Read Aramaic Peshita Psalms 114 Bible Online

Psalms 114 - Aramaic Peshita bible

Psalms 114

¹ܟܲܕ݂ ܢܦܲܩ݂ ܝܑܼܣܪܵܝܹܠ ܡ̣ܢ ܡܸܨܪܹܝܢ.

²ܘܲܕ݂ܒܹܝܬ̣ ܝܲܥܩܘܿܒ̣ ܡ̣ܢ ܥܲܡܵܐ ܠܵܥܘܿܙܵܐ.

³ܗܘ݀ܵܐ ܝܼܗܘܼܕ݂ܵܐ ܩܘܼܕ݂ܫܹܗ ܘܝܼܣܪܵܝܹܠ ܬܸܫܒ̇ܘܿܚܬܹܗ.

⁴ܝܲܡܵܐ ܚܙܵܝܗܝ ܘܲܥ݂ܪܲܩ.

⁵ܘܝܘܿܪܕ̇ܢܵܢ ܗܦܲܟ݂ ܠܒܸܣܬ̇ܪܹܗ.

⁶ܛܘܼܪܹ̈ܐ ܪܲܩܸܕ݂ ܐܲܝܟ݂ ܐܲܝܠܹ̈ܐ.

⁷ܘܪ̈ܵܡܵܬ̣ܵܐ ܐܲܝܟ݂ ܐܸܡܪܹ̈ܐ ܕܥܵـ̈ـܢܵܐ.

⁸ܡܵܐ ܠܵܟ݂ ܝܲܡܵܐ ܕܲܥܪܲܩܬ̇.

⁹ܘܝܘܿܪܕ̇ܢܵܢ ܕܲܗܦܲܟ̣ܬ̇ ܠܒܸܣܬ̇ܪܵܟ݂.

¹⁰ܘܛܘܼܪܹ̈ܐ ܕܪܲܩܸܕ݂ܬ̇ܘܿܢ ܐܲܝܟ݂ ܐܲܝܠܹ̈ܐ.

¹¹ܘܪ̈ܵܡܵܬ̣ܵܐ ܐܲܝܟ݂ ܐܸܡܪܹ̈ܐ ܕܥܵـ̈ـܢܵܐ.

¹²ܡ̣ܢ ܩܕ݂ܵܡ ܡܵܪܝܵܐ ܙܵܥܲܬ݀ ܐܲܪܥܵܐ.

¹³ܡ̣ܢ ܩܕ݂ܵܡ ܐܲܠܵܗܹܗ ܕܝܲܥܩܘܿܒ̣.

¹⁴ܕܲܗܦܲܟ݂ ܛܲܪܵܢܵܐ ܠܐܵܓ̣ܡܹ̈ܐ ܕܡܲܝ̈ܵܐ.

¹⁵ܘܟܹܐܦܵܐ ܫܲܪܝܼܪܬܵܐ ܠܡܲܒ̇ܘܼܥܹ̈ܐ ܕܡܲܝ̈ܵܐ.

¹⁶ܠܵܐ ܠܲܢ ܡܵܪܝܵܐ ܠܵܐ ܠܲܢ.

¹⁷ܐܸܠܵܐ ܠܲܫܡܵܟ݂ ܗܲܒ̣ ܐܝܼܩܵܪܵܐ.

¹⁸ܥܲܠ ܛܲܝܒ̇ܘܼܬ̣ܵܟ݂ ܘܥܲܠ ܩܘܼܫܬܵܟ݂.

¹⁹ܕܠܵܐ ܢܹܐܡܪܘܼܢ ܥܲܡܡܹ̈ܐ ܐܲܝܟܵܘ ܐܲܠܵܗܗܘܿܢ.

²⁰ܐܲܠܵܗܲܢ ܒܲܫܡܲܝܵܐ ܗ̄ܘ̣ ܘܟ̣ܠ ܕܨܵܒܹ̇ܐ ܥܵܒܹ̇ܕ݂.

²¹ܦܬܲܟ̣ܪܹ̈ܐ ܕܥܲܡܡܹ̈ܐ ܣܹܐܡܵܐ ܘܕܲܗܒ̣ܵܐ.

²²ܥܒ̣ܵܕ݂ ܐܝܼ̈ܕܲܝܵܐ ܕܒܲܪܢܵܫܵܐ.

²³ܦܘܼܡܵܐ ܐܝܼܬ̣ ܠܗܘܿܢ ܘܠܵܐ ܡܡܲܠܠܝܼܢ.

²⁴ܥܲܝܢܹ̈ܐ ܐܝܼܬ̣ ܠܗܘܿܢ ܘܠܵܐ ܚܵܙܹ̇ܝܢ.

