Read Aramaic Peshita Psalms 108 Bible Online

Psalms 108 - Aramaic Peshita bible

Psalms 108

¹ܡܛܲܝܲܒ̣ ܗ̄ܘ̣ ܠܹܒ̇ܝ ܐܲܠܵܗܵܐ ܡܛܲܝܲܒ̣ ܗ̄ܘ̣ ܠܹܒ̇ܝ.

²ܐܹܫܲܒܲܚ ܘܐܹܙܲܡܲܪ ܒܐܝܼܩܵܪܝ.

³ܐܸܬ̇ܬ̇ܥܝܼܪ ܟܸܢܵܪܝ ܐܸܬ̇ܬ̇ܥܝܼܪܘ ܩܝܼܬ̣ܵܪܵܐ ܘܟܸܢܵܪܵܐ.

⁴ܘܐܸܢܵܐ ܐܸܬ̇ܬ̇ܥܝܼܪ ܒܨܲܦܪܵܐ.

⁵ܐܲܘܕܸ̇ܐ ܠܵܟ݂ ܒܥܲܡܡܹ̈ܐ ܐܲܠܵܗܵܐ.

⁶ܘܠܲܫܡܵܟ݂ ܐܹܙܲܡܲܪ ܒܐܸܡ̈ܘܵܬ̣ܵܐ.

⁷ܡܸܛܠ ܕܪܲܒܵܐ ܗ̄ܝ̣ ܛܲܝܒ̇ܘܼܬ̣ܵܟ݂ ܥܕܲܡܵܐ ܠܲܫܡܲܝܵܐ.

⁸ܘܗܲܝܡܵܢܘܼܬ̣ܵܟ݂ ܥܕܲܡܵܐ ܠܲܫܡܲܝ̈ ܫܡܲܝܵܐ.

⁹ܐܸܬ̇ܬ̇ܪܝܼܡ ܥܲܠ ܫܡܲܝܵܐ ܐܲܠܵܗܵܐ.

¹⁰ܘܥܲܠ ܟܠܵܗ̇ ܐܲܪܥܵܐ ܐܝܼܩܵܪܵܟ݂.

¹¹ܡܸܛܠ ܕܢܸܬ̣ܦܲܪܩܘܼܢ ܚܲܒ̇ܝܼ̈ܒܲܝܟ.

¹²ܦܪܘܿܩܲܝܢ ܒܝܲܡܝܼܢܵܟ݂ ܘܲܥܢܝܼܢܝ.

¹³ܐܲܠܵܗܵܐ ܡܲܠܸܠ ܒܩܘܼܕ݂ܫܹܗ.

¹⁴ܐܹܫܲܒܲܚ ܐܸܢܵܐ ܘܐܹܦܲܠܸܓ̣ ܠܲܫܟܹܝܡ.

¹⁵ܘܲܠܥܘܼܡܩܵܐ ܕܣܵܟ̣ܘܼܬ̣ ܐܸܡܫܘܿܚ.

¹⁶ܕܝܼܠܝ ܗ̄ܘ̣ ܓܸܠܥܵܕ݂ ܘܕ݂ܝܼܠܝ ܗ̄ܘ̣ ܡܢܲܫܹܐ.

¹⁷ܘܐܲܦܪܹܝܡ ܡܥܲܫܢܵܢܹܗ ܕܪܹܫܝ.

¹⁸ܝܼܗܘܼܕ݂ܵܐ ܡܲܠܟ̇ܝ ܘܡܘܼܐܵܒ̣ ܩܲܕ݂ܣܵܐ ܕܲܫܝܵܓ̣ܬ̇ܝ.

¹⁹ܥܲܠ ܐܲܕ݂ܘܿܡ ܐܸܫܪܸܐ ܡܣܵܢܲܝ̈ ܘܥܲܠ ܦܠܸܫܬ̇ ܐܸܩܥܸܐ.

²⁰ܡܲܢ̣ܘܼ ܢܲܘܒ̇ܠܲܢܝ ܠܲܩܪܝܼܬ̣ܵܐ ܥܲܫܝܼܢܬܵܐ.

²¹ܘܡܲܢ̣ܘܼ ܢܕܲܒ̇ܪܲܢܝ ܥܕܲܡܵܐ ܠܐܲܕ݂ܘܿܡ.

²²ܕܗܵܐ ܐܲܢ̄ܬ̇ ܐܲܠܵܗܵܐ ܛܥܲܝܬܵܢ ܘܠܵܐ ܢܵܦܹܩ ܐܲܢ̄ܬ̇ ܒܚܲܝܠܲܢ.

²³ܗܲܒ̣ܠܲܢ ܚܲܝܠܵܐ ܥܲܠ ܒܥܸܠܕ̇ܒ̣ܵܒܲܝ̈ܢ.

²⁴ܡܸܛܠ ܕܲܣܪܝܼܩܘܼ ܦܘܼܪܩܵܢܹܗ ܕܒܲܪܢܵܫܵܐ.

²⁵ܐܲܠܵܗܵܐ ܢܲܩܢܹܝܢ ܚܲܝܠܵܐ.

²⁶ܘܗܘ݀ ܢܕ݂ܘܼܫ ܠܲܒ̣ܥܸܠܕ̇ܒ̣ܵܒܲܝ̈ܢ.