Read Aramaic Peshita Psalms 118 Bible Online

Psalms 118 - Aramaic Peshita bible

Psalms 118

¹ܛܘܼܒܲܝܗܘܿܢ ܠܐܲܝܠܹܝܢ ܕܲܕ݂ܠܵܐ ܡܘܼܡ ܐܸܢܘܿܢ ܒܐܘܼܪܚܵܐ.

²ܘܲܡܗܲܠܟ̣ܝܼܢ ܒܢܵܡܘܿܣܹܗ ܕܡܵܪܝܵܐ.

³ܛܘܼܒܲܝܗܘܿܢ ܠܐܲܝܠܹܝܢ ܕܢܵܛ݁ܪܝܼܢ ܣܵܗܕ̇ܘܼܬܹܗ.

⁴ܘܲܒ̣ܟ̣ܠܹܗ ܠܸܒ̇ܗܘܿܢ ܒܵܥܹܝܢ ܠܹܗ.

⁵ܘܠܵܐ ܥܒܲܕ݂ܘ ܥܲܘܠܵܐ ܘܗܲܠܸܟ̣ܘ ܒܐܘܼܪ̈ܚܵܬܹܗ.

⁶ܐܲܢ̄ܬ̇ ܦܲܩܸܕ̇ܬ̇ ܕܢܸܬ̣ܢܲܛܪܘܼܢ ܦܘܼܩܕܵܢܲܝ̈ܟ ܪܲܘܪ̱ܒ̣ܵܐܝܼܬ̣.

⁷ܐܸܫܬ̇ܘܿܦ ܕܹܝܢ ܡܲܬ̣ܩ̈ܢܵܢ ܐܘܼܪ̈ܚܵܬ̣ܝ ܕܐܸܛܲܪ ܦܘܼܩܕܵܢܲܝ̈ܟ.

⁸ܘܠܵܐ ܐܸܒ̣ܗܲܬ̣ ܡܵܐ ܕܢܸܛܪܹܬ̣ ܟܠܗܘܿܢ ܦܘܼܩܕܵܢܲܝ̈ܟ.

⁹ܐܲܘܕܸ̇ܐ ܠܵܟ݂ ܒܲܬ̣ܪܝܼܨܘܼܬܹܗ ܕܠܹܒ̇ܝ.

¹⁰ܡܵܐ ܕܝܸܠܦܹ̇ܬ̣ ܕܝܼܢܹ̈ܐ ܕܙܲܕ̇ܝܼܩܘܼܬ̣ܵܟ݂.

¹¹ܦܘܼܩܕܵܢܲܝ̈ܟ ܢܸܛ̇ܪܹܬ̣ ܠܵܐ ܬܲܪܦܹܝܢܝ ܠܥܵܠܲܡ.

¹²(1) ܒܡܵܢܵܐ ܡܕܲܟܸ̇ܐ ܛܲܠܝܵܐ ܐܘܼܪܚܹܗ ܕܢܸܛܲܪ ܦܘܼܩܕܸܢܲܝ̈ܟ.

¹³(2) ܒܟ̣ܠܹܗ ܠܹܒ̇ܝ ܥܲܩܸܒ̣ܬܵܟ݂ ܠܵܐ ܬܸܛܥܹܝܢܝ ܡ̣ܢ ܦܘܼܩܕܵܢܲܝ̈ܟ.

¹⁴(3) ܒܠܹܒ̇ܝ ܛܲܫܝܼ݁ܬ̣ ܡܸܠܲܝ̈ܟ ܕܠܵܐ ܐܸܚܛܸܐ ܠܵܟ݂.

¹⁵(4) ܒܪܝܼܟܲܬ̇ ܡܵܪܝܵܐ ܐܲܠܸܦܲܝܢܝ ܦܘܼܩܕܵܢܲܝ̈ܟ.

¹⁶(5) ܒܣܸܦ̈ܘܵܬ̣ܝ ܬܢܹܝ݁ܬ̣ ܟܠܗܘܿܢ ܕܝܼܢܹ̈ܐ ܕܙܲܕ̇ܝܼܩܘܼܬ̣ܵܟ݂.

¹⁷(6) ܠܐܘܼܪܚܵܐ ܕܣܵܗܕ̇ܘܼܬ̣ܵܟ݂ ܪܸܚܡܹ̇ܬ̣ ܛܵܒ̣ ܡ̣ܢ ܟܠܹܗ ܥܘܼܬ̣ܪܵܐ.

¹⁸(7) ܒܦܘܼܩܕܵܢܲܝ̈ܟ ܪܢܹܝ݁ܬ̣ ܘܝܸܕ݂ܥܹ̇ܬ̣ ܐܘܼܪ̈ܚܵܬ̣ܵܟ݂.

¹⁹(8) ܒܢܵܡܘܿܣܵܟ݂ ܪܢܹܝܬ̣ ܕܠܵܐ ܐܸܛܥܸܐ ܡܸܠܲܝ̈ܟ.

²⁰(1) ܥܢܝܼ ܠܥܲܒ̣ܕܵܟ݂ ܕܐܸܚܸܐ ܘܐܸܛܲܪ ܡܸܠܲܝ̈ܟ.

²¹(2) ܓܠܝܼ ܥܲܝܢܲܝ̈ ܕܐܸܚܙܸܐ ܬܸܕ݂ܡ̱ܪ̈ܵܬ̣ܵܐ ܕܲܒ̣ܢܵܡܘܿܣܵܟ݂.

²²(3) ܥܵܡܘܿܪܵܐ ܐ̄ܢܵܐ ܥܲܡܵܟ݂ ܠܵܐ ܬܲܛܫܸܐ ܡܹܢܝ ܦܘܼܩܕܵܢܲܝ̈ܟ.

²³(4) ܨܒ̣ܵܬ݀ ܢܲܦ̮ܫܝ ܘܐܸܬ̣ܪܲܓ̣ܪ̱ܓܲܬ݀ ܠܕ݂ܝܼܢܲܝ̈ܟ ܒܟ̣ܠܙܒܲܢ.

²⁴(5) ܟܐܲܝܬ̇ ܒܥܲܡܡܹ̈ܐ ܘܠܝܼܛܝܼܢ ܐܸܢܘܿܢ ܐܲܝܠܹܝܢ ܕܛܵܥܹܝ݁ܢ ܡ̣ܢ ܦܘܼܩܕܵܢܲܝ̈ܟ.

²⁵(6) ܐܲܥܒܲܪ ܡܹܢܝ ܚܸܣܕܵܐ ܡܸܛܠ ܕܣܵܗܕ̇ܘܼܬ̣ܵܟ݂ ܢܸܛ݁ܪܹܬ̣.

²⁶(7) ܝܵܬ̣ܒ̇ܝܼܢ ܗ̄ܘ̣ܵܘ ܥܲܘܵܠܹ̈ܐ ܘܪܵܢܹܝܢ ܗ̄ܘ̣ܵܘ ܒܝܼ.

²⁷(8) ܘܐܸܢܵܐ ܒܦܘܼܩܕܵܢܲܝ̈ܟ ܪܵܢܹܐ ܗ̄ܘܹ̇ܝܬ̣.

