Read Aramaic Peshita Job 9 Bible Online

Job 9 - Aramaic Peshita bible

Job 9

¹ܘܲܥ̣ܢܵܐ ܐܝܼܘܿܒ̣ ܘܐܸܡܲܪ.

²ܫܲܪܝܼܪܵܐܝܼܬ̣ ܝܵܕܲܥ ܐ̄ܢܵܐ ܕܗܵܟܲܢܵܐ ܗ̄ܘܼ. ܘܠܵܐ ܙܵܟܹ̇ܐ ܠܐܲܠܵܗܵܐ ܐ̄ܢܵܫܵܐ.

³ܐܸܢ ܢܸܨܒܹ̇ܐ ܓܹܝܪ ܠܲܡܕ݂ܵܢ ܥܲܡܹܗ: ܚܕ݂ܵܐ ܡ̣ܢ ܐܵܠܹܦ ܠܵܐ ܥܵܢܹ̈ܐ ܠܹܗ.

⁴ܚܲܟ̇ܝܼܡ ܠܸܒܵܐ ܗ̄ܘܼ: ܘܥܲܫܝܼܢ ܚܲܝܠܵܐ. ܡܲܢܘܼ ܐܸܬ̣ܩܲܫܝܼ ܠܘܵܬܹܗ: ܘܲܗܘ̤ܵܐ ܠܹܗ ܫܠܵܡ.

⁵ܗܵܘܿ ܕܲܡܫܲܢܹܐ ܛܘܼܪ̈ܝܼܢ: ܠܵܐ ܝܵܕܲܥ. ܘܗܵܦܹ̇ܟ݂ ܠܗܘܿܢ ܒܪܘܼܓ̣ܙܗ.

⁶ܗܵܘܿ ܕܐܲܙܝܼܥ ܐܲܪܥܵܐ ܡ̣ܢ ܫܹܪ̈ܫܹܝܗ̇: ܘܥܵܡ̇ܘܿܪܹ̈ܝܗ̇ ܪܵܥ̇ܠܝܼܢ.

⁷ܗܵܘܿ ܕܐܸܡܲܪ ܠܫܸܡܫܵܐ ܘܠܵܐ ܕܢܲܚ̣: ܘܒܲܐܦܲܝ̈ ܟܵܘܟ̇ܒܹ̈ܐ ܚ̣ܬܲܡ.

⁸ܗܵܘܿ ܕܲܡ̣ܬܲܚ ܫܡܲܝܵܐ ܒܲܠܚܘܿܕ݂ܵܘܗܝ: ܘܲܕ݂ܪܲܟ݂ ܥܲܠ ܬܘܼܩܦܹܗ ܕܝܲܡܵܐ.

⁹ܗܵܘܿ ܕܲܥ̣ܒܲܕ݂ ܟܝܼܡܵܐ: ܘܥܲܝܘܼܬ̣ܵܐ: ܘܓܲܢ̄ܒܵܪܵܐ: ܘܐܲܚܕܲܪ ܠܬܲܝܡ̄ܢܵܐ.

¹⁰ܗܘܿ ܕܲܥ̣ܒܲܕ݂ ܪܵܘ̱ܪ̈ܒ̣ܵܬ̣ܵܐ ܕܠܵܐ ܣܵܟ݂: ܘܬܲܩܝܼ̈ܦܵܬ̣ܵܐ ܕܠܵܐ ܡܸܢܝܵܢ.

¹¹ܗܵܐ ܐܸܢ ܥܵܒܲܪ ܥܠܲܝ: ܠܵܐ ܚܵܙܹܿܐ ܐ̄ܢܵܐ ܠܹܗ. ܘܐܸܢ ܡܸܬ̣ܟ̇ܪܸܟ݂ ܚܕ݂ܵܪ̈ܲܝ: ܠܵܐ ܡܸܬ̣ܒܲܝܲܢ ܐ̄ܢܵܐ ܠܹܗ.

¹²ܗܵܐ ܐܸܢ ܬܵܒ̇ܪ: ܡܲܢܘܼ ܢܸܦܩܘܿܕ݂ ܒܐܝܼܕܹܗ. ܘܡܲܢ̣ܘܼ ܢܹܐܡܲܪ ܠܹܗ ܡܵܢܵܐ ܥܵܒܹܿܕ ܐܲܢ̄ܬ̇.

