Read Aramaic Peshita Psalms 102 Bible Online

Psalms 102 - Aramaic Peshita bible

Psalms 102

¹ܡܵܪܝܵܐ ܫܡܲܥ ܨܠܘܿܬ̣ܝ.

²ܘܲܓ̣ܥܵܬ̣ܝ ܠܘܵܬ̣ܵܟ݂ ܬܹܥܘܿܠ.

³ܠܵܐ ܬܲܗܦܸܟ݂ ܐܲܦܲܝ̈ܟ ܡܹܢܝ ܒܝܲܘܡܵܐ ܕܐܘܼܠܨܵܢܝ.

⁴ܐܸܠܵܐ ܐܲܪܟܸ̇ܢ ܠܝܼ ܐܸܕ݂ܢܵܟ݂ ܒܝܲܘܡܵܐ ܕܐܸܩܪܹܝܟ݂ ܘܒܲܥܓܲܠ ܥܢܝܼܢܝ.

⁵ܡܸܛܠ ܕܲܓ̣ܡܲܪܘ ܒܬܸܢܵܢܵܐ ܝܲܘ̈ܡܲܝ.

⁶ܘܓܲܪ̈ܡܲܝ ܚܘ݂ܲܪܘ ܐܲܝܟ݂ ܡܲܘ̈ܩܕܹܐ.

⁷ܚܡ݂ܵܐ ܠܹܒ̇ܝ ܐܲܝܟ݂ ܥܸܣܒܵܐ ܘܝܼܒܸܫ̣.

⁸ܡܸܛܠ ܕܲܛܥܹܝ݁ܬ̣ ܡܹܐܟ̣ܘܼܠܬܹ̇ܗ ܕܠܲܚܡܝ.

⁹ܡ̣ܢ ܩܵܠܵܐ ܕܬܸܢ̈ܚܵܬ̣ܝ ܕܒܸܩ̣ ܒܸܣܪ̱ܝ ܠܓܲܪ̈ܡܲܝ.

¹⁰ܘܐܸܬ̇ܕܲܡܝܼܬ̣ ܠܩܵܩܵܐ ܕܲܒ̣ܡܲܕ݂ܒ̇ܪܵܐ.

¹¹ܘܲܗ̤ܘܹܝܬ̣ ܐܲܝܟ݂ ܥܘܿܕ݂ܵܐ ܒܚܲܪܒ̇ܬ̣ܵܐ.

¹²ܣܸܪܕܹ̇ܬ̣ ܘܲܗ݀ܘܹܝܬ̣ ܒܲܠܚܘܿܕܲܝ.

¹³ܐܲܝܟ݂ ܨܸܦܪܵܐ ܕܲܡܦܲܪܚܵܐ ܥܲܠ ܐܸܓܵܪܹ̈ܐ.

¹⁴ܟܠܹܗ ܝܲܘܡܵܐ ܚܲܣܕ݂ܘܼܢܝ ܒܥܸܠܕ̇ܒ̣ܵܒܲܝ̈.

¹⁵ܘܲܡܫܲܒܚܵܢܲܝ̈ ܒܝܼ ܝܑܼܡܵܘ.

¹⁶ܡܸܛܠ ܕܩܸܛܡܵܐ ܐܲܝܟ݂ ܠܲܚܡܵܐ ܠܸܥܣܹ̇ܬ̣.

¹⁷ܘܡܲܫܬܲܝ ܒܲܒ̣ܟ̣ܵܬ̣ܵܐ ܡܸܙ̇ܓܹ̇ܬ̣.

¹⁸ܡ̣ܢ ܩܕ݂ܵܡ ܚܸܡܬ̣ܵܟ݂ ܘܪܘܼܓ̣ܙܵܟ݂.

¹⁹ܕܐܲܪܝܼܡܬܵܢܝ ܘܲܫܕܲܝܬܵܢܝ.

²⁰ܝܲܘ̈ܡܲܝ ܐܲܝܟ݂ ܛܸܠܵܠܵܐ ܐܸܬ̣ܪ̱ܟܸܢܘ.

²¹ܘܐܸܢܵܐ ܝܸܒ̣ܫܹ̇ܬ̣ ܐܲܝܟ݂ ܥܸܣܒܵܐ.

²²ܘܐܲܢ̄ܬ̇ ܡܵܪܝܵܐ ܠܥܵܠܲܡ ܩܲܝܵܡ ܐܲܢ̄ܬ̇.

²³ܘܕ݂ܘܼܟ̣ܪܵܢܵܟ݂ ܠܕ݂ܵܪܕܵܪ̈ܝܼܢ.

²⁴ܐܲܢ̄ܬ̇ ܩܘܼܡ ܘܪܲܚܸܡ ܥܲܠ ܨܸܗܝܘܿܢ.

²⁵ܡܸܛܠ ܕܲܡܛ݂ܵܐ ܙܲܒ̣ܢܵܐ ܠܲܡܪܲܚܵܡܘܼ ܥܠܹܝܗ̇.

²⁶ܡܸܛܠ ܕܲܨܒ̣ܵܘ ܥܲܒ̣ܕܲܝ̈ܟ ܒܟܹܐܦܹ̈ܝܗ̇ ܘܲܠܥܲܦܪܵܗ̇ ܪܚܸܡ݂ܘ.