²⁸(9) ܒܣܵܗܕ̇ܘܼܬ̣ܵܟ݂ ܪܢܹܝܬ̣ ܘܲܒ̣ܬܲܪܥܝܼܬ̣ܵܟ݂ ܛܵܒ̣ܬ̣ܵܐ.

²⁹(1) ܢܸܩܦܲܬ݀ ܢܲܦ̮ܫܝ ܠܥܲܦܪܵܐ ܐܲܚܵܢܝ ܐܲܝܟ݂ ܡܸܠܬ̣ܵܟ݂.

³⁰(2) ܐܘܼܪ̈ܚܵܬ̣ܝ ܚܲܘܝܼܬܵܟ݂ ܘܲܥܢܲܝܬܵܢܝ ܐܲܠܸܦܲܝܢܝ ܢܵܡܘܿܣܵܟ݂.

³¹(3) ܐܘܼܪܚܵܐ ܕܦܘܼܩܕܸܢܲܝ̈ܟ ܚܲܘܵܢܝ ܘܐܸܪܢܸܐ ܒܬܸܕ݂ܡ̱ܪ̈ܵܬ̣ܵܟ݂.

³²(4) ܐܸܬ̇ܛܲܪܦܲܬ݀ ܢܲܦ̮ܫܝ ܒܪܸܢܝܵܐ ܐܲܚܵܢܝ ܐܲܝܟ݂ ܡܸܠܬ̣ܵܟ݂.

³³(5) ܐܘܼܪܚܵܐ ܕܥܲܘܵܠܹ̈ܐ ܐܲܥܒܲܪ ܡܹܢܝ ܘܢܵܡܘܿܣܵܟ݂ ܐܲܠܸܦܲܝܢܝ.

³⁴(6) ܐܘܼܪܚܵܐ ܕܗܲܝܡܵܢܘܼܬ̣ܵܟ݂ ܓܒܹ̇ܝܬ̣ ܘܲܒ̣ܕ݂ܝܼܢܲܝ̈ܟ ܨܒܹ̇ܝܬ̣.

³⁵(7) ܢܸܩܦܹ̇ܬ̣ ܠܣܵܗܕ̇ܘܼܬ̣ܵܟ݂ ܡܵܪܝܵܐ ܠܵܐ ܬܲܒ̣ܗܸܬܲܝܢܝ.

³⁶(8) ܒܐܘܼܪܚܵܐ ܕܦܘܼܩܕܵܢܲܝ̈ܟ ܗܲܠܟܹ̇ܬ̣ ܡܸܛܠ ܕܚܲܕ̇ܝܼܬܵܢܝ.

³⁷(1) ܐܲܠܸܦܲܝܢܝ ܡܵܪܝܵܐ ܐܘܼܪܚܵܐ ܕܦܘܼܩܕܵܢܲܝ̈ܟ ܘܐܸܛܲܪ ܐܸܢܘܿܢ.

³⁸(2) ܣܲܟܸ̇ܠܲܝܢܝ ܕܐܸܛܲܪ ܢܵܡܘܿܣܵܟ݂ ܘܐܸܛܪܝܼܘܗܝ ܡ̣ܢ ܟܠܹܗ ܠܹܒ̇ܝ.

³⁹(3) ܗܲܠܸܟܲܝܢܝ ܒܲܫܒ̣ܝܼܠܵܐ ܕܦܘܼܩܕܵܢܲܝ̈ܟ ܡܸܛܠ ܕܒܹܗ ܨܒܹ̇ܝܬ̣.

⁴⁰(4) ܐܲܦܢܵܐ ܠܹܒ̇ܝ ܠܣܵܗܕ̇ܘܼܬ̣ܵܟ݂ ܘܠܵܐ ܠܡܲܬ̣ܠܹ̈ܐ.

⁴¹(5) ܐܲܥܒܲܪ ܥܲܝܢܲܝ̈ ܕܠܵܐ ܢܸܚܙ̈ܝܵܢ ܕܲܓܵܠܘܼܬ̣ܵܐ ܘܒ̣ܐܘܼܪ̈ܚܵܬ̣ܵܟ݂ ܐܲܚܵܢܝ.

⁴²(6) ܐܲܫܲܪ ܡܸܠܬ̣ܵܟ݂ ܠܥܲܒ̣ܕܵܟ݂ ܕܕ݂ܵܚܹܠ ܠܵܟ݂.

⁴³(7) ܐܲܥܒܲܪ ܡܹܢܝ ܚܸܣܕܵܐ ܡܸܛܠ ܕܕ݂ܝܼܢܲܝ̈ܟ ܫܲܦܝܼܪܝܼܢ ܐܸܢܘܿܢ.

⁴⁴(8) ܨܒܹ̇ܝܬ̣ ܒܦܘܼܩܕܵܢܲܝ̈ܟ ܘܲܒ̣ܙܲܕ̇ܝܼܩܘܼܬ̣ܵܟ݂ ܐܲܚܵܢܝ.

⁴⁵(1) ܢܹܐܬ̣ܘܿܢ ܥܠܲܝ ܪ̈ܲܚܡܲܝܟ ܡܵܪܝܵܐ ܘܦܘܼܪܩܵܢܵܟ݂ ܕܐܸܡܲܪ݂ܬ̇.

⁴⁶(2) ܐܸܬܸ̇ܠ ܦܸܬ̣ܓ̣ܵܡܵܐ ܠܲܡܚܲܣܕ݂ܵܢܲܝ̈ ܡܸܛܠ ܕܐܸܬ̇ܬܲܟ̣ܠܹ̇ܬ̣ ܥܲܠ ܡܸܠܲܝ̈ܟ.

⁴⁷(3) ܠܵܐ ܬܸܥܢܲܕ݂ ܡ̣ܢ ܦܘܼܡܝ ܡܸܠܬ̣ܵܐ ܕܩܘܼܫܬܵܐ ܡܸܛܠ ܕܲܠܕ݂ܝܼܢܲܝ̈ܟ ܣܲܟ̇ܝܼܬ̣.

⁴⁸(4) ܐܸܛܲܪ ܢܵܡܘܿܣܵܟ݂ ܠܥܵܠܲܡ ܥܵܠܡܝܼܢ ܘܐܹܗܲܠܸܟ݂ ܒܲܪܘܲܚܬ̣ܵܐ.

⁴⁹(5) ܡܸܛܠ ܕܲܒ̣ܦܘܼܩܕܵܢܲܝ̈ܟ ܨܒܹ̇ܝܬ̣.

⁵⁰(6) ܐܹܡܲܠܸܠ ܒܙܲܕ̇ܝܼܩܘܼܬ̣ܵܐ ܩܕ݂ܵܡ ܡܲܠ̈ܟܹ̇ܐ ܘܠܵܐ ܐܸܒ̣ܗܲܬ̣.

⁵¹(7) ܘܐܸܪܢܸܐ ܒܦܘܼܩܕܵܢܲܝ̈ܟ ܕܪܸܚܡܹ̇ܬ̣.

