇ܘܿܢ ܫܚܘܿܕ݂ܘ ܚܠܵܦܲܝ.

²³ܘܦܲܠܛܘܼܢܝ ܡ̣ܢ ܐܝܼ̈ܕܲܝ ܡܥܝܼܩܵܢܝ ܐܵܘ ܡ̣ܢ ܐܝܼܕ݂ܵܐ ܕܚܲܣܝܼܢܵܐ ܦܲܨܐܵܘܼܢܝ.

²⁴ܐܲܠܦܘܼܢܝ ܘܐܸܢܵܐ ܐܸܫܬ̇ܘܿܩ. ܘܡܵܢܵܐ ܛܥܹ̇ܝܬ̣: ܒܲܝܢܘܼܢܝ.

²⁵ܠܡܵܢܵܐ ܕܵܚ̇ܩܝܼܢ ܐܲܢ̄ܬ̇ܘܿܢ ܡܹܐܡܲܪ ܩܘܼܫܬܵܐ. ܘܡ̇ܢ ܕܲܡܟ݂ܵܘܸܢ ܘܡܲܟܸ̇ܣ ܡܸܢܟ݂ܘܿܢ.

²⁶ܗܵܐ ܠܲܡܟ݂ܵܘܵܢܘܼ ܡܸܠ̈ܝܼܢ ܬܸܬ̣ܚܲܫܒ̣ܘܼܢ ܘܥܲܠ ܪܘܼܚ ܡܸܠܲܬ̣ܝ ܬܸܬ̣ܒܲܝܢܘܼܢ.

²⁷ܗܵܐ ܥܲܠ ܝܲܬ̣ܡܵܐ ܡܸܬ̣ܪܵܘ̱ܪܒ̣ܝܼܢ ܐܲܢ̄ܬ̇ܘܿܢ. ܘܡܲܟ݂ܪܹܝܢ ܐܲܢ̄ܬ̇ܘܿܢ ܠܪܵܚܡܟ݂ܘܿܢ.

²⁸ܘܗܵܫܵܐ ܐܸܬ̇ܛܦܝܼܣܘ ܘܚܘܼܪܘ ܘܲܩܕ݂ܵܡܲܝܟ̇ܘܿܢ ܐܹܡܲܠܸܠ ܘܠܵܐ ܐܹܟܲܕܸ̇ܒ̣.

²⁹ܬܘܼܒ̣ܘ ܢܹܐ ܗܵܫܵܐ. ܘܠܵܐ ܬܸܗܘܘܿܢ ܐܲܝܟ݂ ܥܵܘܠܹ̈ܐ ܬܘܼܒ̣ܘ ܗܵܟܹܝܠ: ܘܙܲܟܵܘ.

³⁰ܕܲܠܡܵܐ ܐܝܼܬ̣ ܒܠܸܫܵܢܝ ܥܵܘܼܠܵܐ ܐܵܘ ܦܘܼܡܝ ܠܵܐ ܡܡܲܠܸܠ ܩܘܼܫܬܵܐ.