Read Aramaic Peshita Psalms 10 Bible Online

Psalms 10 - Aramaic Peshita bible

Psalms 10

¹ܠܡܵܢܵܐ ܡܵܪܝܵܐ ܩܵܡ̣ܬ̇ ܒܪܘܼܚܩܵܐ.

²ܘܐܲܗܡܝܼܬ̇ ܚܝܵܪܵܟ݂ ܒܙܲܒ̣ܢܹ̈ܐ ܕܐܘܼܠܨܵܢܵܐ.

³ܒܫܘܼܒ̣ܗܵܪܹܗ ܕܪܲܫܝܼܥܵܐ ܝܵܩܸܕ݂ ܡܸܣܟܟܹ̇ܢܵܐ.

⁴ܢܸܬ̇ܬܲܚܕ̇ܘܼܢ ܒܬܲܪܥܝܼܬ̣ܵܐ ܗ̇ܝ ܕܐܸܬ̣ܚܲܫܲܒ̣ܘ.

⁵ܡܸܛܠ ܕܡܸܫܬܲܒ̣ܗܲܪ ܪܲܫܝܼܥܵܐ ܒܲܪ̈ܓ̣ܝܼܓ̣ܵܬ̣ܵܐ ܕܢܲܦ̮ܫܹܗ.

⁶ܥܲܘܵܠܵܐ ܡܸܬ̣ܒܲܪܲܟ݂ ܘܪܵܓܹܙ݁ ܡܵܪܝܵܐ.

⁷ܘܪܲܫܝܼܥܵܐ ܒܪܵܡܘܼܬܹܗ ܠܵܐ ܡܥܲܩܸܒ̣.

⁸ܘܠܲܝܬ̇ ܐܲܠܵܗܵܐ ܒܟ̣ܠܗܹܝܢ ܬܲܖ̈ܥ̱ܝܵܬܹܗ.

⁹ܫܲܖ̈ܝܵܢ ܐܘܼܪܚܵܬܹܗ ܒܟ̣ܠܙܒܲܢ.

¹⁰ܘܲܡܥܲܠܲܝ ܕܝܼܢܵܟ݂ ܡ̣ܢ ܠܩܘܼܒ̣ܠܹܗ.

¹¹ܘܲܠܟ̣ܠܗܘܿܢ ܒܥܸܠܕ̇ܒ̣ܵܒ̣ܵܘ̈ܗܝ ܫܵܐܹ̇ܛ.

¹²ܐܵܡܲܪ ܒܠܸܒܹ̇ܗ ܕܠܵܐ ܐܹܙܘܼܥ ܠܕ݂ܵܪܕܵܖ̈ܝܼܢ.

¹³ܪܵܢܹ݁ܐ ܒܒ̣ܝܼܫܬܵܐ ܘܠܲܘܛܬ̣ܵܐ ܡܠܸܐ ܦܘܼܡܹܗ.

¹⁴ܬܘܼܟܵܐ ܘܢܸܟ̣ܠܵܐ ܬܚܘܿܬ̣ ܠܸܫܵܢܹܗ ܥܲܘܠܵܐ ܘܥܸܬܵܐ.

¹⁵ܝܵܬܹ݁ܒ̣ ܒܲܟ̣ܡܹܐܢܵܐ ܒܕܲܝܪܵܐ.

¹⁶ܘܲܒ̣ܛܘܼܫܝܵܐ ܩܵܛܸ݁ܠ ܠܙܲܕܝܼܩܵܐ.

¹⁷ܥܲܝܢܵܘ̈ܗܝ ܠܒ̣ܵܝܫܹ̈ܐ ܕܵܝ̈ܩܵܢ.

¹⁸ܘܟ̣ܵܡܹ̇ܢ ܠܡܸܚܛܲܦ ܠܡܸܣܟܟܹ̇ܢܵܐ ܒܢܸܓ̣ܕܵܐ ܕܲܡܨܝܼܕ̇ܬܹ̇ܗ.

