Read Aramaic Peshita Job 8 Bible Online

Job 8 - Aramaic Peshita bible

Job 8

¹ܘܲܥܢ̣ܵܐ ܒܸܠܕܵܕ݂ ܫܘܿܚܵܝܵܐ: ܘܐܸܡܲܪ.

²ܥܕܲܡܵܐ ܠܐܸܡܲܬ̣ܝ ܬܡܲܠܸܠ ܗܵܠܹܝܢ. ܘܪܘܼܚܵܐ ܪܵܡܬ̣ܵܐ ܡܠܹܐ ܦܘܼܡܵܟ݂.

³ܕܲܠܡܵܐ ܐܲܠܵܗܵܐ ܡܲܥܘܸܠ ܕܝܼܢܵܐ. ܐܵܘ ܚܲܣܝܼܢܵܐ ܡܲܥܘܸܠ ܙܸܕ݂ܩܵܐ.

⁴ܐܸܢ ܒܢܲܝ̈ܟ ܚܛ̣ܵܘ ܠܹܗ: ܫܲܕܲܪ ܐܸܢܘܿܢ ܒܲܚܛܵܗܲܝ̈ܗܘܿܢ.

⁵ܘܐܸܢ ܐܲܢ̄ܬ̇: ܒܥܝܼ ܡ̣ܢ ܐܲܠܵܗܵܐ. ܘܲܠܚܲܣܝܼܢܵܐ ܐܸܬ̣ܟܲܫܲܦ.

⁶ܐܸܢ ܙܲܟܵܝ ܐܲܢ̄ܬ̇ ܘܼܬ̣ܪܝܼܨ: ܗܵܫܵܐ ܢܬ̇ܬ̇ܥܝܼܪ ܥܠܲܝܟ. ܘܲܢܫܲܠܸܡ ܕܲܝܪܵܐ ܕܙܸܕ݂ܩܵܟ݂.

⁷ܘܬܸܗܘܹܐ ܩܲܕ݂ܡܵܝܬܵܟ݂ ܙܥܘܿܪܝܵܐ. ܘܐ̄ܚܪܵܝܬܵܟ݂ ܢܲܣܓܹܿܐ ܛܵܒ̣.

⁸ܫܲܐܸܠ ܢܹܐ ܥܲܠ ܕܲܪܹ̈ܐ ܩܲܕ݂ܡܵܝܹ̈ܐ. ܘܐܸܬ̣ܒܲܝܲܢ ܒܒ̣ܘܼܕܵܩܵܐ ܕܐܲܒ̣ܵܗܲܝ̈ܗܘܿܢ.

⁹ܕܐܸܬ݂ܡܵܠܝ ܓܹܝܪ ܚܢܲܢ ܠܵܐ ܝܵܕ݂ܥܝܼܢ ܚ̄ܢܲܢ. ܘܐܲܝܟ݂ ܛܸܠܵܠܵܐ ܐܸܢܘܿܢ ܝܵܘ̈ܡܲܝܢ ܥܲܠ ܐܲܪܥܵܐ.

¹⁰ܘܗܵܐ ܗܸܢܘܿܢ ܢܲܠܦܘܼܢܵܟ݂: ܘܢܹܐܡܪܘܼܢ ܠܵܟ݂. ܘܡ̣ܢ ܠܸܒ̇ܗܘܿܢ ܢܲܦܩܘܼܢ ܡܸܠܹ̈ܐ.

¹¹ܕܲܠܡܵܐ ܣܵܓܹܿܐ ܐܵܓ̣ܡܵܐ ܒܐܵܬ̣ܪܵܐ ܨܲܗܝܵܐ: ܐܵܘ ܝܵܥܹ̇ܐ ܐܲܪܒ̇ܢܵܐ ܐܲܝܟܵܐ ܕܠܲܝܬ̇ ܡܲـ̈ـܝܵܐ.

¹²ܕܥܲܕ݂ ܗ̤ܘ ܒܐܸܒܹ̇ܗ: ܠܵܐ ܡܸܬ̣ܩܛܸܦ. ܘܲܩܕ݂ܵܡ ܟܠ ܥܡܝܼܪ ܝܵܒܹ̇ܫ.

¹³ܗܵܟܲܢܵܐ ܐܸܢܹܝܢ ܐܘܼܪ̈ܚܵܬ̣ܵܐ ܕܟ݂ܠ ܡ̇ܢ ܕܛܵܥܹ̇ܐ ܠܐܲܠܵܗܵܐ. ܘܣܲܒ̣ܪܹܗ ܕܚܲܢܦܵܐ ܢܹܐܒܲܕ݂.

¹⁴ܘܢܸܬ̣ܦܣܸܩ ܬܘ̣ܟ݂ܠܵܢܹܗ. ܘܒܲܝܬܵܐ ܕܲܓ̣ܘܵܓܲܝ ܒܲܝܬܹ̇ܗ.

¹⁵ܢܸܬ̇ܬ̇ܟܸܠ ܥܲܠ ܒܲܝܬܹ̇ܗ: ܘܠܵܐ ܢܩܘܼܡ. ܘܲܢܚܲܡܣܸܢ: ܘܠܵܐ ܢܸܬ̣ܩܲܝܲܡ.

¹⁶ܐܲܝܟ݂ ܪܸܛܒ̣ܵܐ ܗ̄ܘ̣ ܩܕ݂ܵܡ ܫܡܫܵܐ.

¹⁷ܘܥܲܠ ܓܲܠ̈ܠܝܼܢ ܫܹܪ̈ܫܵܘܗܝ ܢܸܣ̱ܡܟ݂ܘܼܢ. ܘܒܲܝܬܵܐ ܕܟܹܐܦܹ̈ܐ ܢܸܚܙܹܐ.

¹⁸ܐܸܢ ܢܸܥܩܪܝܼܘܗܝ ܡ̣ܢ ܐܲܬ̣ܪܹܗ. ܘܲܢܕܲܓܸܿܠ ܒܹܗ: ܘܢܹܐܡܲܪ ܠܹܗ ܕܠܵܐ ܚܙܹܝ̇ܬ̣ܵܟ݂.

¹⁹ܗܵܐ ܗܘ̤ܝܘܼ ܒܵܨܹܿܐ ܟܠܗܹܝܢ ܐܘܼܪ̈ܚܵܬܹ̇ܗ. ܘܡ̣ܢ ܥܲܦܪܵܐ ܐ̄ܚܪܹܢܵܐ ܢܸܨܡܲܚ.

²⁰ܠܵܐ ܡܲܣܠܹܐ ܐܲܠܵܗܵܐ ܠܬܲܡܝܼܡܹ̈ܐ. ܘܠܵܐ ܐܵܚܹܿܕ݂ ܒܐܝܼܕ݂ܵܐ ܕܡܲܒ̣ܐ̱ܫܵܢܹ̈ܐ.

²¹ܥܕܲܡܵܐ ܕܢܸܬ̣̱ܡܠܹܐ ܦܘܼܡܵܟ݂ ܓܘܼܚܟܵܐ: ܘܣܸܦ̈ܘܵܬ̣ܵܟ݂ ܬܸܫܒ̇ܘܿܚܬܵܐ. ܣܵܢܐܲܝ̈ܟ ܢܸܠܒ̇ܫܘܼܢ ܒܸܗܬ̇ܬ̣ܵܐ. ܘܡܲܫܟ̇ܢܵܐ ܕܪܲܫܝܼܥܹܐ ܠܲܝܬܵܘܗܝ.