⁵²(8) ܘܐܲܪܝܼܡ ܐܝܼ̈ܕܲܝ ܠܘܵܬ̣ ܦܘܼܩܕܵܢܲܝ̈ܟ ܕܪܸܚܡܹ̇ܬ̣.

⁵³(9) ܘܐܸܪܢܸܐ ܒܗܘܿܢ ܒܦܘܼܩܕܵܢܲܝ̈ܟ ܘܐܸܫܬܲܒܲܚ ܒܗܲܝܡܵܢܘܼܬ̣ܵܟ݂.

⁵⁴(1) ܥܗܲܕ݂ ܡܸܠܬ̣ܵܟ݂ ܠܥܲܒ̣ܕܵܟ݂ ܗܵܝ̇ ܕܐܲܬ̣ܟܸ̇ܠܬܵܝܗܝ.

⁵⁵(2) ܘܒ̣ܵܗ̇ ܐܸܬ̣ܒܲܝܐܹܬ̣ ܒܡܘܼܟܵܟ̣ܝ.

⁵⁶(3) ܡܸܛܠ ܕܡܹܐܡܪܵܟ݂ ܐܲܚܝܲܢܝ.

⁵⁷(4) ܥܲܘܵܠܹ̈ܐ ܐܲܠܨܘܼܢܝ ܘܡ̣ܢ ܢܵܡܘܿܣܵܟ݂ ܠܵܐ ܣܛܹ̇ܝܬ̣.

⁵⁸(5) ܐܸܬ̇ܕܲܟ̣ܪܹܬ̣ ܕܝܼܢܲܝ̈ܟ ܡܵܪܝܵܐ ܕܡ̣ܢ ܥܵܠܲܡ ܘܐܸܬ̣ܒܲܝܐܹܬ̣.

⁵⁹(6) ܘܲܗ݀ܘܵܘ ܠܝܼ ܠܡܲܪܕ̇ܘܼܬ̣ܵܐ.

⁶⁰(7) ܟܡܝܼܪܘܼܬ̣ܵܐ ܐܸܚܲܕ݂ܬܲܢܝ ܡ̣ܢ ܚܲܛܵܝܹ̈ܐ ܕܲܫܒܲܩܘ ܢܵܡܘܿܣܵܟ݂.

⁶¹(8) ܙܡܝܼܪܬܵܐ ܗܘ݀ܵܘ ܠܝܼ ܦܘܼܩܕܵܢܲܝܟ ܒܹܝܬ̣ ܬܲܘܬܵܒ̣ܘܼܬ̣ܝ.

⁶²(9) ܥܸܗ̇ܕܹ̇ܬ̣ ܒܠܸܠܝܵܐ ܫܡܵܟ݂ ܡܵܪܝܵܐ ܘܢܸܛ݁ܪܹܬ̣ ܢܵܡܘܿܣܵܟ݂.

⁶³(10) ܘܐܸܬ̣ܒܲܝܐܹ̇ܬ̣ ܡܸܛܠ ܕܢܸܛ݁ܪܹܬ̣ ܦܘܼܩܕܵܢܲܝ̈ܟ.

⁶⁴(1) ܒܦܲܠܓ̇ܘܼܬܹܗ ܕܡܵܪܝܵܐ ܪܢܹܝ݁ܬ̣ ܕܐܸܛܲܪ ܦܘܼܩܕܵܢܲܝ̈ܟ.

⁶⁵(2) ܣܲܟ̇ܝܼܬ̣ ܠܐܲܦܲܝ̈ܟ ܡ̣ܢ ܟܠܹܗ ܠܹܒ̇ܝ ܐܲܚܵܢܝ ܐܲܝܟ݂ ܡܸܠܬ̣ܵܟ݂.

⁶⁶(3) ܐܸܬ̣ܚܲܫܒܹ̇ܬ̣ ܐܘܼܪ̈ܚܵܬ̣ܝ ܘܐܲܗܦ̇ܟܹܬ̣ ܪܸ̈ܓ̣ܠܲܝ ܠܲܫܒ̣ܝܼܠܲܝ̈ܟ.

⁶⁷(4) ܐܸܬ̇ܛܲܝ݁ܒܹܬ̣ ܘܠܵܐ ܐܸܫܬܲܘܚ̇ܪܹܬ̣ ܕܐܸܛܲܪ ܦܘܼܩܕܵܢܲܝ̈ܟ.

⁶⁸(5) ܚܲܒ̣ܠܹ̈ܐ ܕܥܲܘܵܠܹ̈ܐ ܥܲܪܙܠܘܼܢܝ ܘܡ̣ܢ ܢܵܡܘܿܣܵܟ݂ ܠܵܐ ܣܛܹ̇ܝܬ̣.

⁶⁹(6) ܒܦܸܠܓܹ̇ܗ ܕܠܸܠܝܵܐ ܩܵܡܹ̇ܬ̣ ܕܐܲܘܕܸ̇ܐ ܠܵܟ݂ ܥܲܠ ܕܝܼܢܲܝ̈ܟ ܙܲܕ̇ܝܼܩܵܐ.

⁷⁰(7) ܪܵܚܡܵܐ ܐ̄ܢܵܐ ܕܟ̣ܠܗܘܿܢ ܕܵܚܠܲܝ̈ܟ ܘܕܲܐܝܠܹܝܢ ܕܢܵܛ݁ܪܝܼܢ ܦܘܼܩܕܵܢܲܝ̈ܟ.

⁷¹(8) ܪ̈ܲܚܡܲܝܟ ܡܵܪܝܵܐ ܡܲܠܝܵܐ ܐܲܪܥܵܐ ܐܲܠܸܦܲܝܢܝ ܦܘܼܩܕܵܢܲܝ̈ܟ.

⁷²(1) ܛܵܒ̣ܬ̣ܵܐ ܥܒܸܕ݂ ܥܲܡ ܥܲܒ̣ܕܵܟ݂ ܡܵܪܝܵܐ ܐܲܝܟ݂ ܕܐܸܡܲܪܬ̇.

⁷³(2) ܛܲܥܡܵܐ ܘܛܲܝܒ̇ܘܼܬ̣ܵܐ ܘܡܲܕ̇ܥܵܐ ܐܲܠܸܦܲܝܢܝ.

⁷⁴(3) ܡܸܛܠ ܕܗܲܝܡ̱ܢܹ̇ܬ̣ ܒܦܘܼܩܕܵܢܲܝ̈ܟ.

⁷⁵(4) ܥܲܕ݂ܠܵܐ ܐܸܬ̣ܡܲܟ̇ܟܹܬ̣ ܗܲܝܡ̱ܢܹ̇ܬ̣ ܘܡܹܐܡܪܵܟ݂ ܢܸܛ݁ܪܹܬ̣.

⁷⁶(5) ܛܵܒ̣ ܐܲܢ̄ܬ̇ ܡܵܪܝܵܐ ܘܡܲܛܐܸܒ̣ ܐܲܠܸܦܲܝܢܝ ܦܘܼܩܕܵܢܲܝ̈ܟ.

