Read Aramaic Peshita Psalms 138 Bible Online

Psalms 138 - Aramaic Peshita bible

Psalms 138

¹ܡܵܪܝܵܐ ܒܨܲܝܬܵܢܝ ܘܝܼܕܲܥܬܵܢܝ.

²ܐܲܢ̄ܬ̇ ܝܵܕܲܥ̇ ܐܲܢ̄ܬ̇ ܡܲܘܬܲܒ̣ܝ ܘܲܡܩܵܡܝ.

³ܐܸܣܬܲܟܲܠܬ̇ ܡܲܚܫ̈ܒ̣ܵܬ̣ܝ ܡ̣ܢ ܪܲܘܡܵܐ.

⁴ܐܘܼܪܚܝ ܘܲܫܒ̣ܝܼ̈ܠܲܝ ܝܵܕܲܥ̇ ܐܲܢ̄ܬ̇.

⁵ܘܟ̣ܠܗܹܝܢ ܐܘܼܪ̈ܚܵܬ̣ܝ ܥܲܩܸܒ̣ܬ̇.

⁶ܐܸܢ ܐܝܼܬ̣ ܫܘܼܚܠܵܦܵܐ ܒܠܸܫܵܢܝ ܐܲܢ̄ܬ̇ ܡܵܪܝܵܐ ܝܵܕܲܥ̇ ܐܲܢ̄ܬ̇.

⁷ܟܠܗܹܝܢ ܕܡ̣ܢ ܩܕ݂ܝܼܡ ܘܲܠܚܲܪܬ̣ܵܐ.

⁸ܓܒܲܠܬܵܢܝ ܘܣܵܡ݂ܬ̇ ܥܠܲܝ ܐܝܼܕ݂ܵܟ݂.

⁹ܡܹܢܝ ܗ݀ܘܵܬ̣ ܝܑܼܕܲܥܬ̣ܵܐ ܘܬܸܕ݂ܡܘܼܪܬܵܐ.

¹⁰ܐܸܬ̣ܚܲܝܠܹܬ̣ ܘܠܵܐ ܡܨܸܐ ܐ̄ܢܵܐ ܚܲܝܠܵܐ.

¹¹ܠܐܲܝܟܵܐ ܐܹܙܲܠ ܡ̣ܢ ܪܘܼܚܵܟ݂.

¹²ܘܐܲܝܟܵܐ ܐܸܛܫܸܐ ܡ̣ܢ ܩܕ݂ܵܡܲܝܟ.

¹³ܐܸܢ ܐܸܣܲܩ ܠܲܫܡܲܝܵܐ ܬܲܡܵܢ ܐܲܢ̄ܬ̇.

¹⁴ܘܐܸܢ ܐܸܚܘܿܬ̣ ܠܲܫܝܘܿܠ ܐܵܦ ܬܲܡܵܢ ܐܝܼܬܲܝܟ.

¹⁵ܘܐܸܢ ܐܲܪܝܼܡ ܟܸܢܦܲܝ̈ ܐܲܝܟ݂ ܕܢܸܫܪܵܐ.

¹⁶ܘܐܸܫܪܸܐ ܒܚܲܪܬܹܗ ܕܝܲܡܵܐ.

¹⁷ܐܵܦ ܬܲܡܵܢ ܐܝܼܕ݂ܵܟ݂ ܬܹܐܚܕܲܢܝ ܘܲܬ̇ܕܲܒܪܲܢܝ ܝܲܡܝܼܢܵܟ݂.

¹⁸ܐܸܡ݁ܪܹܬ̣ ܕܚܸܫܘܿܟ̣ܵܐ ܢܸܢܗܲܪ ܠܝܼ.

¹⁹ܘܠܸܠܝܵܐ ܢܲܢܗܲܪ ܒܐܲܦܲܝ̈.

²⁰ܘܚܸܫܘܿܟ̣ܵܐ ܠܵܐ ܢܸܚܫܲܟ݂ ܡܸܢܵܟ݂.

²¹ܘܠܸܠܝܵܐ ܐܲܝܟ݂ ܐܝܼܡܵܡܵܐ ܢܲܢܗܲܪ.

²²ܘܚܸܫܘܿܟ̣ܵܐ ܐܲܝܟ݂ ܢܲܗܝܼܪܵܐ.

²³. ܡܸܛܠ ܕܐܲܢ̄ܬ̇ ܬܲܩܸܢܬ̇ ܟܘܿܠ̈ܝܵܬ̣ܝ.

²⁴ܘܩܲܒܸ̇ܠܬܵܢܝ ܡ̣ܢ ܟܲܪܣܵܗ̇ ܕܐܹܡܝ.

