Read Aramaic Peshita Psalms 103 Bible Online

Psalms 103 - Aramaic Peshita bible

Psalms 103

¹ܒܲܪܸܟ̣ܝ ܢܲܦ̮ܫܝ ܠܡܵܪܝܵܐ.

²ܘܟ̣ܠܗܘܿܢ ܓܲܪ̈ܡܲܝ ܠܲܫܡܹܗ ܩܲܕ̇ܝܼܫܵܐ.

³ܒܲܪܸܟ̣ܝ ܢܲܦ̮ܫܝ ܠܡܵܪܝܵܐ.

⁴ܘܠܵܐ ܬܸܛܥܹܝܢ ܟܠܗܘܿܢ ܦܘܼܪ̈ܥܵܢܵܘܗܝ.

⁵ܕܫܵܒܹ݁ܩ ܠܹܟ̣ܝ ܟܠܹܗ ܥܲܘܠܹܟ̣ܝ.

⁶ܘܡܲܐܣܸܐ ܟܠܗܘܿܢ ܟܹܐܒܲܝܟ̇ܝ.

⁷ܦܵܪܹ݁ܩ ܠܹܟ̣ܝ ܡ̣ܢ ܚܒ̣ܵܠܵܐ.

⁸ܡܣܲܡܸܟ݂ ܠܹܟ̣ܝ ܒܛܲܝܒ̇ܘܼܬ̣ܵܐ ܘܲܒ̣ܪ̈ܲܚܡܹܐ.

⁹ܡܣܲܒܲܥ ܒܛܵܒ̣ܵــ̈ــܬ̣ܵܐ ܓܘܼܫܡܹܟ̣ܝ.

¹⁰ܘܲܡܚܲܕܸ̇ܬ̣ ܐܲܝܟ݂ ܕܢܸܫܪܵܐ ܥܠܲܝܡܘܼܬܹܟ̣ܝ.

¹¹ܥܵܒܹ݁ܕ݂ ܙܲܕ̇ܝܼܩܘܼܬ̣ܵܐ ܡܵܪܝܵܐ.

¹²ܘܕ݂ܝܼܢܵܐ ܠܟ̣ܠܗܘܿܢ ܛܠܝܼܡܹ̈ܐ.

¹³ܡܚܲܘܸܐ ܐܘܼܪ̈ܚܵܬܹܗ ܠܡܘܼܫܹܐ.

¹⁴ܘܠܲܒ̣ܢܲܝ̈ ܝܑܼܣܪܵܝܹܠ ܥܒ̣ܵܕ݂ܵܘ̈ܗܝ.

¹⁵ܡܪܲܚܡܵܢ ܗ̄ܘ̣ ܘܲܡܪܲܚܦܵܢ ܡܵܪܝܵܐ.

¹⁶ܢܲܓ̇ܝܼܪܵܐ ܪܘܼܚܹܗ ܘܣܲܓ̇ܝܼܐܵܐ ܛܲܝܒ̇ܘܼܬܹܗ.

¹⁷ܡܸܛܠ ܕܠܵܐ ܐܵܠܹܡ ܠܥܵܠܲܡ.

¹⁸ܘܠܵܐ ܠܥܵܠܲܡ ܢܵܛܲܪ ܪܘܼܓ̣ܙܹܗ.

¹⁹ܡܸܛܠ ܕܠܵܐ ܗ̄ܘܵܐ ܐܲܝܟ݂ ܚܛܵܗܲܝ̈ܢ ܥܒ݂ܲܕ݂ ܠܲܢ.

²⁰ܐܵܦܠܵܐ ܐܲܝܟ݂ ܥܲܘܠܲܢ ܦܲܪܥܲܢ.

²¹ܡܸܛܠ ܕܐܲܝܟ݂ ܕܪܵܡܝܼܢ ܫܡܲܝܵܐ ܡ̣ܢ ܐܲܪܥܵܐ.

²²ܗܵܟܲܢ ܥܸܫܢܲܬ̤ ܛܲܝܒ̇ܘܼܬܹܗ ܕܡܵܪܝܵܐ ܥܲܠ ܕܵܚܠܵܘ̈ܗܝ.

²³ܘܐܲܝܟ݂ ܕܪܲܚܝܼܩܵܐ ܡܲܕ݂ܢ̱ܚܵܐ ܡ̣ܢ ܡܲܥܪ̱ܒ̣ܵܐ.