⁷⁷(6) ܣܓ̣ܝܼ ܥܲܘܠܵܐ ܕܫܲܒ̣ܗ̱ܪ̈ܵܢܹܐ ܘܐܸܢܵܐ ܒܟ̣ܠܹܗ ܠܹܒ̇ܝ ܢܸܛ݁ܪܹܬ̣ ܦܘܼܩܕܵܢܲܝ̈ܟ.

⁷⁸(7) ܐܸܬ̣ܓ̇ܒܸܢ ܠܸܒ̇ܗܘܿܢ ܐܲܝܟ݂ ܚܲܠܒ̣ܵܐ ܘܐܸܢܵܐ ܢܸܛ݁ܪܹܬ̣ ܢܵܡܘܿܣܵܟ݂.

⁷⁹(8) ܛܵܒ̣ ܠܝܼ ܕܐܸܬ̣ܡܲܟ̇ܟܹ̇ܬ̣ ܕܐܹܠܲܦ ܦܘܼܩܕܵܢܲܝ̈ܟ.

⁸⁰(9) ܛܐܸܒ̣ ܠܝܼ ܢܵܡܘܿܣܹܗ ܕܦܘܼܡܵܟ݂ ܡ̣ܢ ܐܲܠܦܹ̈ܐ ܕܕܲܗܒ̣ܵܐ ܘܲܕ݂ܣܹܐܡܵܐ.

⁸¹(1) ܐܝܼ̈ܕܲܝܟ ܥܲܒ̣ܕܵܢܝ̈ ܘܐܲܬ̣ܩܢܵܢܝ̈ ܐܲܠܸܦܲܝܢܝ ܢܵܡܘܿܣܵܟ݂.

⁸²(2) ܕܢܸܚܙܘܿܢ ܕܵܚܠܲܝ̈ܟ ܘܢܸܚܕ̇ܘܿܢ ܕܲܠܡܸܠܬ̣ܵܟ݂ ܣܲܒ̇ܪܹܬ̣.

⁸³(3) ܝܸܕ݂ܥܹ̇ܬ̣ ܕܙܲܕ̇ܝܼܩܝܼܢ ܐܸܢܘܿܢ ܕܝܼܢܲܝ̈ܟ ܡܵܪܝܵܐ ܘܗܲܝܡܵܢܘܼܬ̣ܵܟ݂ ܡܲܟܸ̇ܟ̣ܬܲܢܝ.

⁸⁴(4) ܢܸܗܘܘܿܢ ܪ̈ܲܚܡܲܝܟ ܠܒ̣ܘܼܝܵܐܝ ܐܲܝܟ݂ ܕܐܸܡܲܪ݂ܬ̇ ܠܥܲܒ̣ܕܵܟ݂.

⁸⁵(5) ܢܹܐܬ̣ܘܿܢ ܥܠܲܝ ܪ̈ܲܚܡܲܝܟ ܘܐܸܚܸܐ ܡܸܛܠ ܕܲܒ̣ܢܵܡܘܿܣܵܟ݂ ܐܸܬ̣ܝܲܠܦܹ̇ܬ.

⁸⁶(6) ܢܸܒ̣ܗ̱ܬ̣ܘܼܢ ܥܲܘܵܠܹ̈ܐ ܕܲܒ̣ܥܲܘܠܵܐ ܡܲܟ̇ܟ̣ܘܼܢܝ ܘܐܸܢܵܐ ܪܢܹܝ݁ܬ̣ ܒܦܘܼܩܕܵܢܲܝ̈ܟ.

⁸⁷(7) ܢܸܬ̣ܦܢܘܿܢ ܠܘܵܬ̣ܝ ܕܵܚܠܲܝ̈ܟ ܘܐܲܝܠܹܝܢ ܕܝܵܕ݂ܥܝܼ݁ܢ ܣܵܗܕ̇ܘܼܬ̣ܵܟ݂.

⁸⁸(8) ܢܸܪܢܸܐ ܠܹܒ̇ܝ ܒܦܘܼܩܕܵܢܲܝ̈ܟ ܘܠܵܐ ܐܸܒ̣ܗܲܬ̣.

⁸⁹(1) ܪܸܓܲܬ݀ ܢܲܦ̮ܫܝ ܠܦܘܼܪܩܵܢܵܟ݂ ܘܲܠܡܸܠܬ̣ܵܟ݂ ܣܲܒ̇ܪܹܬ̣.

⁹⁰(2) ܣܲܟ̇ܝܼ ܥܲܝܢܲܝ̈ ܠܡܹܐܡܪܵܟ݂ ܕܐܸܡܲܬ̣ܝ ܬܒܲܝܐܲܢܝ.

⁹¹(3) ܡܸܛܠ ܕܲܗ݀ܘܹܝܬ̣ ܐܲܝܟ݂ ܙܸܩܵܐ ܒܲܓ̣ܠܝܼܕ݂ܵܐ ܘܦܘܼܩܕܵܢܲܝ̈ܟ ܠܵܐ ܛܥܹܝ݁ܬ̣.

⁹²(4) ܟܡܵܐ ܐܸܢܘܿܢ ܝܲܘ̈ܡܵܬܹܗ ܕܥܲܒ̣ܕܵܟ݂ ܘܐܸܡܲܬ̣ܝ ܥܵܒܹ̇ܕ݂ ܐܲܢ̄ܬ̇ ܠܝܼ ܕܝܼܢܵܐ ܡ̣ܢ ܪ̈ܵܕ݂ܘܿܦܲܝ.

⁹³(5) ܚܦܲܪܘ ܠܝܼ ܓܘܼܡܵܨܵܐ ܥܲܘܵܠܹ̈ܐ ܕܠܵܐ ܡ̣ܢ ܢܵܡܘܿܣܵܟ݂.

⁹⁴(6) ܟܠܗܘܿܢ ܦܘܼܩܕܵܢܲܝ̈ܟ ܡܗܲܝܡ̱ܢܝܼܢ ܘܥܲܘܵܠܹ̈ܐ ܪܲܕ݂ܦܘܼܢܝ.

⁹⁵(7) ܥܲܕ݂ ܩܲܠܝܼܠ ܡܲܘܒ̇ܕ݂ܝܼܢ ܗ̄ܘ̣ܵܘ ܠܝܼ ܒܐܲܪܥܵܐ ܘܐܸܢܵܐ ܠܵܐ ܫܸܒ̣ܩܹ̇ܬ̣ ܦܘܼܩܕܵܢܲܝ̈ܟ.

⁹⁶(8) ܐܲܝܟ݂ ܪ̈ܲܚܡܲܝܟ ܐܲܚܵܢܝ ܕܐܸܛܲܪ ܣܵܗܕ̇ܘܼܬܹܗ ܕܦܘܼܡܵܟ݂.

⁹⁷(1) ܠܥܵܠܲܡ ܐܲܢ̄ܬ̇ܘܼ ܡܵܪܝܵܐ ܘܡܸܠܬ̣ܵܟ݂ ܩܲܝܵܡܵܐ ܒܲܫܡܲܝܵܐ.

⁹⁸(2) ܘܲܠܕ݂ܵܪܕܵܪ̈ܝܼܢ ܗܲܝܡܵܢܘܼܬ̣ܵܟ݂.

