Read Aramaic Peshita Psalms 134 Bible Online

Psalms 134 - Aramaic Peshita bible

Psalms 134

¹ܫܲܒܲܚܘ ܠܲܫܡܹܗ ܕܡܵܪܝܵܐ.

²ܫܲܒܲܚܘ ܥܲܒ̣ܕܵܘ̈ܗܝ ܕܡܵܪܝܵܐ.

³ܐܲܝܠܹܝܢ ܕܩܵܝܡܝܼܢ ܒܒܲܝܬܹ̇ܗ ܕܡܵܪܝܵܐ.

⁴ܘܲܒ̣ܕ݂ܵܪܹ̈ܐ ܕܒܲܝܬܹ̇ܗ ܕܐܲܠܵܗܲܢ.

⁵ܫܲܒܲܚܘ ܠܡܵܪܝܵܐ ܡܸܛܠ ܕܛܵܒ̣ܘܼ.

⁶ܙܡܲܪܘ ܠܲܫܡܹܗ ܡܸܛܠ ܕܒܲܣܝܼܡ ܗ̄ܘ̣.

⁷ܡܸܛܠ ܕܲܠܝܲܥܩܘܿܒ̣ ܓܒ̣ܵܐ ܠܹܗ ܡܵܪܝܵܐ.

⁸ܘܠܝܼܣܪܵܝܹܠ ܠܟܸܢܫܹܗ.

⁹ܡܸܛܠ ܕܐܸܢܵܐ ܝܵܕܲܥ ܐ̄ܢܵܐ.

¹⁰ܕܪܲܒ̇ܘܼ ܡܵܪܝܵܐ ܡܵܪܲܢ ܡ̣ܢ ܟܠܗܘܿܢ ܐܲܠܵܗܹ̈ܐ.

¹¹ܘܟ̣ܠ ܕܨܵܒܹܐ ܡܵܪܝܵܐ ܥܵܒܸܕ݂.

¹²ܒܲܫܡܲܝܵܐ ܘܒܲܐܪܥܵܐ.

¹³ܒܝܲܡܡܹ̈ܐ ܘܲܒ̣ܟ̣ܠܗܘܿܢ ܬܗܘܿܡܹ̈ܐ.

¹⁴ܡܲܣܸܩ ܥܢܵܢܹ̈ܐ ܡ̣ܢ ܣܲܘ̈ܦܹܝܗ̇ ܕܐܲܪܥܵܐ.

¹⁵ܘܒܲܪ̈ܩܹܐ ܠܡܸܛܪܵܐ ܥܒܲܕ݂.

¹⁶ܡܲܦܸܩ ܪ̈ܘܼܚܹܐ ܡ̣ܢ ܐܲܘܨܪܹ̈ܐ.

¹⁷ܕܲܡܚ݂ܵܐ ܠܒ̣ܘܼܟ̣ܪܹ̈ܐ ܕܡܸܨܪܹܝܢ.

¹⁸ܡ̣ܢ ܒܢܲܝ̈ܢܵܫܵܐ ܘܲܥܕܲܡܵܐ ܠܲܒ̣ܥܝܼܪܵܐ.

¹⁹ܫܲܕܲܪ ܐܵܬ̣ܘܵܬܹ̈ܗ ܘܬܸܕ݂ܡ̱ܪ̈ܵܬܹܗ ܒܓ̣ܵܘܵܗ̇ ܕܡܸܨܪܹܝܢ.

²⁰ܥܲܠ ܦܸܪܥܘܿܢ ܘܥܲܠ ܟܠܗܘܿܢ ܥܲܒ̣ܕܵܘ̈ܗܝ.

²¹ܕܲܡܚ݂ܵܐ ܠܥܲܡܡܹ̈ܐ ܣܲܓ̇ܝܼ̈ܐܹܐ.

²²ܘܩܲܛܸܠ ܠܡܲܠ̈ܟܹ̇ܐ ܥܲܫܝܼܢܹ̈ܐ.

