Read Aramaic Peshita Psalms 143 Bible Online

Psalms 143 - Aramaic Peshita bible

Psalms 143

¹ܒܪܝܼܟ̣ܘܼ ܡܵܪܝܵܐ ܕܐܲܠܸܦ ܐܝܼܕܲܝ̈ ܠܲܩܪܵܒ̣ܵܐ.

²ܘܨܼܒ̣̈ܥܵܬ̣ܝ ܠܲܩܪܵܒ̣ܵܐ.

³ܒܹܝܬ̣ ܓܲܘܣܝ ܘܲܡܦܲܨܝܵܢܝ.

⁴ܡܣܲܝܥܵܢܝ ܕܲܥܠܵܘܗܝ ܬܟ̣ܝܼܠ ܐ̄ܢܵܐ.

⁵ܘܫܲܥܒܸ̇ܕ ܠܥܲܡܡܹ̈ܐ ܬܚܘܿܬܲܝ.

⁶ܡܵܪܝܵܐ ܡܵܢܵܘ ܒܲܪܢܵܫܵܐ ܕܝܼܕܲܥܬܵܝܗܝ.

⁷ܘܒܲܪܢܵܫܵܐ ܕܲܚܫܲܒ̣ܬܵܝܗܝ.

⁸ܒܲܪܢܵܫܵܐ ܠܠܲܗܓܵܐ ܕܵܡܹ̇ܐ.

⁹ܘܝܲܘ̈ܡܵܬܹܗ ܥܵܒ̣ܪܝܼ݁ܢ ܐܲܝܟ݂ ܛܸܠܵܠܵܐ.

¹⁰ܐܲܪܟܸ̇ܢ ܫܡܲܝܵܐ ܡܵܪܝܵܐ ܘܚܘܿܬ̣.

¹¹ܘܲܟ̣ܐܝܼ ܒܛܘܼܪܹ̈ܐ ܘܢܸܬ̇ܢܘܼܢ.

¹²ܐܲܒ̣ܪܸܩ ܒܲܪ̈ܩܲܝܟ ܘܕܲܠܲܚ ܐܸܢܘܿܢ.

¹³ܫܲܕܲܪ ܓܹܐܪ̈ܲܝܟ ܘܒܲܕܲܪ ܐܸܢܘܿܢ.

¹⁴ܐܲܘܫܸܛ ܐܝܼܕ݂ܵܟ݂ ܡ̣ܢ ܡܪܲܘܡܵܐ.

¹⁵ܘܲܫܠܝܼܢܝ ܡ̣ܢ ܡܲܝ̈ܵܐ ܣܲܓ̇ܝܼ̈ܐܹܐ.

¹⁶ܘܡ̣ܢ ܐܝܼܕ݂ܵܐ ܕܥܲܘܵܠܹ̈ܐ.

¹⁷ܕܦܘܼܡܗܘܿܢ ܡܲܠܸܠ ܣܪܝܼܩܘܼܬ̣ܵܐ.

¹⁸ܘܝܲܡܝܼܢܗܘܿܢ ܝܲܡܝܼܢܵܐ ܗ̄ܝ̣ ܕܥܲܘܠܵܐ.

¹⁹ܐܲܠܵܗܵܐ ܬܸܫܒ̇ܘܿܚܬܵܐ ܚܕܲܬܵܐ ܐܹܫܲܒܲܚ ܠܵܟ݂.

²⁰ܘܲܒ̣ܟܸܢܵܪܵܐ ܕܲܥܣܲܪ ܡܸܢܝܼ̈ܢ ܐܹܙܲܡܲܪ ܠܵܟ݂.

²¹ܕܝܲܗ̄ܒ̣ܬ̇ ܦܘܼܪܩܵܢܵܐ ܠܡܲܠܟܵܐ.

²²ܘܦܲܨܝܼ ܠܕ݂ܵܘܝܼܕ݂ ܥܲܒ̣ܕܹ̇ܗ ܡ̣ܢ ܚܲܪܒܵܐ ܒܝܼܫܬܵܐ.

²³ܦܲܨܵܢܝ ܡ̣ܢ ܐܝܼܕ݂ܵܐ ܕܥܲܘܵܠܹ̈ܐ.

²⁴ܕܦܘܼܡܗܘܿܢ ܡܲܠܸܠ ܣܪܝܼܩܘܼܬ̣ܵܐ.

²⁵ܘܝܲܡܝܼܢܗܘܿܢ ܝܲܡܝܼܢܵܐ ܗ̄ܝ̣ ܕܥܲܘܠܵܐ.

²⁶ܒܢܲܝ̈ܗܘܿܢ ܐܲܝܟ݂ ܢܸܨܒ̇ܬ̣ܵܐ ܡܸܬ̣ܪܲܒܹ̇ܝܢ ܡ̣ܢ ܛܲܠܝܘܼܬ̣ܗܘܿܢ.

²⁷ܘܲܒ݂̈ܢܵܬ̣ܗܘܿܢ ܐܲܝܟ݂ ܟܲܠ̈ܠܵܬ̣ܵܐ ܕܲܡ̈ܨܲܒ̇ܬ̣ܵܢ ܒܲܕ݂ܡܘܼܬ̣ܵܐ ܕܗܲܝܟ̇ܠܹ̈ܐ.

²⁸ܬܵܘܵܢܲܝ̈ܗܘܿܢ ܡܠܹܝܢ ܘܡܸܬ̣ܐܲܫܕ̇ܝܼܢ ܚܲܕ݂ ܠܚܲܕ݂.

²⁹ܥܵܢ̈ܗܘܿܢ ܝܵܠ̈ܕܵܢ ܘܲܡܪ̈ܲܒ̇ܝܵܢ ܒܫܘܼܩܲܝ̈ܗܘܿܢ.

³⁰ܒܲܩܪ̈ܲܝܗܘܿܢ ܥܲܫܝܼ̈ܢܵܢ ܘܠܲܝܬ̇ ܒܗܹܝܢ ܕܥܲܩܪܵܐ.

³¹ܠܲܝܬ̇ ܬܘܼܪܥܬ̣ܵܐ ܐܵܦܠܵܐ ܝܑܼܠܲܠܬܵܐ ܒܫܘܼܩܲܝ̈ܗܘܢ.

³²ܛܘܼܒ̣ܵܘܗܝ ܠܥܲܡܵܐ ܕܗܵܟܲܢܵܐ ܐܝܼܬ̣ ܠܹܗ.

³³(ܠܵܐ ܐܸܠܵܐ) ܛܘܼܒ̣ܵܘܗܝ ܠܥܲܡܵܐ ܕܡܵܪܝܵܐ ܗ̄ܘ̣ ܐܲܠܵܗܹܗ.