⁹⁹(3) ܬܲܩܸܢܬ̇ ܐܲܪܥܵܐ ܘܐܲܩܝܼܡܬܵܗ̇.

¹⁰⁰(4) ܐܸܠܘܼܠܵܐ ܢܵܡܘܿܣܵܟ݂ ܕܲܗ݀ܘܵܐ ܠܝܼ ܪܸܢܝܵܐ ܐܵܒܹ̇ܕ݂ ܗ̄ܘܹ̇ܝܬ̣ ܒܡܘܼܟܵܟ̣ܝ.

¹⁰¹(5) ܠܥܵܠܲܡ ܠܵܐ ܐܸܛܥܸܐ ܦܘܼܩܕܵܢܲܝ̈ܟ ܡܸܛܠ ܕܲܒ̣ܗܘܿܢ ܐܸܢܘܿܢ ܚܲܝܲܝ̈.

¹⁰²(6) ܕܝܼܠܵܟ݂ ܐ̄ܢܵܐ ܦܲܨܵܢܝ ܡܸܛܠ ܕܦܘܼܩܕܵܢܲܝ̈ܟ ܢܸܛܪܹܬ̣.

¹⁰³(7) ܥܠܲܝ ܣܲܟ̇ܝܼܘ ܥܲܘܵܠܹ̈ܐ ܕܢܲܘܒ̇ܕ݂ܘܼܢܵܢܵܝ ܘܣܵܗܕ̇ܘܼܬ̣ܵܟ݂ ܐܸܣܬܲܟ̇ܠܹܬ̣.

¹⁰⁴(8) ܠܟ̣ܠ ܣܲܘܦܵܐ ܚܙܹ̇ܝܬ̣ ܩܸܨܵܐ ܘܛܵܒ̣ ܪܘܝܼܚ ܦܘܼܩܕܵܢܵܟ݂.

¹⁰⁵(1) ܡܵܐ ܪܸܚ̇ܡܹܬ̣ ܢܵܡܘܿܣܵܟ݂ ܘܟ̣ܠܹܗ ܝܲܘܡܵܐ ܗܘ݀ܝܘܼ ܪܹܢܝܝ.

¹⁰⁶(2) ܚܲܟܸܡܲܝܢܝ ܡ̣ܢ ܒܥܸܠܕ̇ܒ̣ܵܒܲܝ̈ ܡܸܛܠ ܕܦܘܼܩܕܵܢܲܝ̈ܟ ܢܸܛ݁ܪܹܬ̣.

¹⁰⁷(3) ܡ̣ܢ ܟܠܗܘܿܢ ܡܲܠܦܵܢܲܝ̈ ܣܲܟܸ̇ܠܲܝܢܝ ܡܸܛܠ ܕܣܵܗܕ̇ܘܼܬ̣ܵܟ݂ ܗ݀ܘܵܬ̣ ܠܝܼ ܪܸܢܝܵܐ.

¹⁰⁸(4) ܝܲܬ̇ܝܼܪ ܡ̣ܢ ܩܲܫܝܼܫܹ̈ܐ ܐܸܣܬܲܟ̇ܠܹܬ̣ ܡܸܛܠ ܕܦܘܼܩܕܵܢܲܝ̈ܟ ܢܸܛ݁ܪܹܬ̣.

¹⁰⁹(5) ܡ̣ܢ ܟܠܵܗ̇ ܐܘܼܪܚܵܐ ܒܝܼܫܬܵܐ ܟܠܹ̇ܝܬ̣ ܪܸ̈ܓ̣ܠܲܝ ܕܐܸܛܲܪ ܦܘܼܩܕܵܢܲܝ̈ܟ.

¹¹⁰(6) ܡ̣ܢ ܕܝܼ̈ܢܲܝܟ ܠܵܐ ܣܛܹ̇ܝܬ̣ ܡܸܛܠ ܕܐܲܢ̄ܬ̇ ܐܲܠܸܦܬܵܢܝ.

¹¹¹(7) ܚܲܠ̈ܝܵܢ ܡܸܠܲܝ̈ܟ ܠܲܫܡܲܝ̈ ܚܹܟ̇ܝ ܛܵܒ̣ ܡ̣ܢ ܕܸܒ̣ܫܵܐ ܠܦܘܼܡܵܐ.

¹¹²(8) ܒܦܘܼܩܕܵܢܲܝ̈ܟ ܪܢܹ̇ܝܬ̣ ܡܸܛܠ ܗܵܢܵܐ ܣܢܹ̇ܝܬ̣ ܟܠܵܗ̇ ܐܘܼܪܚܵܐ ܕܥܲܘܵܠܹ̈ܐ.

¹¹³(1) ܫܪܵܓ̣ܵܐ ܗ̄ܝ̣ ܡܸܠܬ̣ܵܟ݂ ܠܪܸ̈ܓ̣ܠܲܝ ܘܢܘܼܗܪܵܐ ܠܲܫܒ̣ܝܼ̈ܠܲܝ.

¹¹⁴(2) ܝܑܼܡܝܼܬ̣ ܘܐܲܫܪܹܬ̣ ܕܐܸܛܲܪ ܕܝܼܢܹ̈ܐ ܕܙܲܕ̇ܝܼܩܘܼܬ̣ܵܟ݂.

¹¹⁵(3) ܐܸܬ̣ܡܲܟ̇ܟܹܬ̣ ܪܲܘܪ̱ܒ̣ܵܐܝܼܬ̣ ܡܵܪܝܵܐ ܐܲܚܵܢܝ ܐܲܝܟ݂ ܡܸܠܬ̣ܵܟ݂.

¹¹⁶(4) ܒܡܸܠܵܘ̈ܗܝ ܕܦܘܼܡܝ ܨܒ̣ܝܼ ܡܵܪܝܵܐ ܘܡ̣ܢ ܕܝܼܢܲܝ̈ܟ ܐܲܠܸܦܲܝܢܝ.

¹¹⁷(5) ܢܲܦ̮ܫܝ ܒܐܝܼܕܲܝ̈ܟ ܗ̄ܝ̣ ܒܟ̣ܠܙܒܲܢ ܘܢܵܡܘܿܣܵܟ݂ ܠܵܐ ܛܥܹ̇ܝܬ̣.

¹¹⁸(6) ܣܵܡ̣ܘ ܠܝܼ ܚܲܛܵܝܹ̈ܐ ܦܲܚܹ̈ܐ ܘܡ̣ܢ ܦܘܼܩܕܵܢܲܝ̈ܟ ܠܵܐ ܣܛܹ̇ܝܬ̣.

¹¹⁹(7) ܝܸܪܬܹ̇ܬ̣ ܣܵܗܕ̇ܘܼܬ̣ܵܟ݂ ܠܥܵܠܲܡ ܡܸܛܠ ܕܒ̣ܘܼܣܵܡܵܐ ܗ̄ܝ̣ ܕܠܹܒ̇ܝ.