¹⁹ܗܘ̤ ܢܸܬ̣ܡܲܟܲܟ݂ ܘܢܸܦܸܠ.

²⁰ܘܲܒ̣ܓܲܖ̈ܡܵܘܗܝ ܟܘܼܪܗܵܢܵܐ ܘܟܹܐܒܹ̈ܐ.

²¹ܐܵܡܲܪ ܒܠܸܒܹܗ ܕܲܛܥ݂ܵܐ ܐܲܠܵܗܵܐ.

²²ܘܐܲܦܢܝܼ ܐܲܦܵܘ̈ܗܝ ܘܠܵܐ ܚܵܙܹ݁ܐ ܠܥܵܠܲܡ.

²³ܩܘܼܡ ܡܵܪܝܵܐ ܐܲܠܵܗܝ ܘܐܲܪܝܼܡ ܐܝܼܕ݂ܵܟ݂.

²⁴ܘܠܵܐ ܬܸܛܥܹܝܘܗܝ ܠܒ̣ܵܝܫܵܐ.

²⁵ܠܡܵܢܵܐ ܐܲܪܓܸ̇ܙ ܚܲܛܵܝܵܐ ܠܐܲܠܵܗܵܐ.

²⁶ܘܐܵܡܲܪ ܒܠܸܒܹܗ ܕܠܵܐ ܬܵܒܲܥ.

²⁷ܚܵܙܹܐ ܐܲܢ̄ܬ̇ ܕܐܝܼܬ̣ ܥܲܘܠܵܐ ܘܪܘܼܓ̣ܙܵܐ.

²⁸ܘܚܵܐܲܪ ܐܲܢ̄ܬ̇ ܕܢܸܫܬ̇ܠܸܡ ܒܐܝܼܕܲܝ̈ܟ.

²⁹ܥܠܲܝܟ ܢܸܫܬ̇ܒܸܩ ܒܵܝܫܵܐ.

³⁰ܘܲܕ݂ܝܲܬ̣ܡܵܐ ܐܲܢ̄ܬ̇ ܗ̄ܘ̣ ܥܵܕ݂ܘܿܪܹܗ.

³¹ܬܒܲܪ ܕܪܵܥܹܐ ܕܚܲܛܵܝܵܐ ܘܲܕ݂ܒ̣ܝܼܫܵܐ.

³²ܬܸܬ̣ܒ̇ܥܹܗ ܚܛܝܼܬܹܗ ܘܠܵܐ ܢܸܫܬ̇ܟܲܚ.

³³ܡܵܪܝܵܐ ܡܲܠܟܵܐ ܗ̄ܘ̣ ܠܥܵܠܲܡ ܥܵܠܡܝܼܢ.

³⁴ܐܸܒܲܕ݂ܘ ܥܲܡܡܹ̈ܐ ܡ̣ܢ ܐܲܪܥܹܗ.

³⁵ܣܲܒ̣ܪܵܐ ܕܡܸܣܟܹ̇ܢܹ̈ܐ ܫܵܡܲܥ ܐܲܢ̄ܬ̇ ܡܵܪܝܵܐ.

³⁶ܘܛܘܼܝܼܵܒ̣ܵܐ ܕܠܸܒ̇ܗܘܿܢ ܬܨܘܼܬ̣ ܐܸܕ݂ܢܵܟ.

³⁷ܠܲܡܕ݂ܵܢ ܠܝܲܬ̣ܡܹ̈ܐ ܘܲܠܒ̣ܵܝܫܹ̈ܐ.

³⁸ܕܠܵܐ ܢܲܘܣܸܦ ܬܘܼܒ̣ ܠܡܲܘܒܵܕ݂ܘܼ ܒܢܲܝ̈ܢܵܫܵܐ ܡ̣ܢ ܐܲܪܥܵܐ܀