¹³ܐܲܠܵܗܵܐ ܠܵܐ ܡܲܗܦܸܟ݂ ܪܘܼܓ̣ܙܹܗ. ܘܲܬ̣ܚܘܿܬ̣ܵܘܗܝ ܢܸܬ̣ܡܲܟ̇ܟ݂ܘܿܢ ܡܥܲܕ̇ܪ̈ܲܝ ܣܲܓ̇ܝܼ̈ܐܹܐ.

¹⁴ܐܵܦ ܐܸܢܵܐ ܕܹܝܢ ܐܸܥܢܹܝܘܗܝ ܘܐܸܣܕ̇ܘܿܪ ܡܸܠܲܝ ܩܕ݂ܵܡܵܘܗܝ.

¹⁵ܐܸܢ ܠܵܐ ܐܸܙܕܲܕ̇ܩܹ̇ܬ̣: ܠܵܐ ܐܸܬ̣ܥܢܹܐ. ܘܲܠܕܲܝܵܢܝ ܐܸܬ̣ܟܲܫܲܦ.

¹⁶ܐܸܢ ܩܵܪܹܐ ܐ̄ܢܵܐ: ܥܵܢܹ̇ܐ ܠܝܼ. ܠܵܐ ܡܗܲܝܡܸܢ ܐ̄ܢܵܐ ܥܕܲܡܵܐ ܕܫܵܡܲܥ ܩܵܠܝ.

¹⁷ܕܲܒ̣ܟ݂ܠ ܡܸܢܬ̣ܵܐ ܕܪܹܫܝ ܒܬ̣ܘ̣ܩܦܵܐ ܡܚ̣ܵܢܝ ܘܐܲܣܓ̇ܝܼ ܨܘܼ̈ܠܦܵܬ̣ܝ ܡܲܓܵܢ.

¹⁸ܘܠܵܐ ܫܲܒ̣ܩܲܢܝ ܕܬܸܬ̇ܢܝܼܚ ܪܘܼܚܝ ܡܸܛܠ ܕܐܲܣ̣ܒ̇ܥܲܢܝ ܡܪܵܪܹ̈ܐ.

¹⁹ܐܸܢ ܒܚܲܝܠܵܐ: ܬܲܩܝܼܦ ܗ̄ܘܼ. ܘܐܸܢ ܠܕ݂ܝܼܢܵܐ: ܡܲܢ̣ܘܼ ܢܹܐܪܥܝܼܘܗܝ.

²⁰ܐܸܢ ܐܸܙܟܹ̇ܐ: ܦܘܼܡܝ ܢܚܲܝܒܲܢܝ. ܬܲܡܝܼܡ ܐ̄ܢܵܐ: ܘܲܡܥܲܩܸܡ ܠܝܼ.

²¹ܬܲܡܝܼܡ ܐ̄ܢܵܐ: ܘܠܵܐ ܝܵܕܲܥ ܐ̄ܢܵܐ. ܢܲܦ̮ܫܝ ܐܲܣ̱ܠܝܲܬ̤ ܚܲܝܲܝ̈.

²²ܚܕ݂ܵܐ ܗ̄ܝܼ: ܡܸܛܠ ܗܵܢܵܐ ܐܸܡ̇ܪܹܬ̣: ܕܲܠܙܲܕ̇ܝܼܩܹ̈ܐ ܘܲܠܪ̈ܲܫܝܼܥܹܐ ܗܘ̤ܝܘܼ ܡܣܝܼܦ.

²³ܐܸܢ ܫܵܒ̣ܛܹܗ ܡ̣ܢ ܫܹܠܝ ܩܵܛܹ̇ܠ. ܘܥܲܠ ܫܵܛ̇ܝܘܼܬ̣ ܙܲܟܵܝܑܝܼ̈ܢ ܡܡܲܝܸܩ.

²⁴ܐܲܪܥܵܐ ܝܲܗ̄ܒܵܗ̇ ܒܐܝܼܕ݂ܵܐ ܕܪܲܫܝܼܥܵܐ. ܘܐܲܦܲܝ̈ܗܘܿܢ ܕܕܲܝܵܢܹ̈ܐ ܡܚܲܦ̈ܝܵܢ. ܐܸܠܵܐ ܪܘܼܓ̣ܙܹܗ ܡܲܢ̣ܘܼ ܡܣܲܝܒܲܪ.