¹²⁰(8) ܐܲܦܢܝܼܬ̣ ܠܹܒ̇ܝ ܕܐܸܥܒܸ̇ܕ݂ ܦܘܼܩܕܵܢܲܝ̈ܟ ܠܥܵܠܲܡ ܒܲܫܪܵܪܵܐ.

¹²¹(1) ܣܢܹ̇ܝܬ̣ ܠܥܲܘܵܠܹ̈ܐ ܘܢܵܡܘܿܣܵܟ݂ ܪܸܚܡܹ̇ܬ̣.

¹²²(2) ܣܸܬܵܪܝ ܘܒܹܝܬ̣ ܓܲܘܣܝ ܐܲܢ̄ܬ̇ܘܼ ܘܲܠܡܸܠܬ̣ܵܟ݂ ܣܲܒ̇ܪܹܬ̣.

¹²³(3) ܥܒܲܪܘ ܡܹܢܝ ܥܲܘܵܠܹ̈ܐ ܕܐܸܛܲܪ ܦܘܼܩܕܵܢܵܘ̈ܗܝ ܕܐܲܠܵܗܝ.

¹²⁴(4) ܐܲܫܲܪܲܝܢܝ ܒܡܸܠܬ̣ܵܟ݂ ܘܐܸܚܸܐ ܘܠܵܐ ܬܲܒ̣ܗܸܬܲܝܢܝ ܡ̣ܢ ܣܲܒ̣ܪ̱ܝ.

¹²⁵(5) ܣܲܝܲܥܲܝܢܝ ܘܐܸܬ̣ܦܪܸܩ ܘܐܸܬ̣ܝܲܠܲܦ ܒܦܘܼܩܕܵܢܲܝ̈ܟ.

¹²⁶(6) ܒܟ̣ܠܙܒܲܢ ܐܲܣܠܝܼ݁ܬ̣ ܠܟ̣ܠ ܕܛܵܥܹ̇ܝܢ ܡܸܢܵܟ݂ ܡܸܛܠ ܕܥܲܘܠܵܐ ܗ̄ܘ̣ ܪܸܢܝܼܗܘܿܢ.

¹²⁷(7) ܣܲܡܸܟܲܝܢܝ ܘܐܸܬ̣ܦܪܸܩ ܘܐܸܪܢܸܐ ܒܟ̣ܠܙܒܲܢ ܒܦܘܼܩܕܵܢܲܝ̈ܟ.

¹²⁸(8) ܩܦܘܿܕ݂ ܒܸܣܪ̱ܝ ܡ̣ܢ ܕܸܚܠ̱ܬ̣ܵܟ݂ ܘܡ̣ܢ ܕܝܼܢܲܝ̈ܟ ܕܸܚܠܹ̇ܬ̣.

¹²⁹(1) ܥܵܒܹ̇ܕ݂ ܕܝܼܢܵܐ ܘܙܲܕ̇ܝܼܩܘܼܬ̣ܵܐ ܠܵܐ ܬܸܫܒ̇ܘܿܩܲܝܢܝ ܒܐܝܼܕ݂ܵܐ ܕܛܵܠܘܿܡܲܝ̈.

¹³⁰(2) ܒܲܣܸܡܲܝܗܝ ܠܥܲܒ̣ܕܵܟ݂ ܒܛܵـ̈ــܒ̣ܵܬ̣ܵܐ ܘܠܵܐ ܢܸܥܫܩܘܼܢܵܢܝ ܫܲܒ̣ܗ̱ܪ̈ܵܢܹܐ.

¹³¹(3) ܥܲܝܢܲܝ̈ ܣܲܟ̇ܝܼ ܠܦܘܼܪܩܵܢܵܟ݂ ܘܲܠܡܹܐܡܪܵܐ ܕܙܲܕ̇ܝܼܩܘܼܬ̣ܵܟ݂.

¹³²(4) ܥܒܸܕ݂ ܠܥܲܒ̣ܕܵܟ݂ ܐܲܝܟ݂ ܪ̈ܲܚܡܲܝܟ ܘܐܲܠܸܦܲܝܢܝ ܢܵܡܘܿܣܵܟ݂.

¹³³(5) ܥܲܒ̣ܕܵܟ݂ ܐ̄ܢܵܐ ܣܲܟܸ̇ܠܲܝܢܝ ܘܐܸܕܲܥ ܣܵܗܕ̇ܘܼܬ̣ܵܟ݂.

¹³⁴(6) ܙܲܒ̣ܢܵܐ ܗ̄ܘ̣ ܠܡܸܦܠ̱ܚܹܗ ܠܡܵܪܝܵܐ ܘܗܵܐ ܒܲܛܸܠܘ ܢܵܡܘܿܣܵܟ݂.

¹³⁵(7) ܡܸܛܠ ܗܵܢܵܐ ܪܸܚܡܹ̇ܬ̣ ܦܘܼܩܕܵܢܲܝ̈ܟ ܛܵܒ̣ ܡ̣ܢ ܕܲܗܒ̣ܵܐ ܘܛܵܒ̣ ܡ̣ܢ ܟܹܐܦܹ̈ܐ ܛܵܒ̣ܵـ̈ــܬ̣ܵܐ.

¹³⁶(8) ܟܠܗܘܿܢ ܦܘܼܩܕܵܢܲܝ̈ܟ ܪܸܚܡܹ̇ܬ̣ ܘܟ̣ܠܵܗ̇ ܐܘܼܪܚܵܐ ܕܥܲܘܵܠܹ̈ܐ ܣܢܹ̇ܝܬ̣.

¹³⁷(1) ܪܲܘ̱ܪ̈ܒ̣ܵܢ ܐܸܢܹܝܢ ܣܵܗܕ̇ܘܵܬ̣ܵܟ݂ ܡܸܛܠ ܗܵܢܵܐ ܢܸܛܪܲܬ݀ ܐܸܢܹܝܢ ܢܲܦ̮ܫܝ.

¹³⁸(2) ܦܬܲܚ ܡܸܠܬ̣ܵܟ݂ ܘܐܲܢܗܲܪ ܘܣܲܟܸ̇ܠ ܠܫܲܒ̣ܪܹ̈ܐ.

¹³⁹(3) ܦܘܼܡܝ ܦܸܬ̣ܚܹ̇ܬ̣ ܘܣܵܩܹ̇ܬ̣ ܪܘܼܚܵܐ ܘܣܲܟ̇ܝܼܬ̣ ܠܦܘܼܪܩܵܢܵܟ݂.

¹⁴⁰(4) ܐܸܬ̣ܦܲܢ ܥܠܲܝ ܘܪܲܚܸܡܥܠܲܝ ܡܸܛܠ ܕܪܸܚܡܹ̇ܬ̣ ܫܡܵܟ݂.

¹⁴¹(5) ܐܲܬ̣ܩܸܢ ܗܲܠ̈ܟ̣ܵܬ̣ܝ ܒܲܫܒ̣ܝܼ̈ܠܲܝܟ ܘܠܵܐ ܢܸܫܬܲܠܲܛ ܒܝܼ ܥܲܘܵܠܵܐ.