²⁴ܗܵܟܲܢ ܐܲܪܚܸܩ ܡܸܢܲܢ ܥܲܘܠܲܢ.

²⁵ܘܐܲܝܟ݂ ܕܲܡܪܲܚܸܡ ܐܲܒ̣ܵܐ ܥܲܠ ܒܢܲܝ̈ܵܐ.

²⁶ܡܪܲܚܸܡ ܡܵܪܝܵܐ ܥܲܠ ܕܵܚܠܵܘ̈ܗܝ.

²⁷ܡܸܛܠ ܕܗܘ݀ ܝܵܕܲܥ̇ ܓܒ̣ܝܼܠܬܲܢ.

²⁸ܘܐܸܬ̇ܕ̇ܟܲܪ ܕܥܲܦܪܵܐ ܚܢܲܢ.

²⁹ܒܲܪܢܵܫܵܐ ܐܲܝܟ݂ ܥܡܝܼܪܵܐ ܝܲܘ̈ܡܵܘܗܝ.

³⁰ܘܐܲܝܟ݂ ܥܘܼܦܝܵܐ ܕܚܲܩܠܵܐ ܗܵܟܲܢ ܝܵܥܹ̇ܐ.

³¹ܕܡܵܐ ܕܢܸܫܒܲܬ̤ ܒܹܗ ܪܘܼܚܵܐ ܠܲܝܬܵܘܗܝ.

³²ܘܐܵܦܠܵܐ ܡܸܬ̣ܝܲܕ݂ܥܵܐ ܕܘܼܟ̇ܬܹܗ.

³³ܛܲܝܒ̇ܘܼܬܹܗ ܕܡܵܪܝܵܐ ܡ̣ܢ ܥܵܠܲܡ ܗ̄ܝ̣.

³⁴ܘܲܥܕܲܡܵܐ ܠܥܵܠܲܡ ܥܲܠ ܕܵܚܠܵܘ̈ܗܝ.

³⁵ܘܙܲܕ̇ܝܼܩܘܼܬܹܗ ܠܲܒ̣ܢܲܝ̈ ܒܢܲܝ̈ܗܘܿܢ.

³⁶ܠܐܲܝܠܹܝܢ ܕܵܢܛ݁ܪܝܼܢ ܩܝܵܡܹܗ.

³⁷ܘܡܸܬ̇ܕܲܟ̣ܪܝܼܢ ܦܘܼܩܕܵܢܵܘ̈ܗܝ ܘܥܵܒ̣ܕ̇ܝܼܢ ܠܗܘܿܢ.

³⁸ܡܵܪܝܵܐ ܒܲܫܡܲܝܵܐ ܡܲܬ̣ܩܲܢ ܟܘܼܪܣܝܹܗ.

³⁹ܘܡܲܠܟ̇ܘܼܬܹܗ ܒܟ̣ܠ ܫܲܠܝܼܛܵܐ.

⁴⁰ܒܲܪܸܟ̣ܘ ܠܡܵܪܝܵܐ ܡܲܠܲܐܟ̣ܵܘ̈ܗܝ.

⁴¹ܕܲܡܨܹܝܢ ܒܚܲܝܠܵܐ ܘܥܵܒ̣ܕ̇ܝܼܢ ܦܘܼܩܕܵܢܵܘ̈ܗܝ.

⁴²ܒܲܪܸܟ̣ܘ ܠܡܵܪܝܵܐ ܟܠܗܘܿܢ ܚܲܝ̈ܠܵܘܵܬܹܗ.

⁴³ܡܫܲܡܫܵܢܵܘ̈ܗܝ ܕܥܵܒ̣ܕ̇ܝܼ݁ܢ ܨܸܒ̣ܝܵܢܹܗ.

⁴⁴ܒܲܪܸܟ̣ܘ ܠܡܵܪܝܵܐ ܟܠܗܘܿܢ ܥܒ̣ܵܕ݂ܵܘ̈ܗܝ.

⁴⁵ܕܲܒ̣ܟ̣ܠܵܗ̇ ܐܲܪܥܵܐ ܫܘܼܠܛܵܢܹܗ.

⁴⁶ܒܲܪܸܟ̣ܝ ܢܲܦ̮ܫܝ ܠܡܵܪܝܵܐ.