Read Aramaic Peshita Psalms 104 Bible Online

Psalms 104 - Aramaic Peshita bible

Psalms 104

¹ܒܲܪܸܟ̣ܝ ܢܲܦ̮ܫܝ ܠܡܵܪܝܵܐ.

²ܡܵܪܝܵܐ ܐܲܠܵܗܝ ܝܑܼܪܸܒ̣ܬ̇ ܛܵܒ̣.

³ܙܝܼܘܵܐ ܘܗܸܕ݂ܪܵܐ ܠܒܸܫ̣ܬ̇.

⁴ܘܐܸܬ̣ܟܲܣܝܼܬ̇ ܢܘܼܗܪܵܐ ܐܲܝܟ݂ ܡܲܪܛܘܼܛܵܐ.

⁵ܡܬܲܚ̣ܬ̇ ܫܡܲܝܵܐ ܐܲܝܟ݂ ܝܵܪܝܼܥܬܵܐ.

⁶ܥ̣ܒܲܕ݂ ܒܡܲܝܵܐ ܡܸܕ݂ܝܵܪ̈ܵܘܗܝ.

⁷ܘܣܵܡ݂ ܥܲܠ ܥܢܵܢܹ̈ܐ ܡܲܪܟܲܒ̣ܬܹܗ.

⁸ܘܲܡܗܲܠܸܟ݂ ܥܲܠ ܟܸܢܦܹ̈ܐ ܕܪܘܼܚܵܐ.

⁹ܥ̣ܒܲܕ݂ ܡܲܠܲܐܟ̣ܵܘ̈ܗܝ ܪܘܼܚ.

¹⁰ܘܲܡܫܲܡܫܵܢܵܘ̈ܗܝ ܢܘܼܪ ܝܵܩ̇ܕܵܐ.

¹¹ܐܲܬ̣ܩܸܢ ܐܲܪܥܵܐ ܥܲܠ ܡܲܬ̣ܩܢܹ̈ܝܗ̇.

¹²ܕܠܵܐ ܬܙܘܼܥ ܠܥܵܠܲܡ ܥܵܠܡܝܼܢ.

¹³ܬܗܘܿܡܵܐ ܐܲܝܟ݂ ܡܲܪܛܘܼܛܵܐ ܟܲܣܝܼܬܵܝܗܝ.

¹⁴ܘܥܲܠ ܛܘܼܪܹ̈ܐ ܩܵܡ̣ܘ ܡܲܝ̈ܵܐ.

¹⁵ܘܡ̣ܢ ܟܐܵܬ̣ܵܟ݂ ܥܵܪܩܝܼ݁ܢ.

¹⁶ܘܡ̣ܢ ܩܵܠܵܐ ܕܪ̈ܲܥܡܲܝܟ ܡܸܬ̣ܪܲܗܒ̇ܝܼܢ.

¹⁷ܣܠܸܩ̣ܘ ܛܘܼܪܹ̈ܐ ܘܲܢ̣ܚܸܬ̣ܘ ܦܲܩ̈ܥܵܬ̣ܵܐ.

¹⁸ܒܐܲܬ̣ܪܵܐ ܕܬܲܩܸܢܬ̇ ܠܗܘܿܢ.

¹⁹ܬܚܘܼܡܵܐ ܣܵܡ̣ܬ̇ ܠܗܘܿܢ.

²⁰ܕܠܵܐ ܢܸܥܒ̇ܪܘܼܢ ܘܲܢܟܲܣܘܼܢܵܗ̇ ܠܐܲܪܥܵܐ.

²¹ܫܲܕܲܪܬ̇ ܡܲܒ̇ܘܼܥܹ̈ܐ ܒܢܲܚܠܹ̈ܐ.

²²ܘܒܲܝܢܵܬ̣ ܛܘܼܪܹ̈ܐ ܡܗܲܠܟ̣ܝܼܢ.

²³ܘܡܲܫܩܹܝܢ ܟܠܵܗ̇ ܚܲܝܘ̱ܬ̣ܵܐ ܕܕܲܒ̣ܪܵܐ.

²⁴ܘܣܵܒ̣ܥ̇ܝܼܢ ܥܪ̈ܵܕܹܐ ܕܲܨܗܹܝܢ.

²⁵ܦܵܪܲܚܬ̣ܵܐ ܕܲܫܡܲܝܵܐ ܥܠܲܝܗܘܿܢ ܫܵܟ̣ܢܵܐ.

²⁶ܘܡ̣ܢ ܒܲܝܢܵܬ̣ ܛܘܼܪܹ̈ܐ ܝܵܗ̄ܒ̇ܝܼܢ ܩܵܠܵܐ.

²⁷ܡܲܫܩܸܐ ܛܘܼܪܹ̈ܐ ܡ̣ܢ ܡܸܕ݂ܝܵܪ̈ܵܘܗܝ.