²⁵ܐܲܘܕܸ̇ܐ ܠܵܟ݂ ܡܸܛܠ ܬܸܕ݂ܡܪ̈ܵܬ̣ܵܐ ܕܲܥܒܲܕ̇ܬ̇.

²⁶ܡܪܲܡܪ̱ܡܝܼܢ ܐܸܢܘܿܢ ܓܹܝܪ ܥܒ̣ܵܕܲܝ̈ܟ ܘܢܲܦ̮ܫܝ ܛܵܒ̣ ܝܵܕ݂ܥܵܐ݁.

²⁷ܘܠܵܐ ܟܣܹܝܢ ܓܲܪ̈ܡܲܝ ܡܸܢܵܟ݂ ܕܲܥܒܲܕ̇ܬ̇ ܒܣܸܬ̣ܪܵܐ.

²⁸ܢܸܚܬܹ̇ܬ̣ ܠܬܲܚ̈ܬܵܝܵܬ̣ܵܗ̇ ܕܐܲܪܥܵܐ ܘܦܘܼܪܥܵܢܝ ܚܙܲܝ̈ ܥܲܝܢܲܝ̈.

²⁹ܘܥܲܠ ܟܬ̣ܵܒܲܝ̈ܟ ܟܠܗܹܝܢ ܢܸܬ̣ܟܲܬܼ̈ܒܵܢ.

³⁰ܗܵܐ ܝܲܘ̈ܡܵܬ̣ܵܐ ܐܸܬ̣ܟܲܪܝܼܘ ܘܠܲܝܬ̇ ܒܗܘܿܢ ܐ̄ܢܵܫ.

³¹ܠܝܼ ܕܹܝܢ ܛܵܒ̣ ܝܑܩܲܪ݂ܘ ܪ̈ܲܚܡܲܝܟ ܐܲܠܵܗܵܐ ܘܛܵܒ̣ ܥܫܸܢ݂ܘ.

³²ܫܲܠܝܼܛܵܢܲܝ̈ܗܘܿܢ ܐܸܡܢܸܐ ܐܸܢܘܿܢ.

³³ܘܝܲܬ̇ܝܼܪ ܡ̣ܢ ܚܵܠܵܐ ܢܸܣܓ̇ܘܿܢ.

³⁴ܐܸܬ̇ܬ̇ܥܝܼܪܹܬ̣ ܘܬ̣ܘܼܒ̣ ܥܲܡܵܟ݂ ܐ̄ܢܵܐ.

³⁵ܐܸܢ ܬܸܩܛܘܿܠ ܐܲܠܵܗܵܐ ܠܚܲܛܵܝܹ̈ܐ.

³⁶ܘܓܲܒ̣ܪܹ̈ܐ ܕܲܕ݂ܡܵܐ ܢܸܥܒ̇ܪܘܼܢ ܡܹܢܝ.

³⁷ܡܸܛܠ ܕܡܲܠܠܘܼܟ݂ ܘܲܢܣ݂ܲܒ̣ܘ ܒܲܣܪܝܼܩܘܼܬ̣ܵܐ ܡܕ݂ܝܼܢ̄ܬܵܟ݂.

³⁸ܠܣܵܢܐܲܝ̈ܟ ܡܵܪܝܵܐ ܣܢܹ݁ܝܬ̣.

³⁹ܘܥܲܠ ܐܲܝܠܹܝܢ ܕܩܵܝܡ݁ܝܼܢ ܠܩܘܼܒ̣ܠܵܟ݂ ܐܸܬ̣ܚܲܡܬܹ̇ܬ̣.

⁴⁰ܘܣܸܢܐ̱ܬ̣ܵܐ ܡܫܲܡܠܲܝܬܵܐ ܣܢܹܝܬ̣ ܐܸܢܘܿܢ.

⁴¹ܘܲܗ݀ܘܵܘ ܠܝܼ ܒܥܸܠܕ̇ܒ̣ܵܒܹ̈ܐ.

⁴²ܒܨܝܼܢܝ ܐܲܠܵܗܵܐ ܘܕܲܥ ܠܹܒ̇ܝ.

⁴³ܘܲܒ̣ܚܘܿܪܲܝܢܝ ܘܕܲܥ ܗܲܠ̈ܟ̣ܵܬ̣ܝ.

⁴⁴ܘܲܚܙܝܼ ܐܸܢ ܐܝܼܬ̣ ܒܝܼ ܐܘܼܪܚܵܐ ܕܫܘܼܩܪܵܐ.

⁴⁵ܕܲܒܲܪܲܝܢܝ ܒܐܘܼܪܚܵܟ݂ ܕܲܠܥܵܠܲܡ.