²⁵ܐܸܕ݂ܢܹ̈ܐ ܐܝܼܬ̣ ܠܗܘܿܢ ܘܠܵܐ ܫܵܡ̇ܥܝܼܢ.

²⁶ܢܚܝܼܪܹ̈ܐ ܐܝܼܬ̣ ܠܗܘܿܢ ܘܠܵܐ ܡܪܝܼܚܝܼܢ.

²⁷ܒܐܝܼ̈ܕܲܝܗܘܿܢ ܠܵܐ ܡܵܝܫ݁ܝܼܢ.

²⁸ܘܲܒ̣ܪܸ̈ܓ̣ܠܲܝܗܘܿܢ ܠܵܐ ܡܗܲܠܟ̣ܝܼܢ.

²⁹ܘܠܵܐ ܡܡܲܠܠܝܼܢ ܒܓܲܓ̇ܪ̈ܵܬ̣ܗܘܿܢ.

³⁰ܐܲܟ̣ܘܵܬ̣ܗܘܿܢ ܢܸܗܘܘܿܢ ܥܵܒ̣ܘܿܕܲܝ̈ܗܘܿܢ.

³¹ܘܟ̣ܠ ܕܲܬ̣ܟ̣ܝܼܠܝܼܢ ܥܠܲܝܗܘܿܢ.

³²ܕܒܹܝܬ̣ ܝܼܣܪܵܝܹܠ ܬܟ̣ܝܼܠܝܼܢ ܥܲܠ ܡܵܪܝܵܐ.

³³ܗܘ݀ܝܘܼ ܥܵܕ݂ܘܿܪܗܘܿܢ ܘܲܡܣܲܝܥܵܢܗܘܿܢ.

³⁴ܕܒܹܝܬ̣ ܐܲܗܪܘܿܢ ܬܟ̣ܝܼܠܝܼܢ ܥܲܠ ܡܵܪܝܵܐ.

³⁵ܗܘ݀ܝܘܼ ܥܵܕ݂ܘܿܪܗܘܿܢ ܘܲܡܣܲܝܥܵܢܗܘܿܢ.

³⁶ܕܵܚܠܵܘ̈ܗܝ ܕܡܵܪܝܵܐ ܬܟ̣ܝܼܠܝܼܢ ܥܲܠ ܡܵܪܝܵܐ.

³⁷ܗܘ݀ܝܘܼ ܥܵܕ݂ܘܿܪܗܘܿܢ ܘܲܡܣܲܝܥܵܢܗܘܿܢ.

³⁸ܡܵܪܝܵܐ ܥܲܗܕܲܢ ܘܒܲܪܟܲܢ.

³⁹ܢܒܲܪܸܟ݂ ܠܲܕ݂ܒܹܝܬ̣ ܝܼܣܪܵܝܹܠ.

⁴⁰ܢܒܲܪܸܟ݂ ܠܲܕ݂ܒܹܝܬ̣ ܐܲܗܪܘܿܢ.

⁴¹ܢܒܲܪܸܟ݂ ܡܵܪܝܵܐ ܠܕ݂ܵܚܠܵܘ̈ܗܝ.

⁴²ܙܥܘܿܪܹ̈ܐ ܥܲܡ ܪܲܘ̱ܪ̈ܒܹܐ.

⁴³ܢܲܘܣܸܦ ܥܠܲܝܟ̇ܘܿܢ ܡܵܪܝܵܐ.

⁴⁴ܥܠܲܝܟ̇ܘܿܢ ܘܥܲܠ ܒܢܲܝ̈ܟ̇ܘܿܢ.

⁴⁵ܒܪܝܼܟ̣ܝܼܢ ܐܢ̄ܬ̇ܘܿܢ ܠܡܵܪܝܵܐ.

⁴⁶ܕܲܥܒܲܕ݂ ܫܡܲܝܵܐ ܘܐܲܪܥܵܐ.

⁴⁷ܫܡܲܝ̈ ܫܡܲܝܵܐ ܕܡܵܪܝܵܐ.

⁴⁸ܘܐܲܪܥܵܐ ܝܲܗ̄ܒܵܗ̇ ܠܲܒ̣ܢܲܝ̈ܢܵܫܵܐ.

⁴⁹ܠܵܐ ܡܝܼ̈ܬܹܐ ܢܫܲܒ̇ܚܘܼܢ ܠܡܵܪܝܵܐ.

⁵⁰ܘܐܵܦܠܵܐ ܟܠ ܢܲܚܬܲܝ̈ ܚܸܫܘܿܟ̣ܵܐ.

⁵¹ܚܢܲܢ ܕܹܝܢ ܢܒܲܪܸܟ݂ ܠܡܵܪܝܵܐ.

⁵²ܡܸܟܹ̇ܝܠ ܘܲܥܕܲܡܵܐ ܠܥܵܠܲܡ.