²⁸ܘܡ̣ܢ ܦܹܐܪ̈ܲܝ ܥܒ̣ܵܕܲܝ̈ܟ ܬܸܣܒܲܥ ܐܲܪܥܵܐ.

²⁹ܡܲܘܥܸܐ ܥܡܝܼܪܵܐ ܠܲܒ̣ܥܝܼܪܵܐ.

³⁰ܘܥܸܣܒܵܐ ܠܦܘܼܠܚܵܢܹܗ ܕܒܲܪܢܵܫܵܐ.

³¹ܠܡܲܦܵܩܘܼ ܠܲܚܡܵܐ ܡ̣ܢ ܐܲܪܥܵܐ.

³²ܚܲܡܪܵܐ ܡܚܲܕܸ̇ܐ ܠܸܒܹ̇ܗ ܕܒܲܪܢܵܫܵܐ.

³³ܘܡܲܦܨܲܚ ܐܲܦܵܘ̈ܗܝ ܒܡܸܫܚܵܐ.

³⁴ܠܲܚܡܵܐ ܣܵܡܸܟ݂ ܠܸܒܹ̇ܗ ܕܒܲܪܢܵܫܵܐ.

³⁵ܢܸܣܒ̇ܥܘܼܢ ܐܝܼܠܵܢܵܘ̈ܗܝ ܕܡܵܪܝܵܐ.

³⁶ܘܐܲܪ̈ܙܹܐ ܕܠܸܒ̣ܢܵܢ ܕܲܢܨܲܒ̣ܬ̇.

³⁷ܬܲܡܵܢ ܐܲܩܸܢ ܨܸܦܪܹ̈ܐ.

³⁸ܘܚܘܼܪܒ̣ܵܐ ܩܸܢܵܗ̇ ܒܫܲܪ̈ܘܲܝܢܹܐ.

³⁹ܛܘܼܪܹ̈ܐ ܪ̈ܵܡܹܐ ܠܕܲܝܨܹ̈ܐ.

⁴⁰ܘܲܫܩܝܼܦܹ̈ܐ ܣܸܬܵܪܵܐ ܠܲܚܓ̣ܵܣܹ̈ܐ.ܦܵܣܘܿܩܵܐ.

⁴¹(1) ܥܒܲܕ݂ ܣܲܗܪܵܐ ܠܙܲܒ̣ܢܹ̈ܐ.

⁴²(2) ܘܫܸܡܫܵܐ ܝܑܼܕܲܥ ܙܲܒ̣ܢܵܐ ܕܡܲܥܪ̈ܵܒ̣ܵܘܗܝ.

⁴³(3) ܥ̣ܒܲܕ݂ ܚܸܫܘܿܟ̣ܵܐ ܘܲܗ݀ܘܵܐ ܠܸܠܝܵܐ.

⁴⁴(4) ܘܒܹܗ ܥܵܒ̣ܪ̈ܵܢ ܟܠܗܹܝܢ ܚܲܝ̈ܘܵܬ̣ܵܐ ܕܥܵܒ̣ܵܐ.

⁴⁵(5) ܐܲܪ̈ܝܵܘܵܬ̣ܵܐ ܢܵܗ̇ܡܝܼܢ ܠܡܸܬ̣ܒܲܪ.

⁴⁶(6) ܘܲܠܡܸܒ̣ܥܵܐ ܡ̣ܢ ܐܲܠܵܗܵܐ ܡܹܐܟ̣ܘܼܠܬ̇ܗܘܿܢ.

⁴⁷(7) ܒܡܲܕ݂ܢܵܚܲܝ̈ ܫܸܡܫܵܐ ܡܸܬ̣ܚܲܡܠܝܼܢ.

⁴⁸(8) ܘܲܒ̣ܡܲܥܡ̱ܪ̈ܲܝܗܘܿܢ ܪܵܒ̣ܥ̇ܝܼܢ.

⁴⁹(9) ܢܵܦܹ̇ܩ ܒܲܪܢܵܫܵܐ ܠܲܥܒ̣ܵܕܹܗ.

⁵⁰(10) ܘܲܠܦܘܼܠܚܵܢܹܗ ܥܕܲܡܵܐ ܠܪܲܡܫܵܐ.

⁵¹(11) ܡܵܐ ܣܲܓ̇ܝܼܐܝܼܢ ܥܒ̣ܵܕܲܝ̈ܟ ܡܵܪܝܵܐ.

⁵²(12) ܘܟ̣ܠܗܘܿܢ ܒܚܸܟ̣ܡ̱ܬ̣ܵܐ ܒܪܲܝܬ̇ ܐܸܢܘܿܢ.

⁵³(13) ܘܲܡܠܵܬ݀ ܐܲܪܥܵܐ ܩܸܢܝܵܢܵܟ݂.