¹⁴²(6) ܦܪܘܿܩܲܝܢܝ ܡ̣ܢ ܛܠܘܼܡܝܹܗ ܕܒܲܪܢܵܫܵܐ ܕܐܸܛܲܪ ܦܘܼܩܕܵܢܲܝ̈ܟ.

¹⁴³(7) ܐܲܢܗܲܪ ܐܲܦܲܝ̈ܟ ܥܲܠ ܥܲܒ̣ܕܵܟ݂ ܘܐܲܠܸܦܲܝܢܝ ܢܵܡܘܿܣܵܟ݂.

¹⁴⁴(8) ܬܲܦܹ̈ܐ ܕܡܲܝ̈ܵܐ ܐܸܬ̣ܵܘ ܡ̣ܢ ܥܲܝܢܲܝ̈ ܥܲܠ ܕܠܵܐ ܢ̣ܛܲܪܘ ܢܵܡܘܿܣܵܟ݂.

¹⁴⁵(1) ܙܲܕ̇ܝܼܩ ܐܲܢ̄ܬ̇ ܡܵܪܝܵܐ ܘܛܵܒ̣ ܬܪܝܼܨܝܼܢ ܕܝܼܢܲܝ̈ܟ.

¹⁴⁶(2) ܦܸܩ̇ܕܹ̇ܬ̣ ܣܵܗܕ̇ܘܼܬ̣ܵܟ݂ ܒܙܲܕ̇ܝܼܩܘܼܬ̣ܵܐ ܘܲܒ̣ܗܲܝܡܵܢܘܼܬ̣ܵܐ.

¹⁴⁷(3) ܫܲܢܩܲܢܝ ܚܣܵܡܵܐ ܒܟ̣ܠܙܒܲܢ ܡܸܛܠ ܕܲܛܥ̣ܵܘ ܡܸܠܬ̣ܵܟ݂ ܒܥܸܠܕ̇ܒ̣ܵܒܲܝ̈ܟ.

¹⁴⁸(4) ܓܲܒ̣ܝܵܐ ܗ̄ܝ̣ ܡܸܠܬ̣ܵܟ݂ ܛܵܒ̣ ܘܥܲܒ̣ܕܵܟ݂ ܪܲܚܡܵܗ̇.

¹⁴⁹(5) ܙܥܘܿܪ ܐ̄ܢܵܐ ܘܫܝܼܛ ܘܦܘܼܩܕܵܢܲܝ̈ܟ ܠܵܐ ܛܥܹ̇ܝܬ̣.

¹⁵⁰(6) ܙܲܕ̇ܝܼܩܘܼܬ̣ܵܟ݂ ܩܲܝܵܡܵܐ ܠܥܵܠܲܡ ܘܢܵܡܘܿܣܵܟ݂ ܒܲܫܪܵܪܵܐ.

¹⁵¹(7) ܐܘܼܠܨܵܢܵܐ ܘܥܵܩܬ̣ܵܐ ܡܲܛܝܘܼܢܝ ܘܲܒ̣ܦܘܼܩܕܵܢܲܝ̈ܟ ܪܢܹܝ݁ܬ̣.

¹⁵²(8) ܙܲܕ̇ܝܼܩܵܐ ܗ̄ܝ̣ ܣܵܗܕ̇ܘܼܬ̣ܵܟ݂ ܠܥܵܠܲܡ ܣܲܟܸ̇ܠܲܝܢܝ ܘܐܸܚܸܐ.

¹⁵³(1) ܩܪܹܝܬ̣ܵܟ݂ ܡ̣ܢ ܟܠܹܗ ܠܹܒ̇ܝ ܡܵܪܝܵܐ ܥܢܝܼܢܝ ܘܐܸܛܲܪ ܦܘܼܩܕܵܢܲܝ̈ܟ.

¹⁵⁴(2) ܩܪܹܝܬ̣ܵܟ݂ ܦܪܘܿܩܲܝܢܝ ܘܐܸܛܲܪ ܣܵܗܕ̇ܘܼܬ̣ܵܟ݂.

¹⁵⁵(3) ܩܲܕ̇ܡܹ̇ܬ̣ ܒܨܲܦܪܵܐ ܘܲܓ̣ܥܹ̇ܝܬ̣ ܘܣܲܟ̇ܝܼܬ̣ ܠܡܸܠܬ̣ܵܟ݂.

¹⁵⁶(4) ܩܲܕܸ̇ܡ ܥܲܝܢܲܝ̈ ܠܡܲܛܲܪܬܵܐ ܕܐܸܪܢܹܐ ܒܡܸܠܬ̣ܵܟ݂.

¹⁵⁷(5) ܫܡܲܥ ܩܵܠܝ ܡܵܪܝܵܐ ܐܲܝܟ݂ ܪ̈ܲܚܡܲܝܟ ܘܲܒ̣ܕ݂ܝܼܢܲܝ̈ܟ ܐܲܚܵܢܝ.

¹⁵⁸(6) ܩܪܸܒ̣ܘ ܪ̈ܵܕ݂ܘܿܦܲܝ ܕܥܲܘܠܵܐ ܘܡ̣ܢ ܢܵܡܘܿܣܵܟ݂ ܐܸܬ̣ܪܲܚܲܩܘ.

¹⁵⁹(7) ܩܲܪܝܼܒ̣ ܐܲܢ̄ܬ̇ ܡܵܪܝܵܐ ܘܟ̣ܠܗܘܿܢ ܦܘܼܩܕܵܢܲܝ̈ܟ ܒܩܘܼܫܬܵܐ.

¹⁶⁰(8) ܩܲܕܸ̇ܡ ܥܲܝܢܲܝ̈ ܠܡܲܛܲܪܬܵܐ ܕܐܸܪܢܸܐ ܒܡܸܠܬ̣ܵܟ݂.

¹⁶¹(9) ܡ̣ܢ ܩܕ݂ܝܼܡ ܝܸܕ݂ܥܹ̇ܬ̣ ܣܵܗܕ̇ܘܼܬ̣ܵܟ݂ ܡܸܛܠ ܕܡ̣ܢ ܥܵܠܲܡ ܬܲܩܸܢܬܵܗ̇.

¹⁶²(1) ܚܙܝܼ ܡܘܼܟܵܟ̣ܝ ܘܦܲܨܵܢܝ ܡܸܛܠ ܕܢܵܡܘܿܣܵܟ݂ ܠܵܐ ܛܥܹ̇ܝܬ̣.

¹⁶³(2) ܕܘܼܢ ܕܝܼܢܝ ܘܦܲܨܵܢܝ ܘܲܒ̣ܡܸܠܬ̣ܵܟ݂ ܐܲܚܵܢܝ.

¹⁶⁴(3) ܪܲܚܝܼܩܘܼ ܦܘܼܪܩܵܢܵܐ ܡ̣ܢ ܥܲܘܵܠܹ̈ܐ ܡܸܛܠ ܕܠܵܐ ܒܥܵܘ ܦܘܼܩܕܵܢܲܝ̈ܟ.

¹⁶⁵(4) ܣܲܓ̇ܝܼܐܝܼܢ ܐܸܢܘܿܢ ܪ̈ܲܚܡܲܝܟ ܡܵܪܝܵܐ ܘܲܒ̣ܕ݂ܝܼ̈ܢܲܝܟ ܐܲܚܵܢܝ.

