Read Aramaic Peshita Psalms 109 Bible Online

Psalms 109 - Aramaic Peshita bible

Psalms 109

¹ܐܲܠܵܗܵܐ ܕܬܸܫܒ̇ܘܿܚܬ̇ܝ ܠܵܐ ܬܸܫܬ̇ܘܿܩ.

²ܡܸܛܠ ܕܦܘܼܡܹܗ ܕܪܲܫܝܼܥܵܐ ܘܦܘܼܡܹܗ ܕܢܲܟ̇ܘܼܠܬ̣ܵܢܵܐ ܐܸܬ̣ܦܬܲܚܘ ܥܠܲܝ.

³ܡܲܠܸܠܘ ܥܲܡܝ ܒܠܸܫܵܢܵܐ ܕܲܓܵܠܵܐ ܘܲܒ̣ܩܵܠܵܐ ܕܣܸܢܐ̱ܬ̣ܵܐ.

⁴ܘܐܸܬ̣ܟܲܬܲܫܘ ܥܲܡ ܣܪܝܼܩܵܐܝܼܬ̣.

⁵ܘܲܚܠܵܦ ܪܸܚܡܲܬ̣ܝ ܣܲܩܪܘܼܢܝ.

⁶ܘܐܸܢܵܐ ܡܨܲܠܸܐ ܗ̄ܘܹܝܬ̣ ܥܠܲܝܗܘܿܢ.

⁷ܦܲܪܥܘܼܢܝ ܒܝܼܫܬܵܐ ܚܠܵܦ ܛܵܒ̣ܬ̣ܵܐ.

⁸ܘܣܸܢܐ̱ܬ̣ܵܐ ܚܠܵܦ ܪܸܚܡ̱ܬ̣ܵܐ.

⁹ܦܩܘܿܕ݂ ܥܠܲܝܗܘܿܢ ܥܲܘܠܵܐ.

¹⁰ܘܣܵܛܵܢܵܐ ܢܩܘܼܡ ܡ̣ܢ ܝܲܡܝܼܢܗܘܿܢ.

¹¹ܘܡܵܐ ܕܡܸܬ̇ܬ̇ܕ̇ܝܼܢܝܼܢ ܢܸܦܩܘܼܢ ܟܲܕ݂ ܚܲܝܵܒ̣ܝܼܢ.

¹²ܘܲܨܠܘܿܬ̣ܗܘܿܢ ܬܸܗܘܸܐ ܚܛܝܼܬ̣ܵܐ.

¹³ܢܸܗܘܘܿܢ ܝܲܘ̈ܡܲܝܗܘܿܢ ܙܥܘܿܪ̈ܝܼܢ.

¹⁴ܘܡܸܕܸ̇ܡ ܕܡܲܛܲܪ ܠܗܘܿܢ ܐ̄ܚܪ̈ܵܢܹܐ ܢܸܣܒ̣ܘܼܢ.

¹⁵ܢܸܗܘܘܿܢ ܒܢܲܝ̈ܗܘܿܢ ܝܲܬ̣ܡܹ̈ܐ.

¹⁶ܘܢܸܫܲܝ̈ܗܘܿܢ ܐܲܪ̈ܡܠܵܬ̣ܵܐ.

¹⁷ܢܩܘܼܡ ܡܵܪܹܐ ܚܲܘܒܵܐ ܥܲܠ ܟܠ ܕܐܝܼܬ ܠܗܘܿܢ.

¹⁸ܘܢܸܒ̣ܨܘܼܢ ܢܘܼܟ̣ܪ̈ܵܝܹܐ ܚܲܝܠܗܘܿܢ.

¹⁹ܘܠܵܐ ܢܸܗܘܸܐ ܠܗܘܿܢ ܡܪܲܚܡܵܢܵܐ.

²⁰ܘܠܵܐ ܢܸܗܘܸܐ ܕܲܡܪܲܚܸܦ ܥܲܠ ܝܲܬ̣ܡܲܝ̈ܗܘܿܢ.

²¹ܬܸܗܘܸܐ ܚܲܪܬ̣ܗܘܿܢ ܠܐܲܒ̣ܕܵܢܵܐ.

²²ܘܲܠܕ݂ܵܪܵܐ ܐ̄ܚܪܹܢܵܐ ܢܸܬ̣ܥ̱ܛܸܐ ܫܸܡܗܘܿܢ.

²³ܢܸܬ̇ܕ̇ܟܲܪ ܥܲܘܠܵܐ ܕܐܲܒ̣ܵܗܲܝ̈ܗܘܿܢ.

²⁴ܘܲܚܛܵܗܹ̈ܐ ܕܐܸܡ̈ܘܵܬ̣ܗܘܿܢ ܠܵܐ ܢܸܬ̣ܥ̱ܛܘܿܢ.

²⁵ܐܸܠܵܐ ܢܸܗܘܘܿܢ ܩܕ݂ܵܡ ܡܵܪܝܵܐ ܒܟ̣ܠܙܒܲܢ.

²⁶ܘܢܲܘܒܸ̇ܕ ܡ̣ܢ ܐܲܪܥܵܐ ܕܘܼܟ̣ܪܵܢܗܘܿܢ.

²⁷ܥܲܠ ܕܠܵܐ ܥܗܲܕ݂ܘ ܠܡܸܥܒܲܕ݂ ܛܵܒ̣ܬ̣ܵܐ.

²⁸ܘܲܪܕܲܦ݂ܘ ܠܡܸܣܟܹ̇ܢܵܐ ܘܲܠܒ̣ܵܝܫܵܐ.

²⁹ܘܠܲܕ݂ܡܲܟ̣ܐܲܒ̣ ܠܸܒܹ̇ܗ ܠܡܲܘܬܵܐ.

