Read Aramaic Peshita Psalms 142 Bible Online

Psalms 142 - Aramaic Peshita bible

Psalms 142

¹ܫܡܲܥ ܡܵܪܝܵܐ ܨܠܘܿܬ̣ܝ ܘܨܘܼܬ̣ ܠܒ̣ܵܥܘܼܬ̣ܝ.

²ܒܡܹܐܡܪܵܟ݂ ܥܢܝܼܢܝ ܘܲܒ̣ܙܲܕ̇ܝܼܩܘܼܬ̣ܵܟ݂.

³ܠܵܐ ܬܲܥܠܝܼܘܗܝ ܠܥܲܒ̣ܕܵܟ݂ ܒܕ݂ܝܼܢܵܐ.

⁴ܡܸܛܠ ܕܠܵܐ ܙܵܟܹ݁ܐ ܩܕ݂ܵܡܲܝܟ ܟܠ ܕܚܲܝ.

⁵ܡܸܛܠ ܕܲܪܕܲܦ ܒܥܸܠܕ̇ܒ̣ܵܒ̣ܵܐ ܠܢܲܦ̮ܫܝ.

⁶ܘܡܲܟܸ̇ܟ݂ ܚܲܝܲܝ̈ ܒܐܲܪܥܵܐ.

⁷ܐܲܘܬ̇ܒܲܢܝ ܒܚܸܫܘܿܟ̣ܵܐ ܐܲܝܟ݂ ܡܝܼܬ̣ܵܐ ܠܥܵܠܲܡ.

⁸ܐܸܬ̇ܛܲܪܦܲܬ݀ ܥܠܲܝ ܪܘܼܚܝ ܘܙܵܥ݂ ܠܹܒ̇ܝ ܒܓ̣ܵܘ.

⁹ܐܸܬ̇ܕ̇ܟܲܪܬܵܟ݂ ܡܵܪܝܵܐ ܡ̣ܢ ܩܕ݂ܝܼܡ.

¹⁰ܘܲܪܢܹܝ݁ܬ̣ ܒܟ̣ܠܗܘܿܢ ܥܒ̣ܵܕܲܝ̈ܟ.

¹¹ܪܢܹܝ݁ܬ̣ ܒܲܥܒ̣ܵܕ݂ ܐܝܼܕܲܝ̈ܟ ܘܦܸܫܛܹ̇ܬ̣ ܐܝܼ̈ܕܲܝ ܠܘܵܬ̣ܵܟ݂.

¹²ܢܲܦ̮ܫܝ ܨܲܗܝܵܐ ܗ̄ܝ̣ ܠܵܟ݂ ܐܲܝܟ݂ ܐܲܪܥܵܐ.

¹³ܥܢܝܼܢܝ ܒܲܥܓܲܠ ܡܵܪܝܵܐ ܡܸܛܠ ܕܓܸܡܪܲܬ݀ ܪܘܼܚܝ.

¹⁴ܠܵܐ ܬܲܗܦܸܟ݂ ܐܲܦܲܝ̈ܟ ܡܹܢܝ ܕܠܵܐ ܐܸܫܬ̇ܠܸܡ ܥܲܡ ܢܵܚܬܲܝ̈ ܓܘܼܒܵܐ.

¹⁵ܐܲܫܡܲܥܲܝܢܝ ܒܨܲܦܪܵܐ ܛܲܝܒ̇ܘܼܬ̣ܵܟ݂.

¹⁶ܡܸܛܠ ܕܲܥܠܲܝܟ ܗ̄ܘ̣ ܬܟ̣ܝܼܠ ܐ̄ܢܵܐ.

¹⁷ܚܲܘܵܢܝ ܐܘܼܪܚܵܟ݂ ܕܐܹܙܲܠ ܒܵܗ̇.

¹⁸ܡܸܛܠ ܕܲܠܘܵܬ̣ܵܟ݂ ܡܵܪܝܵܐ ܐܲܪܝܼܡܹܬ̣ ܢܲܦ̮ܫܝ.

¹⁹ܦܲܨܵܢܝ ܡ̣ܢ ܒܥܸܠܕ̇ܒ̣ܵܒܲܝ̈ ܘܐܲܠܸܦܲܝܢܝ ܠܡܸܥܒܲܕ݂ ܨܸܒ̣ܝܵܢܵܟ݂.

²⁰ܡܸܛܠ ܕܐܲܢ̄ܬ̇ܘܼ ܐܲܠܵܗܝ.

²¹ܪܘܼܚܵܟ݂ ܡܒܲܣܲܡܬܵܐ ܬܕܲܒ̇ܪܲܢܝ ܒܐܘܼܪܚܵܐ ܕܚܲܝܹ̈ܐ.

²²ܡܸܛܠ ܫܡܵܟ݂ ܡܵܪܝܵܐ ܒܲܝܲܐܲܝܢܝ.

²³ܘܡܸܛܠ ܙܲܕ̇ܝܼܩܘܼܬ̣ܵܟ݂ ܐܲܦܸܩ ܢܲܦ̮ܫܝ ܡ̣ܢ ܐܘܼܠܨܵܢܵܐ.

²⁴ܒܛܲܝܒ̇ܘܼܬ̣ܵܟ݂ ܫܲܬܸ̇ܩ ܠܣܵܢܐܲܝ̈.

²⁵ܘܐܲܘܒܸ̇ܕ݂ ܠܲܒ̣ܥܸܠܕ̇ܒ̣ܵܒܹܝ̈ܗ̇ ܕܢܲܦ̮ܫܝ. ܟܘ ܡܸܛܠ ܕܐܸܢܵܐ ܐ̄ܢܵܐ ܥܲܒ̣ܕܵܟ݂.