Read Aramaic Peshita Psalms 115 Bible Online

Psalms 115 - Aramaic Peshita bible

Psalms 115

¹ܪܸܚܡܹܬ̣ ܕܢܸܫܡܲܥ ܡܵܪܝܵܐ ܩܵܠܵܐ ܕܒ̣ܵܥܘܼܬ̣ܝ.

²ܘܢܸܨܠܸܐ ܐܸܕ݂ܢܹܗ ܠܘܵܬ̣ܝ ܒܝܲܘܡܵܐ ܕܐܸܩܪܹܝܘܗܝ.

³ܡܸܛܠ ܕܚܲܕ݂ܪܘܼܢܝ ܚܸܒ̣ܠܹ̈ܐ ܕܡܲܘܬܵܐ.

⁴ܘܐܘܼܠܨܵܢܹ̈ܐ ܕܲܫܝܘܿܠ ܡܲܛܝܘܼܢܝ.

⁵ܐܘܼܠܨܵܢܵܐ ܘܕ݂ܵܘܘܿܢܵܐ ܐܸܫܟ̇ܚܹܬ̣.

⁶ܘܒܲܫܡܹܗ ܕܡܵܪܝܵܐ ܩܪܹܝܬ̣.

⁷ܐܘܿ ܡܵܪܝܵܐ ܦܲܨܵܗ̇ ܠܢܲܦ̮ܫܝ.

⁸ܡܪܲܚܡܵܢ ܐܲܢ̄ܬ̇ ܡܵܪܝܵܐ ܘܙܲܕ̇ܝܼܩ.

⁹ܘܐܲܠܵܗܵܐ ܐܲܢ̄ܬ̇ ܡܪܲܚܡܵܢܵܐ.

¹⁰ܢܵܛܲܪ ܠܫܲܒ̣ܪܹ̈ܐ ܡܵܪܝܵܐ.

¹¹ܡܲܟ̇ܟܲܢܝ ܘܦܲܪܩܲܢܝ.

¹²ܐܸܬ̣ܦܢܵܝ ܢܲܦ̮ܫܝ ܠܲܢܝܵܚܹܟ̣ܝ.

¹³ܡܸܛܠ ܕܡܵܪܝܵܐ ܦܲܪܥܹܟ̣ܝ.

¹⁴ܡܸܛܠ ܕܦܲܨܝܼ ܢܲܦ̮ܫܝ ܡ̣ܢ ܡܲܘܬܵܐ.

¹⁵ܘܪܸ̈ܓ̣ܠܲܝ ܡ̣ܢ ܫܲܪ̈ܥܵܬ̣ܵܐ.

¹⁶ܕܐܸܫܦܲܪ ܩܕ݂ܵܡܲܝܟ ܡܵܪܝܵܐ ܒܐܲܪܥܵܐ ܕܚܲܝܹ̈ܐ.

¹⁷ܗܲܝܡ̱ܢܹ݁ܬ̣ ܘܡܲܠܠܹ݁ܬ̣ ܘܐܸܬ̣ܡܲܟ̇ܟܹܬ̣ ܛܵܒ̣.

¹⁸ܐܸܢܵܐ ܐܸܡ̇ܪܹܬ̣ ܒܲܪܥܝܼܠܘܼܬ̣ܝ ܕܟ̣ܠ ܒܲܪܢܵܫ ܕܲܓܵܠ.

¹⁹ܡܵܢܵܐ ܐܸܦܪܘܿܥ ܠܡܵܪܝܵܐ ܕܟ̣ܠܗܘܿܢ ܦܘܼܪ̈ܥܵܢܵܘܗܝ ܥܠܲܝ.

²⁰ܟܵܣܵܐ ܕܦܘܼܪܩܵܢܵܐ ܐܹܩܲܒܸ̇ܠ.

²¹ܘܒܲܫܡܹܗ ܕܡܵܪܝܵܐ ܐܸܩܪܸܐ.

²²ܢܸܕ݂ܪ̈ܲܝ ܠܡܵܪܝܵܐ ܐܸܦܪܘܿܥ.

²³ܩܕ݂ܵܡ ܟܠܹܗ ܥܲܡܵܐ.

²⁴ܝܲܩܝܼܪܘܼ ܒܥܲܝܢܵܘ̈ܗܝ ܕܡܵܪܝܵܐ ܡܲܘܬܵܐ ܕܙܲܕ̇ܝܼܩܵܘ̈ܗܝ.

²⁵ܐܘܿ ܡܵܪܝܵܐ ܐܸܢܵܐ ܥܲܒ̣ܕܵܟ݂.

²⁶ܥܲܒ̣ܕܵܟ݂ ܐ̄ܢܵܐ ܘܲܒ̣ܪܵܗ̇ ܕܐܲܡܬ̣ܵܟ݂.

²⁷ܫܪܲܝܬ̇ ܡܹܢܝ ܐܲܣܘܼܪ̈ܲܝ.

²⁸ܠܵܟ݂ ܐܹܕܲܒܲܚ ܕܸܒ̣ܚܹ̈ܐ ܕܫܘܼܒ̣ܚܵܐ.

²⁹ܘܒܲܫܡܹܗ ܕܡܵܪܝܵܐ ܐܸܩܪܸܐ.

³⁰ܢܸܕ݂ܪ̈ܲܝ ܠܡܵܪܝܵܐ ܐܸܦܪܘܿܥ.

³¹ܩܕ݂ܵܡ ܟܠܹܗ ܥܲܡܹܗ.

³²ܘܲܒ̣ܕ݂ܵܪܹ̈ܐ ܕܒܲܝܬܹ̇ܗ ܕܡܵܪܝܵܐ.

³³ܘܲܒ̣ܓ̣ܵܘܹܟ̣ܝ ܐܘܿܪܸܫܠܸܡ.