³⁰ܪܚܸܡ̣ܘ ܠܲܘ̈ܛܵܬ̣ܵܐ ܘܠܵܐ ܨ̣ܒ̣ܵܘ ܒܒ̣ܘܼܪ̈ܟܵܬ̣ܵܐ.

³¹ܘܲܠ̣ܒܸܫܘ ܠܲܘ̈ܛܵܬ̣ܵܐ ܐܲܝܟ݂ ܙܲܝܢܵܐ.

³²ܘܥܲܠ݂ ܒܗܘܿܢ ܐܲܝܟ݂ ܡܲܝ̈ܵܐ ܘܐܲܝܟ݂ ܡܸܫܚܵܐ ܒܓܲܪ̈ܡܲܝܗܘܿܢ.

³³ܬܸܗܘܸܐ ܠܗܘܿܢ ܐܲܝܟ݂ ܡܲܪܛܘܼܛܵܐ ܕܡܸܬ̣ܟܲܣܹܝܢ.

³⁴ܘܐܲܝܟ݂ ܐܲܣܵܪ ܚܲܨܹ̈ܐ ܒܟ̣ܠܙܒܲܢ.

³⁵ܗܵܢܵܘ ܥܒ̣ܵܕ݂ܵܐ ܕܐܲܝܠܹܝܢ ܕܣܵܩ݁ܪܝܼܢ ܠܡܵܪܝܵܐ.

³⁶ܘܕܲܐܝܠܹܝܢ ܕܲܡܡܲܠܠܝܼܢ ܒܝܼܫܬܵܐ ܥܲܠ ܢܲܦ̮ܫܝ.

³⁷ܘܐܲܢ̄ܬ̇ ܡܵܪܝܵܐ ܥܒܸܕ݂ ܥܲܡܝ ܡܸܛܠ ܫܡܵܟ݂.

³⁸ܡܸܛܠ ܕܛܵܒ̣ܵܐ ܗ̄ܝ̣ ܛܲܝܒ̇ܘܼܬ̣ܵܟ݂ ܦܲܨܵܢܝ.

³⁹ܡܸܛܠ ܕܡܸܣܟܹ̇ܢܵܐ ܐ̄ܢܵܐ ܘܒ̣ܵܝܫܵܐ.

⁴⁰ܘܠܹܒ̇ܝ ܐܸܬ̇ܕܲܠܲܚ ܒܓ̣ܵܘܝ.

⁴¹ܘܐܲܝܟ݂ ܛܸܠܵܠܵܐ ܐܸܬ̣ܪ̱ܟܸܢ ܗܲܠ̈ܟ̣ܵܬ̣ܝ.

⁴²ܘܐܸܬ̣ܢܲܦܨܹ̇ܬ̣ ܐܲܝܟ݂ ܩܲܡܨܵܐ.

⁴³ܘܒ̣ܘܼܪ̈ܟܲܝ ܐܸܬ̣ܟ̇ܪܲܗ ܡ̣ܢ ܨܲܘܡܵܐ.

⁴⁴ܘܒܸܣܪ̱ܝ ܢ̣ܚܸܒ̣ ܡ̣ܢ ܡܸܫܚܵܐ.

⁴⁵ܘܐܸܢܵܐ ܗ݀ܘܹܝܬ̣ ܠܗܘܿܢ ܠܚܸܣܕܵܐ.

⁴⁶ܚܙܵܐܘܼܢܝ ܘܐܲܢܝܼܕ݂ܘ ܒܪܹ̈ܫܲܝܗܘܿܢ.

⁴⁷ܥܲܕܲܪܲܝܢܝ ܡܵܪܝܵܐ ܐܲܠܵܗܝ ܘܲܦܪܘܿܩܲܝܢܝ ܐܲܝܟ݂ ܛܲܝܒ̇ܘܼܬ̣ܵܟ݂.

⁴⁸ܕܢܸܕ̇ܥܘܼܢ ܕܐܝܼܕ݂ܵܟ݂ ܗ̄ܝ̣ ܗܵܕܹܐ ܘܐܲܢ̄ܬ̇ ܥܒܲܕ̇ܬܵܗ̇.

⁴⁹ܢܸܬ̇ܬ̇ܠܝܼܛܘܼܢ ܗܸܢ̣ܘܿܢ.

⁵⁰ܘܐܲܢ̄ܬ̇ ܬܸܬ̣ܒܲܪܲܟ݂ ܘܥܲܒ̣ܕܵܟ݂ ܢܸܚܕܸ̇ܐ.

⁵¹ܢܸܠܒ̇ܫܘܼܢ ܒܸܗܬ̇ܬ̣ܵܐ ܐܲܝܠܹܝܢ ܕܣܵܩ݁ܪܝܼܢ ܗ̄ܘܵܘ ܠܝܼ.

⁵²ܘܢܸܬ̣ܥܲܛܦܘܼܢܵܗ̇ ܐܲܝܟ݂ ܦܪܝܼܣܵܐ.

⁵³ܐܲܘܕܸ̇ܐ ܠܡܵܪܝܵܐ ܒܦܘܼܡܝ.

⁵⁴ܘܒܲܝܢܵܬ̣ ܣܲܓ̇ܝܼ̈ܐܹܐ ܐܹܫܲܒ̇ܚܝܼܘܼܗܝ.

⁵⁵ܡܸܛܠ ܕܩ̣ܵܡ ܡ̣ܢ ܝܲܡܝܼܢܹܗ ܕܒ̣ܵܝܫܵܐ.

⁵⁶ܠܡܸܦܪܲܩ ܢܲܦ̮ܫܹܗ ܡ̣ܢ ܕܝܼܢܵܐ.