²⁷ܢܸܕ݂ܚܠܘܼܢ ܥܲܡܡܹ̈ܐ ܠܲܫܡܵܟ݂ ܡܵܪܝܵܐ.

²⁸ܘܟ̣ܠܗܘܿܢ ܡܲܠ̈ܟܹ̇ܐ ܕܐܲܪܥܵܐ ܠܐܝܼܩܵܪܵܟ݂.

²⁹ܡܸܛܠ ܕܒ̣ܵܢܹ̇ܐ ܡܵܪܝܵܐ ܠܨܸܗܝܘܿܢ.

³⁰ܘܡܸܬ̣ܚܙܸܐ ܒܫܘܼܒ̣ܚܹܗ. ܘܡܸܬ̣ܦܢܸܐ ܥܲܠ ܨܠܘܿܬ̣ܵܐ ܕܡܸܣܟܹ̇ܢܹ̈ܐ.

³¹

³²ܘܠܵܐ ܫܵܐܹ̇ܛ ܨܠܘܿܬ̣ܗܘܿܢ.

³³ܬܸܬ̣ܟ̇ܬܸܒ̣ ܗܵܕܹܐ ܠܕ݂ܵܪܵܐ ܐ̄ܚܪܹܢܵܐ.

³⁴ܘܥܲܡܵܐ ܕܡܸܬ̣ܒ̇ܪܸܐ ܢܫܲܒܲܚ ܠܡܵܪܝܵܐ.

³⁵ܡܸܛܠ ܕܐܲܕ݂ܝܼܩ ܡ̣ܢ ܡܪܲܘܡܵܐ ܕܩܘܼܕ݂ܫܹܗ.

³⁶ܡܵܪܝܵܐ ܡ̣ܢ ܫܡܲܝܵܐ ܥܲܠ ܐܲܪܥܵܐ ܐܲܕ݂ܝܼܩ.

³⁷ܠܡܸܫܡܲܥ ܐܸܢܲܩܬܹܗ ܕܐܲܣܝܼܪܵܐ.

³⁸ܘܲܠܡܸܫܪܵܐ ܒܢܲܝ̈ܵܐ ܡ̣ܢ ܡܲܘܬܵܐ.

³⁹ܕܢܸܫܬܲܥܘܿܢ ܒܨܸܗܝܘܿܢ ܫܡܹܗ ܕܡܵܪܝܵܐ.

⁴⁰ܘܬܸܫܒ̇ܚܵܬܹܗ ܒܐܘܿܪܸܫܠܸܡ.

⁴¹ܡܵܐ ܕܐܸܬ̣ܟܲܢܲܫܘ ܥܲܡܡܹ̈ܐ ܐܲܟ̣ܚ̄ܕ݂ܵܐ.

⁴²ܘܡܲܠ̈ܟ̇ܘܵܬ̣ܵܐ ܠܡܸܦܠܲܚ ܠܡܵܪܝܵܐ.

⁴³ܡܲܟܸܟ̣ܘ ܚܲܝܠܝ ܒܐܲܪܥܵܐ.

⁴⁴ܘܲܒ̣ܨܝܼܪܘܼܬ̣ܵܐ ܕܝܲܘ̈ܡܲܝ̈ ܐܸܡܲܪ݂ ܠܝܼ.

⁴⁵ܠܵܐ ܬܲܣܩܲܢܝ ܒܦܸܠܓ̇ܘܼܬ̣ ܝܲܘ̈ܡܲܝ.

⁴⁶ܘܲܠܕ݂ܵܪܕܵܪ̈ܝܼܢ ܫܢܲܝ̈ܟ.

⁴⁷ܡ̣ܢ ܠܩܘܼܕ݂ܡܝܼܢ ܐܲܪܥܵܐ ܬܲܩܸܢܬ̇.

⁴⁸ܘܲܥܒ̣ܵܕ݂ ܐܝܼ̈ܕܲܝܟ ܫܡܲܝܵܐ.

⁴⁹ܗܸܢ̣ܘܿܢ ܥܵܒ̣ܪܝܼܢ ܘܐܲܢ̄ܬ̇ ܩܲܝܵܡ ܐܲܢ̄ܬ̇.

⁵⁰ܘܟ̣ܠܗܘܿܢ ܐܲܝܟ݂ ܠܒ̣ܘܼܫܵܐ ܒܵܠܹܝܢ.

⁵¹ܘܐܲܝܟ݂ ܡܲܪܛܘܼܛܵܐ ܡܸܬ̣ܚܲܠܦܝܼܢ.

⁵²ܘܐܲܢ̄ܬ̇ ܐܲܝܟ݂ ܕܐܝܼܬܲܝܟ ܐܲܢ̄ܬ̇ ܘܲܫܢܲܝ̈ܟ ܠܵܐ ܓܵܡܪ̈ܵܢ.

⁵³ܘܲܒ̣ܢܲܝ̈ ܥܲܒ̣ܕܲܝ̈ܟ ܢܸܫܪܘܼܢ ܒܐܲܪܥܵܐ.

⁵⁴ܘܙܲܪܥ̱ܗܘܿܢ ܩܕ݂ܵܡܲܝܟ ܢܸܬ̣ܩܲܢ.