²⁵ܝܵܘ̈ܡܲܝ ܩܲܠܸܘ ܡ̣ܢ ܪܲܗܵܛܵܐ. ܥܪܲܩ̣ܘ: ܘܠܵܐ ܚܙ̣ܵܘ ܛܵܒ̣ܬ̣ܵܐ.

²⁶ܥܒܲܪܘ ܥܲܡ ܐܸܠܦܹ̈ܐ ܣܲܓܝܼܵܐ̈ܬ̣ܵܐ ܕܲܒ̣ܥܸܠܕ̇ܒ̣ܵܒܹ̈ܐ: ܐܲܝܟ݂ ܢܸܫܪܵܐ ܕܛܵܐܹ̇ܣ ܥܲܠ ܡܹܐܟ݂ܘܼܠܬܹ̇ܗ.

²⁷ܥܲܡ ܡܪܵܪ̈ܲܝ ܛܥܹ̇ܝܬ̣ ܫܘܿܥ̈ܝܵܬ̣ܝ. ܘܐܸܢ ܐܸܫܒ̇ܘ̇ܩ ܪܹܢܚ̄: ܐܵܘ ܡܸܠܲܝ̈: ܡܸܬ̇ܬ̇ܥܝܼܩ ܐ̄ܢܵܐ.

²⁸ܘܐܸܢ ܐܸܬ̇ܬ̇ܢܝܼܚ: ܕܵܚܹ̇ܠ ܐ̄ܢܵܐ ܡ̣ܢ ܟܠ ܬܲܫܢܝܼܩ. ܡܸܛܠ ܕܝܵܕܲܥ ܐ̄ܢܵܐ ܕܠܵܐ ܡܙܲܟܹ̇ܐ ܐܲܢ̄ܬ̇ ܠܝܼ.

²⁹ܗܵܐ ܐܸܢ ܐܸܬ̣ܚܲܝܲܒ̣: ܠܡܵܢܵܐ ܐܲܝܟ݂ ܗܸܒ̣ܠܵܐ ܡܣܝܼܦ ܐܲܢ̄ܬ̇ ܠܝܼ.

³⁰ܘܐܸܢ ܐܸܬ̇ܬ̇ܫܝܼܓ̣ ܒܡܲـ̈ـܝܵܐ ܕܬܲܠܓܵܐ: ܘܡܸܬ̇ܕܲܟܹܿܐ ܐ̄ܢܵܐ ܒܕܲܟ݂ܝܘܼܬ̣ܵܐ ܕܐܝܼܕܲܝ̈.

³¹ܗܵܝܕܹ̇ܝܢ ܒܓ̣ܘܼܡܵܨܵܐ ܬܛܲܒ̇ܥܲܝܢܝ. ܘܢܸܬ̣ܪܲܚܲܩ ܡܹܢܝ ܠܒ̣ܘܼܫܝ.

³²ܡܸܛܠ ܕܠܵܐ ܗܘ̤ܵܐ ܓܲܒ̣ܪܵܐ ܕܐܲܟ݂ܘܿܬ̣ܝ: ܕܐܸܬܸ̇ܠ ܠܹܗ ܦܸܬ̣ܓ̣ܵܡܵܐ: ܘܢܸܥܘܿܠ ܐܲܟ݂ܚ̄ܕ݂ܵܐ ܠܕ݂ܝܼܢܵܐ.

³³ܐܸܫܬ̇ܘܿܦ ܕܹܝܢ ܐܝܼܬ̣ ܡܲܟ̇ܣܵܢܵܐ ܒܲܝܢܵܬܲܢ: ܕܲܢܣܝܼܡ ܐܝܼܕܹܗ ܥܲܠ ܦܘܼܡܵܐ ܕܲܬ̣ܪܲܝܢ.

³⁴ܘܢܲܥܒܲܪ ܡܹܢܝ ܫܲܒ̣ܛܹܗ: ܘܕ݂ܚ̱ܠܬܹܗ ܠܵܐ ܬܙܝܼܥܲܢܝ.

³⁵ܐܹܡܲܠܸܠ ܘܠܵܐ ܐܸܕ݂ܚܲܠ ܡܸܢܹܗ: ܡܸܛܠ ܕܠܵܐ ܗܘܹ̇ܝܬ̣ ܠܩܘܼܒ̣ܠܹܗ.