¹⁶⁶(5) ܣܓ̣ܝܼܘ ܪ̈ܵܕ݂ܘܿܦܲܝ ܘܲܒ̣ܥܸܠܕ̇ܒ̣ܵܒܲܝ̈ ܘܡ̣ܢ ܣܵܗܕ̇ܘܼܬ̣ܵܟ݂ ܠܵܐ ܣܛܹ̇ܝܬ̣.

¹⁶⁷(6) ܚܙܹ̇ܝܬ̣ ܠܥܲܘܵܠܹ̈ܐ ܘܝܸܕ݂ܥܹ̇ܬ̣ ܕܡܹܐܡܪܵܟ݂ ܠܵܐ ܢܛ݂ܲܪܘ.

¹⁶⁸(7) ܚܙܝܼ ܕܪܸܚܡܹ̇ܬ̣ ܦܘܼܩܕܵܢܲܝ̈ܟ ܡܵܪܝܵܐ ܒܛܲܝܒ̇ܘܼܬ̣ܵܟ݂ ܐܲܚܵܢܝ.

¹⁶⁹(8) ܪܹܫ ܡܸܠܬ̣ܵܟ݂ ܩܘܼܫܬܵܐ ܘܲܠܥܵܠܲܡ ܟܠܗܘܿܢ ܕܝܼܢܹ̈ܐ ܕܙܲܕ̇ܝܼܩܘܼܬ̣ܵܟ݂.

¹⁷⁰(1) ܪܲܘ̱ܪ̈ܒ̣ܵܢܹܐ ܪܲܕ݂ܦܘܼܢܝ ܣܪܝܼܩܵܐܝܼܬ̣ ܘܡ̣ܢ ܡܸܠܬ̣ܵܟ݂ ܕܚܸܠ݂ ܠܹܒ̇ܝ.

¹⁷¹(2) ܚܕ݂ܝܼܬ̣ ܒܡܹܐܡܪܵܟ݂ ܐܲܝܟ݂ ܗܵܘ̇ ܕܐܸܫܟܲܚ ܒܸܙܬ̣ܵܐ ܣܲܓ̇ܝܼܐܬ̣ܵܐ.

¹⁷²(3) ܥܲܘܠܵܐ ܣܢܹ̇ܝܬ̣ ܘܐܲܣܠ̇ܝܼܬ̣ ܘܢܵܡܘܿܣܵܟ݂ ܪܸܚܡܹ̇ܬ̣.

¹⁷³(4) ܫܒܲܥ ܒܝܲܘܡܵܐ ܫܲܒܲܚܬܵܟ݂ ܥܲܠ ܕܝܼܢܲܝ̈ܟ ܙܲܕ̇ܝܼܩܵܐ.

¹⁷⁴(5) ܣܲܓ̇ܝܼ ܗ̄ܘ̣ ܫܠܵܡܵܐ ܕܐܲܝܠܹܝܢ ܕܪܵܚܡ݁ܝܼܢ ܢܵܡܘܿܣܵܟ݂ ܘܠܲܝܬ̇ ܠܗܘܿܢ ܟܪܝܼܗܘܼܬ̣ܵܐ.

¹⁷⁵(6) ܣܲܒ̇ܪܹܬ̣ ܠܦܘܼܪܩܵܢܵܟ݂ ܡܵܪܝܵܐ ܘܦܘܼܩܕܵܢܲܝ̈ܟ ܥܸܒ̣ܕܹ̇ܬ̣.

¹⁷⁶(7) ܢܸܛܪܲܬ݀ ܢܲܦ̮ܫܝ ܣܵܗܕ̇ܘܼܬ̣ܵܟ݂ ܘܲܪܚܸܡܬ̣ܵܗ̇ ܪܲܘܪ̱ܒ̣ܵܐܝܼܬ̣.

¹⁷⁷(8) ܢܸܛ̇ܪܹܬ̣ ܦܘܼܩܕܵܢܲܝ̈ܟ ܘܣܵܗ̈ܕ̇ܘܵܬ̣ܵܟ݂ ܘܟ̣ܠܗܹܝܢ ܐܘܼܪ̈ܚܵܬ̣ܝ ܠܩܘܼܒ̣ܠܵܟ݂.

¹⁷⁸(1) ܬܸܥܘܿܠ ܬܸܫܒ̇ܘܿܚܬ̇ܝ ܩܕ݂ܵܡܲܝܟ ܡܵܪܝܵܐ ܘܲܒ̣ܡܸܠܬ̣ܵܟ݂ ܐܲܚܵܢܝ.

¹⁷⁹(2) ܬܸܥܘܿܠ ܒܵܥܘܼܬ̣ܝ ܩܕ݂ܵܡܲܝܟ ܘܲܒ̣ܡܸܠܬ̣ܵܟ݂ ܦܲܨܵܢܝ.

¹⁸⁰(3) ܢܲܒܲܥ ܠܸܫܵܢܝ ܡܹܐܡܪܵܟ݂.

¹⁸¹(4) ܡܸܛܠ ܕܟ̣ܠܗܘܿܢ ܦܘܼܩܕܵܢܲܝ̈ܟ ܒܙܲܕ̇ܝܼܩܘܼܬ̣ܵܐ.

¹⁸²(5) ܢܡܲܠ̈ܠܵܢ ܣܸܦ̈ܘܵܬ̣ܝ ܬܸܫ̈ܒ̇ܚܵܬ̣ܵܟ݂ ܟܲܕ݂ ܬܲܠܸܦܲܝܢܝ ܦܘܼܩܕܵܢܲܝ̈ܟ.

¹⁸³(6) ܬܥܲܕ̇ܪܲܢܝ ܐܝܼܕ݂ܵܟ݂ ܡܸܛܠ ܕܲܨܒܹܝ݁ܬ̣ ܒܦܘܼܩܕܵܢܲܝ̈ܟ.

¹⁸⁴(7) ܣܲܟ̇ܝܲܬ݀ ܢܲܦ̮ܫܝ ܠܦܘܼܪܩܵܢܵܟ݂ ܘܲܒ̣ܢܵܡܘܿܣܵܟ݂ ܪܢܹܝ݁ܬ̣.

¹⁸⁵(8) ܬܸܚܸܐ ܢܲܦ̮ܫܝ ܘܲܬ̣ܫܲܒ̇ܚܵܟ݂ ܘܕ݂ܝܼܢܵܟ݂ ܗ̄ܘ̣ ܢܥܲܕ̇ܪܲܢܝ.

¹⁸⁶(9) ܐܸܬ̇ܛܥܝܼܬ̣ ܐܲܝܟ݂ ܢܸܩܝܵܐ ܐܲܒ̇ܝܼܕ̇ܬܵܐ ܒܥܝܼܘܗܝ ܠܥܲܒ̣ܕܵܟ݂.

¹⁸⁷(10) ܡܸܛܠ ܕܦܘܼܩܕܵܢܲܝ̈ܟ ܠܵܐ ܛܥܹ̇ܝܬ̣.