Read Aramaic Peshita Psalms 16 Bible Online

Psalms 16 - Aramaic Peshita bible

Psalms 16

¹ܢܲܛܲܪܲܝܢܝ ܐܲܠܵܗܵܐ ܡܸܛܠ ܕܲܥܠܲܝܼܟ ܐܸܬ̇ܬܲܟ̣ܠܹܬ̣.

²ܐܸܡ̇ܪܹܬ̣ ܠܡܵܪܝܵܐ ܕܡܵܪܝ ܐܲܢ̄ܬ.

³ܘܛܵܒ̣ܬ̣ܝ ܡ̣ܢ ܠܘܵܬ̣ܵܟ݂ ܗ̄ܝ̣.

⁴ܘܐܵܦ ܠܩܲܕܝܼܫܹ̈ܐ ܕܒܲܐܪܥܵܐ ܘܲܡܫܲܒ̇ܚܹ̈ܐ.

⁵ܕܟ̣ܠܹܗ ܨܸܒ̣ܝܵܢܝ ܒܗܘܿܢ.

⁶ܢܸܣܓܘܿܢ ܟܹܐܒܲܝ̈ܗܘܿܢ ܐ̄ܚܪ̈ܵܝܹܐ ܒܲܥܓܲܠ.

⁷ܕܠܵܐ ܐܹܢܲܩܸܐ ܢܘܼܩܵܝܗܘܿܢ ܡ̣ܢ ܕܡܵܐ.

⁸ܘܠܵܐ ܐܸܬ̇ܕ̇ܟܲܪ ܫܡܵܗܲܝ̈ܗܘܿܢ ܒܣܸܦ̈ܘܵܬ̣ܝ.

⁹ܡܵܪܝܵܐ ܡܢܵܬ̣ܵܐ ܕܝܵܪܬܘܼܬ̣ܝ ܘܲܕ݂ܟ̣ܵܣܝ.

¹⁰ܐܲܢ̄ܬ̇ ܗ̄ܘ̣ ܡܦܲܢܸܐ ܠܝܼ ܝܵܪܬ̇ܘܼܬ̣ܝ.

¹¹ܚܲܒ̣ܠܹ̈ܐ ܢܦܲܠܘ ܠܝܼ ܒܛܲܪܩܹ̈ܐ.

¹²ܘܐܵܦ ܝܵܪܬܘܼܬ̣ܝ ܫܸܦܪܲܬ̤ ܠܝܼ.

¹³ܐܹܒܲܪܸܟ݂ ܠܡܵܪܝܵܐ ܕܡܲܠܟܲܢܝ.

¹⁴ܘܐܵܦ ܒܠܲܝ̈ܠܵܘܵܬ̣ܵܐ ܪ̈ܕܲܝܵܢܝ ܟܘܼܠܝܵܬ̣ܝ.

¹⁵ܣܵܡܹܬ̣ ܠܡܵܪܝܵܐ ܠܘܼܩܒܲܠܝ ܒܟ̣ܠܙܒܲܢ.

¹⁶ܘܲܗ̤ܘܵܐ ܡ̣ܢ ܝܲܡܝܼܢܝ ܕܠܵܐ ܐܹܙܘܼܥ.

¹⁷ܡܸܛܠ ܗܵܢܵܐ ܚܕ݂ܝܼ ܠܹܒܝ ܘܕ݂ܵܨ ܐܝܼܩܵܪܝ.

¹⁸ܘܐܵܦ ܒܸܣܪ̱ܝ ܢܸܫܪܸܐ ܒܫܸܠܝܵܐ.

¹⁹ܡܸܛܠ ܕܠܵܐ ܫܒܲܩܬ̇ ܠܢܲܦ̮ܫܝ ܒܲܫܝܘܿܠ.

²⁰ܘܠܵܐ ܝܲܗ̄ܒ̣ܬ̇ ܠܚܲܣܝܵܟ݂ ܕܢܸܚܙܸܐ ܚܒ̣ܵܠܵܐ.

²¹ܬܚܵܘܹܝܢܝ ܐܘܼܪܚܵܟ݂ ܕܚܲܝܹ̈ܐ.

²²ܘܐܸܣܒܲܥ ܡ̣ܢ ܚܲܕ݂ܘܼܬܹܗ ܕܦܲܪܨܘܿܦܵܟ݂.

²³ܘܡ̣ܢ ܒܲܣܝܼܡܘܼܬ̣ܵܐ ܕܙܵܟ̣ܘܼܬ̣ܵܐ ܕܝܲܡܝܼܢܵܟ݂.