⁵⁴(14) ܗܵܢܵܐ ܝܲܡܵܐ ܪܲܒܵܐ ܘܲܪܘܲܚܬ̣ܵܐ ܕܐܝܼ̈ܕܲܝܵܐ.

⁵⁵(15) ܕܒܹܗ ܐܝܼܬ̣ ܪ̈ܲܚܫܵܐ ܕܠܵܐ ܡܸܢܝܵܢ.

⁵⁶(16) ܚܲܝ̈ܘܵܬ̣ܵܐ ܪܲܘ̱ܪ̈ܒ̣ܵܬ̣ܵܐ ܥܲܡ ܕܲܩ̈ܕ̇ܩܵܬ̣ܵܐ.

⁵⁷(17) ܘܒܹܗܘ݀ ܡܗܲܠ̈ܟ̣ܵܢ ܣܦܝܼܢܹ̈ܐ.

⁵⁸(18) ܠܸܘܝܵܬܲܢ ܗܵܢܵܐ ܕܲܒ̣ܪܲܝܬ̇ ܠܡܸܓ̣ܚܲܟ݂ ܥܠܵܘܗܝ.

⁵⁹(19) ܟܠܗܘܿܢ ܠܵܟ̣ܘܼ ܡܣܲܟܹ̇ܝܢ.

⁶⁰(20) ܕܬܸܬܸ̇ܠ ܠܗܘܿܢ ܡܹܐܟ̣ܘܼܠܬܵܐ ܒܙܲܒ̣ܢܗܘܿܢ.

⁶¹(21) ܝܵܗܹ̇ܒ̣ ܐܲܢ̄ܬ̇ ܠܗܘܿܢ ܘܡܸܬ̇ܬܲܪܣܹܝܢ.

⁶²(22) ܦܵܬܲܚ̇ ܐܲܢ̄ܬ̇ ܐܝܼܕ݂ܵܟ݂ ܘܣܵܒ̣ܥ̇ܝܼܢ.

⁶³(23) ܡܲܗܦܸܟ݂ ܐܲܢ̄ܬ̇ ܐܲܦܲܝ̈ܟ ܘܡܸܬ̇ܕܲܠܚܝܼܢ.

⁶⁴(24) ܫܵܩܹ̇ܠ ܐܲܢ̄ܬ̇ ܪܘܼܚܗܘܿܢ ܘܡܵܝܬ̇ܝܼܢ.

⁶⁵(25) ܘܲܠܥܲܦܪ̱ܗܘܿܢ ܗܵܦ̇ܟ̇ܝܼܢ.

⁶⁶(26) ܡܫܲܕܲܪ ܐܲܢ̄ܬ̇ ܪܘܼܚܵܟ݂ ܘܡܸܬ̣ܒ̇ܪܹܝܢ.

⁶⁷(27) ܘܲܡܚܲܕܸ̇ܬ̣ ܐܲܢ̄ܬ̇ ܐܲܦܹܝ̈ܗ̇ ܕܐܲܪܥܵܐ.

⁶⁸(28) ܢܸܗܘܸܐ ܫܘܼܒ̣ܚܹܗ ܕܡܵܪܝܵܐ ܠܥܵܠܲܡ.

⁶⁹(29) ܢܸܚܕܸ̇ܐ ܡܵܪܝܵܐ ܒܲܥܒ̣ܵܕ݂ܵܘ̈ܗܝ.

⁷⁰(30) ܕܚܵܐܲ݁ܪ ܒܐܲܪܥܵܐ ܘܙܵܝ݁ܥܵܐ.

⁷¹(31) ܘܟ̣ܵܐܹ̇ܐ ܒܛܘܼܪܹ̈ܐ ܘܬ̣ܵܢܝܼ݁ܢ.

⁷²(32) ܐܹܫܲܒܲܚ ܠܡܵܪܝܵܐ ܒܚܲܝܲܝ̈.

⁷³(33) ܘܐܸܙܡܲܪ ܠܐܲܠܵܗܝ ܥܲܕ݂ ܩܲܝܵܡ ܐ̄ܢܵܐ.

⁷⁴(34) ܬܸܒ̣ܣܲܡ ܠܹܗ ܬܸܫܒ̇ܘܿܚܬ̇ܝ.

⁷⁵(35) ܘܐܸܢܵܐ ܐܸܚܕܸ̇ܐ ܒܡܵܪܝܵܐ.

⁷⁶(36) ܘܲܢܣܘܼܦܘܼܢ ܚܲܛܵܝܹ̈ܐ ܡ̣ܢ ܐܲܪܥܵܐ.

⁷⁷(37) ܘܥܲܘܵܠܹ̈ܐ ܠܵܐ ܢܸܫܬܲܚܪܘܼܢ ܒܵܗ̇.

⁷⁸(38) ܒܲܪܸܟ̣ܝ ܢܲܦ̮ܫܝ ܠܡܵܪܝܵܐ.