²³ܠܣܝܼܚܘܿܢ ܡܲܠܟܵܐ ܕܐܵܡܘܿܪ̈ܵܝܹܐ.

²⁴ܘܲܠܥܘܿܓ̣ ܡܲܠܟܵܐ ܕܒ̣ܵܝܫܵܢ.

²⁵ܘܲܠܟ̣ܠܗܹܝܢ ܡܲܠ̈ܟ̇ܘܵܬ̣ܵܐ ܕܲܟ̣ܢܲܥܲܢ.

²⁶ܘܝܲܗ̄ܒ̣ ܐܲܪܥ̱ܗܘܿܢ ܝܵܪܬ̇ܘܼܬ̣ܵܐ ܠܝܼܣܪܵܝܹܠ ܥܲܡܹܗ.

²⁷ܡܵܪܝܵܐ ܫܡܵܟ݂ ܠܥܵܠܲܡ ܡܵܪܝܵܐ ܕܘܼܟ̣ܪܵܢܵܟ݂ ܠܕ݂ܵܪܕܵܪ̈ܝܼܢ.

²⁸ܡܸܛܠ ܕܕ݂ܵܐܹ̇ܢ ܡܵܪܝܵܐ ܠܥܲܡܹܗ.

²⁹ܘܲܒ̣ܥܲܒ̣ܕܵܘ̈ܗܝ ܡܸܬ̣ܒܲܝܲܐ.

³⁰ܦܬܲܟ̣ܪܹ̈ܐ ܕܥܲܡܡܹ̈ܐ ܣܹܐܡܵܐ ܘܕܲܗܒ̣ܵܐ.

³¹ܥܒ̣ܵܕ݂ ܐܝܼ̈ܕܲܝܵܐ ܕܒܲܪܢܵܫܵܐ.

³²ܦܘܼܡܵܐ ܐܝܼܬ̣ ܠܗܘܿܢ ܘܠܵܐ ܡܡܲܠܠܝܼܢ.

³³ܥܲܝܢܹ̈ܐ ܐܝܼܬ̣ ܠܗܘܿܢ ܘܠܵܐ ܚܵܙܹ̇ܝܢ.

³⁴ܐܸܕ݂ܢܹ̈ܐ ܐܝܼܬ̣ ܠܗܘܿܢ ܘܠܵܐ ܫܵܡ̇ܥܝܼܢ.

³⁵ܘܠܲܝܬ̇ ܪܘܼܚܵܐ ܒܦܘܼܡܗܘܿܢ.

³⁶ܐܲܟ̣ܘܵܬ̣ܗܘܿܢ ܢܸܗܘܘܿܢ ܥܵܒ̣ܘܿܕܲܝ̈ܗܘܿܢ.

³⁷ܘܟ̣ܠ ܕܲܬ̣ܟ̣ܝܼܠܝܼܢ ܥܠܲܝܗܘܿܢ.

³⁸ܕܒܹܝܬ̣ ܝܑܼܣܪܵܝܹܠ ܒܲܪܸܟ̣ܘ ܠܡܵܪܝܵܐ.

³⁹ܕܒܹܝܬ̣ ܐܲܗܪܘܿܢ ܒܲܪܸܟ̣ܘ ܠܡܵܪܝܵܐ.

⁴⁰ܕܒܹܝܬ̣ ܠܹܘܝܼ ܒܲܪܸܟ̣ܘ ܠܡܵܪܝܵܐ.

⁴¹ܕܵܚܠܵܘ̈ܗܝ ܕܡܵܪܝܵܐ ܒܲܪܸܟ̣ܘ ܠܡܵܪܝܵܐ.

⁴²ܒܪܝܼܟ̣ܘܼ ܡܵܪܝܵܐ ܡ̣ܢ ܨܸܗܝܘܿܢ.

⁴³ܗܵܘ̇ ܕܥܵܡܲ݁ܪ ܒܐܘܿܪܸܫܠܸܡ.